Додситонии вилояти Суғд мегӯяд, дар пайи ошӯб дар зиндони рақами 3-и Хуҷанд, ки бар пояи иттилои расмӣ, 25 кушта ва чандин маҷруҳ бар ҷо гузошт, 2 корманди масъули ин ниҳод аз вазифа сабукдӯш карда шудаанд.

​Гулчеҳра Ғоибназарова, масъули маркази хабариву таҳлили ин ниҳод рӯзи 17 декабр дар суҳбат бо Радиои Озодӣ гуфт, ки Завқибек Шарифзода – додситони назорати маҳбасҳо ва Маъмур Аъзамзода – ёвари калони додситони Суғд оид ба назорати риояти қонун дар маҳкамаҳои тафтишотӣ аз вазифаҳои худ барканор гардиданд. Ӯ афзуд, ҳоло вазифаҳои онҳоро муваққатан кормандони дигар иҷро мекунанд.

Ӯ хабарҳои қаблан расонаишуда дар мавриди барканор шудани шаш корманди додситонии Суғд дар пайи ошӯб дар зиндони низомаш сангини Хуҷандро бепоя хонд ва афзуд, танҳо ҳамин ду масъули додситонӣ сабукдӯш шудаанд. Ин хабарро ба Радиои Озодӣ қаблан ду манбаъ дар додситонии кулли Тоҷикистон хабар дода буд. Гулчеҳра Ғоибназарова сабукдӯш шудани ин масъулони додситонии Суғдро дар пайи таҳқиқи ошӯби хунини сарзада дар зиндони рақами 3-и Хуҷанд рабт дод, вале аз ироаи ҷузъиёти дигар худдорӣ кард. Ӯ гуфт, ки ба парванда мӯҳри махфӣ зада шудааст ва ошкор кардани ҷузъиёти ҷараёни тафтишот феълан имкон надорад.

Додситонии назорати маҳбасҳо як ҷузъи ҷудогонаи тобеи додситонии Суғд - масъулияти назорати риояи қонун дар маҳбасҳоро бар уҳда дорад, вале вазифаи ёвари калони додситони Суғд умдатан ба назорати қонун дар боздоштгоҳи муваққатии рақами 2-и Хуҷанд маҳдуд мешавад. Дар ин боздоштгоҳ афроди айбдоршаванда замони тафтиши парванда ва то равон кардан ба маҳбасҳо нигоҳ дошта мешаванд.

​Мақомот аз изҳори он ки сар задани ошӯб дар зиндон ба барканор гардидани масъули назорати риояти қонун дар боздоштгоҳи муваққатӣ чӣ рабт дорад, худдорӣ меварзанд. Рӯзи 6-уми декабр як манбаъ дар Додситонии кулли Тоҷикистон ба Радиои Озодӣ гуфт, пас аз ошӯб дар маҳбаси Хуҷанд фаъолияти масъулони раёсатҳо ва шӯъбаҳои Додситонии кул мавриди баррасӣ қарор гирифт ва аз ҷумла ба сардори Раёсати назорати маҳбасҳои Додситонии кул Шамс Нурализода танбеҳи қатъӣ дода шуд.

15-уми ноябр Файзулло Сафарзода, сардори зиндони низомаш сангини шаҳри Хуҷанд аз вазифа барканор ва билофосила бо амри додгоҳ ба ҳабс гирифта шуд. Сипас бо иҷозаи додгоҳи Хуҷанд 6 корманди дигари ин зиндон, аз ҷумла Фарҳод Садиров, сардори шуъбаи низом боздошт гардиданд. Биноба иттилои додгоҳ, алайҳи Файзулло Сафарзода, Фарҳод Садиров ва 5 ҳамкори онҳо бар асоси моддаи 322, қисми 2-и Кодекси ҷиноии Тоҷикистон - "Хунукназарӣ, ки аз беэҳтиётӣ боис ба марги инсон ё дигар оқибатҳои вазнин гаштааст", парванда боз шудааст.

Ин модда дар сурати исботи гуноҳ ҷарима ва ё маҳрум сохтан аз озодӣ ба мӯҳлати то панҷ солро дар назар дорад. Ин хабар дар ҳолест, ки охири моҳи ноябр мақомоти интизомии Тоҷикистон алайҳи 7 корманди маҳбас ва дастикам 10 зиндонии маҳбаси рақами сеи Хуҷанд дар маҷмӯъ бо 11 иттиҳом аз ҷумла - "монеъ шудан ба фаъолияти муассисаҳои ислоҳӣ", "куштор", "расондани зарари вазнини ҷисмонӣ ба саломатӣ", "зӯроварӣ ба муқобили намояндаи ҳукумат" парвандаи ҷиноӣ боз кардаанд.

