Иттиҳоди Аврупо мегӯяд, барои кӯмак ба паноҳҷӯёни Афғонистон дар хоки Тоҷикистон 160 ҳазор евро кӯмаки башарӣ ихтисос медиҳад. Дар иттилоияи ин ниҳод аз рӯзи 14-уми сентябр гуфта мешавад, ки дар ҳудуди вилояти Хатлон ва Вилояти Мухтори Кӯҳистони Бадахшон, ки бо Афғонистон ҳаммарзанд, то 5 ҳазор фирориён аз Афғонистон паноҳ бурдаанд. Қаблан вазири умури дохилии Тоҷикистон гуфт, ки 80 хонавода аз Афғонистон бо фарзандони худ "аз тарсу ваҳми қасди кушторашон" мехоҳанд, ба кишвар ворид шаванд. Рамазон Раҳимзода рӯзи 1-уми сентябр гуфт, онҳо дар "минтақаи дахлнопазир"-и сарҳад ҳастанд. Минтақаҳои "ҳоил" ё "дахлнопазир" асосан дар сарҳади вилояти Хатлони Тоҷикистон бо вилоятҳои Тахор, Кундуз ва Балхи Афғонистон ҷойгиранд.

Эълони ИА дар бораи кӯмаки башарӣ ба паноҳҷӯён дар Тоҷикистон дар ҳоле садо медиҳад, ки Рамазон Раҳимзода дар ҳамон мулоқоташ бо Мулугета Зевди, роҳбари намояндагии Комиссари олии Созмони Милал оид ба паноҳандагон (UNHCR) аз набуди ёриҳои байналмилалӣ барои кӯмак ба фирориёни кишвари ҳамсоя дар давоми «20 соли гузашта» шикоят карда инро сабаби аслии дасткӯтаҳии ҳукумати Тоҷикистон дар ёрӣ ба ин қишри осебпазир номида буд. Ҳарчанд гуфтааст, ки дар ҳоли ҳозир ҷониби Тоҷикистон бо ҳадафи бунёди урдугоҳ барои паноҳандагони эҳтимолӣ аз Афғонистон, дар ноҳияҳои Ҷайҳун, Шаҳритус, Фархор, Шамсиддини Шоҳин ва вилояти Мухтори Кӯҳистони Бадахшон 70 гектар замин ҷудо кардааст.

Дар изҳороти ахири ИА аз рӯзи 14-уми сентябр омадааст, ки кӯмакҳои пулии ин ниҳод барои таъминоти ниёзи аввалия, аз ҷумла хӯрокворӣ, хайма ва ашёи рӯзгор, барои қонеъ гардонидани эҳтиёҷоти бештари фарориён дар ҳафт дидбонгоҳи сарҳадии Тоҷикистон равона мешавад. Ин маблағгузорӣ як қисми саҳми умумии Иттиҳоди Аврупо ба "Фонди ҳолатҳои фавқуллода" (DREF) мебошад, ки аз ҷониби Федератсияи Байналмилалии Салиби Сурх ва Ҳилоли Аҳмар (ФБСС) идора карда мешавад.

Дар изҳороти ИА бо такя ба UNHCR – Дафтари СММ дар умури паноҳандагон пешбинӣ шудааст, ки «то охири соли 2021 метавонад дар Тоҷикистон то 50 ҳазор гуреза сабти ном шавад». Тоҷикистон бо Афғонистон 1357 километр марзи муштарак дорад.

Бисту ҳашт кишвари ҷаҳон бо шумули Бритониё, Ҷопон бо нашри як баёнияи муштарак дар рӯзи душанбе гуфтанд, ки ба ҷанг дар Ғазза “бояд ҳамин ҳоло поён дода шавад”.

Дар баёнияи вазирони умури хориҷии 28 кишвар омадааст, “ранҷи мардуми ғайринизомии Ғазза ба сатҳи наве расидааст”. Онҳо ҳамчунин “қатли ғайринсонии мардуми осоишта, аз ҷумла кӯдаконеро, ки дар ҷустӯҷуи обу ғизо, ниёзҳои аввалияи инсонӣ ҳастанд” маҳкум кардаанд.

Дар баёния марги 800 нафареро, ки ба гуфтаи мақомоти тандурустии Ғазза ва Дафтари Ҳуқуқи Башари Созмони Милал ҳангоми талош барои гирифтани кӯмакҳои башарӣ ҷон додаанд, “ваҳшатангез” хонда, Исроилро барои маҳрум кардани мардуми осоишта аз кӯмакҳои ҳаётии башарӣ танқид кардаанд ва хостаанд, ӯҳдадориҳои байналмилалии худро иҷро кунад.

