Пайвандҳои дастрасӣ

Хабари нав

Дар чанд ҷумла

Қарзи "Барқи тоҷик" дар назди нерӯгоҳи "Сангтӯда-1" ба 1,1 млрд сомонӣ расидааст

Неругоҳи "Сангтӯда-1"
Неругоҳи "Сангтӯда-1"

Қарзи ширкати "Барқи тоҷик" дар назди нерӯгоҳи "Сангтӯда -1" дар ним соли ҷорӣ 279 миллион сомонӣ бештар шудааст. Маъмурияти нерӯгоҳи "Сангтӯда-1" рӯзи 27-уми июл бо нашри як изҳорот гуфт, ширкати "Барқи тоҷик" ҳамагӣ 33 дарсади пули барқи тавлидкардаи ин нерӯгоҳро пардохт мекунад. Аз ин рӯ, қарзи ширкати "Барқи тоҷик" дар назди нерӯгоҳи "Сангтӯда-1" дар ним соли равон боз ҳам 297 миллион сомонӣ афзоиш ёфта, дар маҷмӯъ ба 1 миллиарду 89 миллион сомонӣ расидааст.

Тавре аз ҷадвали нашркардаи маъмурият бармеояд, нерӯгоҳи “Сангтӯда-1” бо камтар аз нисф ва ё 42,2 дарсади иқтидораш кор мекунад. Нисфи зиёде аз тавоноии ин нерӯгоҳ истифода намешавад, дар ҳоле, ки сокинони Тоҷикистон аз камбуди нерӯи барқ ҳатто дар тобистон ранҷ мебаранд. Ҳафтае қабл сокинони ноҳияҳои Суғди Тоҷикистон қатъ шудани интиқоли нерӯи барқ ба хонаҳояшон шикоят карда буданд.

Сохтмони нерӯгоҳи “Сангтӯда-1” соли 2006 бо сармоягузории Русия оғоз ёфта, соли 2009 ба анҷом расид. Қудрати нерӯгоҳ 670 мегават дар як солро ташкил медиҳад. Айни замон тақрибан 75 дарсади саҳмияҳои нерӯгоҳи "Сангтӯда-1" дар дасти ширкатҳои давлатии Русия -- "Росатом" ва "Интер РАО ЕЭС" ва 25 дарсади дигар дар ихтиёри Тоҷикистон қарор дорад.

Ҳамаи хабарҳои имрӯзро дар инҷо бихонед

Мақомот мегӯянд, сармоягузории хориҷӣ дар Тоҷикистон бисёр зиёд шудааст

Сармояи зиёди хориҷӣ аз ҷумла барои истихроҷи маъдан ба Тоҷикистон ворид шудааст.
Сармояи зиёди хориҷӣ аз ҷумла барои истихроҷи маъдан ба Тоҷикистон ворид шудааст.

Мақомоти расмии Тоҷикистон мегӯянд, соли гузашта ба кишвар тақрибан 5 миллиард доллар сармояи хориҷӣ ворид шудааст, ки ҳаҷми бисёр бузург аст.

Раҳбарони кумитаи давлатии сармоягузорӣ рӯзи 11-уми сентябр дар нишасти хабарие дар Душанбе гуфтаанд, ки сармоягузории хориҷӣ дар муқоиса ба соли 2023 бештар аз 72 дар сад зиёд шудааст. Ду сол пеш ба иқтисоди Тоҷикистон аз хориҷ бештар аз 2 миллиард доллар сармоя ворид шудааст. Дар ин бора хабаргузории давлатии "Ховар" гузориш додааст.

Дар ин миён сармояҳои мустақими хориҷӣ асосан аз Чин бештар аз 150 миллион доллар, аз Амрико тақрибан 119 миллион доллар ва сипас аз Бритониёву Русияву Қазоқистон ва кишварҳои дигар будааст. Пули хориҷӣ ба Тоҷикистон бештар барои коркарди ашё, истихроҷ, бонкдориву тиҷорату сохтмон ворид шудааст.

Тоҷикистон пайваста барои фазои номуносиби сармоягузорӣ, бахусус тамаъҷӯӣ аз ширкатҳову ришвахорӣ ва молиёти зиёд танқид мешавад ва мақомоти Кумитаи сармоягузорӣ гуфтаанд, ки аз авлавиятҳои корашон имсол беҳтар кардани фазо ва ҷалби сармояи бештари хориҷӣ будааст.

Сафири Саудӣ: "Ҳангоми Ҷоми Ҷаҳонии Футбол ҳам истеъмоли шароб манъ аст"

Зиндагии шабона дар Арабистони Саудӣ, ки нӯшидани ҳаргуна нӯшокии спиртӣ дар он манъ аст.
Зиндагии шабона дар Арабистони Саудӣ, ки нӯшидани ҳаргуна нӯшокии спиртӣ дар он манъ аст.

Холид Бандар ал-Сауд, сафири Арабистони Саудӣ дар Бритониё гуфтааст, ҳангоми баргузории Ҷоми ҷаҳонии футбол дар соли 2034 дар кишвараш мухлисон иҷозаи нӯшидани шароб ва ё ҳар нӯшокии спиртии дигарро нахоҳанд дошт.

Онҳое, ки ба дидани яке аз мусобиқоти сертамошобини дунё мераванд, иҷоза надоранд, дар ҳеч куҷо, аз ҷумла меҳмонхонаву ресторан ва майдонҳои футбол машруботро бинӯшанд. Баръакси Қатар, ки ба сайёҳон иҷоза медиҳад, дар ҷойҳои махсус машрубот бинӯшанд, Арабистони Саудӣ кишварест, ки истеъмоли машруботро комилан манъ кардааст.

Холид Бандар ал-Сауд гуфтааст: “Айни замон мо нӯшидани машруботро иҷоза намедиҳем, чун бе машрубот ҳам шодиву хурсандӣ кардан ҳам мумкин аст.”

Моҳи декабри соли гузашта Арабистони Саудиро бо як қарори баҳсбарангез мизбони Ҷоми Ҷаҳонии Футбол дар соли 2034 интихоб карданд, чун нигарониҳо аз риояти ҳуқуқи инсон дар ин кишвари муҳофизакор зиёд аст.

Дар Чин ақди никоҳ ба ҳадде кам шудааст, ки...

Маҳдудиятҳои пешин сабаб шудааст, ки теъдоди аҳолии ҷавон ва синни издивоҷ кам шавад.
Маҳдудиятҳои пешин сабаб шудааст, ки теъдоди аҳолии ҷавон ва синни издивоҷ кам шавад.

Теъдоди ҷуфтҳое, ки дар Чин соли гузашта ақди никоҳи расмӣ бастаанд, дар муқоиса ба соли 2023 бист дар сад камтар шудааст, ки поинтарин сатҳ аз замони сабти алоҳидаи ин омор дар кишвар будааст.

