Дар чанд ҷумла
Шумори довталабони курсии президентӣ дар Қирғизистон ба 38 расид
Кумиссиюни марказии интихобот дар Қирғизистон аз як шаҳрванди бознишаста аризаи иштирок дар интихоботи раёсати ҷумҳурро дарёфт кард, ки бо ворид шуданаш ба сабқат шумори довталабонро ба 38 нафар расонд. Ҳудудан шаш довталабро ҳизбҳои сиёсӣ пешбарӣ кардаанд.
Раҳбари ҷиноҳи порлумонии ҳизби "Ота-Макон", Омурбек Текебоев ба гурӯҳи даҳҳо номзади худгардон шомил аст. Текебоев аз рақибони аслии президенти феълӣ Алмосбек Отамбоев номбар мешавад, вале ҳоло бо иттиҳоми фасодкорӣ дар боздошт ба сар мебарад. Дар оғоз "Ота-Макон" Текебоевро ба сабқати президентӣ номзад пешниҳд кард, аммо ӯ гуфт, ки мехоҳад аз тариқи худпешбарӣ дар интихобот иштирок кунад.
Интихоботи раёсати ҷуҳмур ба таърихи 15 октябр барномарезӣ шудааст, аризаи довталабон то 1 август қабул мешавад.
Ҳамаи хабарҳои имрӯзро дар инҷо бихонед
"На бар подшоҳ". Эътирози мухолифони Трамп дар 50 аёлат
Мухолифон ва афроди норозӣ аз сиёсатҳои Доналд Трамп, раиси ҷумҳури Амрико дар 50 аёлати ИМА бо шиори "на ба подшоҳ" ба хиёбонҳо омаданд. Ҷумҳурихоҳон ин эътирозҳоро "намоиши нафрат аз Амрико" хонданд.
Хабаргузориҳои байнулмилалӣ рӯзи шанбеи 18-уми октябр шумораи муътаризонро ҳудуди ҳафт миллион нафар эълом карданд. Муътаризон аз Ню-Йорк то Лос-Анҷелес ва ҳатто дар наздикии маҳалли иқомати Трамп дар аёлати Флоридо ҷамъ шуданд.
Мақомоти аёлати Ню-Йорк шумораи ширкаткунандагон дар тазоҳуротро "беш аз 100 ҳазор нафар" ва дар Вашингтон "8 то 10 ҳазор нафар" гуфтанд. Ҳамла ба расонаҳо, мухолифони сиёсӣ ва муҳоҷирони беҳуҷҷат аз ҷумлаи интиқодҳое буд, ки аз сӯи муътаризон садо дод.
Вокуниши Трамп
Доналд Трамп мисли ҳамеша вокуниши тунде нишон дод ва чанд видеои омодашуда бо ҳуши маснуиро дар шабакаи иҷтимоии худ Truth Social пахш кард, ки ӯро дар нақши як подшоҳ нишон медод.
Дар яке аз ин наворҳо Трамп бо тоҷ бар сар ҷангандаеро идора мекунад, зоҳиран маводи нопокро бар сари муътаризон мерезад.
Ҳампаймонҳои сиёсии Доналд Трамп аз ҳизби ҷумҳурихоҳ низ муътаризонро барои ин корашон танқид карданд.
Тазоҳуроти мухолифони Доналд Трамп дар ҳоле баргузор шуд, ки давлати федероли Амрико ба далели тасвиб нашудани будҷаи Иёлоти Муттаҳида аз кор мондааст. Талошҳо барои эҷоди тафоҳум миёни ҷумҳурихоҳон ва демократҳо дар ин бора ҳанӯз ба натиҷае нарасидааст.
Толибон ва Покистон созиши оташбас имзо карданд
Ҳукумати Толибон мегӯяд, ҳайатҳои Афғонистон ва Покистон дар Қатар бар сари оташбаси комил ва маънодор ба тавофуқ расиданд.
