Сироҷиддин Муҳриддин, вазири умури хориҷии Тоҷикистон, рӯзи 10-уми декабр дар як нишасти матбуотӣ дар Брюссел ба суолҳо дар бораи мушкили аккредитатсия ё парвонаи кори хабарнигорони Радиои Озодӣ посух дод. Ҳоло 11 хабарнигор ва корманди фаннии Радиои Озодӣ дар Душанбе аз ҳаққи кор маҳруманд.

Вазири умури хориҷии Тоҷикистон гуфт, “имсол ду дафъа бо Ҷейми Флай, президенти Радиои Аврупои Озод/Радиои Озодӣ мулоқот доштем. Моҳи октябр эътиборномаи ҳафт хабарнигор ва корманди фаннии Бахши Тоҷикии Радиои Озодиро тамдид кардем. Чаро ин вақти фарқкунанда гирифт ва шабеҳи дигар кишварҳо нест? Барои он ки муқаррароти кишвар чунин аст. Ҳар кишвар муқаррароти худро дорад."

Рӯзи 31-уми октябр, пас аз баёнияҳои бешумори созмонҳои байнулмилалӣ ва ватанӣ Вазорати умури хориҷии Тоҷикистон ба 6 хабарнигор парвонаи нимсола ва ба як нафар семоҳа дод. Мудирияти Радиои Аврупои Озод/Радиои Озодӣ дода шудани ин ҳафт парвонаи корро "назарфиребӣ" номид.

Сироҷиддин Муҳриддин дар идомаи суҳбаташ дар бораи аккредитатсияи хабарнигорон ба вазъи амниятӣ дахл кард ва гуфт, “Шумо медонед, мо рӯбарӯ бо Афғонистоне ҳастем, ки аз он ҷо мушкилоти зиёде таҳдид мекунад. Ва шумо медонед, ки дар муддати кӯтоҳи истиқлоли худ мо ҷанги шаҳрвандӣ доштем ва омилҳои зиёди дигаре ба амният ва суботи кишвар таъсир мекунанд. Аз ҳамин сабаб нақши васоити ахбори ом дар кишвар хеле муҳим аст. Ва журналистон ва намоянагони матбуот бояд ҳамаи фаъолиятҳои худро дар доираи қонунҳои мавҷудаи миллӣ анҷом диҳанд.”

Вазири умури хориҷии Тоҷикистон нагуфт, ки кай ба хабарнигорону кормандони фаннии Радиои Озодӣ парвонаи кор дода хоҳад шуд, вале афзуд, “мо бо хабарнигорон ва намояндагони Радиои Аврупои Озод/Радиои Озодӣ аллакай баҳсҳо кардем ва бо онҳо бисёр ҳамкории мусбат дорем. Мо беҳтарин талошамонро барои ҳамкории беҳтари оянда бо ин радио хоҳем кард."

Дар оғози моҳи ноябри имсол президенти Радиои Аврупои Озод/Радиои Озодӣ Ҷейми Флай бо раиси ҷумҳури Тоҷикистон Эмомалӣ Раҳмон мулоқот кард ва ду тараф вазъ ва шароити кори хабарнигорон ва кормандони Радиои Озодиро дар Тоҷикистон баррасӣ намуданд.

Қаблан аъзои Сенат, палатаи болоии порлумони Иёлоти Муттаҳидаи Амрико ва ду узви Конгресси Амрико аз мақомоти Тоҷикистон даъват карданд, ки масъалаи додани иҷозатномаи кор ба кормандони Бахши тоҷикии Радиои Аврупои Озод/Радиои Озодӣ дар Душанберо бар асоси қонунҳои дохилӣ ва конвенсияҳои байналмилалӣ баррасӣ ва ҳал кунанд.

Бори авал нест, ки раванди дарёфти иҷозатномаи кор боиси нигарониҳо мешавад. Дар соли 2016 низ пас аз нашри як мақола дар мавриди мақоми нави яке аз духтарони раиси ҷумҳур Эмомалӣ Раҳмон дар Вазорати умури хориҷӣ, ин вазорат аккредитасияи шаш корманди Радиои Озодиро бозхонд карда буд.

Радиои Озодӣ яке аз охирин манбаъҳои хабарии мустақил аст, ки бо гузориш додан аз воқеаҳое, ки расонаҳои давлатӣ аз онҳо хабар намедиҳанд, шунаванда ва бинандаи бешумор дорад. Шабакаи Ютюби он бо тақрибан 900 000 обуначӣ ва 200 миллион биниши видеоҳояш дар як соли гузашта дар Тоҷикистон маъруф аст. Сафҳаи фейсбукии он 184 000 пайрав дошта, танҳо видеоҳои он дар як сол 14 миллион бор дида шудаанд.

Вай рӯзи 24-уми феврал дар паёми видеоӣ гуфт, муфаттишон “ягон айб наёфтанд ва парвандаро бастанд.” Феълан барои як муддат аз ин кишвар берун шудааст.

Ин блогер, ки шаҳрвандии Тоҷикистон ва Русияро дошт, дар моҳи январи соли 2024 бо гумони “барангехтани кинаву адовати миллӣ ва паст задани шаъну шараф” дастгир шуд.

