Як маъракаи бахшида ба рӯзи президенти Тоҷикистон бо ҳузури мақомоти расмӣ дар вилояти Хатлон вокунишҳои зиёдеро ба миён овард. Дар аксҳое, ки дафтари матбуоти ҳукумати Хатлон рӯзи 14-уми ноябр нашр кард, дида мешавад, намояндагони ҳукумат дар зери чатр истодаанд, аммо наврасон дар зери борон шеър мехонанд.

Корбарони шабакаҳои иҷтимоӣ аз ин рафтори масъулон сахт танқид карда, гуфтаанд, барои таҷлили ҳар ид набояд наврасонро азият дод.

Анвар Иброҳим, як корбари Фейсбук, навиштааст, “ба ҷойи онҳо фарзандони худро оварда гузоред, намешавад?” Шукур Тошматов, корбари дигари Фейсбук, дар ин кор волидонро гунаҳкор кардааст, ки фарзандони худро барои сурудхонӣ дар назди мансабдорон иҷозат медиҳанд.

Дафтари матбуоти ҳукумати вилояти Хатлон дар пайи интиқодҳои зиёди корбарони Фейсбук акси сурудхонии наврасонро пок кард. Носирҷон Маъмурзода, сухангӯи ҳукумати вилояти Хатлон, навишт, "бо тамоми масъулият мегӯям, ки ягон хонандаи мактаб зери борон шеър нагуфтааст. Танҳо як пора мусиқӣ заданд, ки он ҳам зери соябон. Нотавонбин набошем, дӯстон."

Дар акси дигар дида мешавад, ки Абдуҷаббор Раҳмонзода, ёвари раиси ҷумҳур дар умури робита бо ҷомеа, Хайриннисо Юсуфӣ, муовини раиси Ҳизби ҳокими халқии демократӣ, Қурбон Ҳакимзода, раиси вилояти Хатлон ва дигарон дар зери чатр истодаанд.

Бори аввал нест, ки наврасон бо либосҳои тунук дар сардӣ ба пешвози мансабдорон мебароянд. Дар гузашта низ ҳодисаҳои монанд ба ин интиқодҳои зиёдро ба миён оварда буд.

Соли гузашта аксҳо аз маросими ифтитоҳи "Дорухонаи байторӣ" дар ноҳияи Темурмалики вилояти Хатлон сабаби танқиди мақомоти ноҳия шуд.

Дар аксҳое, ки баъдан муаллифаш пок кард, вале онро дигар корбарон гирифта паҳн карданд, дида мешавад, чӣ гуна духтарон дар либоси баҳорӣ даст пеши бар раиси ноҳия Фотеҳ Аминзодаро пешвоз мегиранд. Баръакси духтарон, Аминзода ва ҳамроҳонаш либоси ғафс пӯшидаанд.

Пеш аз он Раҷаббой Аҳмадзода, раиси вилояти Суғд ҳам барои чунин шеваи пешвозгирӣ танқид шунид. Ӯро ҳам, ки дар сар кулоҳ ва дар тан либоси зимистона дошт, духтарон бо либосҳои тунук дар шаҳри Панҷакент истиқбол гирифтанд.

Мавзӯи ҷалби кӯдакону наврасон ба маросим ва бо либосҳои тунук дар фаслҳои сард ҳангоми сафарҳои президент ба минтақаҳо солҳо боз вуҷуд дорад. Соли 2013 дар ноҳияи Фархор кӯдаки хурдсолеро, ки ба пешвози президент оварда буданд, бо лаҳни кӯдакона шикоят кард, "хунук хӯрдааст".

Эмомалӣ Раҳмон он замон гуфта буд, кӯдаконро набояд дар сардӣ ба пешвози ӯ биоранд, вале натанҳо ин ҳолат кам нашуд, балки зоҳиран дар ноҳияҳо ва дар сатҳҳои поин ҳам ба анъана даромадааст.

Бар асари ҳамлаи Русия бо ҳавопаймоҳои бесарнишин ба вилояти Одесса як сокини 77-солаи рустои Лиманка ҷон бохтааст.

Дар ин бора раиси маъмурияти низомии вилоят, Олег Кипер, рӯзи 5-уми март хабар дод.

Ба иттилои ӯ, дар атрофи Одесса чанд хона вайрон шуда, дар маркази вилоят, шаҳри Одесса, зербунёдҳои муҳим осеб дидаанд.

"Бахше аз шаҳри Одесса бе барқ, об ва гармӣ монд," -- афзуд ӯ.

Нерӯҳои Русия бо мушаки дурпарвоз ноҳияи Белгород-Днестровскийро дар вилояти Одесса низ нишон гирифтаанд. Кипер гуфт, дар онҷо як бинои истироҳатгоҳ пурра вайрон шуд.

Вазорати корҳои дохилии Украина зарари расидаро аз зарбаҳои Русия "густурда" донистааст.

Расонаҳои давлатии Русия низ дар бораи "таркишҳо дар Одесса" навиштанд, вале бе ёдоварӣ аз он ки ин ҳодисаҳо бар асари ҳамлаи ҳавопаймоҳои бесарнишини Маскав рух доданд.

Хадамоти Федеролии Амнияти Русия ё ФСБ хабар дод, ки як сокини Екатеринбургро бо иттиҳоми даъват ба оташ задани комиссариати ҳарбӣ дастгир кард.

Хабаргузории расмии ТАСС видеои маъзаратхоҳии ӯро нашр кард, аммо маълум нест онро таҳти чӣ шароит ба навор гирифтаанд.

Ба зидди ин сокини Екатеринбург бо иттиҳоми даъват ба терроризм парванда боз шудааст.

"Медиазона" маълум кард, ки боздоштшуда Маркус Мур аст ва 24 сол дорад.

Замони боздошташ маълум нест, вале саҳифааш дар шабакаи "ВКонтакте" бо талаби Додситонии кулли Русия дар моҳи августи соли 2024 баста шудааст.

Ба гузориши "ОВД-Инфо", аз оғози ҳуҷуми Русия ба Украина бо иттиҳоми даъват ба терроризм алайҳи 262 кас парванда кушодаанд. Ҷазои ҳадди аксар аз рӯи ин иттиҳом ҳафт сол зиндон аст.

Александр Лукашенко, раҳбари Беларус, дар суҳбат бо блогери амрикоӣ Марио Науфалу гуфт, омода аст, ки дар Минск мизбони гуфтушуниди президентҳои Русия, Украина ва Амрико бошад, вале омода нест, миёнравӣ кунад.