Забеҳуллоҳ Муҷоҳид, сухангӯи ҳукумати Толибон дар шабакаи X аз талошҳои Қатар ва Туркия барои миёнҷигӣ дар ин гуфтугӯ сипосгузорӣ кард.
Муҷоҳид навишт, Афғонистон ва Покистон санадеро имзо карданд, ки бар асоси он ду кишвар ба эҳтироми тарафайн ва робитаи неки ҳамсоягӣ таъкид кардаанд.
Дар музокираи Қатар, раёсати ҳайатҳои ду кишварро вазирони дифоъ ба уҳда доштанд.
Забеҳулло Муҷоҳид гуфтааст, ду тараф тавофуқ карданд, ки ҳеч гуна иқдоми душманона алайҳи якдигар анҷом надиҳанд ва аз гуруҳҳои мухолифи ҳукумати Покистон ҳимоят накунанд.
Вазорати корҳои хориҷии Қатар низ субҳи 19-уми октябр эълон кард, ки ҳайатҳои Афғонистон ва Покистон рӯзи шанбе барои оташбаси фаврӣ тавофуқ карданд.
Таниш миёни Покистон ва Афғонистон пас аз он боло гирифт, ки нерӯҳои покистонӣ рузи 9-уми октябр бо ҳадафи нобуд кардани аъзои баландпояи толибони Покистон ба Кобул ҳамлаи ҳавои анҷом доданд.
Баъди ин чанд рӯз неруҳои марзбонии Толибон ва Покистон бо ҳам даргир шуданд. Ду тараф аз даҳҳо кушта хабар доданд.
Як дипломати пешини Русия дар Амрико зиндонӣ шуд
Додгоҳе дар Амрико як дипломати пешини Шӯравӣ ва Русияро ба дуюним соли зиндон ва пардохти 100 доллар ҷарима маҳкум кард.
Серей Шестаков ба додани маълумоти бардуруғ дар парвандаи собиқ маъмури ФБР Чарлз Макгонигал ва тоҷири рус Олег Дерипаска гунаҳкор шудааст ва иҷрои ҷазои аз моҳи феврали соли 2026 оғоз мешавад.
Ба гуфтаи мақомоти тафтишотии Амрико, Сергей Шестаков соли 2013 шаҳрвандии Амрикоро гирифта ва ба ҳайси тарҷумони расмӣ дар додгоҳҳои Амрико кор мекард. Шестаков медонист, ки додани маълумоти бардуруғ ба маъмурони Бюрои федеролии таҳқиқотии ИМА (ФБР) ҷиноят аст.
Чарлз Макгонигал, собиқ маъмури ФБР ва Сергей Шестаков ба он гунаҳкор шудаанд, ки барои кумак дар давр задани таҳримҳо ба Олег Дерипаска, сарватманди русиягӣ кумак кардаанд. Таҳримҳо алайҳи Дерипаска соли 2018 ҷорӣ шуда буд.
Соли 2023 додгоҳ Макгонигалро дар доираи парванда ба чор солу ду моҳ зиндон маҳкум карда буд.
Сергей Шестаков моҳи июни имсол ба гуноҳаш иқрор шуд ва баъди он айбномаи ӯро бекор карданд.
Исроил эълон кард, ки гузаргоҳи Рафаҳ баста мемонад
Дафтари нахуствазири Исроил рӯзи шанбеи 18-уми октябр эълом кард, ки гузаргоҳи марзии Рафаҳ миёни Навори Ғазза ва Миср то иттилои баъдӣ баста хоҳад монд.
Дар баёнияи дафтари Бенямин Нетаняҳу омадааст, "бозкушоии гузаргоҳ баъди амали "Ҳамос" дар бозгардонии ҷасади гаравгонҳои фавтида дар доираи созиши ҳосилшуда мавриди баррасӣ қарор хоҳад гирифт".