Кумитаи тафтишоти Русия он замон иддао кард, ки ӯ “бо нашру паҳни наворҳои саҳнасозишуда духтарони дорои чеҳраи славяниро таҳқир мекард ва шаъну шарафи онҳоро паст мезад.”

Баъзе аз расонаҳои Русия гуфтанд, гап сари наворе меравад, ки блогер гуё дар он гуфтааст “ба зудӣ ҳамаи духтарони рус аз мо мешаванд”. Салмон (Ҷумъабой) Раҷабзода ин иддаоро беасос хонда буд.

Худаш гуфт, тамоми муддате, ки дар ҳабс қарор дошт, барои исботи бегуноҳии худ талош кард: “Бовар доштам, ки бегуноҳиям исбот мешавад. Бисёр қонунҳоро хондам. Бо вакилони хуб кор кардам. Ба мақомоти Русия шикоят менавиштам. Ба хондани китобҳои ҳуқуқӣ машғул будам.”

Embed ба дигарон фиристед

Блогери тоҷик аз боздоштгоҳе дар Русия раҳо шудааст

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:01:11 0:00

Боздошти блогер, ки худи ӯ ва ҳомиёни ҳуқуқ онро ба ғайрирус буданаш рабт медоданд, соли гузашта дар расонаҳо сарусадои зиёде ба по кард. Мақомот ва расонаҳои Русия ҳангоми арзёбии қазияи ӯ ҳамеша ба тоҷик буданаш ишора мекарданд, аммо хабари бекор шудани парвандаашро надоданд.

Салмон (Ҷумъабой) Раҷабзода, дар саҳифаҳояш дар Инстаграм ва ТикТок дар мавзуъҳои гуногун навору пурсишҳои ҳазломез мегузорад. Вай пеш аз боздошт гуфта буд, ки тамоми наворҳояш саҳнасозист ва касеро таҳқир ё нисбат ба нафаре бадрафторӣ накардааст.

Баъди боздошт мақомоти Русия шаҳрвандии ин зодаи Тоҷикистонро бекор кардаанд, аммо Салмон (Ҷумъабой) Раҷабзода мегӯяд, тибқи қонун ӯ бегуноҳ эътироф шуд ва бояд шиносномаи русияш барқарор шавад.

Аммо барои як муддат аз ин кишвар берун шудааст. Мегӯяд, бо вуҷуди исботи бегуноҳӣ дар Русия худро чандон амн эҳсос намекард: “Каме истироҳат мекунем. Гуфтанд, хатар нест, вале фикр кардам, ки беҳтар аст, як муддат аз Русия бароям.”

Дар гузашта ду блогери тоҷик дар Русия барои нашру паҳни аксу наворҳои ҷанҷолӣ ба муддати аз 10 моҳ то ду сол зиндон маҳкум шуда буданд.

Навор дар Инстаграм:

Мушакҳо аз ҳавопаймоҳои бомбафкани навъи Ту-95 аз шаҳри Энгелски вилояти Саратов партоб шуданд.

Радио Свобода, бахши русии Радиои Озодӣ, навишт, ҳавопаймои бесарнишини навъи “Шаҳид” тамоми шаб дар фазои чанд вилояти Украина дида шуд.

Дар вилоятҳои Киев, Харков, Днепропетровск, Херсон, Донетск, Наколаев, Житомир, Виннитса ва Черниҳов чанд бор хатари афтодани бесарнишинҳоро эълон карданд.

Дар вилояти Киев як зан маҷруҳ шуда, чанд манзил вайрон гашт.

Вазорати мудофиаи Русия дар бораи ҳамлаи паҳподҳо аз тарафи Украина хабар дода, иддао кардааст, ки аксари онҳоро дар фазои вилояти Брянск безарар гардонд.

Қарор дар ин бора рӯзи 25-уми феврал содир шуд.

Ягона ниҳоди содиркунандаи фатво дар Тоҷикистон нисоби закотро 36 ҳазор сомонӣ таъйин кардааст. Аз ин пул бояд 900 сомонӣ закот дода шавад.

Фитри рӯза барои як нафар 8 сомонист. “Садақаи фитр танҳо ба ниёзмандону маъюбон ва ятимон дода шавад,” – гуфта шудааст дар қарор.

Шӯрои уламо барои касоне, ки узри шаръӣ доранд ва наметавонанд, рӯзаи моҳи Рамазонро бигиранд, 480 сомонӣ барои 30 рӯз фидя муқаррар кард.

Гирифтани рӯза аз рукнҳои панҷгонаи дини Ислом ба шумор меравад. Зиёда аз навад дарсад аз аҳолии Тоҷикистон пайрави ин дин ҳастанд, вале солҳои охир мақомот аз афзоиши ифротгароии динӣ нигарон буда, садҳо нафарро бо ин гумон дастгиру зиндонӣ кардаанд.

Созмону кишварҳои ғарбӣ пайваста аз Тоҷикистон мехоҳанд, ки мубориза бо ифротгароии исломӣ ва терроризмро барои саркӯби дигарандешон ва мухолифони низом истифода накунад.

Намояндагони IRS, масъули нигоҳубин ва ҷамъоварии пул дар ин роҳ хабар доданд, ки ҳодиса субҳи 25-уми феврал дар километри 78-уми ин шоҳроҳ, рух дод.