Дар ин бора нашрияи “Гордиан” бо такя ба омори идораҳои расмии Ҷумҳурии Мардумии Чин хабар додааст. Соли 2023 дар Чин 7 миллиону 700 ҳазор ақди никоҳи расмӣ бастаанд, вале ин рақам соли гузашта то 6.1 миллион поин омадааст.

Аз соли 1986 то кунун чунин омори поин сабт нашуда будааст. Айни замон соли гузашта 2.6 миллион ҷуфт барои ҷудо шудан ариза додаанд, ки 1.1 дар сад бештар аз соли 2023 аст. Ҷумҳурии Мардумии Чин дуввумин кишвари сераҳолии ҷаҳон аст.

Даҳсолаҳо боз мақомот бо сиёсати сахтгиронае намегузоштанд, ки оилаҳо на бештар аз як фарзанд дошта бошанд ва маҳдудиятҳо сабаби он шудааст, ки мардуми камтаре ба синни издивоҷ расидаанд ва ё ба издивоҷ майл надоранд.

Гузашта аз ин аҳолии Чин пир мешавад, ки ба ояндаи иқтисоди кишвар хатари зиёд дорад. Бо вуҷуди тағйири сиёсат ва ташвиқи мардум ба издивоҷу соҳиби фарзанд шудан, ҷавонони Чин солҳои ахир камтар издивоҷ мекунанд, чун зиндагӣ қимат мешавад ва кор ҳам кам аст.

Вазир гуфт, бозгардонидани тоҷикон аз Сурияву Ироқ масъалаи муҳим аст

Зани тоҷик дар додгоҳи Ироқ. Акс аз бойгонист.
Зани тоҷик дар додгоҳи Ироқ. Акс аз бойгонист.

Сироҷиддин Муҳриддин, вазири умури хориҷии Тоҷикистон гуфт, бозгардонидани шаҳрвандони кишвар аз гӯшаҳои ҷангзадаи ҷаҳон ва ҳамоиши онҳо ба зиндагии оддӣ як масъалаи муҳим барои ҳукумат ба ҳисоб меравад.

Ӯ рӯзи 11-уми феврал дар нишасти хабарие дар Душанбе гуфт, то кунун 381 шаҳрванди Тоҷикистонро аз Сурияву Ироқ ба кишвар баргардондаанд ва дар вақти мусоид ба ин кор идома медиҳанд.

Сироҷиддини Муҳриддин гуфт: “Мо ният дорем, тамоми он шаҳрвандони худро, ки хоҳиши бозгашт доранд, аз урдӯгоҳҳо ба ватан баргардонем. Баъди онки вазъ дар минтақа ором шавад, комиссияи ҳукуматӣ корро сари ин масъала аз нав оғоз мекунад.”

Баъди зуҳури ДОИШ ва ишғоли қаламравҳои васеи Ироқу Сурия аз тарафи ҷангҷӯёни он садҳо ҷавони тоҷик ба сафи ин гурӯҳи террористӣ пайваста ва зану фарзандони худро ҳам бо худ ба онҷо бурданд. Теъдоди зиёде аз он ҷангҷӯён куштаву беному нишон шудаанд ва қисмате аз зану фарзандони онҳо ҳанӯз дар урдӯгоҳҳои Сурияву Ироқ мондаанд.

Соли гузашта дар Тоҷикистон одамкушӣ зиёд шудааст

Қатлҳои занҷираӣ дар Конибодом зоҳиран сабаби афзоиши омори қатл дар Тоҷикистон шудааст.
Қатлҳои занҷираӣ дар Конибодом зоҳиран сабаби афзоиши омори қатл дар Тоҷикистон шудааст.

Мақомоти интизомии Тоҷикистон гуфтанд, қатлу куштор, яке аз ҷиноятҳои мудҳиш дар кишвар соли 2024 ба таври чашмгир афзоиш ёфтааст.

Дар баёнияи расмӣ, ки вазорати корҳои дохилӣ, ки рӯзи 13-уми феврал нашр кард, омадааст, соли гузашта дар Тоҷикистон 75 мавриди одамкушӣ ва қасди одамкушӣ сабт шудааст, ки дар муқоиса ба соли 2023-ум 18 маврид бештар аст. Соли 2023 дар Тоҷикистон 57 нафарро куштаанд ва ё ба ҷонашон сӯиқасд кардаанд. Соли 2022 дар кишвар 58 мавриди қатл ва сӯиқасд ба ҷони инсон сабт шудааст.

Дар баёнияи вазорати корҳои дохилӣ дар бораи сабабҳои афзоиши якбораи ин ҷинояти сангин чизе нагуфтаанд, аммо зоҳиран қатлҳои пайваста дар шаҳри Конибодом дар соли 2024 сабаби зиёд шудани омори нохушоянд барои ҷомеа ва ҳам дардисарсоз барои мақомоти интизомии Тоҷикистон шудааст. Дар ин сол 23 узви 7 хонаводаро дар Конибодом бераҳмона куштанд ва то кунун таҳқиқи ин ҷиноятҳо идома дорад.

Русия аз Чехия хост, ки Фаридаро истирдод кунад

Фарида Қурбонгалеева
Фарида Қурбонгалеева

Муфаттишон дар шаҳри Қазони Русия ба хонаи волидони Фарида Қурбонгалеева, хабарнигори мустақили муқими Чехия рафтаанд. Русия аз Чехия талаб дорад, ки ӯро ба Маскав истирдод кунанд.

Қурбонгалеева рӯзи 13-уми феврал дар саҳифааш дар Фейсбук навишт, ки муфаттишон ба волидонаш дар бораи ӯ саволҳо доданд.

“Мухтасар гӯям, - навишт Фарида, - аз падару модарам пурсиданд, ки чӣ гуна ман ҷинояткори сатҳи олӣ шудаам”. Аз ин пеш ӯ навишт, ки ходимони пулиси Чехия ба дасти ӯ номае супурданд, ки дар он талаби истирдоди ӯ аз Прага ба Маскав карда шудааст.

Қарор аст ин талабро Додгоҳи шаҳри Прага дар ҷаласа муҳокима намояд. Қурбонгалеева гуфт, ки як вакили дифоъ розӣ шуд, аз ҳуқуқи ӯ ройгон дифоъ кунад.

Фарида Қурбонгалееваро моҳи июни соли 2024 додгоҳе дар Русия дар ғайбаш барои нашри хабарҳои “дурӯғин” дар бораи артиш ва даъват ба терроризм ба ҳабс гирифт. Аз ин пеш исми ӯро ба феҳристи “агентҳои хориҷӣ” ва “террористу ифротгароҳо” ворид карданд.