Ин хабар дар ҳоле нашр мешавад, ки Сафорати Фаластин дар Миср 18-уми октябр эълом карда буд, ки гузаргоҳи Рафаҳ рӯзи душанбеи 20-уми октябр кушода мешавад.
Ба гуфтаи Сафорат, ин гузаргоҳ ба фаластиниҳои муқими Миср иҷозаи бозгашт ба Ғаззаро хоҳад дод. Дар баёнияи ишора нашудааст ки оё кумакҳои башардӯстона низ иҷозаи убур аз ин гузаргоҳро хоҳад дошт ё на.
Аз замони тавофуқи оташбас дар Ғазза, ки 13-уми октябр бо миёнҷигии Амрико, Миср ва Қатар ҳосил шуд, рӯзона ба ҳисоби миёна 560 тонна маводи ғизоӣ вориди Ғазза шудааст. Барномаҳои ҷаҳонии ғизо эълом кардааст, ки ин кумакҳо камтар аз талаботи мавриди ниёз дар минтақа аст.
Гузаргоҳи Рафаҳ моҳи майи соли 2024 пас аз онки неруҳои исроилӣ назорати шимоли Ғаззаро ба даст гирифтанд, барои убури кумакҳо баста шуд. Ин гузаргоҳ соли 2025 дар ҷараёни як оташбаси кутоҳмуддат ба таври муваққат бозкушоӣ шуда буд.
Духтарони футболбози тоҷик ба қисми ниҳоии Ҷоми Осиё роҳ наёфтанд
Дастаи мунтахаби футболи Тоҷикистон (U-17) зери раҳбарии сармураббӣ Фарҳодҷон Холбеков дар сеюмин бозиаш дар марҳилаи интихобии Ҷоми Осиё-2026 миёни духтарони то 17-сола аз тими Сурия бо ҳисоби 0:1 мағлуб шуд.
Ин бозии даври охирини мусобиқот дар гурӯҳи “А” шоми ҷумъаи 17-уми октябр дар Варзишгоҳи марказии ҷумҳуриявии шаҳри Душанбе доир гардид. Голи ягонаро ҳамлагари суриягиҳо Нивин Боддур дар дақиқаи 47-ум ба самар расонд.
Дар бозии дигари даври сеюм дар гурӯҳи “А” дастаи мунтахаби Филиппин (U-17) бар тими Малайзия (U-17) бо ҳисоби 4:0 пирӯз гардид.
Дар марҳилаи интихобии Ҷоми Осиё-2026 миёни духтарони то 17-сола дар гурӯҳи «А» дастаҳои наврасони Тоҷикистон, Филиппин, Малайзия ва Сурия барои роҳхат ба қисми ниҳоии Ҷоми Осиё-2026 мубориза бурданд. Ҳамаи бозиҳои марҳилаи интихобӣ аз 13-ум то 17-уми октябр дар Варзишгоҳи марказии ҷумҳуриявии шаҳри Душанбе доир шуданд.
Дастаи мунтахаби Тоҷикистон (U-17) қаблан дар ду бозиаш дар марҳилаи интихобии Ҷоми Осиё-2026 аз тимҳои Малайзия ва Филиппин бо ҳисоби якхелаи 0:2 шикаст хӯрда буд.
Баъди натиҷагирии даври сеюми мусобиқот дар гурӯҳи “А” Филиппин бо 9 имтиёз ғолиб шуда, ба қисми ниҳоии Ҷоми Осиё-2026 миёни духтарони то 17-сола роҳхат гирифт.
Малайзия бо 6 имтиёз ҷойи дуюм, Сурия бо 3 имтиёз ҷойи сеюм ва Тоҷикистон бидуни имтиёз ҷойи чорумро ишғол карданд. Ҳарсе даста аз ҳаққи ширкат дар қисми ниҳоии мусобиқот маҳрум шуданд.