Ба гуфтаи IRS субҳи имрӯз дар чанд мавзеъ тарма фаромада ва боиси қатъи муваққати ҳаракати мошинҳо дар ин масир шудааст.

Ин дар ҳоле аст, ки Оҷонсии обуҳавошиносии Тоҷикистон аз резиши шадиди барфу борон дар рӯзҳои 25-ум ва 26-уми феврал пешгӯӣ хабар дод. Кумитаи ҳолатҳои фавқулода ҳам ба сокинон тавсия додааст, ки дар вазъи номусоиди обу ҳаво дар минтақаҳои кӯҳӣ эҳтиёткор бошанд.

Ҳар сол дар фасли зимистону баҳор фаромадани тармаву сангпора дар роҳи Душанбе-Хуҷанд сабт шуда, борҳо боис ба талафоту бастани роҳ гаштааст.

Ҳукумат масъулияти нигоҳубини роҳи пулакиро аз соли 2009 ба ширкати IRS додааст. Соҳиби ширкат маълум нест.

Ба гузориши “Рейтерс”, ин тасмимро вазирони корҳои хориҷии Иттиҳоди Аврупо рӯзи 24-уми феврал гирифтанд.

Ин даври 16-уми таҳримҳои иқтисодӣ алайҳи Русия аст.

Дипломатҳои аврупоӣ ҳафтаи гузашта гуфта буданд, ки таҳримҳо воридоти алюминийи Русия ва бахшҳои дигар, аз ҷумла 73 киштиро ҳадаф қарор медиҳанд.

Гуфта мешавад, мақсад аз ин таҳримҳо маҳдуд кардани сарчашмаи даромади Русия ва суст кардани зарфиятҳои ҷангии он аст.

Ҳамлаи Русия ба Украина се сол пеш, 24-уми феврали соли 2022, оғоз шуд.

Ширкатдорон бо маҳкум кардани ҳамлаи Русия ба Украина умед бар он мебастанд, ки ҷанг ба зудӣ поён дода шавад.

Раймундас Кароблис, сафири Иттиҳоди Аврупо дар Тоҷикистон, рӯзи 24-уми феврал гуфт: "Русия нақша дошт, ки дар се рӯз Украинаро ишғол кунад. Имрӯз аз ҷанг се сол мегузарад ва Украина назар ба моҳи феврали соли 2022 нерӯмандтар шудааст. Тамоми Аврупо дар пушти Украина аст."

Дар поёни ин ҳамоиш изҳороти муштараки сафирони Фаронса, Олмон ва Бритониё дар Тоҷикистон нашр шуд.

Дар он гуфта шудааст, ки "аз ҳама бештар Украина сулҳ мехоҳад ва бе ҳузури Украина ва Аврупо ҳеч гуна тасмим гирифта нахоҳад шуд. Танҳо сулҳи ҳамаҷониба, одилона ва пойдор барои Украина... метавонад асоси барқарорсозии амнияти байнулмилалӣ гардад."

Русия се сол пеш, 24-уми феврали соли 2022, ба Украина ҳамла кард.

Бархе пойгоҳҳо талафоти Русияро дар ин ҷанг бештар аз 160 ҳазор нафар медонанд. Бахши русии Би-би-сӣ ва “Медиазона” то имрӯз рӯйхати 95 ҳазору 328 касро нашр кардаанд.

Талафоти ҷониби Укрина дар ин ҷанг беш аз 124 ҳазор тан дар миёни шаҳрвандон ва зиёда аз 45 ҳазор нафар дар миёни низомиён гуфта мешавад.

Мусобиқаи наврасон аз рӯи 14 дараҷаи вазнҳо байни муштзанҳои панҷ кишвар - Қазоқистон, Қирғизистон, Русия, Тоҷикистон ва Узбекистон – рӯзҳои 20-23-юми феврал дар шаҳри Уралски Қазоқистон баргузор шуд.

Медалҳои тилоро аз дастаи Тоҷикистон Беҳрӯз Умаров ва Амир Нозимов гирифтанд. Беҳрӯз, ки дар вазни то 48 кило бар ҳамаи рақибонаш дастболо шуд, ба финал роҳ ёфт. Вай дар рақобати ниҳоӣ Роман Соловёвро аз Русия шикаст дод.

Амир дар вазни то 75 кило дар финал бар Мирхон Дукееви қазоқ пирӯз шуд.

Ба ғайр аз ду муштзани тоҷик, инчунин дар ҳашт вазн варзишгарони қазоқ - Айторе Каирбеков (44 кг), Бекхон Қодирбек (50 кг), Асилхон Газиз (52 кг), Жанарис Дуйсенбой (54 кг), Диас Сабит (60 кг), Куаниш Амонқул (70 кг), Еркебулан Алӣ (80 кг) ва Нурбек Сержанули (+80 кг) - ғолиб гаштанд. Дар чаҳор вазни дигар муштзанҳои қирғиз – Муслим Паншер (46 кг), Зубайр Акрамов (57 кг), Кутман Дуйшеналиев (63 кг) ва Абубакр Дуйшеев (66 кг) - ҷойҳои аввалро азони худ карданд.

Ғолибони мусобиқа дар ҳар як вазн бо медали тило, диплом, 100 ҳазор танга (19 доллари ИМА), iPhone-15 мукофотонида шуданд. Ба барандагони медалҳои нуқраю биринҷӣ мутаносибан ҷоизаҳои пулӣ ба маблағи 50 ҳазор ва 20 ҳазор танга, инчунин телефонҳои Samsung ва Redmi тақдим гардид.