"Бинобар ин, ба Доналд Трамп расонед, ки ман ӯро ҳамроҳи Владимир Путин ва Владимир Зеленский дар инҷо мунтазирам. Менишинем ва оромона созиш мекунем," – гуфт Лукашенко.

Раҳбари худкомаи Беларус афзудааст, "аҳсан ба Трамп, ки хоҳони поён додан ба ҷанг дар Украина аст. Дар ин масъала ман омода ҳастам дар як саф бо ӯ ҷой гирам."

Сухангӯйи Кремл Дмитрий Песков гуфт, имкони мулоқоти Путин, Трамп ва Зеленский дар Минск ҳанӯз баррасӣ нашудааст.

Александр Лукашенко дар мусоҳибааш ҳамчунин гуфт, Евгений Пригожин, раҳбари пешинаи ширкати муздурии "Вагнер" ҳангоми ошӯб дар тобистони соли 2023 мехост, силоҳи ҳастаӣ дошта бошад.

Ба гуфтаи Лукашенко, вай тавонистааст Пригожинро бовар кунонад, ки ба ҳадафҳояш намерасад ва сипас нерӯҳои "Вагнер", ки ба тарафи Маскав мерафтанд, ба қафо баргаштанд.

Лукашенко гуфт, барои қатъи ошӯби Пригожин дар Русия аз ҷониби намояндагони CIA, MI6 ва идораҳои дигари истихборотии ғарбӣ ба таври хусусӣ ситоиш шудааст. Вале ӯ дар мусоҳиба барои тасдиқи суханонаш ҳеч далел наовард.

Фирдавс Ҳаётзода, додситони нави ҳарбии Тоҷикистон, хостааст, ки аз шеваҳои ғайриқонунии ҷалби сарбозон ба артиш пешгирӣ шавад.

Бино ба хабари Вазорати дифои Тоҷикистон, Ҳаётзода дар ин бора рӯзи 3-юми март дар ҷаласае бо ҳузури муовини сарвазир ва раиси Кумисюни даъват Дилрабо Мансурӣ ва вазири мудофиа Эмомалӣ Собирзода суҳбат кард.

Вай афзудааст, барои ин, "пешгирӣ аз роҳҳои ғайриқонунии даъват, коҳиши сатҳи ҳама гуна ҷиноят ва диққати аввалиндараҷа ба сифати даъвати шаҳрвандон" зарур аст.

Дар Тоҷикистон соле ду дафъа – дар баҳор ва тирамоҳ – маъракаи ҷалби ҷавонон ба артиш сурат мегирад. Солҳост, ки ин маърака бо хабари “сарбозшикор” (облава) ё бо зӯр ба артиш ҷалб кардани ҷавонон ҳамроҳ аст.

Баъзе аз волидон соли гузашта шикоят карда буданд, ки мақомот ба онҳо бо ҳар васила фишор меоранд, то фарзандони муҳоҷир ё донишҷӯйи худро барои рафтан ба артиш аз Русия ба Тоҷикистон баргардонанд.

Бархе далели фирор аз артишро ба шароити нохубу "дедовишина" ва марги мармузи баъзе аз сарбозон пайванд медиҳанд.

Радиои Озодӣ рӯзи 14-уми ноябри 2024 дар бораи марги Ботир Эргашев, сарбози 20-солаи Нерӯҳои марзбонӣ, дар қисми низомӣ дар ноҳияи Шамсиддини Шоҳин гузориш дод. Мақомот ҳангоми супоридани ҷасади ӯ ба волидонаш гуфтаанд, “худкушӣ кард". Падараш иддао дорад, ки дар бадани ҷавон осори латукӯб буд.

Омбудсмен ё Ваколатдори ҳуқуқи инсон дар Тоҷикистон низ дар гузорише гуфтааст, дар соли 2023 марги 40 сарбоз дар артиш сабт шуд. Аз ин шумора, ба эътирофи Омбудсмен, 8 маврид худкушӣ буда, "6 нафар аз беморӣ фавтиданд".

Ба иттилои Федератсияи футболи Тоҷикистон, дар ин мусобиқа дастаҳои мунтахаби духтарони то 17-солаи Тоҷикистон, Эрон, Узбекистон ва Қирғизистон иштирок доранд.

Дар даври якуми мусобиқа 4-уми март дастаи мунтахаби Тоҷикистон дар Варзишгоҳи марказии Душанбе аз тими Қирғизистон бо ҳисоби 0:1 шикаст хӯрд. Голи ягонаро дар дақиқаи панҷуми бозӣ Сумая Маҳмадсолиева, бозигари қирғизҳо, ба дарвозаи мизбонон зад. Дар бозии дигари даври якум мунтахаби Узбекистон тими Эронро бо ҳисоби 1:0 мағлуб кард.

Ба ин тартиб, дастаҳои мунтахаби духтарони Қирғизистону Узбекистон бо сеимтиёзӣ дар ҷадвали мусобиқа пешсаф шуданд.

Мусобиқа аз рӯйи системи даврӣ дар як давра сурат мегирад, яъне ҳар як даста се бозӣ анҷом медиҳад. Дастае, ки аз ҳама бештар имтиёз ба даст меорад, ғолиби мусобиқа мегардад.

Бозиҳои даври дуюми мусобиқа рӯзи панҷшанбеи 6-уми март байни дастаҳои Қирғизистон - Эрон ва Узбекистон - Тоҷикистон баргузор мешаванд.

Барои духтарони футболбози тоҷик иштирок дар мусобиқаи Ассотсиатсияи футболи Осиёи Марказӣ (CAFA)-2025 як марҳилаи омодагӣ ба мусобиқаи интихобии Ҷоми Осиё-2026 (U-17) ба ҳисоб меравад, ки аз 9-ум то 17-уми октябри имсол баргузор хоҳад шуд.

Мусобиқаи қаҳрамонии CAFA)-2025 байни дастаҳои мунтахаби духтарони то 17-сола:

Иштирокдорон:

Тоҷикистон

Эрон

Узбекистон

Қирғизистон

Даври якум

4-уми март (сешанбе)

Эрон – Узбекистон – 0:1

Тоҷикистон – Қирғизистон – 0:1

Мавқеи дастаҳо дар ҷадвали мусобиқа:

Даври дуюм

6-уми март (панҷшанбе)

12:00 – Қирғизистон - Эрон

15:00 – Узбекистон - Тоҷикистон

Даври сеюм

8-уми март (шанбе)

12:00 – Узбекистон - Қирғизистон

15:00 –- Тоҷикистон - Эрон

Ба иттилои Вазорати меҳнат, муҳоҷират ва шуғли аҳолии Тоҷикистон, ширкати "Арко"-и саудӣ хоҳишмандонро ҳамчун пешхизмат дар ин кишвар ба кор ҷалб карданист.