Мансурҷон Умаров ба ҷои Иззатулло Шарифзода раҳбари зиндонҳо шуд

Баъди беш аз ду ҳафтаи ошӯби хунин дар маҳбаси Хуҷанд, дар раёсати зиндонҳои Тоҷикистон ҳам тағйироти кадрӣ сурат гирифт. Иззатулло Шарифзода, муовини вазири адлия ва сардори Сарраёсати иҷрои ҷазои ҷиноӣ, ки аз соли 2006 дар ин мақом кор мекард, “ба далели бознишаста шудан” аз вазифааш озод гардид. Мансурҷон Умаров, ноиби аввали раиси Кумитаи давлатии амнияти миллӣ, сардори нави раёсати зиндонҳо ва ҳамзамон муовини вазири адлияи Тоҷикистон таъйин шуд.

Таҳқиқи ошӯб дар зиндони рақами 3-и Хуҷандро гурӯҳи тафтишотии Додситонии кулли Тоҷикистон пеш мебарад ва ба гуфтаи манобеи наздик ба он, ин парванда муҳри махфӣ гирифтааст. Манобеи наздик ба таҳқиқ мегӯянд, масъулони назорати риояти қонун дар маҳбасҳо шикоятҳои маҳбусон дар бораи қонуншиканиҳо ва рафтори ғайриқонунӣ нисбат ба онҳоро нодида мегирифтанд ва норизоиву қаҳру ғазаби бархе маҳбусон ба ошӯб кашонид.

Ошӯб дар маҳбаси низомаш сангини рақами 3/3-и шаҳри Хуҷанд шаби 7 ба 8-уми ноябр сар зада, нахуст ду зиндонбон ва замони фурӯнишонии ошӯб 23 зиндонӣ кушта шуданд. Ҳамчунин, чандин зиндонбон ва маҳбусон захмӣ гардиданд. Мақомоти тоҷик гуфтанд, гурӯҳи ошӯбгарон, ки дар миёни онҳо асосан маҳкумшудаҳо барои узвият дар созмонҳои ифротӣ ва мамнӯе ба мисли гурӯҳи “Давлати исломӣ” мебошанд, мехостанд аз зиндон фирор кунанд. Вале манобеи ғайрирасмӣ мегӯянд, ки бадрафторӣ нисбат ба зиндониҳо ва поймолкунии ҳуқуқашон сабаби аслии сар задани ошӯб гардид.

​Ошӯб дар зиндони низомаш сангини Хуҷандро яке аз пурқурбонитарин ҳодисаҳо дар зиндонҳои Тоҷикистон меноманд. Раҳбарони корпусҳои дипломатии мустақар дар Тоҷикистон аз мақомоти ин кишвар хостанд, ки ин ҳодиса ҳамаҷониба ва аз рӯи қонун баррасӣ шавад.

Додгоҳи ноҳияи Синои шаҳри Душанбе аввали моҳи сентябр ба баррасии парвандаи марги як тифл дар яке аз кӯдакистонҳои Душанбе оғоз мекунад.

Рӯзи 26-уми август дар Додгоҳи ноҳияи Сино ба Радиои Озодӣ гуфтанд, ки мурофиа ҳафтаи оянда баргузор мешавад. Парвандаро Хуршед Исозода, муовини раиси додгоҳ, баррасӣ мекунад.

Рӯзи 19-уми май дар кӯдакистони "Суолу ҷавоб" дар шаҳри Душанбе, Судайси дусола ба ҳалокат расид. Навори ҷон кандани ин кӯдак, ки ба панҷараи рахти хоб овезон шуда буд, вокунишҳои зиёдро дар шабакаҳои иҷтимоӣ ба миён овард.

Ба гуфтаи намояндагони додгоҳ, дар курсии айбдорӣ ду нафар нишастаанд, ки якеашон мураббии кӯдакистон ва дувумӣ корманди Идораи беҳдоштӣ (СЭС) аст.

Ҳардуи онҳо ба "хунукназарӣ" дар корашон муттаҳам мешаванд ва бо шарти берун нарафтан аз ҷойи зист дар озодӣ будаанд.

Намояндагони Додситонии кулли Тоҷикистон аввали моҳи август гуфта буданд, ки дар робита ба марги тифл дар кӯдакистон 5 нафар ба ҷавобгарӣ кашида шудаанд.