Дар ин бора дафтари матбуоти ҳукумати Қирғизистон рӯзи 24-уми феврал хабар дод. Мақомот дар Тоҷикистон ҳанӯз иттилое нашр накарданд.

Гуфтугӯйи телефонии сарвазирони ду кишвар дар ҳолест, ки мақомоти Тоҷикистон ва Қирғизистон рӯзи 21-уми феврал созишномаи ниҳоии таъйини хати марзро имзо карданд.

Ин ҳуҷҷат бояд барои баррасӣ ба порлумон ва сипас барои имзо ба президентҳои ду кишвар пешниҳод шавад, вале маълум нест кай. Ҷузъиёти санад низ расонаӣ нашудааст.

Тоҷикистон ва Қирғизистон тақрибан ҳазор километр марз доранд. Номуайянӣ дар сарҳад дар солҳои 2021 ва 2022 сабаби даргириҳои хунин шуд ва аз ҳарду ҷониб даҳҳо куштаву захмӣ бар ҷой гузошт.

Вазорати корҳои дохилӣ ва ниҳодҳои дигари интизомии Тоҷикистон дар бораи боздошт ва иттиҳоми зидди Фарҳод Неъматов расман шарҳе надоданд.

Чанд манбаи огоҳ аз қазия рӯзи 24-уми феврал ба Радиои Озодӣ гуфтанд, ки Фарҳод Неъматов ба пайравӣ аз "Ҳизби Таҳрир", созмони динии фаъолияташ мамнуъ дар Тоҷикистон, гумонзад шудааст.

Баъзе аз пайвандонаш ин фарзияро инкор карданд, вале дар саҳифаҳои ӯ дар Фейсбук ва шабакаҳои дигари иҷтимоӣ чанд матлаб дар бораи "Ҳизби Таҳрир" ва ташкили хилофат нашру паҳн шудааст. Фарҳод Одинаев, як фаъоли мухолифон, мегӯяд, Неъматов бештар матолиби танқидӣ менавишт.

Яке аз пайвандони Фарҳод Неъматов рӯзи 24-уми феврал ба Радиои Озодӣ гуфт, таҳқиқи парванда ҷараён дорад. "То ин дам се бор хабар гирифтем. Барояш хӯрок бурдем. Аҳволаш хуб аст, шикоят надорад, аммо вакили мудофеъ ҳам надорад. Намедонем, чӣ хоҳад шуд," – гуфт мусоҳиби мо. Ба далели амниятӣ номаш навишта намешавад.

Вай афзуд, мақомот се духтари Фарҳод Неъматовро барои парасторӣ ба наздиконаш супурдаанд.

Неъматов қаблан бо зану фарзандонаш дар Украина мезист ва баъд аз ҷанги Русия ба шаҳри Гётеборги Шветсия рафт. Чанд дафъа ба гирифтани ҳаққи паноҳандагии сиёсӣ муроҷиат карда, посухи мусбат нагирифт.

Ӯ зодаи деҳаи Хистеварзи ноҳияи Бобоҷон Ғафуров аст. Соли 2019 ҳамроҳи зану фарзандонаш аз Тоҷикистон берун шудааст.

Урсула фон дер Лейен, раиси Кумисюни Аврупо, гуфт, "имрӯз дар Киев ҳастем, чун Украина Аврупо аст. Ин сарнавишти Аврупо аст."

Владимир Зеленский, раисҷумҳури Украина, гуфт, "роҳбарони давлатҳо ҳузурӣ ва маҷозӣ соҳибихтиёрӣ ва тамомияти арзии моро пуштибонӣ мекунанд. Ҳамаи мо медонем, ки ин ҷанги беасос ва ҷиноии Русия алайҳи Украина аст."

Дар ин рӯз дар пойтахти чанд кишвари аврупоӣ раҳпаймоиҳои мухолифони таҷовузи Русия ба хоки Украина барпо шуд.

Вишасти вазирони корҳои хориҷии Иттиҳоди Аврупо дар Брюссел бо як дақиқа сукут ба ёди қурбониҳои ҷанг дар Украина оғоз ёфт.

Президент Владимир Зеленский нақши украиниҳоро дар муқовимат ба артиши русӣ чун "се соли қаҳрамонии комил" ситоиш кард.

Дар ҳамин ҳол, шаби 23 ба 24-уми феврал Русия бо 185 паҳподи “Шаҳид” Украинаро ҳадаф қарор дод. Мақомоти ҳарбии Украина гуфтанд, ки дар натиҷаи ин ҳамла дар вилоятҳои Днепропетровск, Одесса, Киев ва Хмелнитск биноҳои маъмурӣ ва истиқоматӣ осеб дидаанд.

Изҳороти ӯ рӯзи 23-юми феврал, баъд аз эълони пирӯзии Эътилофи марказу ростгарои демократҳои масеҳӣ ва муҳофизакор садо дод.

Мертс, ки дар гузашта ҷонибдори ашаддии НАТО буд, дар бораи ояндаи ин созмони низомӣ изҳори шубҳа кард. НАТО пас аз Ҷанги Дуюми Ҷаҳон такягоҳи ҳарбии Ғарб дониста мешуд.