Фарида Қурбонгалеева зодаи шаҳри Қазони Тотористон аст. Баъди солҳо кораш дар телевизиони давлатии Тотористон, дар шабакаи давлатии “Россия-1” барандаи барномаҳои хабарию иттилоотии “Вести” буд.

Баъди ишғоли Қрим аз ҷониби Русия дар соли 2014 Қурбонгалеева ихтиёран кор дар телевизиони давлатиро тарк карда ба Прага кӯчид ва солҳои 2018-2021 дар телевизиони "Настоящее время" чун барандаи барномаҳои хабарӣ кор кард.

Муовини Трамп аз эҳтимоли тадбирҳои нави фишор ба Русия гуфт

 Муовини президенти ИМА Ҷей Ди Венс
Муовини президенти ИМА Ҷей Ди Венс

Ҷей Ди Венс, муовини президенти ИМА гуфт, агар президенти Русия Владимир Путин барои созиши сулҳ ва замонатҳои давомдор барои Украина розӣ нашавад, Вашингтон метавонад зидди Маскав таҳрим ҷорӣ карда иқдоми низомие ба кор барад.

Нашрияи The Wall Street Journal бо такя ба мусоҳибаи ихтисосии Венс рӯзи 14 феврал навишт, “василаҳои иқтисодӣ ва ҳам, бешубҳа, василаҳои ҳарбии таъсиргузор ҳам ҳаст, ки аз он ИМА метавонад зидди Путин истифода кунад”.

Ӯ таъкид намуд, ки Вашингтон дар ҳақи истиқлолият ва соҳибихтиёрии Украина андеша мекунад. Айни замон, Венс гуфт, дар робита бо Украина имкони дастёбӣ ба созише ҳам вуҷуд дорад, ки ба гуфтаи ӯ, “бисёриҳоро дар ҳайрат хоҳад гузошт”.

Инчунин муовини президенти Амрико ишора кард, ки Доналд Трамп вобаста ба шеваи музокирот метавонад тарзи бархӯрдашро дигар кунад. Қарор аст рӯзи ҷумъа, 14-уми феврал Ҷей Ди Венс дар Мюнҳен бо президенти Украина Владимир Зеленский дидор ва гуфтугӯ кунад.

Рӯзи 12 феврал Трамп гуфт, ки бо президентони Русия ва Украина телефонӣ суҳбат кард ва ба зердастонаш дастур дод, ки барои шурӯи музокирот ба хотири хатми ҷанг дар Украина омода шаванд.

Даҳҳо мансабдор бо гумони дуздии 120 млн сомонии сарбозони тоҷик ҷавобгар шудаанд

Бинои Вазорати дифоъи Тоҷикистон
Бинои Вазорати дифоъи Тоҷикистон

Оҷонсии мубориза бо фасод дар Тоҷикистон парвандаи 78 нафар мансабдорро барои тасарруфи беш аз 120 миллион сомонии Вазорати дифои кишвар ба додгоҳ фиристодааст.

Пештар ин ниҳод гуфта буд, ки барои ин ҷиноят 52 масъули Вазорати дифоъ ва дигар идораҳои муҳими давлатӣ боздошт шуда, тафтиши қисме аз парвандаҳо идома дорад. Оҷонсӣ дар бораи шахсияти боздоштшудаҳо чизе нагуфт. Мавқеи онҳо ё вакилони мудофеяшон низ ба иттиҳомот маълум нест.

Сулаймон Султонзода, раиси Оҷонсии мубориз бо фасод рӯзи 14-уми феврал дар нишасти хабарӣ гуфт, “аз зарари расонидашуда тахминан 107,8 миллион сомонияш ба буҷети давлат барқарор карда шуд, вобаста ба 14,8 миллион сомонӣ барои барқарар кардани зарар аризаи даъвоӣ ба судҳо пешниҳод гардид.”

“Дар инҷо 43 нафар аз ҳисоби кормандони Вазорати мудофиа, 3 нафар аз Кумитаи давлатии амнияти миллӣ, 2 нафар аз Вазорати молия боз аз дигар вазорату сохторҳои дигар ҳам дар ҳамин парвандаи ҷиноятӣ ҳамиштирок буданд,”--афзуд ӯ.

Оҷонсии мубориза бо фасод хабари дуздиву аз худ кардани даҳҳо миллион сомонӣ аз Вазорати дифоъро моҳи феврали соли гузшта тасдиқ карда буд.

Пулеро, ки бояд барои либосу хӯроку нигоҳубини сарбозон ва барои муҳофизати амнияти кишвар сарф мешуд, ба гуфтаи мақомот, бо мусоидати чанде аз масъулон тасарруф шудааст. Дилрабо Самадова, мудири созмони "Дафтари озодиҳои шаҳрвандӣ" қаблан ба Радиои Озодӣ гуфта буд, ки чунин амал ба вазъу шароити қисмҳои ҳарбӣ таъсири манфӣ гузошта, дар ниҳоят ҷабри онро сарбозон мекашанд.

Созмони Шаффофияти Байнулмилал (Transparency International ) дар гузориши як соли пешаш гуфта буд, ки фасод дар Тоҷикистон расм шудааст. Ин созмон, ки меъёри фасод дар кишварҳои ҷаҳонро баҳогузорӣ мекунад, Тоҷикистонро як кишвари фасодзадатарини дунё номидааст.

Додгоҳи олӣ парвандаи ҳамла ба муфтиро шарҳ дод

Додгоҳи олии Тоҷикистон ҳукми се муттаҳам барои ҳамла ба муфтии кишварро шарҳ дод.

Рустам Мирзозода, раиси Додгоҳи олӣ 13-уми феврал дар нишасти хабарӣ гуфт, Муҳаммадрофеъ Иззатуллозода, фарде, ки ба раиси Шӯрои уламо ҳамла кард, ба 26 сол зиндон маҳкум шудааст.

Додгоҳ ин ҷавонро дар терроризм, тайёрӣ ва ба ҷиноят ва одамкушӣ гунаҳкор кардааст. Назари Иззатуллозода ва наздиконаш ба иттиҳом маълум нест.

Рӯшан нест, ки онҳо аз болои қарори додгоҳ ба зинаи болоӣ шикоят мебаранд ё не. Гуфта мешавад, ҷавони ҳамлагар 21-сола ва сокини шаҳри Норак аст.

Ба гуфтаи раиси Додгоҳи олӣ, Муҳаммадҷон Шодихонов, гумонбари дигар бо иттиҳомҳои терроризм ва шарикӣ дар ҷиноят ба 13 сол зиндон маҳкум шудааст.

Раиси Додгоҳи олӣ афзуд, Шодихонов ҳарчанд дар тарҳрезии ҳамла ба Сайидмукаррам Абдулқодирзода даст дошт, аммо дар лаҳзаи ҳамла ба муфтӣ дар ҷойи ҳодиса набуд.