Дар Додгоҳи ноҳияи Сино гуфтанд, мурофиаи ин парванда озод баргузор мешавад.

Вазорати корҳои дохилии Тоҷикистон пештар гуфта буд, ки мураббӣ вазифаи худро дуруст иҷро накарда, вақти хоби кӯдакон онҳоро танҳо гузоштааст. Дар натиҷа "аз беэҳтиётӣ писари 2-сола аз гарданаш дар панҷараи рахти хоб овезон шуда ба ҳалокат расидааст".

Бо вуҷуди дар озодӣ будан, назари мураббии кӯдакистон ва дигар гумонбарони парванда то ин лаҳза дастрас нест. Пештар Раҳим Саидзода, вазири маориф ва илми Тоҷикистон ҳам гуфт, кори кӯдакистони "Суолу ҷавоб" ғайриқонунӣ буд.

Ситоди кулли артиши Украина тасдиқ кардааст, ки даргирии артиши ин кишвар бо нерӯҳои Русия дар вилояти Днепропетровск идома дорад. Дар айни замон артиши Украина хабарҳоро дар бораи ишғоли ду деҳа аз сӯи нерӯҳои Русия рад кард.

Дар хабари Ситоди кулли артиши Украина омадааст, ки нерӯҳои ин кишвар бо низомиёни рус дар ноҳияҳои Запороже ва Новогеоргиевск ҷанг доранд. Ин ду деҳа дар ғарби вилояти Днепропетровск ва дар марз бо вилояти Донетск ҷойгир шудаанд.

"Артиши Украина пешравии ишғолгаронро боздошта, назорати деҳаи Запорожеро идома медиҳанд", -- омадаааст дар хабари артиши Украина. Дар иттилоия ҳамчунин омадааст, ки даргириҳои сахт дар ноҳияи Новогеоргиевск идома доранд.

Пештар Ситоди кулли артиши Украина хабари расонаҳои русӣ дар бораи ҷанг дар вилояти Днепропетровскийро шарҳ намедод. Лоиҳаи мониторингии украинии DeepState пештар навишта буд, нерӯҳои Русия чанд вақт шуд, ки дар минтақаи Днепропетровский ҷанг доранд.

Вазорати дифои Русия аз тасарруфи чанд минтақаи аҳолинишин, аз ҷумла ноҳияҳои Запороже ва Новогеоргиевск, хабар дода буд. Сухан дар бораи чанд деҳаи начандон калон меравад.

Пулиси Душанбе Рамазон Муродов, маъруф ба "Ралик", рэпсарои тоҷикро барои беиҷозат рондани мошин боздошт карда, додгоҳе дар пойтахт ӯро 30 ҳазор сомонӣ ҷарима бастааст.

Раёсати корҳои дохилии Душанбе рӯзи 26-уми август хабар дод, ки ин ҷавони 27-сола қаблан бо қарори додгоҳ панҷ сол аз ҳаққи рондани мошин маҳрум шуда буд. Сабаб идораи нақлиёт дар ҳолати мастӣ будааст.

Ба иттилои пулиси Душанбе, Рамазон Муродов "қарори додгоҳро сарфи назар карда, боз ҳам дар ҳолати сархушӣ ва баъди истеъмоли маводи нашъадор" ронандагӣ кардааст.

Назари Рамазон Муродов ва наздиконаш ба қазия маълум нест. Ӯ дар саҳифааш дар Телеграм танҳо навиштааст, ки "аҳволи ман хуб аст".

Рамазон Муродов, ки дар миёни як гурӯҳ ҷавонон шинохта аст, моҳи июли соли 2024 барои таҳқири роҳбарони сохторҳои қудратӣ дар шабакаҳои иҷтимоӣ, боздошт шуда буд. Ӯ чанд дафъа аз боздошт ва шиканҷа шуданаш аз сӯйи кормандони пулис шикоят карда буд.

Раҳбари олии Эрон рӯзи 24-уми август дар дидор бо ҳаводоронаш иддао кард, ки танҳо як рӯз пас аз ҳамлаи артиши Исроил ба Эрон бархе қудратҳои ғарбӣ ҳамроҳи "як фарди эронӣ" дар Брюссел нишасте баргузор карданд, то дар бораи "ҷойгузинии Ҷумҳурии исломӣ" тасмим бигиранд.