Манбаъ мегӯяд, музди меҳнат дар ҳаҷми 2500 риёл, баробар ба 7 ҳазор сомонӣ буда, довталабон баъди суҳбат бо намояндаи "Арко", ба кор гирифта мешаванд.

Синну соли аз 21 то 35 сола, донистани забонҳои англисӣ ва арабӣ дар сатҳи муошират ва надоштани доғи судӣ, талаботҳоест, ки барои довталабон пешбинӣ шудааст.

Зубайдулло Саидов, намояндаи "Агентии бокортаъмикунӣ дар хориҷа"-и Вазорати меҳнат, муҳоҷират ва шуғлӣ ба Радиои Озодӣ гуфт, раводиди кории 2-сола, се вақт хурок ва ҷои хоб аз сӯи корфармо таъмин мешавад.

Ба гуфтаи ӯ, хоҳишмандон новобаста аз ҷинсият ба кор гирифта шуда, дар шаҳрҳои гуногуни Арабистони Саудӣ ба ҳайси пешхизмат кор мекунанд.

Манбаъ таъкид намуд, ки ҷалби корҷӯёни тоҷик бар асоси ёддошти тафоҳум байни ду кишвар сурат мегирад ва дар назар аст то 20 ҳазор корҷӯи тоҷик дар бахшҳои гуногуни хидматрасонӣ дар шаҳрҳои гуногуни Арабистони Саудӣ ба кор ҷалб гарданд.

Мақомоти Тоҷикистон солҳост талош доранд, ки роҳи муҳоҷирони тоҷик ба ҷуз аз Русия, ба кишварҳои дигар ҳам боз шавад.

Тибқи омори расмӣ, бештари муҳоҷирони тоҷик ба Русия ва як қисми дигар барои кор ба Қазоқистон мераванд.

Даҳҳо додрасу раисони додгоҳҳоро дар шаҳру ноҳияҳои Тоҷикистон дигар карданд.

Фармон дар ин бора рӯзи 4-уми март имзо шуд.

Сабаби тағйирот дар додгоҳҳо поёни ваколат, гузаштан ба кори дигар ва бознишастагӣ будааст.

Хадамоти матбуоти президенти Тоҷикистон навишт, ки 65 кас бори аввал ба мақоми додрас таъйин гардиданд.

Додрасҳо дар Тоҷикистон бо фармони президент таъйину барканор мешаванд ва танқидҳо зиёданд, ки зимни интихоби онҳо лаёқат ва донишҳо ба қадри кофӣ ба эътибор гирифта намешавад. Вебсайти президент рӯзи чоруми март онҳоро "кадрҳои ҷавону корозмуда" навишт.

Дар даҳ соли гузашта нисбат ба 107 нафар, аз ҷумла 45 додрас, муовинон ва раисони додгоҳҳои шаҳру ноҳияҳо, бо гумони ришвахорӣ, қаллобӣ ва фаро рафтан аз ваколат парвандаи ҷиноӣ боз шудааст.

Дар Тоҷикистон беш аз чорсад додрас кор мекунад.

Даҳҳо муҳоҷири тоҷик дар гузаргоҳи “Жайсан” дар сарҳади Қазоқистон бо Русия дармондаанд.

Чанд муҳоҷири тоҷик рӯзи 4-уми март бо фиристодани навор гуфтанд, ки чор рӯз боз дар шароити сахте қарор доранд.

Яке аз ин муҳоҷирон, ки нахост номаш зикр шавад, гуфт, марзбонони қазоқ ба онҳо гуфтаанд, дархости Русия аст, ки шаҳрвандони Тоҷикистонро роҳ надиҳанд.

Ба гуфтаи муҳоҷирон, теъдоди тоҷикони дармонда “ба беш аз сад нафар мерасад”.

Дар сафорати Тоҷикистон дар Қазоқистон ба зангҳои Радиои Озодӣ посух надоданд.

Аксари ин муҳоҷирон ба воситаи мусофирбар ва мошин талоши рафтан ба Русияро доштаанд. Маъмулан, муҳоҷироне бо роҳи заминӣ ба Русия мераванд, ки пули камтар доранд ва сафар бо автобусу мошинро арзонтар медонанд.

Ҳукуматҳои Тоҷикистон ва Қирғизистон мегӯянд, ки дар фикри “эҳё ва рушди минбаъдаи робитаҳои тиҷоратию иқтисодӣ” ҳастанд.

Намояндагони ду тараф изҳори умед кардаанд, ки то соли 2030 “додугирифт то 500 миллион доллар” расонда хоҳад шуд.

Ин нақшаҳо рӯзи 4-уми март ҳангоми мулоқоти ҳайатҳои ду кишвар дар шаҳри Душанбе садо додааст. Ҳайати Қирғизистонро нахуствазир Одилбек Қосималиев раҳбарӣ мекунад.

Мақомот дар Тоҷикистон ҷузъиёт намедиҳанд. Дафтари матбуоти ҳукумати Қирғизистон хабар дод, ки мулоқоти сарвазирони ду кишвар – Қоҳир Расулзода ва Одилбек Қосималиев – дар “шакли маҳдуд” барпо шуд ва баъди ин нашасти васеи аъзои ҳукуматҳо доир гардид.

Ба навиштаи ҳукумати Қирғизистон, Қосималиев “ба авлавияти рушди муносибатҳои хуб бо кишварҳои Осиёи Марказӣ, аз ҷумла Тоҷикистон” таъкид ва “саломи гарму ҷӯшони президент Содир Ҷабборов ба Эмомалӣ Раҳмон”-ро расондааст.

Дар суҳбати ду сарвазир "ҳадафи умумии то соли 2030 то ба сатҳи 500 миллион доллар расонидани додугирифтҳои тиҷоратӣ" баён шудааст. Қосималиев гуфтааст, ки кишвараш омода аст барои ба бозори Иттиҳоди иқтисодии АвруОсиё баровардани маҳсулоти Тоҷикистон мусоидат кунад.

"Ба аҳамияти роҳандозии ҳарчи зудтари тарҳи CASA-1000 ва эҳёи парвози ҳавопаймоҳо миёни Тоҷикистону Қирғизистон таъкид шудааст”, -- омадааст дар изҳороти расмии Бишкек.