Дар Додгоҳи олӣ гуфтанд, гумонбари севвум Қиёмиддин Файзуллоев барои хабар надодан дар бораи ин ҷиноят, 2 сол аз озодӣ маҳрум шудааст.

Рӯзи 11-уми сентябри соли гузашта дар дохили Масҷиди марказии шаҳри Душанбе ва дар байни намозгузорон ба муфтии Тоҷикистон бо корд дарафтода, пешонии ӯро захмӣ карда буд.

Вазорати корҳои дохилии Тоҷикистон он замон ҳодисаро “авбошӣ” номид, вале баъдан худи муфтӣ онро кори дасти “гурӯҳҳои ифротӣ” хонд.

Ин ҳодиса вокунишҳои зиёдро дар шабакаҳои иҷтимоӣ ба миён овард.

Ҳамла ба Абдулқодирзода замоне рух дод, ки шарҳу паёмҳои ситезаҷӯёнаи зидди ӯ, махсусан пас аз ҳимояташ аз фишори мақомот ба ҳиҷоби исломӣ, ба авҷ расида буд.

Абдулқодирзода 61 сол дорад ва 14 соли охир раиси Шӯрои уламои Маркази исломӣ, ягона ниҳоди содиркунандаи фатво дар Тоҷикистон, аст.

Ӯ дар тӯли кораш дар ин мақом, ки зоҳиран ҷамъиятӣ, вале зери назорату итоати дастгоҳҳои давлатист, борҳо аз минбари масҷид алайҳи гурӯҳҳои ифротӣ сухан ва ба ҳимоят аз ҳукумати Эмомалӣ Раҳмон даъват кардааст.

Мухолифон ӯ ва ниҳоди зери раҳбарияшро барои сукут дар баробари мушкили диндорон, аз ҷумла ташкили масҷидҳову пӯшиши мазҳабӣ ва гузоштани ришу аз минбарҳо дур кардани рӯҳониёни шинохта танқид карда, баъзе аз гурӯҳҳои ифротгаро ба воситаи интернет ба ӯ таҳдид намуда буданд.

Кумитаи андоз номи қарздорони калонро эълон кард

Нусратулло Давлатзода, раиси Кумитаи андози Тоҷикистон.
Нусратулло Давлатзода, раиси Кумитаи андози Тоҷикистон.

Кумитаи андози Тоҷикистон рӯйхати калонтарин қарздорҳо аз молиётро эълон кард.

Нусратулло Давлатзода, раиси ин ниҳод 13-уми феврал дар ҳузури хабарнигорон гуфт, аз ҳама зиёд Шабакаҳои тақсимоти барқ аз молиёт қарздор аст ва вомаш ба 177 миллион сомонӣ расидааст. Баъд аз Шабакаҳои тақсимоти барқ, калонтарин қарздорҳо аз андоз ин корхонаҳо будаанд:

Корхонаҳои зертобеи Оҷонсии беҳдошти замин 81 миллион сомонӣ,

Корхонаҳои зертобеи Идораи манзилию комунналӣ 32,6 миллион сомонӣ,

Неругоҳи "Сангтӯда-1" 26 миллион сомонӣ,

Кони Яғноб 11 миллион сомонӣ,

ҶСП “Алюминсохтмон” 9,9 миллион сомонӣ.

Раиси Кумитаи андоз мегӯяд, ин корхонаҳо дар умум аз молиёт қариб 400 миллион сомонӣ қарздор ҳастанд. Ин маблағ 52 дарсади маблағи умумии бақияи қарзи андозро ташкил медиҳад.

“Ин соҳаҳо мушкилоти худро доранд, мо корбарӣ мекунем,”-афзуд раиси Кумитаи андоз.

Ба ҷуз “Сангтӯда-1”, ки моли Русия аст, дигар қарздорони калон аз молиёт, корхонаҳои давлатӣ ҳастанд.

Шеваи идоракунии корхонаҳои давлатӣ ва бо зарар кор кардану қарздор шудани онҳо, пештар танқидҳоеро ба миён оварда буд.

Боздошти як паноҳҷӯи афғон бо гумони захмӣ кардани 28 кас дар Мюнхен

Мюнхен, 13-уми феврали 2025
Мюнхен, 13-уми феврали 2025

Пулиси Олмон гуфт, бар асари ҳамлаи як мошин ба издиҳоми мардум дар шаҳри Мюнхен камаш 28 тан, аз ҷумла кӯдакон, захмӣ шудаанд.

Ҳодиса рӯзи 13-уми феврал рух дод.

Гумонзад як паноҳҷӯйи 24-солаи афғонистонӣ будааст.

Хабаргузории "Ассошиэйтед Пресс" навишт, ки ӯ боздошт шудааст ва таҳқиқи ҳодиса идома дорад.

Ин ҳамла дар ҳоле сурат гирифт, ки рӯзи 14-уми феврал "Нишасти амниятии Мюнхен" баргузор хоҳад шуд.

Дар нишаст намояндагони чанд кишвар, аз ҷумла Ҷей Ди Вэнс, муовини раисҷумҳури Амрико ва Владимир Зеленский, президенти Украина, ширкат хоҳанд кард.

Кушта шудани 1455 тоҷикистонӣ дар ҷанги се кишвар

Сурия
Сурия

Вазири корҳои дохилии Тоҷикистон гуфт, ки дар ҷанги Ироқ, Сурия ва Афғонистон 1455 шаҳрванди кишвар кушта шудаанд.

Рамазон Раҳимзода ин оморро рӯзи 13-уми феврал дар нишасти матбуотӣ эълон кард.

Вай гуфт, дар умум, 2566 зодаи Тоҷикистон дар ҷангҳои Ховари Миёна ва Афғонистон ширкат кардаанд, вале соли дақиқеро ба забон наовард.

Ҳузури шаҳрвандони Тоҷикистон дар ҷанги Ироқу Сурия аз замони зуҳури ДОИШ ё гурӯҳи террористии “Давлати исломӣ” дар соли 2014 сар шудааст.

Тоҷикистон дар панҷ соли охир наздик ба чорсад зану кӯдаки ҷангҷӯёнро аз Сурияву Ироқ ба ватан баргардонд ва ҳанӯз ҳам теъдоди дигаре дар паноҳгоҳи “Ал Ҳавл”-и Сурия мондаанд.

Кушта шудани 1455 тоҷикистонӣ дар ҷанги се кишвар
лутфан мунтазир бошед

Феълан кор намекунад

0:00 0:02:10 0:00

Вазири тоҷик аз баёнияҳои муҳоҷирситезона дар Русия изҳори нигаронӣ кард

Сироҷиддин Муҳриддин ва Сергей Лавров
Сироҷиддин Муҳриддин ва Сергей Лавров

Вазири корҳои хориҷии Тоҷикистон гуфт, баёнияҳои муҳоҷирситезонаи теъдоде аз вакилон ва сиёсатмадорони рус мояи нигаронӣ аст ва боиси изтироб дар ҷомеаи Тоҷикистон мешавад.