Алии Хоманаӣ дар суханронии худ бо ситоиш аз "иттиҳоди мардум" дар ҷанги 12-рӯза байни Эрон ва Исроил гуфт, "душман дарёфтааст, ки роҳи мубориза бо Ҷумҳурии исломӣ эҷоди ихтилофи дохилӣ аст, на ҷанг."

Ӯ тарафдорони гуфтугӯи мустақимрбо Амрикоро "зоҳирбин" хонд ва гуфт, ки "душманӣ"-и Вашингтон бо Эрон решаӣ ва "ҳалношуданӣ" аст. Алии Хоманаӣ ҳамчунин Амрикоро ба талош барои "ба зону даровардани миллати Эрон" муттаҳам кард ва онро "тавҳин ба эрониён" донист.

Ширин Ибодӣ, барандаи Ҷоизаи Нобел ва фаъоли ҳуқуқи башар, ки дар нишасти рӯзи 14-уми июн суханронӣ карда буд, гуфтаҳои Хоманаиро рад кард ва изҳор дошт, ки ӯ ҳақ дорад аз ояндаи Ҷумҳурии исломӣ нигарон бошад.

Ӯ дар суҳбат ба Радиои Фардо, бахши эронии Радиои Аврупои Озод/Радиои Озодӣ гуфт, "он чизе, ки дар конфронс баррасӣ шуд, ин буд, ки сохтори сиёсӣ нотавон аст ва бояд аз ҷониби мардум сарнагун карда шавад ва барои ин ба ҷуз ваҳдат дар байни мухолифин роҳе нест."

Ҷиноҳҳои мухолифи ҳукумати Эрон бинобар ихтилофҳои амиқи идеологӣ ва дидгоҳҳои гуногун солҳо бар сари барномаи муайяне барои ояндаи Эрон ваҳдати назар надоранд. Аммо Ширин Ибодӣ, вакили дифоъ ва фаъоли ҳуқуқи башар, исрор дорад, ки "пешрафти зиёде" дар ин ҷабҳа ба даст омадааст, ки ба гуфтаи ӯ, ҳамон чизе аст, ки раҳбари олии Эронро нигарон кардааст.

Барандаи Ҷоизаи сулҳи Нобел рӯзи 25-уми август гуфт, "ба ҳамин сабаб Хоманаӣ бо шитоб аз паноҳгоҳ берун омад, то худро ба унвони фарде муаррифӣ кунад, ки ҳар кореро мехоҳад анҷом медиҳад, аммо ҳеч кас ба суханонаш бовар намекунад".

Хоманаӣ, ки фармондеҳи кулли нерӯҳои мусаллаҳи Эрон низ ҳаст, пас аз нопадид шудан дар маҳзари умум пас аз ҳамлаи ҳавоии Исроил алайҳи Эрон дар 13-уми июл мавриди интиқодҳо қарор гирифт.

Ба 36 оила дар ноҳияи Тоҷикобод, ки бар асари заминларза хонаашон пурра ё қисман вайрон шуда буд, манзил додаанд. Тақдими хонаҳо рӯзи 26-уми март дар деҳаи навбунёде дар ҷамоати Лангари Шоҳ сурат гирифт.

Эмомалӣ Раҳмон, раисҷумҳури Тоҷикистон, дар ин маросим гуфтааст, аксар деҳаҳои Тоҷикобод дар мавзеъҳои осебпазир ҳастанд ва бояд манзилҳои истиқоматӣ ба офатҳои табиӣ тобовар сохта шаванд.

Заминларзаи вайронгар дар ноҳияи Тоҷикобод рӯзи 13-уми апрели имсол рух дод. Дар натиҷаи он як наврас ҷон бохта, 16 нафар ҷароҳат бардоштанд.

Вебсайти президенти Тоҷикистон навишт, ки дар ин ҳодиса 33 хона пурра ва 164 манзил қисман вайрон шуда, чанд мактабу бунгоҳи тиббӣ низ осеб диданд. Зиёни расида 8 миллион сомонӣ, муодили тақрибан ҳаштсад ҳазор доллар ҳисоб шудааст.

Ба қавли дафтари матбуоти раёсати ҷумҳурӣ, дар зарфи чор моҳ дар деҳаҳои осебдидаи Қалъаи Лаби Об ва Лангари Шоҳ барои 197 оила манзили истиқоматӣ сохта додаанд. Маълум нест, ҳамаи хонаҳо аз пули давлат сохта шудаанд ва харҷи онҳо аз ҷайби соҳибкорону тоҷирон будааст. Пештар баъзе аз зарардидаҳо ба Радиои Озодӣ шикоят карда буданд, ки барои азнавсозии хона ё оғилу ҳаммоми худ ёрие дарёфт накарданд.