“Барои ман тақвияти ҳарчи зудтар ва ҳадди имкони Аврупо дар авлавият аст, то қадам ба қадам ба истиқлол аз Иёлоти Муттаҳида даст ёбем,” – гуфт Фридрих Мертс.

Вай афзуд, дар робита бо он ки аз “Амрико чиро бояд интизор шуд”, барояш ҳама чиз маълум аст: “Баъд аз нашри изҳороти Доналд Трамп дар ҳафтаи гузашта, маълум аст, ки Амрико ба ояндаи Аврупо дар маҷмуъ бетафовут аст”.

“Мо дар охири моҳи июн бояд барои баргузории нишасти НАТО омода шавем ва барои ман ҷолиб аст, ки оё ҳанӯз ҳам дар бораи шакли имрӯзаи НАТО суҳбат мекунем ва ё дар фикри эҷоди ҳарчи зудтари тавонмандиҳои мустақилонаи дифоии Аврупо мешавем?” -- гуфт Мертс.

Эътилофи Мертс дар интихоботи рӯзи 23-юми феврал бо 28,5 дарсади овозҳо пешсаф шуд, вале ин ҳам барои таъсиси ҳукумат дар Олмон кофӣ нест.

Ҳамзамон дар бисёре аз гӯшаҳои Аврупо аз он изҳори қаноатмандӣ карданд, ки ҳизби ростгарои “Алтернатива барои Олмон” ё AfD ҳарчанд дар ҷойи дуюм қарор гирифт, ба ҳукумат роҳ намеёбад.

Ҳизби сотсиал-демократи садри аъзам Олаф Шолтс ва ҳизби Сабзҳо номзад барои эҷоди эътилоф бо Эътилофи марказу ростгарои демократҳои масеҳӣ ва муҳофизакор буда метавонанд.

Ҳизби Шолтс дар ин интихобот назар ба чор сол пеш 10 дарсад камтар овоз гирифтааст.

Раисҷумҳури Украина рӯзи 24-уми феврали имсол дар паёме се соли гузаштаро "қаҳрамонии комили украиниҳо" номид.

Владимир Зеленский гуфт: "Ман бо Украина ифтихор мекунам. Ба ҳар касе, ки аз он ҳимояту пуштибонӣ мекунад, сипос мегӯям. Ва ба ҳар касе, ки барои Украина кор мекунад. Хотираи касоне, ки барои давлату халқи мо ҷони худро фидо кардаанд, поянда бошад."

Тибқи оморе, ки раисҷумҳури Украина гуфт, дар ин муддат камаш 46 ҳазор сарбози украинӣ кушта ва тақрибан 380 ҳазор тан захмӣ шуданд.

Мақомот ва расонаҳои ғарбӣ кушташудаҳо ва захмиёни Русияро дар се соли ҷанг беш аз 700 ҳазор нафар ҳисоб кардаанд.

Ин масъули ҳукумати Толибон, ки ба Узбекистон сафар карда буд, 23 феврал дар ин бора бо хабарнигорони афғон суҳбат кард.

Мулло Бародар гуфт, ки ба зудӣ ҳайати техникӣ аз Узбекистон барои омӯзишҳои фаннии ин хати оҳан ба Афғонистон сафар мекунад.

Ӯ афзуд, ки хароҷоти ин хати оҳанро Узбекистон пардохт мекунад ва даҳ рӯз пас аз такмили арзёбиҳо, кори амалӣ оғоз хоҳад шуд.

Дар ҳоли ҳозир интиқоли бору коло бо қатора аз Афғонистон ба Осиёи Миёна тариқи роҳи оҳани Ҳайратон-Мазори Шариф, анҷом мешавад.

Хати оҳани Ҳайратон-Мазори Шариф 75 километр дарозӣ дорад ва дар соли 2010 бо сармояи Бонки осиёии рушд такмил шуд.

Шохаи низомии “Ҳизбуллоҳ”-ро ИМА ва Иттиҳоди Аврупо террористӣ медонанд.

Ҳасан Насруллоҳ ним соли пеш дар ҳамлаи Исроил дар таҳхонаи як бинои баландошёна дар Бейрут кушта шуд.

Дар маросими ҷанозаи Ҳасан Насруллоҳ ҳазорон нафар ширкат кардаанд.

Али Дамуш, намояндаи “Ҳизбуллоҳ” гуфтааст, ки дар маросими ҷанозаи Ҳасан Насруллоҳ 800 намоянда аз 65 кишвар ҳузур доштанд.

Дар миёни ин афрод Муҳаммад Қолибоф, раиси порлумони Эрон ва Аббос Ароқчӣ, вазири корҳои хориҷии ин кишвар иштирок доштаанд.

Раҳбари “Ҳизбуллоҳ” рӯзи 24-уми сентябри соли 2024 дар ҳамлаи Исроил кушта шуда буд. Ӯ беш аз 30 сол раҳбари ин гурӯҳ буд, ки бо Исроил дар ҳоли ҷанг қарор дошт.

“Ҳизбуллоҳ” моҳи октябри соли 2023 эълон кард, ки бо ҳимоят аз ҲАМОС ба Исроил ҳамла мекунад. Ин гурӯҳ моҳҳо Исроилро мушакборон кард. Исроил ба хоки Лубнон барои нобудии “Ҳизбуллоҳ” ҳамла кард. Дар ин ҳамла садҳо нафар кушта шуд.