Сироҷиддин Муҳриддин рӯзи 13-уми феврал дар нишасти хабарии муштарак бо ҳамтои русаш Сергей Лавров амалиёти мақомоти интизомии Русияро ба зидди муҳоҷирони тоҷик низ танқид кард.

"Амалиёт ба зидди муҳоҷирон гоҳо бо шеваҳои сахте сурат мегиранд. Мо чорабиниҳои мақомоти Русияро барои ба чаҳорчӯбаи қонунӣ ворид кардани муҳоҷират зери суол намебарем, вале ин чорабиниҳо набояд сабаби изтироб дар ҷомеа ва фазои иттилоотӣ бишаванд," – гуфт Сироҷиддин Муҳриддин дар Маскав.

Бадрафторӣ бо муҳоҷирони тоҷик дар Русия бахусус баъд аз ҳамлаи маргбор ба толори консертии "Крокус" дар моҳи март бисёр зиёд шуд. Баъди ҳамин ҳодиса аз Русия бештар аз 17 ҳазор муҳоҷири тоҷикро ихроҷ карданд.

Матбуоти Русия ва гоҳе сиёсатмадорони он муҳоҷирони корӣ ва аз ҷумла муҳоҷирони тоҷикро сабаби тамоми бадбахтиҳои кишварашон меноманд.

Бино ба омори расмӣ, танҳо дар нимаи соли 2024 аз Тоҷикистон тақрибан 393 ҳазор нафар барои кор ба хориҷ ва аксаран ба Русия рафтаанд.

"Украина бояд як бахши музокироти сулҳ бошад"

Доналд Трамп, Владимир Зеленский ва Владимир Путин
Доналд Трамп, Владимир Зеленский ва Владимир Путин

Роҳбарони баъзе аз кишварҳои аврупоӣ бо нашри баёнияе пойбандии худро ба истиқлол ва тамомияти арзии Украина таъкид карданд.

Намояндагони Фаронса, Олмон, Бритониё, Лаҳистон, Испания, Итолиё ва Кумисюни Аврупо рӯзи 12-уми феврал гуфтанд, "дар ҳама гуна музокира бо Русия, Аврупо ва Украина низ бояд нақш дошта бошанд".

"Мо як ҳадаф дорем: идомаи пуштибонӣ аз Украина то расидан ба сулҳи одилона, ҳамаҷониба ва пойдор," – гуфта шудааст дар баёния.

Олаф Шолтс, садри аъзами Олмон, дар мусоҳибае бо нашрияи Politico гуфт, ки наметавон сулҳро ба Украина таҳмил кард. Ин мусоҳиба рӯзи 13-уми феврал нашр шуд.

Изҳороти раҳбарони аврупоӣ дар ҳолест, ки президенти Амрико Доналд Трамп рӯзи 12-уми феврал бо раҳбарони Русия ва Украина дурнамои хатми ҷанг дар Украинаро баррасӣ кард.

Ӯ изҳори умед кард, ки ин фоҷеа ба зудтарин фурсат хотима меёбад.

"15 парвандаи ҷиноӣ дорад." ВКД боздошти "Боим"-ро тасдиқ кард

Иброҳим Сафаров. Акс аз шабакаҳои иҷтимоӣ
Иброҳим Сафаров. Акс аз шабакаҳои иҷтимоӣ

Намояндагони Вазорати корҳои дохилӣ боздошт ва истирдоди Иброҳим Сафаров, машҳур бо лақаби "Боим"-ро аз Туркия ба Тоҷикистон тасдиқ карданд. Радиои Озодӣ дар ин бора дар аввали моҳи декабри соли 2024 хабар дода буд.

Рамазон Раҳимзода, вазири корҳои дохилӣ, рӯзи 13-уми феврал дар нишасти матбуотӣ гуфт, Иброҳим Сафарови 53-сола аз рӯйи 15 парвандаи ҷиноӣ таҳти ҷустуҷӯй қарор дошт.

"Ҳамаи парвандаҳо барои ба муомилот баровардани маводи мухаддир. Пештар дар Русия барои ин ҷиноят ба ҷавобгарӣ кашида шуда буд. Ҳоло дар Истанбули Туркия дастгир ва ба Тоҷикистон оварда шудааст ва тафтиши парвандаҳояш идома дорад," – афзуд вазир.

Ҳарчанд Раҳимзода дар бораи парвандаҳои Иброҳим Сафаров ҷузъиёт надод, пештар манбаъҳои Радиои Озодӣ гуфта буданд, ки ӯ "ба таъсиси шабакаи фурӯши ҳабҳои экстазӣ" ва "нигаҳдории силоҳ айбдор мешавад". Мавқеи наздикон ё вакили мудофеаш ба иттиҳом маълум нест.

Исми Иброҳим Сафаров (Боим) дар гузашта низ борҳо бо интиқолу фурӯши миқдори бузурги маводи мухаддир расонаӣ шуда буд. Расонаҳои русӣ аз ӯ “Пабло Эскобари Тоҷик” ном мебурданд.

Вай, ки дар гузашта ба баргузории консерт ва таҳияи суруд ба сарояндагон мадад мекард, соли 2006 бо беш аз 200 кило ҳероин дар Русия боздошт ва ба нуздаҳ сол зиндон маҳкум шуд. Соли 2020 дар саҳифааш дар Фейсбук хабар дод, ки озод шудааст.

Вазорати корҳои дохилии Тоҷикистон дар соли 2024 дар умум нуҳ гурӯҳи созмонёфтаи ҷиноии иборат аз 42 нафарро боздошт кардааст, ки аз онҳо 280 кило маводи мухаддир гирифта шудааст.

Назорат дар зиндонҳои Тоҷикистон сахттар шудааст?

Зиндони шаҳри Ваҳдат
Зиндони шаҳри Ваҳдат

Пайвандони баъзе аз зиндониён гуфтанд, ки баъд аз нооромӣ дар маҳбаси шаҳри Ваҳдат, назорат дар зиндонҳои кишвар сахттар шудааст. Мақомот дар ин бора расман чизе нагуфтанд.

Волидони ду маҳбус бо шарти фош нашудани номашон рӯзи 12-уми феврал ба Радиои Озодӣ гуфтанд, баъди ҳодиса дар зиндони Ваҳдат бо фарзандонашон вохӯрда наметавонанд.

Яке аз ин ҳамсуҳбатҳои мо гуфт, фарзандаш дар як занги кӯтоҳи телефонӣ хабар додааст, ки назорат пурзӯр шудааст ва беҳтар аст феълан ба мулоқот наоянд.