Вазорати умури хориҷии Исроил баёнияи танқидии 28 кишварро рад кард ва гуфт, ки он “аз воқеият канда шудааст ва паёми хатое ба Ҳамос мефиристад.” Ба гуфтаи вазорати умури хориҷии Исроил, ин Ҳамос аст, ки бо напазируфтани тарҳи пешниҳодии созиши оташбаси мувақаттӣ ва раҳо кардани гаравгонон, ҷангро дароз мекунад.

Ҷанг дар Ғазза дар моҳи октябри соли 2023 ва баъд аз он оғоз шуд, ки гуруҳи Ҳамос бо ҳамла ба ҷануби Исроил 1200 нафарро кушт ва 251 каси дигарро гаравгон гирифт. То кунун 50 гаравгони дигар дар Ғазза мондаанд ва бовар меравад, камтар аз нисфи онҳо зинда бошанд. Созмони Ҳамосро Амрико ва Иттиҳодияи Аврупо созмони террористӣ мешуморанд.

Бино ба омори тозаи Бонки Авруосиёии Рушд, интиқоли пул аз хориҷ ба Тоҷикистон дар се моҳи аввали имсол 66 дар сад афзуда ба 1.8 миллиард доллар расидааст. Дар як баёнияи кӯтоҳи ин бонк дар Телеграм омадааст, ки афзоиши пулҳои интиқолӣ, қимати баланди тиллои содиротӣ сабаби тақвияти қурби сомонӣ пули миллии Тоҷикистон шудааст.

Ба гуфтаи Бонки Авруосиёии Рушд, ки Русия аз бунёдгузорони асосии он аст, аз аввали имсол қурби сомонӣ дар баробари доллар 12.5 дар сад ва то аввали моҳи июл 3.3 дар сад боло рафтааст. Ба қавли бонки мазкур, афзоиши қурби сомонӣ сабаби коҳиши таваррум шудааст, ки моҳи июн ба 3.6 дар мерасид ва дар муқоиса бо моҳи май поинтар аст.

Иқтисоди Тоҷикистон ба пули муҳоҷирони корӣ сахт вобаста аст, ки солона ба кишвар садҳо миллион доллар мефиристанд ва беҳтар шудани зиндагии хонаводаҳои худ ва ҳамингуна пешрафти иқтисоди кишвар саҳм мегузоранд. Айни замон муҳоҷирати зиёд, сабаби норасоии мутахассисон дар Тоҷикистон, дурии хонаводаҳо аз ҳам, афзудани мушкилоти иҷтимоӣ ва дигар мушкилоти зиёд дар ҷомеа шудааст.

Мақомот дар Фархор мегӯянд, ки Мадина Ҳалимова аз сабаби "рашк", фарзандони худро ба дарё андохтааст. Ҳодиса ҳудуди 25 рӯз пеш рух дода буд.

Хуршед Раҳмонзода, муовини додситони ноҳияи Фархор, рӯзи 22 июл зимни нишасти хабарӣ гуфт, "омили ба дарё партофтанаш рашк будааст ва ҳоло худаш дар боздошт аст ва тафтишот идома дорад".

Додситон дар посух ба суоли хабарнигорон гуфт, ҳоло танҳо нисбати худи Мадина Ҳалимова парванда боз шудааст.

Мақомот дар бораи ин қазия бинобар идомаи тафтишот, маълумоти бештар намедиҳанд.

Шаби 29 ба 30-уми июн Мадина Ҳалимова, модари 27-солаи чаҳор тифли хурдсол, ки хурдӣ семоҳа ва бузургӣ 5-сола буд, чаҳор фарзанд ва худашро зоҳиран бо қасди худкушӣ ба рӯдхонаи Сурхоб андохт.

Чаҳор фарзандаш ғарқ шуда ҷон додаанд, вале худаш зинда монд. Ӯро бо иттиҳоми қатли кӯдаконаш боздошт карданд. Ҷасади се тифлашро пайдо кардаанд, ҷустӯҷуи яке дигар идома дорад.

Баъди фоҷиа ҳадсу гумон зиёд буд, шуд, ки Мадина Ҳалимова, гӯё аз рашк ба ҳамсар ва ба сабаби ҷанҷолҳои хонаводагӣ ба чунин кор даст задааст, вале хонаводаи Қудратулло Шарифов, ҳамсари Мадина Ҳалимова дар суҳбати катбӣ бо Радиои Озодӣ, фарзияи "баҳси хонаводагӣ ва доштани зани дуюм"-ро рад кард.