Марҳилаи интихобии Ҷоми Осиё-2026 миёни духтарони то 17-сола
Гурӯҳи «А»
Даври 1-ум
13-уми октябр (душанбе)
Филиппин – Сурия – 5:0
Малайзия – Тоҷикистон – 2:0
Дври 2-юм
15-уми октябр (чоршанбе)
Сурия – Малайзия – 0:1
Тоҷикистон – Филиппин – 0:2
Даври 3-юм
17-уми октябр (ҷумъа)
Филиппин – Малайзия – 4:0
Тоҷикистон – Сурия – 0:1
Мавқеи астаҳо дар ҷадвали гурӯҳи “А”
Ҷ ДАСТАҲО Б Ғ М Б Т/Т И
1 Филиппин 3 3 0 0 11-0 9
2 Малайзия 3 2 0 1 3-4 6
3 Сурия 3 1 0 2 1-6 3
4 Тоҷикистон 3 0 0 3 0-5 0
Дар марҳилаи интихобии Ҷоми Осиё-2026 миёни духтарони то 17-сола 27 даста ширкат варзид. Бар асоси қуръакашӣ ҳашт гурӯҳ ташкил шуда буд: се гурӯҳ аз чаҳор даста ва панҷ гурӯҳ аз седастаӣ иборат буданд.
Ғолибони ҳашт гурӯҳи интихобӣ – Филиппин (гурӯҳи “А”), Лубнон (гурӯҳи “В”), Мянмар (гурӯҳи “С”), Ветнам (гурӯҳи “D”), Австралия (гурӯҳи “Е”), Тайланд (гурӯҳи “F”), Ҳиндустон (гурӯҳи “G”), Тайпейи Чин (гурӯҳи “Н”) - ба қисми ниҳоии Ҷоми Осиё миёни духтарони то 17-сола, ки аз 30-юми апрел то 17-уми майи соли 2026-ум дар Чин доир мегардад, роҳ ёфтанд.
"Бо пули роҳрӯбӣ скутер харидам, ки харҷ кам шавад, аммо он ҳам манъ шуд"
Қарори манъи истифодаи скутер ё дучархаҳои барқӣ то соли 2030 дар Душанбе, соҳибони ин навъи нақлиётро нигарон кардааст. Онҳо таъкид мекунанд, ки скутерҳо ба муҳити зист зарар надорад ва дар шароити тамбашавии зиёду камбуди нақлиёти мусофирбар дар пойтахт корашонро осон карда буд.
Мақомот мегӯянд, ин тасмим барои кам кардани тасодуф дар роҳҳо муҳим буд.
Моҳсафар, сокини ноҳияи Рӯдакӣ, чанд моҳ пеш бо пули роҳрубии худ барои писараш скутери барқӣ харид. Мехост харҷи оилааш барои роҳкиро кам шавад. Писари 27 солаи ин зан бо дучарха ва бе ягон харҷи зиёдатӣ ба Душанбе равуо мекард “Бачаи ман англисӣ мехонад, роҳамон дароз аст, маблағи зиёд надорем, ки ҳар рӯз ба ӯ пул диҳам, то рафта биёяд. Инро харидам, ки аз дасти норасӣ, ҳаминро ҳай карда раваду ягон камбудиро буд кунад. Масалан вақте дору даркор аст ё бозор бояд равад, зарур аст ин.” – мегӯяд, Моҳсафар Сафарова.
Чандест писари Моҳсафар наметавонад бо скутер ба шаҳр ворид шавад. Ба ӯ гуфтаанд, бидуни қайди давлатӣ ва рақами махсус аз он истифода набарад. Мегӯяд, ҳанӯз онро ба қайд нагирифта буданд, ки истифодааш пурра манъ шуд.
Моҳсафар Сафарова афзуд: “Гуфтанд, дигар намемонанд, намедонам ҳоли зиндагии мо чӣ мешавад.”