Мулоқот дар пасманзари созиши муҳими Душанбе ва Бишкек дар мавриди таъйин ва нишонагузории сарҳади ду кишвар сурат гирифтааст. Созиш баъд аз ду муноқишаи хунин дар солҳои 2021 ва 2022, ки аз ду тараф даҳҳо куштаву захмӣ барҷой гузошт, роҳро ба эҳёи муносибатҳои хуб ҳамвор мекунад.

Муносибатҳои сиёсӣ, иқтисодӣ ва фарҳангии Тоҷикистону Қирғизистон дар чор соли гузашта ба поинтарин сатҳ расида буд. Интизор меравад, ки ҳафтаҳои наздик президентони Тоҷикистон ва Қирғизистон созишномаи марзиро имзо кунанд.

Омори расмӣ мегӯяд, баъди хушунатҳои соли 2021, додугирифти байни ду ҳамсоя беш аз се баробар кам шуд. Агар соли 2020 ин нишондод 37 миллион долларро ташкил медод, соли 2023 он то 12 милилон доллар поин омад.

Бино ба маълумоти омори Тоҷикистон, 93 дарсади додугирифтҳои байни ду ҳамсояро содироти маҳсулот аз Қирғизистон ташкил медодааст.

Виктория Рошина, хабарнигори украинӣ, ки дар асорати нерӯҳои Русия ҷон бохт, қаблан дар бораи бо нерӯи барқ шиканҷа шуданаш шикоят кардааст.

Дар ин бора дар филми таҳқиқотие хабар дода шуд, ки чанд созмону расона, аз ҷумла тарҳи "Слидство.Инфо" ва Гузоришгарони Бидуни Марз, омода намуданд.

Яке аз ҳамроҳони Рошина дар Боздоштгоҳи зери итоати нерӯҳои Русия бо шарти фош нашудани номаш гуфтааст, "вай аз дарди меъдаву табларза ҳам шикоят дошт; то 30 кило вазнашро гум карда буд ва базӯр аз ҷой мехест."

Виктория Рошинаи 27-сола хабарнигори озод буд ва барои бахши украинии Радиои Аврупои Озод/Радиои Озодӣ низ гузориш медод. Дар моҳи августи соли 2023 дар як минтақаи таҳти тасарруфи Русия дар Украина бедарак шуд.

Марги Виктория Рошинаро дар моҳи октябри соли 2024 тасдиқ карданд, вале то ҳанӯз ҷасади ӯ ба пайвандонаш дода нашудааст.

Рошина аз аввал ҳуҷуми Русияро ба Украина бозтоб медод. Дар моҳи марти соли 2022 дар Бердянски ишғолшуда аз тарафи нерӯҳои ФСБ-и Русия дастгир ва баъд аз даҳ рӯз раҳо гардида буд. Он замон барандаи ҷоизаи International Women's Media Foundation шуд.

Масъулони Идораи гумрук дар вилояти Суғд баъзе аз тоҷиронро гунаҳкор карданд, ки бо ҳуҷҷатҳои сохта талош доранд, мошинҳои истеҳсолашон то соли 2013-ро ба кишвар биоранд. Дар соли 2024 чанд нафар бо ин ҷурм боздошт шудааст.

Баҳриддин Эмомзода, муовини сардори Идораи гумрук, гуфт, дар понздаҳ маврид парвандаи ҷиноӣ боз шуда, 19 мошин гирифта шуд.

“Ин парвандаҳо ба мақомоти тафтишотӣ фиристоданд. Асосан ҳолатҳое, ки онҳо ба чунин кор даст мезаданд, ин бо роҳи сохтакорӣ ба қайдгирии шаҳодатномаи техникии воситаҳои нақлиёт буд,” – гуфт ӯ.

Тоҷикистон аз моҳи октябри соли 2023 овардани мошинҳои истеҳсолашон то соли 2013-ро манъ кард. Вале бисёре аз тоҷирон он вақт иддао доштанд, ки қарор ногаҳонӣ буд ва тиҷораташонро дар нимароҳ гузошт.

Мақомоти Тоҷикистон дар моҳи октябри соли 2023, ҳангоми нашри қарор, ҳадафро аз манъи нақлиёти “куҳна” ҳифзи муҳити зист ва коҳиши партовҳо гуфтанд.

Мошинҳои истеҳсолашон то соли 2013 дар муқоиса ба мошинҳои нав арзон ва барои қишри миёна дар Тоҷикистон дастрасанд. Бештари мошинҳои истеҳсолашон то соли 2013, аз 35 то 100 ҳазор сомонӣ (3000 - 9000 доллар) нарх доранд. Нақлиёте, ки баъд аз соли 2014 истеҳсол шудаанд, аз 150 ҳазор сомонӣ (13 ҳазор доллар) боло ҳастанд.

Бо назардошти дастрас будани нақлиёти тавлидашон то соли 2013, тоҷирон талош мекарданд, ин гуна мошинҳоро аз Кореяи Ҷанубӣ ва Аврупо ба Тоҷикистон оранд. Дар се соли охир ба Тоҷикистон ҳудуди 110 ҳазор мошини тавлидашон то соли 2013 оварда шудааст.

Видеоро дар инҷо бинед:

Ин ниҳод ҳушдор додааст, ки дар акси ҳол, нисбати онҳое, ки нархҳоро боло мебаранд, "чораҳои таъсиррасони қонунӣ" меандешад.

Ба иттилои Раёсати ВКД дар Душанбе, бархе афроди "фурсатталаб" бо ҳадафи ба даст овардани фоидаи бештар, аз ниёзмандиҳои мардум истифода бурда, нархи маҳсулоти хӯроквориро боло мебаранд.

Пулис мегӯяд, ки ба ҳадафи назорат ва танзими нархҳо, кормандонаш дар якҷоягӣ бо дигар ниҳодҳо, ба санҷиш ва корҳои фаҳмондадиҳӣ оғоз кардаанд.

Дар Тоҷикистон маъмулан дар арафаи иду ҷашнҳо нархи маҳсулот боло меравад.

Мақомот ҳамакнун барои танзими қиматҳо, баъзе чораҳоро рӯи даст гирифтаанд. Аз ҷумла, ташкили ярмаркаҳо, ки ба гуфтаи масъулин, дар онҷо маҳсулот бо арзиши поёнтар аз бозор пешниҳод мешавад.

Аммо аз сифати моли пешниҳодшуда дар ярмакаҳо на ҳама розӣ ҳастанд.