Падари як маҳбуси дигар гуфт, умедвор аст, ҳарчӣ зудтар вазъ дар зиндонҳо ба ҳолати муқаррарӣ бармегардад ва боз фарзандонашро мебинад.

Рӯзи 3-юми феврал дар зиндони шаҳри Ваҳдат нооромӣ сар зад. Ба гуфтаи мақомот, чанде аз зиндониён бо мақсади “қатл ва фирор” ба нигаҳбонони зиндон ҳамла кардаанд.

Дар натиҷа ба маълумоти расмӣ 3 ва ғайрирасмӣ то 7 маҳбус кушта, чанд корманди зиндон захмӣ гаштаанд.

Манобеи Радиои Озодӣ гуфтанд, муфаттишони Додситонии кул ҳодисаро таҳқиқ доранд.

"Ҷинояти махсусан вазнин". Шарҳи Додгоҳ дар бораи ҳукми Рухшона Ҳакимова

Рухшона Ҳакимова бо кӯдаконаш
Рухшона Ҳакимова бо кӯдаконаш

Додгоҳи олии Тоҷикистон дар пайванд ба ҳукми хабарнигор Рухшона Ҳакимова гуфт, ки он ба гурӯҳи "ҷиноятҳои махсусан вазнин" дохил мешавад ва аз ин рӯ, қонунгузорӣ ба таъхир гузоштани иҷрои онро пешбинӣ накардааст.

Хабарнигори тоҷик Рухшона Ҳакимова рӯзи 5-уми феврал дар доираи парвандаи пурсарусадои "табаддулот" бо гуноҳи "хиёнат ба давлат" ба ҳашт сол зиндон маҳкум шуд. Худаш дар додгоҳ иттиҳомро рад кард.

Ҳабси Рухшона Ҳакимова вокунишҳои зиёдро дар шабакаҳои иҷтимоӣ ба миён овард. Бахусус инки ӯ ду кӯдак (яке нуҳмоҳа ва дигаре дуюнимсола) дорад.

Корбарони шабакаҳои иҷтимоӣ бо ишора ба муқаррароти қонунгузории Тоҷикистон дар бораи ба таъхир гузоштани ҷазои зане, ки кӯдаки хурдсол дорад, аз мақомот талаб карданд, ки Ҳакимоваро аз фарзандонаш ҷудо накунанд.

Шавкат Лутфуллозода, муовини аввали раиси Додгоҳи олии Тоҷикистон, рӯзи 13-уми феврал зимни нишасти хабарӣ гуфт, "ҳукми Рухшона Ҳакимова ба гурӯҳи ҷиноятҳои махсусан вазнин дохил мешавад ва мавқуф гузоштани иҷрои онро қонунгузорӣ пешбинӣ накардааст." Вай аз додани ҷузъиёти бештар худдорӣ кард.

Дар посух ба пурсишҳои батакрори хабарнигорон, ки то куҷо дуруст аст Рухшона Ҳакимова барои анҷоми як пурсиш дар бораи нуфузи Чин боздошту маҳкум шудааст, Лутфуллозода посух дод, ки парванда махфӣ аст ва бинобар ин, ҷузъиёт ироа карда наметавонад.

Рухшона Ҳакимова 31-сола аст ва хатмкардаи бахши рӯзноманигории Донишгоҳи миллии Тоҷикистон. Корро соли 2013 дар Маркази таҳқиқоти журналистӣ оғоз кардааст. Корманди нашрияҳои “Самак”, “Фараж” ва “Ҷавонони Тоҷикистон” буд. Матолиби таҳлилияш дар сомонаҳои “Кабар Азия” ва “Фактчек.тҷ” низ нашр шудаанд. Барандаи ҷоизаи ба номи Воҳид Асрорӣ, ҷоизаҳои Кумитаи ҷавонон, Эътилофи бонувони журналист ва "Медиа-Алянс"-и Тоҷикистон аст.

Дар бештар аз ду соли охир нуҳ рӯзноманигору блогери тоҷик – Абдулло Ғурбатӣ, Завқибек Саидаминӣ, Далери Имомалӣ, Абдусаттор Пирмуҳаммадзода, Хуршед Фозилов, Хушом Ғулом, Улфатхоним Мамадшоева, Муҳаммади Султон ва Аҳмади Иброҳим – аз 7 то 20 сол зиндонӣ шуданд. Созмонҳои ҳомии ҳуқуқ, аз ҷумла Human Rights Watch ин вазъро ташвишовар донистаанд.

Кумита: Блогерон 27 миллион сомонӣ даромад гирифтанд

Кумитаи андоз (молиёт)-и Тоҷикистон мегӯяд, соли 2024 блогерони тоҷик 27,2 миллион сомонӣ ё 2.4 миллион доллар даромад гирифтаанд.

Намояндагони Кумитаи андоз 13-уми феврал дар нишасти хабарӣ гуфтанд, блогерон соли гузашта ба буҷа 2,2 миллион сомонӣ молиёт супоридаанд.

Мустақилона тасдиқи ин рақамҳо аз манобеи мустақил имконпазир нест. Баъзе аз блогерон аз кам шудани даромади худ шикоят мекунанд.

Тибқи иттилои ахири Кумитаи андоз, дар кишвар 114 блогер сабт шудаанд, ки назар ба соли гузашта 26 кас зиёд аст.

Сабтиноми блогерҳо дар Тоҷикистон соли 2020 сар шуд. Мақомот ба ин бахш замоне таваҷҷуҳ карданд, ки сафи блогерон барои гирифтани даромад афзуд.

Доналд Трамп ва Владимир Путин гуфтугӯ карданд

Доналд Трамп ва Владимир Путин.
Доналд Трамп ва Владимир Путин.

Президенти Амрико Доналд Трамп хабар дод, ки рӯзи 12-уми феврал бо ҳамтои русаш Владимир Путин дар бораи Украина ва чанд мавзӯи дигар телефонӣ гуфтугӯ кардааст.

Трамп дар шабакаи иҷтимоии худ Truth Social навишт, бо Путин мавзӯи Украина, Ховари Миёна, энержӣ, зеҳни сунъӣ, қувваи доллар ва дигар мавзуъҳо гап задааст.

Ба гуфтаи Дмитрий Песков, сухангӯи Кремл, сӯҳбати роҳбарони Русия ва Амрико ҳудуди ду соат давом кард ва Путин Трампро ба Маскав даъват кардааст.

Раиси ҷумҳури Амрико сӯҳбат бо Владимир Путинро "пурсамар" номид. Ба навиштаи Трамп, ӯ ва Путин дар ин масъала ҳамфикр буданд, ки куштори миллионҳо нафар дар ҷанги Русия ва Украина бояд бас шавад.