Онҳо гуфтанд, ки Мадина Ҳалимова мушкилоти равонӣ доштааст ва ӯро мунтазам барои "табобату дуохонӣ" мебурданд ва дар гузашта ҳам як бародараш даст ба худкушӣ зада будааст.

Ин ҳодиса дар ҷомеаи Тоҷикистон сару садоҳоеро ба миён овард.

Идораи Омбудсмен ва ё ваколатдори ҳуқуқи инсон дар Тоҷикистон аз марги ин чор кӯдаки хурдсол, ки модарашон онҳоро ба рӯдхона андохт, изҳори нигаронии амиқ кард ва аз ҷомеа ва мақомот хост, барои муҳофизати кӯдакон тадбирҳои бештар биандешанд.

Дар Тоҷикистон дар гузашта ҳам талоши худкушии модар ва бо худ ба рӯдхона андохтани фарзандонашон рух дода буд. Соли 2021 Шаҳло Шарифоваи 31-сола аз ноҳияи Панҷакент аввал се кӯдакаш -- Муҳаммадҷони 6-сола, Шаҳнозаи 4-сола ва Аминаи 8-моҳаро ба дор овехта кушт ва сипас худашро.

Соли 2016 Зӯҳро Маҳмуродоваи 25-сола аз Норак худ ва чаҳор фарзандашро ба дарёи Вахш андохт, ки дар натиҷа ҳама ба ҳалокат расиданд.

Дар ноҳияи Вахш ҳам як модари ҷавон ҳамроҳ бо се тифли хурдсолаш кӯшиши худкушӣ карда, боиси ҳалокати се кӯдакаш шуд.

Ба гуфтаи мақомот, сабаби аксари ин фоҷиаҳо хушунати хонаводагӣ будааст.

Дар шаш моҳи аввали соли 2025 дар мақомоти давлатии Тоҷикистон 4 ҳазору 102 коргар намерасад.

Дар ин бора Илёс Идрисзода, раиси Оҷонсии хизмати давлатии Тоҷикистон рӯзи 21-уми июл дар як нишасти хабарӣ баён дошт. Ӯ гуфт, "ба ҳисоби миёна, имрӯз ба ҳар як мансаби холӣ 0,6 довталаб рост меояд".

Идрисзода эътироф кард, ки ҳолатҳои дар як мансаб зиёд кор кардани бархе мансабдорон ҷой доранд, аммо таъкид кард, ки ин ба норасоии кадрӣ, вобаста аст.

Ба иттилои манбаъ, хидматчиёни давлатӣ бо озмун ба кор қабул шуда, бояд аз санадҳои меъёрӣ-ҳуқуқӣ огоҳ бошанд, забон донанд, бо компютер кор карда тавонанд ва таъриху фарҳанги миллиро хуб донанд.

Изҳороти раиси Оҷонсӣ дар ҳолест, ки солҳои ахир на танҳо корхонаҳои давлатӣ, балки бархе аз ширкату коргоҳҳои хусусӣ ҳам ба камбуди коргар рӯбарӯ ҳастанд. Аммо бо он, ки шумори бекорон дар кишвар зиёд аст, бархеи онҳо наметавонанд коргар пайдо кунанд.

Мақомот барои таъмини мардум бо шуғл, сари ҳар чанд вақт ярмаркаҳои ҷойҳои корӣ ташкил мекунанд. Аммо корҷӯён мегӯянд, ки ба далели кам будани маош, ба чунин ярмаркаҳо таваҷҷуҳи зиёд надоранд.

Дар шаҳри Душанбе бо қарори додгоҳ ду наврасро аз модарашон гирифта, онҳоро ба мактаб-интернат додаанд.

Раёсати корҳои дохилӣ дар шаҳри Душанбе бо нашри ин хабар гуфт, шаҳрванд Тағоева М., ки модари ду кӯдаки хурдсол аст, фарзандонашро ба талбандагию оворагардӣ маҷбур мекард ва аз ин ҳисоб манфиати пулӣ ҳам ба даст меовард.

Назари модари ноболиғон ба ҳарфҳои мақомот маълум нест.

Ин бори аввал нест, ки дар Душанбе фарзандонро аз модарашон гирифта, ба мактаб-интернати давлатӣ медиҳанд.

Моҳи июни имсол ду наврасро аз модарашон ҷудо карда, ба интернат доданд. Мақомот он вақт гуфта буданд, ду наврас аз сӯи модарашон, ки зиндагии носолим дошт, ҳамеша мавриди азияту озор қарор мегирифтанд.