Истифодаи "скутер" ва "самокат"-и барқӣ дар роҳҳои мошингард ва пиёдагарди шаҳри Душанбе то 5 соли оянда манъ шуд. Сабаб ҳам танзими фаъолияти бенизоми онҳо, коҳиши садамаҳо ва пешгирии халал ба ҳаракати мошинҳову пиёдагардон гуфта шудааст. Ин қарор шумори дучархаҳои барқиро дар роҳҳои пойтахт ангуштшумор ва харидори онро ҳам кам кардааст.
Абдуқаҳор Розиқов, соҳибкори бозори Корвон дар сӯҳбат бо мо гуфт, чанд рӯз боз касе ба суроғи скутерҳо намеояд: “Савдо чанд рӯз шуд нест. 20 дона оварда будем, яктояшро фурухтем ин қадараш мондагӣ аст. Харидор буд якта нимта мефурӯхтем, се чор рӯз шуд савдо нест. На харидор аст на ҳичӣ. Кадоме бинад? мегӯяд, манъ шудааст, намегирем.”
Аз ин пеш мақомот соҳибони скутерҳоро маҷбур карданд, ки нақлиёти худро аз қайд гузаронанд ва рақами давлатӣ бигиранд. Зоҳиран ин қарор натавонист ҳаракати скутерҳоро дар шаҳр ба назм орад. Тасмими манъи ҳаракати скутерҳо дар роҳу пиёдаравҳои шаҳр пас аз он гирифта шуд, ки ба иттилои мақомот садамаҳои маргбор бо ширкати чунин навъи нақлиёт зиёд шуд. Мақомот мегӯянд, аз аввали сол бо скутеру самокатҳо 26 садамаи нақлиётӣ ба қайд гирифта шудааст, ки дар натиҷа, 3 нафар ҷон бохта, 24 нафари дигар ҷароҳатҳои гуногуни ҷисмонӣ бардоштаанд. Фақат дар як ҳафтаи аввали моҳи октябр мақомот аз марги ду ронандаи скутерҳои барқӣ хабар доданд.
Коршинсон мегӯянд, роҳҳои кишвар барои ҳаракати ин навъи нақлиёт мувофиқ нестанд ва мақомотро зарур аст, то аввал барои ин шароит фароҳам оварда баъдан иҷоза диҳанд.
Абдурақиб Қодиров, коршиноси масоили роҳу нақлиёт гуфт: “Ҳанӯз масалан ба баъзе асноди ҳуқуқӣ, хусусан қоидаҳои ҳаракат дар роҳ бояд баъзе мушаххасот ворид шавад, ки ҳамин скутерҳо чӣ намуд нақлиёт ҳастанд. Аз нигоҳи меъёрҳои техникӣ. Бояд мушаххас шавад, ки роҳи ҳаракати онҳо куҷост. Роҳи пиёдагард, автомобилгар ё роҳи махсус? Ин самти масъала ҳал нашудааст. Соҳибони ин намуди воситаҳои нақлиёт синну соли гуногун доранд, ҳатто талабаҳои мактаб ҳам ҳастанд.Ҳатто дар дохили боғҳои фарҳангиву фароғатӣ ҳам истифода мекунанд.”
Таҳлилгар мегӯяд, скутерҳои барқӣ зуд суръат мегиранду, на ҳамеша имкони сари вақт боздоштани онҳ мавҷуд аст. Касе, ки қобилияти вокуниши сареъ надорад, метавонад ба хатар рӯ ба рӯ шавад.
Шафқат Аҳмадов, ки чанд сол боз дар шабакаҳои иҷтимоӣ ба фурӯшу иҷораи скутерҳо машғул буд, мегӯяд, беҳтар буд, истифодаи ин навъи нақлиётро фақат барои афроди то 18 сола манъ мекарданд.