Минтақаи Рашт дар гузашта ҳам шоҳиди заминларзаҳои сахте шуда, соли 2020-2021 бар асари зилзила панҷ сокини Тоҷикобод ба ҳалокат расида, наздик ба шаст хона дар чаҳор деҳаи ин ноҳия осеб диданд.

Заминҷунбиҳо дар ин минтақа фоҷиаи 10-уми июли соли 1949-ро ёдрас карданд, ки чун зилзилаи Ҳоит маъруф буда, сабаби марги 32 ҳазор нафар гашта буд. Аз он вақт бунёди манзил дар ин ҷо талаботи хос дорад, ки на ҳамеша риоят мешавад.

Ҳавошиносони тоҷик мегӯянд, эҳтимол то ду рӯзи дигар ҳавои Тоҷикистон сахт ғуборолуд шавад ва аз ин рӯ онҳое, ки бемории роҳҳои нафас ё ҳассосият доранд, зарур аст, камтар ба берун бароянд.

Идораи ҳавошиносӣ рӯзи 25-уми август гуфт, ки рӯзҳои 26-27-уми август дар шаҳру ноҳияҳои вилояти Хатлон, ноҳияҳои тобеи ҷумҳурӣ ва шаҳри Душанбе бо сабаби хокбориш сатҳи олудагии ҳавои кишвар бисёр баланд хоҳад шуд.

Дар ин баёния омадааст, ки ба шаҳрвандон тавсия дода мешавад, аз сайругашти зиёди рӯзона дар хиёбонҳо, кӯчаҳо, хусусан дар наздикии роҳҳои сернақлиёт худдорӣ намоянд.

Ба гуфтаи пизишкон, дар чунин ҳавои олуда бемориҳои музмини роҳҳои нафас авҷ мегиранд.

Ҳавошинсони тоҷик ҳамчунин гуфтаанд, ки ҳавои олуда ба гарду ғубор ба кӯдакон, пиронсолон, занони обистан ва гирифторони бемори диққи нафас ва дил доранд, таъсири бад дорад.

Аз миёни панҷ кишвари Осиёи Марказӣ роҳбарони танҳо се давлат раисҷумҳури Украинаро ба рӯзи истиқлоли ин кишвар табрик кардаанд.

Владимир Зеленский, президенти Украина, дар саҳифааш дар Фейсбук номаи шодбоши роҳбарони Қазоқистон, Узбекистон ва Туркманистонро ба муносибати Рӯзи истиқлоли Украина нашр кард.

Шавкат Мирзиёев, раисҷумҳури Узбекистон, изҳори умед кардааст, ки муносибатҳои Тошканд ва Киев дар асоси манофеи ду кишвар рушд мекунанд.

Сардор Бердимуҳаммадов, президенти Туркманистон ба Зеленский саломатӣ ва барор дар корҳои давлатӣ таманно кардааст.

Украина рӯзи 24-уми август 34-солагии истиқлоли худро ҷашн гирифт.

Маълум нест, ки роҳбарони Тоҷикистон ва Қирғизистон ҳамтои украинии худро ба рӯзи истиқлоли ин кишвар табрик карданд ё не.

Дар сомонаи президенти Тоҷикистон ва расонаҳои дигари расмӣ чунин хабаре нест.

Шодбошӣ ба рӯзи истиқлол як таҷрибаи маъмул дар равобити дипломатӣ мебошад.

Вазорати корҳои дохилии Тоҷикистон аз истирдоди як гумонбар аз Русия хабар додааст.

Ин ниҳод 25-уми август дар хабарномае навишт, Баҳриддин Миров, сокини 45-солаи шаҳри Ваҳдат бо иттиҳоми "содир кардани амалҳои ифротгароӣ, тамаъҷӯӣ, бандитизм, азобу уқубат ва гаравгонгирӣ", дар ҷустуҷӯ буд.

Назари ин сокини Ваҳдат, ки ба гуфтаи мақомот бо тахаллуси "Ҳоҷи Файз" кор мекард, маълум нест.

Мақомот ҳам ҷузъиёт надодаанд, ки ин сокини Ваҳдат кай ва чигуна ҷиноятҳоро анҷом додааст.

ВКД танҳо гуфт, Баҳриддин Миров дар шаҳри Челябински Русия дастгир ва ба Тоҷикистон истирдод шуд.

Мақомот аз шаҳрвандон хостаанд, ки агар аз ин мард шикоят дошта бошанд, ба Вазорати корҳои дохилӣ муроҷиат кунанд.