Кодекси оилаи Тоҷикистон ба мақомот иҷозат медиҳад, ки дар сурати аз ӯҳдаи тарбияи фарзандон набаромадани волидайн, кӯдаконро аз онҳо гирифта, ба мактабҳои давлатӣ диҳанд. Дар ин ҳолат волидайн аз ҳаққи падару модарӣ пурра маҳрум карда намешаванд.

Сарҳадбонони Русия барои обуна шудан ба саҳифаи гуруҳҳои тундрав ва ҳам шабакаҳои тарафдори Украина, чандин шаҳрванди Тоҷикистон ва Узбекистонро ба Русия роҳ надодаанд. Дар ин бора хабаргузории ТАСС баъди омӯзиши чанд парванда гузориш додааст.

Ба қавли манбаъ, дар яке аз парвандаҳо омадааст, дар вақти тафтиши телефони шаҳрванди Тоҷикистон Дилшоди А. муайян шуд, ки ӯ ба саҳифаи яке аз гуруҳҳои мамнуъ дар Ютуб обуна шуда, инчунин наворҳои таблиғотии зидди Русияро тамошо кардааст. Ӯро барои ҳамин ба Русия роҳ надодаанд. Дар хабар гуфта нашудааст, ки шаҳрванди Тоҷикистон ба саҳифаи кадом гуруҳ обуна шудааст.

Айни кор бо як шаҳрванди Узбекистон сурат гирифтааст, ки ӯро ҳам барои тамошои наворҳои яке аз блогерони тундрав ба Русия роҳ надода ва аз ҳаққи вуруд ба кишвар маҳрум кардаанд. Номи ин блогер нашр нашудааст.

ТАСС менависад, чанд нафари дигар барои обуна шудан ба саҳифаҳои тарафдори Украина ва маҳкум кардани ҷанги Русия алайҳи Украина дар паёмакҳо, аз сарҳади Русия бозгардонда шудаанд.

Ба гузориши ин хабаргузорӣ, дар ним соли ахир дастикам 20 шаҳрванди Тоҷикистон ва Узбекистон аз қарори сарҳадбонон дар бораи манъи вурудашон ба Русия шикоят кардаанд. Аммо ба гузориши ТАСС, додгоҳ ҳамаи ин даъворо рад ва қарори марзбониро дуруст ҳисобидааст. Тафтиши муҳоҷирони тоҷик ба Русия баъди ҳамлаи террористӣ ба толори консертии "Крокус" дар моҳи марти соли 2024 зиёд шуд.

Илёс Идрисзода, раиси Оҷонсии хизмати давлатии Тоҷикистон мегӯяд, мақомдорони давлатӣ беҳтар аст баъди ба нафақа баромадан ҳаҷ кунанд. Изҳори назари Идрисзода 21-уми июл дар нишасти хабарӣ садо дод.

Раиси Оҷонсӣ гуфт, қонунгузорӣ барои рафтани хизматчиёни давлатӣ барои адои маносики ҳаҷ маҳдудияте пешбинӣ накардааст, вале ба назари шахсии ӯ, мансабдорон баъди ба нафақа баромадан ин корро анҷом диҳанд хубтар аст.

"Хизматчии давлатӣ бояд вазифаи худашро иҷро кунад, ин фикри шахсии ман аст. Вақте дар мақомоти давлатӣ кор кардӣ, дар хизмати давлатӣ кор кардӣ бояд содиқона, сидқану шаффоф ба давлату миллат хизмат кунӣ. Баъд аз он, ки ба нафақа баромаданд, аз хизмати давлатӣ озод шуданд, марҳамат рафтанд гиранд,"-афзуд Илёс Идрисзода.

Ин посух дар ҳоле садо медиҳад, ки миёни кормандони идораҳои давлатӣ чунин нигаронӣ вуҷуд дорад, ки бо рафтан ба ҳаҷ, эҳтимоли аз кор озод шуданашон ҷой дорад. Роҳбари Оҷонсии хизмати давлатӣ гуфт, дар ин мавзуъ аз хизматчиёни давлатӣ ягон шикоят нагирифтаанд.

Чанд тан аз аъзои ҳукумати Тоҷикистон борҳо дар ҷараёни сафарҳои Эмомалӣ Раҳмон ба Арабистони Саудӣ, ҳамроҳи раиси ҷумҳур ҳаҷҷи умраро адо кардаанд.

Мақомдорони тоҷик, аз ҷумла раиси ҷумҳурӣ аз сокинон даъват мекунанд, ки пули сафари ҳаҷ, аз ҷумла ҳаҷҷи такрориро "ба корҳои хайр" ба мисли сохтани пулу мактаб ва роҳу иншооти дигар сарф кунанд. Мухолифон ҳукуматро танқид мекунанд, ки бо истифода аз нерӯву пули мардум мушкилоти иҷтимоиро ҳал карданист.