“Кори бисёр одамонро осон мекард, баъзеҳо барои мағоза рафтан истифода мебурданд. Ҳастанд онҳое, ки хонаҳояшон аз мағоза дур аст. Скутерҳои калон барои мардум дар хоҷагии деҳқонӣ кӯмаки беандоза мерасонад. Баъзеҳо ба кор мераванд.”- Шафқат Аҳмадов, скутерфурӯш
Манъи истифодаи скутерҳо дар Тоҷикистон дар ҳолест, ки сокинон, аз танбашавӣ дар роҳҳо ва камбуди нақлиёту гаронии роҳкиро шикоят мекунанд. Чанде аз ҳамсуҳбатони мо гуфтанд, хуб аст, агар қарори пурра манъ кардани ин навъи нақлиёт бознигарӣ шавад.
ИМА ба Украина мушакҳои "Томаҳавк" намедиҳад
ИМА ба Украина мушакҳои болдори “Томаҳавк” намедиҳад. Дар ин бора Владимир Зеленский, президенти Русия баъди мулоқот бо Доналд Трамп хабар дод.
Ба гуфтаи вай гуфтугӯҳо дар ин бора идома хоҳад кард. Сабаби рад шудани ин пешниҳод ба он рабт дода шудааст, ки Вашингтон намехоҳад, то ҷанг вусъат ёбад.
Зеленский дар мулоқот, дар Кохи Сафед гуфт, барои музокира бо Владимир Путин ва қатъи ҷанг омодааст. Вай бо президенти Амрико масъалаи замонати амниятиеро, ки Украина мехоҳад, матраҳ кард. Гуфтугӯи Зеленский ва Трамп беш аз ду соат идома кард. Пас аз ин, Трамп дар саҳифаи иҷтимоии Truth навишт: “Дидор бо президенти Украина, Владимир Зеленский бисёр ҷолиб ва гарм буд, вале ман ба ӯ ҳам мисли президент Путин гуфтам, ки вақти хатми куштору ба созиш расидан аст. Ба қадри кофӣ хун рехт, тамоми марзҳо бо хун кашида шуданд. Бигзор ҳарду ҷониб худро пирӯз эълон кунанд, бигзор инро таърих хулоса кунад. Ҳар ҳафта, ҳазорҳо нафар кушта мешаванд. Бас аст! Бо сулҳ ба хонаҳои худ баргарданд.”
Зеленский ҳам гуфт, бо Трамп мувофиқ аст ва ҳар ду ҷониб бояд бас кунанд. “Вале мо дарк мекунем, ки гап сари Путин аст, ин ҷангро мо оғоз накардем.” Президенти Украина таъкид кардааст, ки ба ҳамагуна музокироте, ки барои кишвараш сулҳ меорад, омода аст.
Аммо дар мавриди додани мушакҳои дурпарвоз ба Украина, Владимир Зеленский дар сӯҳбат бо телевизиони NBC гуфтааст, дар ҳар сурат умедро барои дарёфти “Томаҳавк”-и Амрикоӣ аз даст нахоҳад дод. “Ин хуб аст, ки президент Трамп “не” нагуфт, вале имрӯз “Ҳа” ҳам нагуфт.”
Аз ин пеш гуфта мешуд, Зеленский зимни дидору гуфтугӯяш бо Трамп рӯзи 17 - октябр аз президенти Амрико аз ҷумла мушакҳои дурпарвози "Томаҳавк" дархост менамояд.
Путин ҳушдор додааст, ки додани мушакҳои "Томаҳавк" ба Украина барои раванди сулҳ кумаке намекунад ва баръакс метавонад, равобити Вашингтону Маскавро сард намояд.
Тоҷикистон дар феҳристи нави FIFA боз ду зина боло шуд
Дастаи мунтахаби Тоҷикистон дар феҳристи нави FIFA (Федератсияи байналмилалии футбол) ду зина боло шуд ва бо 1220, 21 имтиёз дар байни 211 тими миллӣ дар ҷойи 102-юм қарор дорад.