"Мо тавофуқ кардем, ки аз наздик кор мекунем, аз ҷумла, ба кишварҳои ҳамдигар ташриф меорем. Мо ҳамчунин ба созиш расидем, ки ҳайатҳои мо музокиротро фавран оғоз кунанд. Мо корро аз он сар мекунем, ки ман ба президенти Украина занг мезанам ва дар бораи ин гуфтугӯ хабар медиҳам",-навиштааст Доналд Трамп.

Дертар хабари гуфтугӯи телефонии роҳбарони Амрико ва Украина ҳам расонаӣ шуд. Президенти Амрико аз Котиби давлатии ин кишвар, мушовири амнияти миллӣ, роҳбари Хадамоти федеролии амният ва фиристодаи вижаи ИМА дар масъалаи Украина дархост кардааст, ки музокиротро роҳбарӣ кунанд.

Навбатпоии тӯлонӣ барои гирифтани патент дар Русия

Акс аз навори фиристодаи муҳоҷирон
Акс аз навори фиристодаи муҳоҷирон

Муҳоҷирони тоҷик дар Русия шикоят доранд, ки баъд аз 5-уми феврал навбатпойӣ барои таҳияи ҳуҷҷатҳо ва гирифтани патент дар Русия зиёд шудааст.

Рӯзи 5-уми феврал дар Русия рӯйхати шаҳрвандони хориҷие фаъол шуд, ки қонуншиканӣ кардаанд. Ба ин гурӯҳи муҳоҷирон то моҳи апрели соли равон муҳлат додаанд, ки ҳуҷҷатҳои худро дуруст кунанд.

Дар наворҳои фиристодаи муҳоҷирон аз шаҳрҳои Маскав ва Санкт-Петербург дида мешавад, ки анбуҳи зиёди одамон дар назди идораи муҳоҷират ҷамъ шудаанд.

Ба гуфтаи як муҳоҷир, маҷбуранд аз соати 2-3-и шаб навбат гиранд. Ин муҳоҷир ба Радиои Озодӣ навиштааст, кормандони идораи муҳоҷирати Санкт-Петербург дар 3 соат фақат 15 нафарро қабул мекунанд.

Бар асоси як фармони Владимир Путин, муҳоҷироне, ки то моҳи апрели имсол кор ва будубоши худро дар Русия қонунӣ намекунанд, аз ин кишвар ихроҷ хоҳанд шуд.

Пештар рӯйхати 120 ҳазор зодаи Тоҷикистон нашр шуд, ки дар қаламрави Русия ягон қонуншиканӣ кардаанд ва ба онҳо ихроҷ таҳдид мекунад.

Сиёсати зидди муҳоҷирон дар Русия баъд аз ҳамлаи маргбор ба толори “Крокус” дар баҳори соли 2024 шиддат гирифт.

Тоқаев гуфт, байни Қазоқистону Тоҷикистон "масъалаи ҳалношуда" нест

Сироҷиддин Муҳриддин бо Қосимҷомарт Тоқаев
Сироҷиддин Муҳриддин бо Қосимҷомарт Тоқаев

Қосимҷомарт Тоқаев, раисҷумҳури Қазоқистон, гуфт, кишвараш бо Тоҷикистон "ягон масъалаи ҳалношуда" надорад.

Изҳороти ӯ рӯзи 12-уми феврал ҳангоми мулоқот бо вазири корҳои хориҷии Тоҷикистон Сироҷиддин Муҳриддин садо дод. Мулоқот дар шаҳри Остона гузашт.

Тоқаев гуфт, "Қазоқистон нисбат ба мардуми бародари тоҷик ҳисси вижае дорад. Кишварҳои мо ҳамеша якдигарро дастгирӣ мекарданд."

Вазири умури хориҷии Тоҷикистон, ки бо сафари расмӣ ба Қазоқистон рафтааст, низ равобити Душанбе ва Остонаро "наздику бародарона" хонд.

"Қазоқистон барои мо шарики муҳим аст ва дар ҳама бахшҳои ҳамкории дуҷониба ҳамдигарфаҳмии пурра вуҷуд дорад," -- гуфт Сироҷиддин Муҳриддин.

Қазоқистон шарики дувуми тиҷоратӣ-иқтисодии Тоҷикистон аст. Ду кишвар соле пеш ба нақша гирифтанд, ки додугирифтро ба ду миллиард доллар хоҳанд расонд. Тоҷикистон орду газу бензинро аз Қазоқистон меорад.

Қазоқистон баъд аз Русия кишвари дувуми муҳоҷирпазир аз Тоҷикистон аст. Бо афзоиши таъсири таҳримҳои байнулмилалӣ болои Русия ва коҳиши иқтисоди ин кишвар, баъзе аз муҳоҷирони тоҷик ба Қазоқистон рӯ оварданд. Онҳо асосан дар бозору сохтмон кор мекунанд.

Муҳоҷирон пештар аз он хушҳол буданд, ки дар муқоиса ба Русия, дар Қазоқистон таъқиби пулис ва бегонаситезӣ камтар аст. Ҳоло мегӯянд, вазъият ба Русия монанд мешавад.

навшуда

Доналд Трамп аз Марк Фогел дар Кохи Сафед пазироӣ кард

Доналд Трамп бо Марк Фогел
Доналд Трамп бо Марк Фогел

Марк Фогел, омӯзгори амрикоӣ, пас аз севуним сол аз зиндоне дар Русия озод карда шуд.

Доналд Трамп, раисҷумҳури Амрико, рӯзи 11-уми феврал ӯро дар Кохи Сафед пазироӣ кард.

Трамп гуфт, ки Маскав рӯзи 12-уми феврал як амрикоии дигарро низ раҳо мекунад. “Фикр мекунам, ин метавонад як унсури бисёр муҳим, як қисми бузурги анҷоми ҷанг бошад,” – афзуд ӯ.

Марк Фогел гуфт, ки худро одами хушбахттарини рӯйи замин ҳис мекунад: "Мехоҳам ба Шумо расонам, ки ман қаҳрамон нестам. Президент Трамп қаҳрамон аст. Ин мақомдорони хадамоти дипломатӣ қаҳрамон ҳастанд. Вакилони мардумиву сенатороне, ки барои бозгардондану ҳимоят аз ман қонун қабул карданд, қаҳрамон ҳастанд. Ман аз ҳамаи онҳо қарздорам”

Фогел дар соли 2021-ум бо 17 грамм равғани бангдонаи ҳиндӣ дар фурудгоҳи Маскав дастгир шуда, бо ҷурми нигаҳдошт ва қочоқи маводи мухаддир ба муддати 14 сол аз озодӣ маҳрум шуд.

Вакили Фогел мегӯяд, истифодаи равғани бангдона барои табобат дар аёлати Пенсилвания иҷозат аст ва аз ин рӯ, номбурда бегуноҳ аст.

Раҳоии Фогел ба замоне рост омадааст, ки Трамп мехоҳад равобити Вашингтону Маскав беҳбуд ёбад.