Охири соли гузашта бундестаг, порлумони Олмон ба садри аъзами ин кишвар изҳори нобоварӣ кард. Ин боис шуд, ки иттиҳоди ду ҳизби порлумонӣ барои тасвиби буҷа ихтилоф пайдо карданд ва пош хурданд. Интихобот бояд моҳи сентябри соли 2025 баргузор мешуд, вале бо сабаби нобоварӣ ба Олаф Шолтс, садри аъзами Олмон он пеш аз муҳлат баргузор мешавад.

Дар ин интихобот ҳафт ҳизби бузург ва 22 ҳизбҳои хурд барои соҳиби курсӣ шудан дар порлумон мубориза мебаранд.

Бар асоси назарпурсиҳо, Ҳизби сотсиал-демократ дар ҷои аввал ва ҳизби “Алтернатива барои Олмон” дар ҷои дуюм аст.

Ҳизби “Алтернатива барои Олмон” зидди муҳоҷирон ва тарафдори Русия аст. Агар ин ҳизб бо як ҳизби дигари порлумони иттиҳод бандад, имкон дорад, ки сиёсати Олмонро дигар кунад.

Бенямин Нетаняҳу, сарвазири Исроил дар баёнияе гуфтааст, то кафолат дода нашавад, ки “гаравгонҳои дигар бе баргузории ҳамоиши таҳқиромез” озод мешаванд, зиндониёни фаластиниро озод намекунанд.

ҲАМОС, ки дар Иттиҳоди Аврупо ва Амрико созмони террористӣ шинохта мешавад, гаравгонҳоро зери садои мусиқии таблиғотӣ ва шиорҳои зидди мақомоти Исроил озод карда буд.

Дар баёнияи сарвазири Исроил гуфта шудааст, ки ин тасмим пас аз он гирифта шуд, ки ҲАМОС “бандҳои созишномаи отшабасро нақз кард, шарафи гаравгонҳоро паст зад ва онҳоро бо ҳадафи таблиғотӣ истифода бурд”.

Шаш гаравгоне, ки ҲАМОС рӯзи 22-юми феврал раҳо кард, аз охирин гаравгонҳои зинда буданд, ки дар марҳилаи аввали оташбас раҳоиашон дар назар гирифта шуда буд.

Намояндагони ҲАМОС Исроилро ба нақзи отшабас айбдор карданд, ки ба аҳдаш вафо накард ва рӯзи шанбе маҳбусонро ба наздиконашон насупурд.

Рӯзи 15-уми январ Исроил ва ҲАМОС бо кумаки кишварҳои миёнарав ба созиши оташбас расиданд. Раҳоии гаравгонҳои исроилӣ аз Ғазза ва озод сохтани зиндониёни фаластинӣ аз Исроил аз шартҳои ин созиш буд.

ҲАМОС рӯзи 7-уми октябри соли 2023 ба Ғазза ҳамла карда, 1200 нафарро кушт ва беш аз 200 нафарро гаравгон гирифт.

Исроил дар посух ба Ғазза ҳамла кард, ки беш аз 47 ҳазор нафар дар ҳамлаҳои ин кишвар кушта шуданд.

Бархе кишварҳо ва созмонҳои байналмилалӣ Исроилро ба наслкушӣ айбдор карданд. Мақомоти ин кишвар наслкушии фаластиниҳоро рад карданд.

Созмони ифротии Ҳамос, ки Амрикову Иттиҳоди Аврупо онро гурӯҳи террористӣ меноманд, 6 гаравгони дигари исроилиро раҳо кардааст.

Қарор аст, дар иваз 602 зиндонии фаластинӣ, аз ҷумла гунаҳкорон дар ҷиноят ва боздоштшудагон дар Навори Ғаззаро раҳо намояд. Гаравгонони раҳошуда аз шумораи гурӯҳи 33 нафарие ҳастанд, ки қарор буд, дар марҳилаи аввали табодул ва созиши оташбас дар Ғазза озод карда шаванд. Яке дигар аз гаравгонон бояд дертар раҳо шавад.

Исҳоқ Ҳерзог, раиси ҷумҳури Исроил, дар як баёнияе дар шабакаи иҷтимоии Х “озодии онҳо аз умқи дӯзах ва оғози дармону шифо дар канори оилаҳои дӯстдоштаашон”-ро табрик гуфт. Созиши оташбаси чандмарҳила рӯзи 19-уми январ ҳукми иҷро гирифт, вале музокира дар бораи марҳилаи дуввум ва муҳими он оғоз наёфтааст, ки ҳадафи он батамом поён додан ба ҷанг дар Ғазза аст.

Муноқиша байни Исроилу Ҳамос моҳи октябри соли 2023 сар зад ва баъди онки ҷангӯёни Ҳамос бо ҳамла ба маҳаллаҳои ҷанубии Исроил 1200 нафар бахсус ғайринизомиён кушта шуданд. Ҳамос ҳамчунин 251 исроилиро гаравгон гирифт.

Эмомалӣ Раҳмон, раиси ҷумҳури Тоҷикистон аз фармондеҳони нерӯҳои мусаллаҳ дигарбора хост, "дар ин замони ноором" ойинномаҳои ҳарбӣ, интизому тартибот ва волоияти қонунро дар тамоми ҷузъу томҳои низомӣ таъмин кунанд.