Ин ҳодиса 3 март рух дод ва ронандаи худрав ба гурӯҳе аз мардум дар хиёбоне, ки барои роҳгузарон ихтисос дошт, бархӯрд кард.

Сухангӯи пулис гуфтааст, як гумонзади ин ҳодиса боздошт шудааст, аммо таъкид кард, ки дар мавриди эҳтимоли вуҷуди гумонзадҳои дигар наметавон маълумоти бештар дод. Хабаргузории Олмон мегӯяд, ӯ шаҳрванди ҳамин кишвар аст.

Пас аз ин ҳодиса пулис аз мардуми Маннхейм дар ҷануб-ғарби Олмон хост, ки дар хонаҳои худ бимонанд ва аз рафтан ба ҷойи ҳодиса худдорӣ кунанд.

Мошинҳо ба унвони абзори маргбор дар чандин иқдоми хушунатомез дар моҳҳои ахир дар Олмон мавриди истифода қарор гирифтаанд.

Моҳи гузашта як духтари дусола ва модараш ду рӯз пас аз захмӣ шудан дар як ҳамла бо як мошин дар Мюнхен, ҷон бохтанд. Як марди 24-солаи афғон, ки ба унвони як паноҳҷӯ ба Олмон омада буд, дастгир шуд ва додгоҳ гуфт, ки ба назар мерасад ӯ бо ангезаҳои динӣ ин корро анҷом додааст.

Соли гузашта бар асари бархӯрди як мошин дар бозори Крисмас дар шаҳри Магдебург дар шарқи ин кишвар, шаш нафар кушта ва беш аз 200 нафар маҷрӯҳ шуданд.

Ҳусейн Мулоимӣ ва Ширин Сӯҳонӣ, филмсозони эронӣ, наздик буд имкони ҳузурро дар ҷашнвораи "Оскар" аз даст диҳанд, аммо дар ниҳоят филмашон – "Дар сояи сарв" –беҳтарин филми кӯтоҳи аниматсионӣ эътироф шуд.

Онҳо ин тарҳро бе пуштибонии давлат, бо сармояи шахсӣ ва дар баробари сензура ва мушкилоти молӣ ба поён расондаанд.

Раводиде, ки дар охирин лаҳза содир шуд, ба Ҳусейн Мулоимӣ ва Ширин Суҳонӣ имкон дод, ки рӯзи 2-юми март ба Лос-Анҷелес сафар кунанд ва танҳо се соат пеш аз оғози маросим ба онҷо бирасанд. Баъд аз муддати кӯтоҳе филми аниматсионии онҳо барандаи ҷоиза шуд.

Мулоимӣ ҳангоми гирифтани ҷоиза гуфт, "ин як муъҷиза аст. Суҳбат кардан дар баробари ин ҷамъи пуринтизор барои мо бисёр душвор аст." Ӯ афзуд, "бале, агар пойфишорӣ кунем ва имкон дошта бошем, муъҷизаҳо рух хоҳанд дод."

"Дар сояи сарв" аниматсияи дубуъдӣ ва бидуни муколама аст, ки пайомадҳои ҷанги Эрон ва Ироқро дар даҳаи 1980 бозгӯ мекунад.

Ҳусейн Мулоимӣ пеш аз маросими "Оскар" дар суҳбат бо Радиои Фардо, бахши эронии Радиои Озодӣ, гуфт, аввал мехостанд муносибати печидаи оилаҳоро ба тасвир бикашанд, аммо баъд тамаркузро ба таъсири вайронагри ҷанг ва пайомадҳои он тағйир доданд.

97-умин маросими супурдани ҷоизаҳои "Оскар" шоми 2-юми март дар Лос-Анҷелеси Амрико баргузор шуд.

Мақомот дар Тоҷикистон натиҷаҳои интихоботи порлумониро эълон карданд.

Ин корзор рӯзи 2-юми март бе ҳузури мухолифон, нозирони САҲА ва баъзе аз расонаҳои мустақили дохилӣ ва байнулмилалӣ гузашт.

Тибқи омори Кумисюни марказии интихобот аз 3-юми март, Ҳизби ҳокими халқӣ-демократии Тоҷикистон наздик ба 2,5 миллион орои мардумро соҳиб шудааст. Тасдиқи дурустии ин рақам аз манобеи мустақил имконпазир нест. Дар умум, ба иттилои КМИР, аз 63 курсии Маҷлиси Намояндагон 49 ҷой ба номзадҳои ҲХДТ расид.

Дар ҷойи дуюм, Ҳизби аграрии Тоҷикистон қарор гирифтааст. Наздик ба як миллион раъй ва 7 курсӣ дар порлумон.

Тақрибан 600 ҳазор орои сокинон ба Ҳизби ислоҳоти иқтисодӣ нисбат дода шудааст. Ин ҳизб дар порлумон соҳиби 5 вакил мешавад.

КМИР гуфтааст, ба Ҳизби сотсиалистӣ беш аз 248 ҳазор ва ба Ҳизби демократ 237 ҳазор нафар раъй додаанд. Ҳардуи ин ҳизб дар порлумон яктоӣ курсӣ хоҳанд дошт.

Ба иттилои расмӣ, ба Ҳизби коммунисти Тоҷикистон наздик ба 90 ҳазор раъй додаанд ва ин ҳизби ҳукмрон дар замони Шӯравӣ бори аввал дар порлумони кишвар бе вакил монд.

Кумисюни марказии интихобот мегӯяд, дар умум, аз панҷуним миллион аҳолии қобили раъй беш аз 85 дарсад ба пойи сандуқҳои овоздиҳӣ рафтанд.

Шарофиддин Гадоев, раиси Ҷунбиши ислоҳот ва рушд, қароргоҳаш дар Амстердам, иддао дорад, ки ширкати беш аз 85 дарсад дар интихобот “комилан бардурӯғ буда, бо иштироки воқеӣ ҳеч иртибот надорад.”

“Бар асоси маълумоти манбаъҳои мустақили ин ниҳод, дар асл, шумораи воқеии иштирокдорон дар интихобот ҳамагӣ 304 ҳазору 301 нафарро ташкил дода, ки танҳо 5,51% аз шумораи умумии интихобкунандагон мебошад,” – гуфт ӯ рӯзи 3-юми март. Тасдиқ ё радди ҳамаи ин баёнияҳо имконпазир нест.

Дар интихоботҳои пешина ҳузури ками раъйдиҳандагон, овоздиҳии як нафар ба ҷойи чанд кас ва партофтани бастаи варақаҳои пуршуда ба сандуқҳои раъйдиҳӣ сабт шуда буд.