Ҳар сол беш аз шаш ҳазор сокини Тоҷикистон барои адои ҳаҷҷи фарзӣ мераванд.

Оҷонсии зидди фасоди Тоҷикистон аз боздошти як корманди Раёсати кофтукоби ҷиноятии Вазорати корҳои дохилӣ хабар додааст.

Ба иттилои ин ниҳод, Наимов Д.М. "қасдан ва бо мақсади ба даст овардани фоидаи муфт дар асоси маслиҳати пешакӣ бо якчанд шарикони ҷиноятпешаи худ" аз наздикони ду боздоштшуда 305 ҳазор сомонӣ гирифтаанд.

Оҷонсии зидди фасод мегӯяд, Наимов ва шариконаш наздикони ду нафарро бо он тарсондаанд, ки нисбати хешовандонашон бо иттиҳоми хариду фурӯши маводи мухаддир парванда мекушоянд. Ҳол он ки ба иттилои Оҷонсӣ, корманди Раёсати кофтукоби ҷиноӣ медонист, ки нисбати шаҳрвандон М.А. ва Ф.Р. ягон маводи санҷишӣ дар даст надоранд.

Оҷонсии зидди фасод гуфтааст, нисбати Наимов ва дигарон бо иттиҳоми қаллобӣ дар ҳаҷми калон ва баромадан аз ҳадди ваколати хизматӣ парванда кушодаанд. Аммо мақомот дар бораи дигар боздоштшудагон маълумот надодаанд. Парвандаи ин афрод ба додгоҳ ирсол шудааст.

Фасод яке аз мушкилиҳои асосӣ дар Тоҷикистон гуфта мешавад.

Тоҷикистон минбаъд аз нуриҳои минералӣ, химиявӣ ва азотие, ки аз Узбекистон оварда мешаванд, боҷи воридотӣ меситонад.

Ин нукта дар як санади дуҷониба миёни Тоҷикистон ва Узбекистон зикр шудааст. Радиои Озодӣ 21-уми июл бо муҳтавои ин созишнома ошно шуд.

Дар ин санад гуфта нашудааст, ки гирифтани боҷ аз нуриҳои минералии Узбекистон аз кай оғоз мешавад ва ҳаҷми он чӣ қадар хоҳад буд?

Бар асоси ин санад, минбаъд Узбекистон ҳам аз сементи Тоҷикистон боҷи гумрукӣ меситонад. Аммо ҳаҷми боҷи таъинкардаи Узбекистон барои сементи Тоҷикистон ҳам эълон нашудааст.

Хабаргузории "Азия-Плюс", моҳи ноябри соли 2024 хабар дода буд, агар то аввали моҳи ноябр гумруки Узбекистон аз ҳар тонна сементи Тоҷикистон 35 доллар боҷ мегирифт, пас ҳоло аз ҳар тонна 300 доллар талаб дорад.

Хабари ҷорӣ шудани боҷ барои нуриҳои минералии воридшуда аз Узбекистон барои деҳқонони тоҷикистонӣ метавонад хабари нохуш бошад. Чун як қисми асосии нуриҳои минералӣ мавриди ниёзи Тоҷикистон аз Узбекистон оварда мешуд. Тибқи оморҳои расмӣ, Тоҷикистон солона аз Узбекистон то 100 ҳазор тона нуриҳои минералӣ ворид мекунад.

Мақомоти Тоҷикистон ва Узбекистон ҳанӯз шарҳ надодаанд, ки сабаби ҷорӣ кардани боҷ барои нуриҳои минералӣ ва семент чист? Пештар расонаҳо гузориш доданд, ки зиёд кардани боҷи гумрукӣ барои сементи Тоҷикистон, эҳтимол бо машварати корхонаҳои истеҳсоли сементи Узбекистон анҷом шудааст. Тоҷикистон яке аз интиқолдиҳандагони асосии семент ба Узбекистон ба ҳисоб меравад.

Владимир Путин, раиси ҷумҳури Русия моҳи октябри имсол бо сафари давлатӣ ба Тоҷикистон меояд. Ин маълумот дар барномаи кории ҳукумати Тоҷикистон барои нимаи дуюми соли 2025 нашр шудааст. Радиои Озодӣ 20-уми июл бо ин санад шинос шуд.

Ҷузъиёти бештари сафари Путин ба Душанбе маълум нест. Мақомоти Тоҷикистону Русия дар бораи ин сафар расман чизе нагуфтаанд.