Назари пайвандони Баҳриддин Миров ҳам феълан дастрас нест.

Ҳамасола аз Русия ба Тоҷикистон чандин нафар истирдод мешаванд.

Дар солҳои ахир чандин мунтақиди давлат, аз ҷумла, фаъолон аз Вилояти Мухтори Куҳистони Бадахшон аз Русия ба Тоҷикистон истирдод ва сипас ба солҳои тӯлонии зиндон маҳкум шуданд.

Эмомалӣ Раҳмон, раисҷумҳури Тоҷикистон, ба духтараш Озода Раҳмон, ки аз соли 2016 раиси Дастгоҳи иҷроияи президент аст, унвони фахрии Корманди шоиста додааст. Маросим рӯзи 25-уми август дар шаҳри Душанбе гузашт.

Дар ҳамин рӯз дар маҷмуъ ба дусад нафар унвону ҷоизаҳои давлатӣ додаанд.

Аз ҷумла, ҳунармандон Тӯрахон Аҳмадхонов ва Исфандиёр Ғуломзода унвони Ҳунарпешаи халқӣ, рӯзноманигор Латофат Кенҷаева унвони Шоири халқӣ ва Юнус Юсуфӣ унвони Нависандаи халқии Тоҷикистонро гирифтанд.

Вебсайти президент навишт, ки "23 нафар бо унвони фахрии Корманди шоиста... 3 нафар бо ордени Дӯстӣ, 1 кас бо ордени Шараф дараҷаи I, 11 нафар бо ордени Шараф дараҷаи II, 107 кас бо медали Хизмати шоиста ва 7 нафар бо Ифтихорномаи Ҷумҳурии Тоҷикистон сарфароз гардонда шуданд."

Мақомот мегӯянд, ин ҷоизаву унвонҳо дар остонаи 34-умин солрӯзи истиқлоли Тоҷикистон тақдим шуд ва ба касоне, ки "дар хизмати давлатӣ, рушди илму фарҳанг ва дигар бахшҳои иқтисоди миллӣ дастовардҳои баланди меҳнатӣ ва фаъолияти самарбахш" доштанд. Намояндагони мухолифин дар хориҷа тақдими баъзе аз ҷоизаҳоро ба маврид дониста, дурустии баъзеи дигарро зери шубҳа мегузоранд.

Озода Раҳмон, духтари раисҷумҳури Тоҷикистон, нуҳ сол боз раиси Дастгоҳи иҷроияи президент аст. Ӯ ба ҷуз унвони Корманди шоистаи Тоҷикистон, ордени "Шараф" (дараҷаи як), рутбаи мушовири давлатии адлия ва рутбаи дипломатии сафири фавқулода ва мухторро дорад.

Духтари 46-солаи президент Раҳмон дар гузашта дар сафорати Тоҷикистон дар Амрико ва дар мақоми муовини вазири корҳои хориҷӣ кор кардааст. Шавҳараш Ҷамолиддин Нуралиев дар гузашта муовини аввали раиси Бонки Миллии Тоҷикистон буд.

Дар пайи ҳамлаи артиши Исроил ба маҳалли Беморхонаи Носир дар Ғазза 19 кас, аз ҷумла чанд хабарнигор кушта шудаанд. Дар ин бора Вазорати тандурустии Ғазза хабар додааст, ки зери назорати "Ҳамос" аст.

Ба гузориши расонаҳо, дар ҳамлаи Исроил дастикам чор хабарнигоре кушта шудаанд, ки бо расонаҳои байнулмилалӣ ҳамкорӣ мекарданд.

Оҷонсии Ассошиэйтед Пресс аз марги Марям Дагга хабар додааст, ки бо ин оҷонсӣ ва дигар расонаҳо ҳамкорӣ мекард. Ҳусайн ал-Масрӣ, навобардори ҳамкори Ройтерз, Муҳаммад Салом, хабарнигори "Ал-Ҷазира" ва аксабардораш Муоз Абу Тоҳо низ дар ҳамлаи Исроил кушта шудаанд. Дар миёни журналистон захмиён низ ҳастанд.

Гузориш шудааст, ки неруҳои ҳавоии Исроил ба атрофи Беморхонаи Носир ду маротиба зарба задаанд. Артиши Исроил феълан ин хабарро шарҳ надодааст. Ба маълумоти рӯзномаи "Таймз Исроил", ба эҳтимоли зиёд ҳамла аз сӯи неруҳои заминӣ анҷом шудааст. Қаблан Исроил далели ин гуна ҳамлаҳоро ҳузури ҷангҷӯёни "Ҳамос" гуфта буд. Гуруҳи "Ҳамос" дар Амрико ва Иттиҳоди Аврупо созмони террористӣ шинохта шудааст.