Маҷлиси Намояндагон аз 63 курсӣ иборат аст ва вакилон дар панҷ сол як дафъа интихоб мешаванд. Вакилоне, ки барои хомӯшӣ дар баробари мушкили мардум ва қабули бе баҳси тарҳҳои пешниҳоди ҳукумат танқид мешаванд.

Аҳмади Иброҳим, рӯзноманигори тоҷикро, ки ба даҳ солу чор моҳ ҳабс маҳкум шудааст, рӯзи 26-уми феврал аз Кӯлоб ба Душанбе бурдаанд. Радиои Озодӣ дар ин бора рӯзи 3-юми март аз манобеаш хабар гирифт.

Мақомот нагуфтанд, ки ӯро дар кадом зиндон ҷойгир хоҳанд кард, вале ба иттилои дарёфтӣ “феълан дар Боздоштгоҳи рақами яки пойтахт аст”.

Ширинмоҳ Иброҳимова, хоҳари Аҳмади Иброҳим, дар як тамоси телефонӣ хабари ба Душанбе бурда шудани ӯро тасдиқ кард.

Ба иттилои ӯ, бародараш ҳангоми интиқол ба Душанбе гуфтааст, ҳанӯз нусхаи ҳукми додгоҳро нагирифт ва биноан барои бозбинии он дархост надод.

“Вай гуфт, ки ҳатман аз рӯйи ҳукми ноодилона шикоят хоҳад кард ва то ҳукм ба дасташ нарасад, муҳлати шикоят намегузарад,” – афзуд Ширинмоҳ Иброҳимова.

Ин дар ҳолест, ки мақомоти додгоҳӣ гуфта буданд, ӯ барои бозбинии ҳукм ҳамагӣ ним моҳ фурсат дошт. Рустам Мирзозода, раиси Додгоҳи олии Тоҷикистон, дар аввали моҳи феврал гуфт, чун рӯзноманигор шикоят накард, “аз ин бармеояд, ки бо ҳукм розӣ аст.”

Пайвандонаш мегуфтанд, шикоятро аз ҳукми, ба гуфтаашон, “фармоишӣ” кори беҳуда медонанд. Ба нақли яке аз онҳо, ҳушдор гирифта буданд, ки агар аз ҳукм шикоят баранд, эҳтимол ҷазо сахттар шавад.

Аҳмади Иброҳим, рӯзноманигори 63-сола ва сардабири нашрияи “Пайк”, дар моҳи августи соли 2024 дастгир шуд. Додгоҳи шаҳри Кӯлоб дар моҳи январ ӯро ба “пешниҳоди ришва”, “тамаҷӯъӣ” ва “ифротгароӣ” гунаҳкор донист. Худаш ҳеч яке аз ин иттиҳомҳоро напазируфт.

Созмонҳои байнулмилалӣ, аз ҷумла Кумитаи дифоъ аз хабарнигорон ва Гузоришгарони бидуни марз ҳукмро ноодилона ва аз мақомоти Тоҷикистон озодии рӯзноманигорро талаб карданд.

Муҳаммадҷавод Зариф, муовини раисҷумҳури Эрон, гуфт, ки бо "тавсия"-и раиси қувваи қазоия Ғуломҳусейн Муҳсини Эҷаӣ аз мансабаш истеъфо дод.

Вай рӯзи 3-юми март дар паёме дар шабакаи "X" навишт, Муҳсини Эҷаӣ "машварат додааст", ки ба донишгоҳ баргардад, "то аз фишори бештар ба ҳукумат пешгирӣ шавад".

"Дар шаш моҳи гузашта бо сахифтарин (қабеҳтарин) тавҳинҳо ва таҳдидҳо нисбат ба худ ва хонаводаам рӯбарӯ будам. Ҳатто дар даруни давлат низ талхтарин даврони хидмати чиҳилсоларо гузарондам," – афзудааст ӯ.

Зариф дар ҳукумати Ҳасани Рӯҳонӣ, раисҷумҳури пешини Эрон, дар мақоми вазири умури хориҷӣ кор кардааст.

Дар маъракаи интихоботии Масъуд Пизишкиён дар соли 2024 ҳузури намоён дошт ва пас аз пирӯзии ӯ ба мақоми муовини стратегии раисҷумҳур таъйин шуд.

Ин тасмим моҳҳо боз сарчашмаи баҳс аст. Мунтақидон мегӯянд, писарони Муҳаммадҷавод Зариф зодаи Амрико ҳастанду шаҳрвандии Эрон ва Иёлоти Муттаҳидаро доранд ва биноан ӯ наметавонад мансаби калидиро ишғол кунад.

Муҳаммадҷавод Зариф дар моҳи августи соли 2024 низ эълон карда буд, ки дар пайи фишорҳои марбут ба душаҳрвандии фарзандонаш истеъфо додааст. Бо вуҷуди баҳси тӯлонӣ дар Маҷлис ӯ дар мақоми худ монд.

Дар ҷашнвораи имсолаи “Оскар” филми “Анора”, сохтаи коргардони амрикоӣ Шон Бейкер, ҷоизаи филми беҳтаринро гирифт.

97-умин маросими супурдани ҷоизаҳои “Оскар” шоми 2-юми март дар Лос-Анҷелеси Амрико баргузор шуд.

Филми “Анора” дар бораи зани ҷавоне аз Бруклин ва писари сарватманди рус аст. Онҳо мехоҳанд, бо ҳамдигар издивоҷ кунанд, вале бо мухолифати хонаводаи ҷавон ва ҳамчунин хатарҳои дигар рӯбарӯ мешаванд.

Эдриен Броуди ва Майки Мэдисон, ки дар филми “Анора” нақшҳои асосиро бозидаанд, ҷоизаҳои беҳтарин бозигари мард ва беҳтарин нақши занро гирифтанд.

Шон Бейкер, ки ин филмро офаридааст, се ҷоизаи “Оскар”, аз ҷумла барои коргардонӣ ва бандубастро ба даст овард.

Пас аз “Анора”, ки дар умум панҷ ҷоизаи “Оскар” гирифт, филми “Бруталист” бо се ҷоиза бештарин ҷоизаҳоро соҳиб шуд.

Комиссияи марказии интихобот ва раъйпурсии Тоҷикистон натиҷаҳои ибтидоии интихоботи порлумонӣ ва маҷлисҳои маҳаллиро эълон кард.