Дар барномаи кории ҳукумати Тоҷикистон омадааст, дар моҳи октябр дар Душанбе нишасти Шӯрои сарони кишварҳои ИДМ ва вохӯрии роҳбарони кишварҳои Осиёи Марказӣ+Русия баргузор мешаванд. Зоҳиран яке аз ҳадафҳои сафари Путин ба Душанбе ширкат дар ин ҳамоишҳост.

Владимир Путин бори охир соли 2022 ба Тоҷикистон сафар карда буд. Ин аввалин сафари Путин баъди ҳамлаи Русия ба Украина буд. Дар ҷараёни он ягон санад имзо нашудаааст. Бар пояи таҳримҳои байнулмилал президенти Русия танҳо ба чанд кишвари ҷаҳон сафар карда метавонад. Додгоҳи байнулмилал дастури боздошти ӯро барои ҷиноятҳои ҷангӣ ва зиддибашарӣ дар Украина содир намудааст.

Ба гуфтаи шоҳидон ва масъулони бемористон, неруҳои Исроил рӯзи 19-уми июл бори дигар ба сӯи гуруҳе аз фаластиниҳо, ки барои дарёфти ғизо мерафтанд, оташ кушодаанд. Ба гузориши расонаҳои хабарӣ, дар пайи ин ҳодиса беш аз 30 нафар кушта шудаанд.

Хабаргузории "Ассошиэйтед пресс" хабар дод, ки тирандозӣ дар наздикии маркази "Бунёди башардӯстонаи Ғазза" (GHF) рух дод.

Ин бунёд моҳи феврали имсол бо пешниҳоди Амрико ва Исроил ба кор оғоз кард. Ҳадаф аз ташкили онҳ, тағйир додани низоми тақсими ёриҳои башардӯстона дар Ғазза аст. Пештар Исроил иддао карда буд, гуруҳи "Ҳамос" кумакҳои башардӯстонаро ба нафъи худ истифода мебарад. Амрико ва Иттиҳоди Аврупо "Ҳамос"-ро гуруҳи террористӣ медонанд.

Созмони Милал аз фаъолияти "Бунёди башардӯстонаи Ғазза" сахт интиқод карда гуфтааст, ин бунёд дар кораш усули башардӯстонаро риоят намекунад. Аммо бунёд чунин танқидҳоро рад карда гуфтааст, то кунун миллионҳо бастаи ғизоро байни мардуми гуруснаи Ғазза тақсим кардааст.

Хабаргузории "Ассошиэйтед пресс" гузориш додааст, ки артиши Исроил дар макони тақсими кумакҳо ҳузур надорад, танҳо аз дур амниятро барқарор мекунад.

Ин бори аввал нест, ки сокинони Навори Ғазза дар вақти навбатпойӣ барои гирифтани ғизо кушта мешаванд. Ҳафти гузашта низ 20 нафар дар яке аз марказҳои тақсими ғизои "Бунёди башардӯстонаи Ғазза" кушта шудаанд.

Рӯзи 13-уми июл бар асари бархӯрди мушаки артиши Исроил ба нуқтаи тақсими об дар урдугоҳи гурезаҳои Нусейрат дар Ғазза, дастикам 8 нафар кушта ва 17 нафар захмӣ шуда буд.

Артиши Исроил гуфт, ки мушак ба сӯи як ҷангҷӯи гуруҳи "Ҷиҳоди исломӣ" партоб шуда буд, аммо "ба далели корношоямӣ" мушак чанд метр дуртар афтид.

Кумитаи ҳолатҳои фавқулодаи Тоҷикистон хабар додааст, ки як занро аз ғарқшавӣ наҷот додаанд.

Ориф Нозимиён, сухангӯи Кумита дар хабарномае навиштааст, Абдурасулова Б. сокини 28-солаи ноҳияи Хуросон ва модари 5 фарзанд, шоми 19-уми июл худро аз болои пул ба дарёи Вахш партофт. Сабаби даст ба ин кор задани зан маълум нест.

Сухангӯи Кумитаи ҳолатҳои фавқулода мегӯяд, наҷотдиҳандагон занро 500-600 метр поёнтар аз ҷойи партофташуда зинда аз об бароварданд. Занро дар Бемористони ноҳияи Кушониён бистарӣ кардаанд ва аҳволи ӯ хуб гуфта мешавад.

Мақомот нагуфтаанд, ки ин зан барои чӣ худро ба дарё партофт.

Ин бори аввал нест, ки занону духтарон дар Тоҷикистон қасди ҷонашон мекунанд.