Тибқи омори Кумитаи дифоъ аз хабарнигорон, баъд аз шурӯи ҷанг дар Навори Ғазза дар моҳи октябри 2023, зиёда аз 190 рӯзноманигор дар ин борика кушта шудаанд.

Вебсайти "Pamir Inside", ки ҳодисаҳои Вилояти Мухтори Кӯҳистони Бадахшонро бозтоб медиҳад, аз марги як фаъоли дигари бадахшонӣ дар зиндонҳои Тоҷикистон хабар дод. Ин расона рӯзи 24-уми август бо такя ба манбаъҳои худ навишт, ки Боғшо Иматшоеви 67-сола ҳанӯз моҳи феврали имсол даргузашта, хабари маргаш нав дастрас шудааст.

Ба навиштаи "Pamir Inside", Боғшо Иматшоев соли 2023 баъди бозгашт аз Русия дастгир ва бо иттиҳоми ҳамкорӣ бо созмонҳои фаъолияташон мамнуъ ба шаш сол ҳабс маҳкум шуда буд. Ӯро дар зиндони шаҳри Хуҷанд нигоҳ медоштанд.

Манбаъҳои расона гуфтаанд, ки вазъи саломати Иматшоев рӯзи 26-уми январи имсол бад шуда, тақрибан як моҳ дар ҳолати беҳушӣ дар Бемористони вилояти Суғд буд ва дар ҳамон ҷо ҷон дод. Мақомот хабарро шарҳ надодаанд.

Дар ҳашт моҳи охир хабари марги панҷ фаъоли зиндонӣ аз Вилояти Мухтори Куҳистони Бадахшон дар маҳбасҳои Тоҷикистон расонаӣ гашт. Аз ин пеш дар бораи марги Қулмамад Паллаев, Аслан Гулобов, Музаффар Давлатмиров ва Эроншо Мамадраҳимов гузориш расида буд. Онҳо дар соли 2022 ва пас аз амалиёти нерӯҳои давлатӣ дар Рӯшону Хоруғ дастгир ва ба муҳлатҳои тӯлонӣ зиндонӣ шуда буданд. Мақомот онҳоро ба терроризму ҷиноятҳои дигар гунаҳкор карданд, вале наздиконашон хулосаи Додгоҳро напазируфтанд.

Хабари марги Боғшо Иматшоев дар ҳоле нашр шуд, ки пештар ҳашт созмони байнулмилалӣ, аз ҷумла Созмони ҷаҳонии зидди шиканҷа ва ҳамкорӣ барои ҳуқуқи башар марги зодагони Вилояти Бадахшонро дар зиндонҳои Тоҷикистон маҳкум карда, аз мақомот хоста буданд, ки таъқибу саркӯби помириҳоро бас кунанд.

Ҳомиёни ҳуқуқи башар дар изҳороти худ шароити номуносиби боздоштгоҳҳо, адами дастрасӣ ба ёрии пизишкӣ ва марги дастгиршудаҳоро аз мушкилиҳои идомадор дар Тоҷикистон номбар кардаанд. Вазири адлияи Тоҷикистон моҳи августи имсол гуфт, ки ба ҳама маҳбусони бемор дар зиндонҳои кишвар ёрии пизишкӣ расонда мешавад. Дарёфти иттилои алтернативӣ аз вазъи зиндониён дар Тоҷикистон хеле мушкил аст. Хабарнигорони мустақил имкони боздид аз зиндонҳоро надоранд.

Додситонии кулли Тоҷикистон аз мардуми кишвар хостааст, ки ҳангоми сафар ба Русия бо худ рустании шифобахши “ҳазориспанд” набаранд, зеро мумкин аст ба зиндон маҳкум шаванд.

Додситонӣ рӯзи 21-уми август бо нашри баёнияе гуфт, “ҳазориспанд” аз моҳи феврали соли 2024 ба рӯйхати рустаниҳои дорои маводи мухаддир ва моддаҳое ворид карда шудааст, ки ба мағзи инсон таъсир мегузорад ва рафтору табъи ӯро тағйир медиҳад.

Ҳафтаи гузашта хабаре нашр шуд, ки мақомоти Русия ду зани тоҷикро барои бо худ доштани “ҳазориспанд” дастгир ва якеро ба 8 сол зиндон маҳкум кардаанд.