Ӯ гуфт: "Русия муомилаи хуб нишон дод. Умедворам, ки ин як оғози эҳёи равобите хоҳад буд, ки ба мо имкон медиҳад, ҷангро хотима бахшем ва миллионҳо ҷавони дигар кушта нашаванд. Онҳо миллионҳо нафарро аз даст доданд. Онҳо дар як муддати кӯтоҳ эҳтимлан якуним миллион сарбозро аз даст додаанд. Мо бояд ин ҷангро боздорем!"

Гузориши видеоӣ дар инҷост:

Раҳоии омӯзгори амрикоӣ аз зиндоне дар Русия
лутфан мунтазир бошед

Феълан кор намекунад

0:00 0:02:00 0:00

Даъват ба таҳрими интихоботи порлумонӣ дар Тоҷикистон

Шарофиддин Гадоев
Шарофиддин Гадоев

Як созмони мухолифи ҳукумат ба таҳрим ё бойкоти интихоботи порлумонӣ дар Тоҷикистон даъват кардааст. Вокуниши мақомот ҳанӯз маълум нест.

Ҷунбиши ислоҳот ва рушд, қароргоҳаш дар Ҳолланд, интихоботро дар Тоҷикистон "раванди сохташуда" номид, ки "ҳадафи асосии он ҳифз ва қонунигардонии ҳокимияти худкома аст".

"Дар шароити нобудсозии пурраи ниҳодҳои демократӣ, набудани рақобати сиёсӣ ва саркӯби шадиди озодиҳои шаҳрвандӣ, ин намоишро наметавон як раванди интихоботии демократӣ номид," – гуфт Шарофиддин Гадоев, раиси Ҷунбиш, рӯзи 10-уми феврал.

Ба қавли ӯ, "интихоботе, ки бе рақобати воқеӣ, дар шароити сензураи комил, тарсонидани шаҳрвандон ва набудани назорати мустақил баргузор мегардад, қонунӣ ҳисобида намешавад."

Бори аввал нест, ки интихоботҳоро дар Тоҷикистон таҳрим мекунанд. Ҳизби сотсиал-демократ дар соли 2020 баргузории интихоботи президентиро ғайриқонунӣ номида, бойкот кард.

Интихоботи порлумонӣ дар Тоҷикистон дар панҷ сол як бор баргузор мешавад. Интихоби вакилон ин навбат дар рӯзи 2-юми марти имсол дар назар гирифта шудааст.

Шаш ҳизби сиёсии Тоҷикистон, ки яке ҳизби ҳоким ва боқимонда ошкоро сиёсати ҳукуматро ҷонибдорӣ мекунанд, номзадҳои худро барои ширкат дар интихобот пешбарӣ кардаанд. Ҳизби сотсиал-демократ на анҷуман баргузор кард, на номзаде пешниҳод намуд.

Дар ҳоли ҳозир аз 63 курсии порлумон 47 курсӣ дар ихтиёри Ҳизби ҳокими халқӣ-демократии Тоҷикистон қарор дорад. Ҳизби кишоварзӣ 7 курсӣ, коммунистӣ ду намоянда ва Ҳизби сотсиалист як курсӣ дорад. Ягона намояндаи Ҳизби демократ Саидҷаъфар Усмонзода буд, ки бо гуноҳи "талош барои табадуллоти давлатӣ" 27 сол зиндонӣ шуд.

Ҳушдори Исроил ба “Ҳамос” дар мавриди раҳоии гаравгонҳо

Навори Ғазза
Навори Ғазза

Исроил таҳдид кардааст, ки агар гурӯҳи “Ҳамос” озод кардани асиронро дубора оғоз накунад, ҳамлаҳо ба Навори Ғазза аз сар гирифта мешаванд.

Дар ин бора Бенямин Нетаняҳу, нахуствазири Исроил, рӯзи 11-уми феврал баъд аз ҷаласаи кобина изҳори назар кард.

Амрико ва Иттиҳоди Аврупо “Ҳамос”-ро созмони террористӣ медонанд.

Ба гузориши расонаҳои исроилӣ, дар доираи созиши оташбас, қарор буд гуруҳи “Ҳамос” рӯзи 15-уми феврал боз 9 асирро озод кунад.

“Ҳамос” рӯзи 10-уми феврал Исроилро ба нақзи созиши оташбас айбдор карда эълон кард, ки раванди раҳоии гаравгонҳоро бозмедорад.

Доналд Трамп, раисҷумҳури Амрико, ҳушдор дод, ки агар ҳамаи гаравгонҳои исроилӣ то нимрӯзи шанбеи ҳафтаи оянда озод нашаванд, созиши оташбас бекор хоҳад шуд.

Расонаи Ynet менависад, кобинаи Бенямин Нетаняҳу ин тасмими Доналд Трампро дастгирӣ кардааст.

Бар асоси созиши оташбас, ки нимаи дуюми моҳи январ оғоз шуд, қарор буд гурӯҳи “Ҳамос” 33 асири Исроилро озод кунад.

Дар иваз Исроил бояд ҳудуди 2 ҳазор зиндонии фаластиниро озод мекард. Марҳилаи аввали созиш барои 42 рӯз пешбинӣ шудааст.

Мақомдори рус барои додани хона ба зани тоҷик дастгир шуд

Алайҳи Таҳмина Самадова ҳам бо иттиҳоми қаллобӣ парванда кушодаанд
Алайҳи Таҳмина Самадова ҳам бо иттиҳоми қаллобӣ парванда кушодаанд

Кумитаи тафтишотии Русия дар робита ба додани хона ба як зодаи Тоҷикистон, муовини шаҳрдори Митишро боздошт кардааст.

Ба гузориши расонаҳои русӣ, ин мақомдори шаҳри Митиш ба он муттаҳам мешавад, ки асноди зодаи Тоҷикистон Таҳмина Самадоваро дуруст насанҷидааст. Азҷумла, ин мақомдорро ба он муттаҳам кардаанд, ки даромади Самадова ва ҳамчунин чигуна дар як ҳуҷра зиндагӣ кардани 13 нафарро тафтиш накардааст.

Рӯзи 13-уми январ ба Таҳмина Самадова, зодаи Тоҷикистон ва шаҳрванди Русия 24 миллион рубл маблағи хариди хона доданд. Ӯ модари ҳафт фарзанд аст. Аммо ин хабар дар Русия норозигии миллатгароёнро ба миён овард ва Таҳмина Самадоваро бо иттиҳоми қаллобӣ боздошт карданд. Бо сабаби ҳомила буданаш ӯро то поёни баррасии парванда озод кардаанд.

Таҳмина Самадова 14 сол боз шаҳрванди ин кишвар аст ва интизори тифли ҳаштум мебошад.

Ёфтҳои бештар

XS
SM
MD
LG