Намунаи ахираш, фоҷиа дар ноҳияи Фархор мебошад, ки шаби 29 ба 30-юми июн рух дод. Ба гуфтаи мақомот, дар ин шаб Мадина Ҳалимоваи 27-сола худро бо чор фарзанди ноболиғаш ба об партофт. Худи Мадина аз об зинда берун омад, аммо кӯдаконаш ғарқ шуданд. Ҷасади се кӯдаки Мадина Ҳалимоваро аз об ёфтаанд. Додситонӣ ин занро боздошт карда, аз рӯи моддаи "куштор" нисбаташ парванда кушодаанд.

Украина ба Русия пешниҳод кардааст, ки ҳафтаи оянда бо ҳам музокира кунанд. Дар ин бора президенти Украина Владимир Зеленский хабар дод.

Ба гуфтаи Зеленский, пешниҳоди Киевро Рустам Умаров, котиби Шӯрои амният ба Русия расонд. Аммо Зеленский мушаххас нагуфт, ки Умаров кай ва дар куҷо бо намояндагони Русия вохӯрда, пешниҳоди музокира додааст.

Намояндагони Русия ва Украина то ин вақт ду маротиба дар шаҳри Истанбули Туркия гуфтугӯ кардаанд. Музокираи ахир моҳи июни имсол баргузор шуда буд. Натиҷаи ин ду даври музокирот табодули асирон ва ҷасади низомиёни кушташуда буд. Русия то ҳол ба пешниҳодҳо дар бораи оташбас мувофиқат накардааст.

Ба гуфтаи Владимир Зеленский, барои расидан ба оташбас, бояд гуфтугӯҳо бештар шаванд.

Хабаргузориҳои русии ТАСС ва "Интерфакс" аз қавли манобеашон гузориш додаанд, ки воқеан Маскав дар бораи гузарондани музокирот дар ҳафтаи оянда, аз Киев пешниҳод гирифтааст.

Доналд Трамп, раиси ҷумҳури Амрико пештар ба Русия ҳушдор дод, ки агар давоми 50 рӯз бо Украина ба тавофуқ нарасанд, алайҳи Маскав ва шарикони тиҷоратиаш таърифаҳои вазнин ҷорӣ мекунад.

Мақомоти тоҷик ба таври расмӣ ихроҷи муҳоҷирони афғонро аз Тоҷикистон тасдиқ карданд ва сабабҳои онро шарҳ доданд. Дар рӯзҳои ахир мавзӯи ихроҷи муҳоҷирони афғонистонӣ аз Тоҷикистон, дар расонаҳо сару садоеро ба миён оварда буд.

Маркази матбуоти Нерӯҳои марзбонии Кумитаи давлатии амнияти миллии Тоҷикистон рӯзи 19 июл бо нашри як изҳорот, ки хабаргузории давлатии "Ховар" онро нашр кард, гуфт, муҳоҷирати шаҳрвандони хориҷӣ ба Тоҷикистон афзоиш ёфтааст ва бархе аз онҳо "ғайриқонунӣ" вориди кишвар шудааанд ва шуморе аз онҳо "низоми муқарраргаштаи будубошро дағалона вайрон мекунанд".

Ба гуфтаи манбаъ, санҷишҳо маълум кардаанд, ки "ин афрод дар ташвиқу тарғиби ақидаҳои ҳаракатҳои экстремистӣ, пешниҳоди маълумот ва ҳуҷҷатҳои қалбакӣ барои соҳиб шудан ба мақоми гурезагӣ, вайрон кардани талаботи низоми муҳоҷират, доштани шаҳрвандии кишвари севум, истифода кардани қаламрави Тоҷикистон ҳамчун кишвари транзитӣ ва муомилаи ғайриқонунини маводи мухаддир", даст доштаанд.

Аммо Нерӯҳои марзбонӣ ҳеч далел ё омореро дар ин бора зикр накардааст.

Мақомоти тоҷик мегӯянд, ки берун кардани шумори муайяни шаҳрвандони Афғонистон аз қаламрави Тоҷикистон, дар ҳамин чорчӯба сурат мегирад.

Дар изҳороти мақомоти тоҷик гуфта нашудааст, ки чӣ миқдор аз паноҳандагони афғонистониро тайи рӯзҳои ахир ба кишварашон баргардондаанд.

Тасдиқ ва таъйиди гуфтаҳои мақомоти тоҷик аз манбаъҳои мустақил ғайри имкон аст.

Ҳафтаи гузашта чанд расонаи маҳаллии Афғонистон бо истинод ба манбаъҳои худ хабар доданд, ки гӯё мақомоти Тоҷикистон ба муҳоҷирони афғонистонӣ 15 рӯз муҳлат додаанд, то кишварро тарк кунанд.