Ӯ рӯзи 22-уми феврал ҳангоми суханронӣ дар раҳпаймоии низомӣ ба муносибати 32-юмин солгарди таъсиси артиши Тоҷикистон гуфт, фармондеҳон ва мақомоти ҳифзи ҳуқуқ “вазифадоранд, ки бо дарназардошти вазъи зудтағйирёбандаи ҷаҳон, ба масъалаҳои омодабошии доимӣ, таъминоти ҷузъу томҳо бо техникаву таҷҳизоти муосири ҳарбӣ ва фароҳам овардани шароити боз ҳам беҳтари зиндагӣ ва хизмат барои ҳайати шахсӣ эътибори бештар диҳанд.”

Нерӯҳои мусаллаҳи Тоҷикистон барои вуҷуди бадрафторӣ ва зӯргуӣ бо сарбозони навомада, худкушӣ дар байни онҳо ва таъмини номуносиби сарбозон пайваста танқид мешавад. Ҳамин моҳ Оҷонсии мубориза бо фасод гуфт, парвандаи 78 нафар мансабдорро барои тасарруфи беш аз 120 миллион сомонии вазорати дифо ба додгоҳ фиристодааст. Ба гуфтаи мақомот, ин пули зарурӣ барои либосу хӯроку нигоҳубини сарбозон ва амнияти кишвар бо мусоидати чанде аз масъулон дуздида шудааст.

Доналд Трамп, раиси ҷумҳури Амрико, рӯзи 21-уми феврал генерал Чарлз Браун, сардори Ситоди марказии нерӯҳои мусаллаҳ ва панҷ адмиралу генерали дигарро аз мақомҳояшон сабукдӯш кард.

Дар бораи аз мақомаш гирифтани Чарлз Браун, ки ӯро Ҷо Байден, раиси ҷумҳури собиқ соли 2023 таъйин кард, Доналд Трамп дар шабакаи иҷтимоии худаш Truth Social хабар дод. Генерали сиёҳпӯсти амрикоӣ, ки дуввумин генерали африқоитабор дар ин мақом буд, бояд то соли 2027 дар мақомаш мемонд.

Вазорати дифои Амрико дар як баёнияи расмӣ гуфт, ки Доналд Трамп, генерал Дан Разин Кейнро ба мақоми сардори Ситоди марказии нерӯҳои мусаллаҳи Амрико пешбарӣ хоҳад кард. Дан Кейн, ки халабони собиқи ҳавопаймоҳои ҷангии F-16 аст, дар Хадамоти Ҷосусии Амрико низ кор кардааст.

Барканории генералу адмиралҳои амрикоӣ бахше аз барномаи вазири дифои нав Пит Ҳегсет аст, ки гуфтааст, артиши Амрикоро аз барномаи махсуси ҷалби аққалиятҳо ва гурӯҳҳое, ки дар гузашта зери табъиз будаанд, пок мекунад.

Ба иттилои Федератсияи футболи Тоҷикистон, дар доираи ин ҷамъомад тими миллии занонаи кишвар дар шаҳри Ҷидда бо дастаи мунтахаби Арабистони Саудӣ ду бозии дӯстона анҷом медиҳад.

Ин бозиҳо дар рӯзҳои FIFA (Федератсияи байнулмилалии футбол) – 23-юм ва 26-уми феврал дар варзишгоҳи «Кинг Абдуллоҳ Спортс Сити» баргузор шуда, соати 19:30 бо вақти маҳаллӣ (соати 21:30 бо вақти Душанбе) оғоз меёбанд.

Бояд зикр намуд, дастаи мунтахаби занонаи Тоҷикистон дар марҳилаи интихобии Ҷоми Осиё-2026, ки аз 23-юми июн то 5-уми июли имсол баргузор мешавад, иштирок мекунад. Рақибони мунтахаби Тоҷикистон дар даври интихобӣ рӯзи 27-уми март дар қуръакашӣ маълум хоҳанд шуд.

Ба ҳисоби онҳо, 16 ҳазору 171 нафар аз кушташудаҳо маҳбусон буданд. Теъдоди зиндониёни кушташуда дар ҷанг метавонад аз ин бештар бошад, чун хабарнигорон танҳо он маҳбусони кушташударо ба ҳисоб гирифтанд, ки ҳукмашон аз манобеи боз дастрас шудааст.

Дар пажӯҳиш гуфта мешавад, "маҳкумшудагон то сеяки талафоти артиши Русияро дар се соли ҷанг ташкил медиҳанд."

Ба ҳисоби хабарнигорон, зиёда аз нисфи қурбониён аз тарафи Русия то замони ҳамла ба Украина ба артиш ягон робита надоштанд. Онҳо баъди ҳамла ба Украина бо Вазорати дифои Русия шартнома бастанд. Рӯзноманигорон аниқ кардаанд, ки баъд аз октябри соли 2023, талафот дар миёни ихтиёриён зиёд шудааст.

Андрей Белоусов, вазири дифои Русия моҳи декабри соли гузашта тасдиқ карда буд, ки аз оғози соли 2024, зиёда аз 400 ҳазор нафар бо ин ниҳод шартнома бастанд.