Ба иттилои КМИР, Ҳизби ҳокими халқӣ-демократии Тоҷикистон, аз рӯйхати ҳизбӣ, бо касби 51,9 дарсади оро дар мақоми аввал қарор дорад. ҲХДТ аз рӯи ин рӯйхат дар порлумон 12 курсӣ хоҳад дошт.

Дар мақоми дувум бо касби 21 дарсади оро, Ҳизби аграрии Тоҷикистон, ҷой гирифтааст. Ин ҳизб дар порлумон соҳиби 5 курсӣ шуд.

Тибқи эълони КМИР, Ҳизби ислоҳоти иқтисодӣ 3 курсӣ, ҲСТ як курсӣ ва Ҳизби демократи Тоҷикистон як курсӣ ба даст овардаанд. Ҳизби коммунисти Тоҷикистон бе курсӣ мондааст.

Ба иттилои расонаҳои давлатӣ, дар интихоботи рӯзи 2-юми март 85,3 дарсади интихобкунандаҳо овоз додаанд.

Тасдиқи дурустии он аз манобеи мустақил имконпазир нест. Ба далели иҷоза надоштани хабарнигорон барои бозтоби корзори сиёсӣ маълум нест, ки ҳузури одамон дар нуқтаҳои раъйдиҳӣ бештар будааст ё камтар.

Дар интихоботҳои пешина ҳузури ками раъйдиҳандагон, овоздиҳии як нафар ба ҷойи чанд кас ва партофтани бастаи варақаҳои пуршуда ба сандуқҳои раъйдиҳӣ сабт шуда буд.

Намояндагони чанд ҳизбу созмони мухолифи ҳукумати Тоҷикистон дар хориҷа интихоботро "намоишӣ" донистанд. Ҷунбиши ислоҳот ва рушди Тоҷикистон, қароргоҳаш дар Амстердам, ба бойкот даъват кард. Раҳбари “Гурӯҳи 24”, ки фаъолияташ дар Тоҷикистон мамнуъст, интихоботро маҳкум намуд.

Ин интихоботи ҳафтуми порлумонӣ аз замони истиқлоли Тоҷикистон аст. Созмону кишварҳои ҳампаймони Тоҷикистон, аз ҷумла Созмони Ҳамкориҳои Шонгҳой ва Иттиҳоди Давлатҳои Мустақил, ҳамеша интихоботҳоро дар кишвар дурусту қонунӣ шумурдаанд.

Дафтари Ниҳодҳои Демократӣ ва Ҳуқуқи Инсон (ODIHR)-и САҲА ҳеч корзори сиёсиро дар Тоҷикистон мутобиқ ба меърёҳои байнулмилалӣ ва демокративу шаффоф надонистааст.

Як манбаъ дар ҳукумати Толибон дар гузаргоҳи Турхам ба бахши афғонистонии Радиои Озодӣ рух додани ин даргириро тасдиқ кард, аммо ҷузъиёти зиёд надод.

Як мақоми пулиси Покистон ба Радиои Машъал, бахши покистонии Радиои Озодӣ гуфт, ки дар ин даргирӣ се сарбози онҳо ва як ғайринизомӣ захмӣ шуданд.

Ин мақоми покистонӣ иддао кардааст, ки ҷанг аз сӯи нерӯҳои марзии Толибон оғоз шуд ва афроди Толибон "Посгоҳи бозрасии Аюб"-ро дар Турхам ҳадаф қарор доданд.

Табибони бемористони Ландикӯтал дар наздикии марз мегӯянд, ки ҷасади як ронандаи маҳаллӣ, ки дар ҷараёни даргирии ҷонибҳо кушта шуд, ба ин бемористон мунтақил шудааст.

Мардуми маҳал ба Радиои Машъал гуфтаанд, ки дар натиҷаи тирандозӣ, мардуми деҳаҳои атроф фирор кардаанд.

Ҳанӯз сабаби даргирии ахир миёни нерӯҳои амниятии Покистон ва Толибон дар марзи Турхам маълум нест. Аммо музокироти рӯзи якшанбеи ду ҷониб дар мавриди бозкушоии гузаргоҳи Турхам бенатиҷа поён ёфтааст.

Марзи Турхам аз 21 феврал ба ин сӯ барои рафтуомад баста аст. Ин муҳимтарин гузаргоҳ байни ду кишвар ба шумор меравад.

"Бо кӯмаки кормандони мо 7 мошин аз тарма раҳо гардид, хушбахтона, талафоти ҷонӣ нест",-омадааст дар хабарномаи ин ширкат.

Тибқи иттилои ширкати IRS, шаби гузашта дар шоҳроҳи Душанбе-Чаноқ 13 тарма фаромада ва бориши пуршиддати барф идома дорад. Баландии барф дар баъзе мавзеъҳо 60 сантиметр гузориш шудааст.

Ширкати IRS мегӯяд, ки бинобар хавфи резиши тарма, ҳаракати нақлиёт дар ин масир муваққат қатъ шудааст. "Баробари рафъ гардидани монеаҳои зикршуда ҳатман иттилоъ медиҳем",-гуфтааст IRS.

Оҷонси ҳавошиносии Тоҷикистон бориши барф ва боронро дар рӯзҳои 2-3 март дар аксари манотиқи Тоҷикистон пешбинӣ кардааст.

Ҳар сол дар охири фасли зимистон ва аввали баҳор фаромадани тарма ҳаракат дар роҳҳои Тоҷикистонро мушкил мекунад.

Кумисюни марказии интихобот ва раъйпурсии Тоҷикистон гуфт, ки овоздиҳӣ дар интихоботи порлумонӣ ба поён расид, вале аз касе арзу шикоят нагирифт.

Интихоботе, ки КМИР дар эъломияаш "шаффоф ва ошкоро" номид, рӯзи 2-юми март бе ҳузури намояндагони мухолифон, нозирони Созмони Амният ва Ҳамкорӣ дар Аврупо ва баъзе аз расонаҳои мустақили дохилӣ ва байнулмилалӣ баргузор шуд. Натиҷаи ибтидоӣ рӯзи 3-юми март эълон мешавад.

Ба иттилои хабаргузории давлатии "Ховар" танҳо дар шаш соати аввали раъйдиҳӣ 59 дарсади мардум овоз додаанд. Тасдиқи дурустии он аз манобеи мустақил имконпазир нест. Ба далели иҷоза надоштани хабарнигорон барои бозтоби корзори сиёсӣ маълум нест, ки ҳузури одамон дар нуқтаҳои раъйдиҳӣ бештар будааст ё камтар.