Давоми ҳафтаи ҷорӣ дар расонаҳо наворҳое нашр шуд, ки эҳтимолан ба таври маҷбурӣ ба микроавтобусҳо бор кардани паноҳҷӯёни афғонистонии муқими Тоҷикистонро нишон медод.

Рӯзи 17 июл шуморе аз муҳоҷирони афғон дар шаҳри Ваҳдат ба Радиои Озодӣ гуфтанд, ки "се автобуси навъи "Газел" омада даҳҳо нафар, аз ҷумла занону кӯдакон ва мардонро" бурданд.

Ҳамсояҳои тоҷики онҳо ҳам тасдиқ карданд, ки шоҳиди бурда шудани шуморе аз муҳоҷирон буданд ва баъди ин бисёре аз паноҳҷӯёни дигар талош мекунанд дар хона ва ё ҷойҳои амни дигар паноҳ ёбанд ва берун набароянд, чун аз боздошту баргаштан ба Афғонистон ҳарос доранд.

Ин муҳоҷирони афғон мегӯянд, ки бо виза ва ба таври қонунӣ вориди қаламрави Тоҷикистон шудаанд ва дар ниҳодҳои кор бо паноҳандагон сабти ном ҳастанд.

Дар гузашта Комиссариати олии Созмони Милали Муттаҳид дар умури паноҳандагон борҳо аз мақомоти Тоҷикистон хоста буд, ки паноҳҷӯёни афғонистониро ихроҷ накунанд, зеро эҳтимол дорад дар кишварашон бо озору азият рӯбарӯ шаванд.

Бино ба иттилои расмӣ, дар Тоҷикистон 9 ҳазор шаҳрванди Афғонистон зиндагӣ мекунанд. Аксари онҳо мегӯянд, ки аз тарси "Толибон" ба Тоҷикистон фирор кардаанд.

Оҷонси авиатсияи мулкии Тоҷикистон аз оғози парвозҳои мустақими ширкати "Centrum Air" дар хатсайри Тошканд-Душанбе-Тошканд, хабар дод.

Ба иттилои ин ниҳод, аввалин парвози ҳавопаймои ин ширкат миёни пойтахтҳои Тоҷикистон ва Узбекистон рӯзи 19 июл сурат гирифт.

Дар ин хатсайр ширкатии тоҷикистонии "Сомон Эйр" ва "Uzbekistan Airways"-и Узбекистон ҳам парвозҳо анҷом медиҳанд.

Роҳандозии парвозҳои нав дар хатсайри Тошканд-Душанбе дар ҳоле аст, ки моҳи гузашта ҳукумати Тоҷикистон дар бахши ҳавонавардӣ сиёсати "Осмони боз"-ро эълон кард. Қарори ҳукумат 12-уми июн тасвиб шуд.

Бар асоси тартиби нав, Тоҷикистон низоми паритет ё баробарӣ дар парвозҳоро бекор мекунад. Қаблан парвозҳо ба Тоҷикистон ё аз инҷо ба дигар кишварҳо, миёни ширкатҳои ҳавопаймоии Тоҷикистон ва ширкатҳои давлати дигар баробар тақсим мешуд.

Бар асоси қарори ҳукумат, инчунин бисёр маҳдудиятҳо барои ширкатҳои ҳавопаймоии хориҷӣ бекор карда мешавад. Аз ҷумла, ҳамаи маҳдудиятҳо дар зичии парвозҳо ва ё шумораи ҷойҳои нишаст, шумораи таъинот дар хатсайр, маҳдудиятҳои тарифӣ барои интиқоли байналмилалии ҳавоӣ ва маҳдудиятҳо барои шумораи ширкатҳои ҳавопаймоӣ аз байн бурда мешаванд.

"Осмони боз" як таҷрубаи байналмилалӣ аст, ки назорати давлатро бар таъйини хатсайрҳо, нархи билети парвоз ва бисёр маҳдудиятҳо аз байн мебарад.

Масъалаи ҷорӣ кардани низоми "Осмони боз" дар Тоҷикистон ҳанӯз соли 2018 дар як ҷаласаи шӯрои машваратии беҳтар кардани фазои сармоягузорӣ бо ҳузури раисҷумҳур Эмомалӣ Раҳмон садо дода буд. Он замон президент ба Оҷонси ҳавонавардӣ супориш дода буд, ки барои амалӣ кардани ин сиёсат ва бештар кардани хатсайрҳои ҳавоӣ чораҳои зарурӣ андешад.

Бархе коршиносон қаблан ба Радиои Озодӣ гуфта буданд, инҳисорталабон ё монополистони бозори ҳавоӣ дар кишвар иҷозаи пурра амалӣ шудани низоми "Осмони боз"-ро шояд надиҳанд.