Маълум нест, ин шаҳрвандони Тоҷикистон кай ҷазо гирифтаанд.

Дар баёнияи Додистонии кул омадааст, ки бар асоси Кодекси ҷиноии Русия вобаста ҷазо барои бо худ бурдану ғайриқонунӣ нигаҳ доштани ҳазориспанд аз ҷаримаву ихроҷ аз Русия то ба зиндони якумрӣ таъйин шудааст.

Таври маълум дар Тоҷикистон ҳазориспандро ҳамчун василаи зиддиуфунӣ ё бар тибқи боварҳои кӯҳна барои дур кардани таъсири чашми бад истифода мебаранд.

Бунёд ё Хазинаи Қатар дар мавриди рушд барои идомаи сохтмони нерӯгоҳи "Роғун" 182 миллион риёли қатарӣ ($50 млн) ҷудо кардааст.

Ба гузориши расонаҳои қатарӣ, созишномаро Фаҳд Ҳамад Ал-Сулайтӣ, мудири Хазинаи Қатар оид ба рушд бо Вазири молияи Тоҷикистон имзо кардааст.

Вазорати молияи Тоҷикистон ҳам бо нашри ин хабар гуфтааст, 50 миллион доллар қарзи боимтиёз аст. Муҳлат ва шарту шароити ин қарз эълон нашудааст.

Дар хабари Вазорати молия танҳо омадааст, ҳадафи лоиҳа "саҳм гузоштан ба амнияти миллии энергетикӣ ва дастгирии рушд" дар Тоҷикистон аст.

Мудири Хазинаи Қатар оид ба рушд дар ҷараёни сафараш ба Тоҷикистон аз неругоҳи "Роғун" низ дидан кардааст.

Ҳукумати Тоҷикистон талош дорад барои то охир сохтани нерӯгоҳи "Роғун" аз хориҷ сармоя дарёфт кунад. То ин вақт Бонки Ҷаҳонӣ, Бонки исломии рушд ва баъзе кишварҳо аз сармоягузорӣ ба сохтмони "Роғун" хабар доданд.

Русия ва Украина рӯзи якшанбеи 24-уми август гуруҳи нави асиронро иваз карданд. Ба гузориши Вазорати дифои Русия, табодули асирон аз рӯи усули "146 ба 146" анҷом шуд. Имороти Муттаҳидаи Араб барои иваз кардани асирон миёнаравӣ кардааст.

Ба ҷуз асирон, инчунин Русия ва Украина чанд шаҳрванди мулкиро низ иваз кардаанд. Ба гуфтаи Омбудсмени Русия, 8 сокини вилояти Курск баргардонда шуданд. Татяна Москалкова гуфт, ин нафарон аз моҳи феврали соли 2025 дар Украина нигоҳ дошта мешуданд.

Президенти Украина Владимир Зеленский низ табодули асиронро тасдиқ кардааст. Гузориш шудааст, ки ба ҷуз низомиён инчунин рӯзноманигор Дмитрий Хилюк ва собиқ волии Херсон низ ба Украина бозгардонда шудаанд. Ин нафарон соли 2022 аз сӯи неруҳои Русия боздошт шуда буданд.

Британияи Кабир "Капитал Бонк”-и Қирғизистон ва мудири онро ба далели кумак ба Русия таҳрим кардааст.

Мақомоти Бритониё гуфтанд, Русия барои хариди маҳсулоти ҳарбӣ ин бонки Қирғизистонро истифода бурдааст. Намояндагони "Капитал Бонк" гуфтанд, онҳо дар давр задани таҳримҳо ба Русия кумак накардаанд ва фаъолияташон дар асоси қонунгузории Қирғизистон аст.

Бритониё ҳамчунин бозори асъори рақамии Grinex--ро таҳрим кард, ки дар Қирғизистон сабти ном шудааст. Амрико ҳам пештар ин бозори асъори рақамӣ ё криптавалютаро ба рӯйхати сиёҳ ворид карда буд.

Маҷаллаи бритониёии Financial Times ҳанӯз охири моҳи июни имсол навишта буд, ки ба воситаи бозори асъори рақамии Grinex амалиётҳо ба маблағи 9 миллиард доллар анҷом шудаанд.

Чанд ширкатҳои хусусии Қирғизистон, аз ҷумла Tengricoin, Old Vector, Altair Holding SA низ ба рӯйхати сиёҳи Бритониё ворид шуданд.