Охирин рақами расмии Вазорати дифои Русия, ки моҳи сентябри соли 2022 интишор карда буд, гуфта мешавад, ки шумори кушташудагон 5937 нафар будааст.

Русия дар моҳи феврали соли 2022 ҳамлаи беасосро ба Украина оғоз кард. Даргирӣ то ҳол идома дорад.

Ба гузориши The Guardian, Луис Рубиалес ҳаққи тамос ва ҳамчунин наздик шудан ба футболбоз Ҷенни Эрмосоро надорад.

Пештар додситонӣ барои Луис Рубиалес аз 2 то 2,5 соли зиндон талаб карда буд.

Қазияи мазкур ду сол пеш ва баъди ғалабаи тими мунтахаби футболи духтаронаи Испания дар Қаҳрамонии ҷаҳон сар зад. Он вақт Луис Рубиалес баъди пирӯзии дастаи духтарона, дар маҳзари ом Ҷенни Эрмосоро бӯсид. Ин кор вокунишҳои зиёдро дар бораи озори ҷинсӣ дар варзиш ба миён овард.

Худи Рубиалес иттиҳоми озори ҷинсиро рад кард. Эрмоси 33-сола баъди ин кор дар Инстаграм навишт, амали президенти Федератсияи футбол ба ӯ писанд наомад.

Марко Рубио 20-уми феврал гуфт, дар дидори ахираш бо Сергей Лавров дар Арабистони Саудӣ таъкид кардааст, ки вохӯрии Трамп ва Путин "то даме, ки надонем дар бораи чӣ суҳбат мешавад," баргузор нахоҳад шуд.

Рӯзи 18-уми феврал намояндагони Амрико ва Русия дар Арабистон тавофуқ карданд, ки барои гуфтугӯ дар бораи поёни ҷанг дар Украина гуруҳҳои корӣ ташкил мекунанд. Ҳам Трамп ва ҳам Путин аз тамоюлашон барои вохӯрӣ хабар доданд.

Марко Рубио дар мусоҳиба бо рӯзноманигори амрикоӣ Кэтрин Херриҷ, ки мустақиман аз шабакаи X пахш шуд, чунин гуфт: "фикр мекунам, ки замони баргузории ин мулоқот аз бисёр ҷиҳат ба он вобаста хоҳад буд, ки оё мо метавонем дар хатми ҷанг дар Украина ба пешрафт ноил мешавем ё не. Агар мо ин корро карда тавонем, дар ин вохӯрӣ созишнома имзо мешавад ва ба назари ман ҳама бояд инро ҷашн гиранд, ки Трамп сулҳҷӯ аст."

Доналд Трамп борҳо гуфтааст, мехоҳад ба ҷанг дар Украина ҳарчӣ зудтар поён диҳад, аммо шеваи пешгирифтаи ӯ нигаронии Киев кишварҳои Аврупоро ба миён овардааст. Украина ва аврупоиҳо аз он тарс доранд, ки Вашингтон бидуни дар назар гирифтани манофеи онҳо бо Русия созиш мекунад.

Президенти Зеленский гуфтааст, дар гуфтугӯ бо намояндаи Трамп, вазъият дар ҷабҳа, бозгардонии ҳама асирони украинӣ ва кафолати амниятӣ барои Укринаро баррасӣ кардааст.

"Ҳақиқати Аврупо" навиштааст, Зеленский ба Кит Келлог гуфтааст, Киев омода аст, ки "дар бораи сармоягузорӣ ва амният" бо раиси ҷумҳури Амрико созишномаи таъсиргузор имзо кунад.

Ба гузориши расонаҳои хабарӣ, маъмурияти Доналд Трамп пештар ба Украина пешниҳод карда буд, ки 50 дарсади захираҳои табии худро дар ихтиёри Вашингтон қарор диҳад. Вале Зеленский аз имзои ин санад даст кашидааст.

Майк Уолтс, мушовири амнияти миллии Кохи Сафед аз Украина даъват кардааст, ки танқид аз Амрикоро камтар карда ба ташаббуси Амрико барои ироаи маъданҳо розӣ шавад.

"Садои Амрико" гузориш додааст, ки Келлог дар рӯзи чаҳоршанбе баъди ворид шудан ба Киев гуфт, ҳадаф аз сафараш гӯш кардани мавқеи Украина аст.

Ҷей Ди Вэнс, муовини Доналд Трамп рӯзи панҷшанбе гуфт, ба назари ӯ, поёни ҷанг наздик аст. Дар айни замон Вэнс афзуд, бидуни музокира бо Русия қатъи ҷанг номумкин аст.

Субҳи имрӯз, 21 феврал, Бонки миллии Тоҷикистон нархи ҳазор рубли русиро 123 сомонӣ муқаррар кардааст. Ин дар ҳолест, ки рӯзи ҷумъаи ҳафта гузашта ҳазор рубл бо 119 сомонӣ иваз карда мешуд.

Поёну болоравии қурби рубл дар Тоҷикистон як мавзӯи муҳим аст, чун ҳазорҳо муҳоҷири тоҷик маблағи худро бо рубл ба ватан мефиристанд.

Беқурбшавии рубли русиро дар Тоҷикистон одатан дар навбати аввал муҳоҷирони корӣ ва оилаҳои онҳо ҳис мекунанд.