Дар интихоботҳои пешина ҳузури ками раъйдиҳандагон, овоздиҳии як нафар ба ҷойи чанд кас ва партофтани бастаи варақаҳои пуршуда ба сандуқҳои раъйдиҳӣ сабт шуда буд.

Намояндагони чанд ҳизбу созмони мухолифи ҳукумати Тоҷикистон дар хориҷа интихоботро "намоишӣ" донистанд. Ҷунбиши ислоҳот ва рушди Тоҷикистон, қароргоҳаш дар Амстердам, ба бойкот даъват кард. Раҳбари “Гурӯҳи 24”, ки фаъолияташ дар Тоҷикистон мамнуъст, интихоботро маҳкум намуд.

Ин интихоботи ҳафтуми порлумонӣ аз замони истиқлоли Тоҷикистон аст. Созмону кишварҳои ҳампаймони Тоҷикистон, аз ҷумла Созмони Ҳамкориҳои Шонгҳой ва Иттиҳоди Давлатҳои Мустақил, ҳамеша интихоботҳоро дар кишвар дурусту қонунӣ шумурдаанд.

Дафтари Ниҳодҳои Демократӣ ва Ҳуқуқи Инсон (ODIHR)-и САҲА ҳеч корзори сиёсиро дар Тоҷикистон мутобиқ ба меърёҳои байнулмилалӣ ва демокративу шаффоф надонистааст.

"Бритониё ҳамроҳи Фаронса ва эҳтимол як ё ду кишвари дигар бо Украина дар таҳияи нақшаи поён додан ба ҷанг кор хоҳанд кард. Сипас, тарҳро бо Иёлоти Муттаҳида дар миён мегузорем."

Ин изҳороти сарвазири Бритониё Кейр Стармер рӯзи 2-юми март дар суҳбат бо Би-би-сӣ садо дод.

Стармер ҳамзамон таъкид кард, ки барои ҳама гуна созиши сулҳ дар Украина замонати амниятии Амрико зарур аст. Яке аз масоиле, ки рӯзи 28-уми феврал дар Кохи Сафед мояи баҳси Владимир Зеленский, раисҷумҳури Украина ва Доналд Трамп, президенти Амрико шуд.

Қарор аст, ҳукумати Бритониё бо ҳузури раҳбарони аврупоӣ ва мақомоти баландпояи НАТО дар бораи амният ва сулҳ дар Украина ва афзоиши фишор болои Русия нишасте баргузор кунад.

Сарвазири Бритониё дар остонаи нишаст бо Зеленский мулоқот кард ва пас аз он гуфт, ки ба Украина 2,26 миллиард фунт (2,84 миллиард доллар) қарз медиҳанд.

Зеленский дар шабакаҳои иҷтимоӣ навишт, "ин қарз иқтидори дифоии Украинаро бештар мекунад ва аз ҳисоби даромаду дороиҳои бандмондаи Русия баргардонда хоҳад шуд."

Созмони "Хонаи Озодӣ" ё Freedom House дар гузориши солонааш аз бадтар шудани вазъи озодиҳои сиёсӣ ва ҳуқуқи маданӣ дар гӯшаҳои ҷаҳон хабар дод. Гузориш дар охири моҳи феврали имсол нашр шудааст.

Бар асоси ёфтаҳои ин созмони мустақар дар Амрико, дар соли 2024 шаст кишвар, аз ҷумла Тоҷикистон, шоҳиди бадтар шудани вазъи озодиҳо буда, танҳо 32 кишвар дар ин замина пешрафт доштаанд.

"Ҳодисаҳои соли 2024 дар Бангладеш, Сенегал ва Куриёи Ҷанубӣ нишон доданд, ки мардуми одӣ қудрати "не" гуфтан ба авторитаризм, ҳифзи ниҳодҳои озод ва ба ҷавобгарӣ кашидани раҳбарони худро доранд," -- гуфта шудааст дар гузориш.

Дар идома мехонем: "Дар ҳоле ки ояндаи Сурия номуайян мемонад, суқути ногаҳонии режими Башор Асад бори собит кард, ки ҳатто низомҳои шадидтарини худкома ҳам тағйирнопазир нестанд."

Зӯроварӣ ва саркӯби рақибони сиёсӣ ҳангоми интихобот, даргириҳои мусаллаҳонаи давомдор ва бештар шудани авторитаризм аз сабабҳои коҳиши озодӣ дар ҷаҳон номбар шудаанд. "Хонаи Озодӣ" ё Freedom House таҳдидҳои амниятӣ ва сахттар шудани саркӯбро дар ҳукуматҳои худкома аз чолишҳои ҷиддӣ дар соли 2025 медонад.

Ин созмон гуфтааст, барои касоне, ки ба арзишҳои демократӣ пойбанд ҳастанд, зарурист, ки натанҳо ба тақвияти сохторҳои демократии кишвар худ бикӯшанд, балки дар муқобили ҳамла ба демократия дар гӯшаҳои ҷаҳон ҳам биистанд.

Исроил вуруди ҳама гуна коло ва ёриҳоро ба Навори Ғазза боздоштааст.

Дафтари сарвазир Бенямин Нетаняҳу рӯзи 2-юми март ҳушдор дод, ки агар гурӯҳи тундрави "Ҳамос" пешниҳоди навро барои тамдиди оташбас напазирад, "пайомадҳои бадтаре" хоҳад дошт.

Гурӯҳи "Ҳамос" (аз сӯйи Амрико ва Иттиҳоди Аврупо созмони террористӣ дониста мешавад) дар вокунише гуфт, чунин рафтори Исроил "сокинони Ғаззаро гурусна мегузорад".

"Ҳамос" ин иқдомро “боҷгирӣ, ҷинояти ҷангӣ ва нақзи ошкорои созиши оташбас" номид.

Марҳилаи аввали оташбас миёни Исроил ва гурӯҳи “Ҳамос”, ки шомили афзоиши кумакҳои башардӯстона буд, рӯзи шанбе ба поён расид.

Ҳанӯз бар сари марҳилаи дувум, ки шомили озодии гаравгонҳои боқимонда дар ивзаи берун рафтани нерӯҳои исроилӣ ва барқарории оташбаси пойдор аст, тавофуқе ҳосил нашудааст.

Ҳукумати Исроил рӯзи 2-юми март эълон кард, ки аз пешниҳоди тамдиди оташбас дар Ғазза дар моҳи Рамазон ва иди Фисҳ ҳимоят мекунад.