Дар ин феҳрист мунтахаби Испания, қаҳрамони феълии Аврупо, бо 1880,76 имтиёз мисли пешин дар ҷойи аввал аст. Мунтахаби Аргентина, қаҳрамони феълии ҷаҳон, як зина боло рафт ва бо 1872,43 имтиёз ҷойи дуюмро соҳиб шудааст. Мунтахаби Фаронса, ҷоизадори нуқраи қаҳрамонии ҷаҳон, як зина поин шуд ва бо 1862,71 имтиёз дар мақоми сеюм аст.
Инчунин ба даҳгонаи беҳтаринҳо тимҳои миллии Англия, Португалия, Нидерланд, Бразилия, Белгия, Италия ва Олмон дохиланд.
Аз байни тимҳои миллии кишварҳои пасошӯравӣ зинаҳои баландро дар феҳристи FIFA Украина (27-ум, 1555,36 имтиёз), Русия (30-юм, 1530,95 имтиёз) ва Узбекистон (55-ум, 1452,34 имтиёз) ба даст овардаанд.
Тоҷикистон дар байни кишварҳои собиқи шӯравӣ аз Беларус (103-юм), Арманистон (104-ум), Қирғизистон (105-ум), Қазоқистон (115-ум), Озарбойҷон (123-юм), Эстония (130-юм), Латвия (139-ум), Туркманистон (142-юм), Литва (146-ум) ва Молдова (156-ум) пеш буда, пас аз Украина (27-ум), Русия (30-юм), Узбекистон (55-ум) ва Гурҷистон (70-ум) ҷойгир шудааст.
Тоҷикистон дар байни тимҳои миллие, ки ба Конфедератсияи футболи Осиё (AFC) шомиланд, ҷойи 17-умро азони худ кардааст. Дар Осиё Ҷопон дар мақоми аввал (дар ҷаҳон 19-ум), Эрон дар мақоми дуюм (дар ҷаҳон 21-ум) ва Кореяи Ҷанубӣ дар мақоми сеюм (дар ҷаҳон 22-юм) мебошанд.
Рейтинги навбатии FIFA (Федератсияи байналмилалии футбол) 21-уми ноябр нашр хоҳад шуд.
Феҳристи FIFA аз соли 1993 ба ин сӯ тартиб дода мешавад. Натиҷаи беҳтарини мунтахаби Тоҷикистон дар тамоми таърихаш дар феҳристи FIFA ҷойи 99-ум ва натиҷаи пасттаринаш ҷойи 180-ум мебошад.
Бояд гуфт, ки дастаи мунтахаби Тоҷикистон моҳи октябр дар марҳилаи интихобии Ҷоми Осиё-2027 дар ду бозӣ бар тими Молдив (2:0 ва 3:0) пирӯз шуд.
Рақибони дастаи мунтахаби Тоҷикистон дар марҳилаи интихобии Ҷоми Осиё-2027 дар гурӯҳи “А” тимҳои миллии Филиппин, Молдив ва Тимори Шарқӣ мебошанд.
Баъди натиҷагирии бозиҳои даври чоруми мусобиқот дар гурӯҳи “А” дастаҳои мунтахаби Филиппин ва Тоҷикистон 10-имтиёзӣ гирифтаанд. Аз рӯи таносуби беҳтари тӯбҳо Филиппин дар ҷойи аввал ва Тоҷикистон дар ҷойи дуюм қарор доранд. Тимори Шарқӣ бо 3 имтиёз дар ҷойи сеюм ва Молдив бидуни имтиёз дар ҷойи чорум мебошанд.
Дар даври панҷуми мусобиқот - 18-уми ноябр - Тоҷикистон дар меҳмонӣ бо Тимори Шарқӣ ва Молдив бо дастаи меҳмон – Филиппин - бозӣ хоҳанд кард.
Дар марҳилаи гурӯҳии Ҷоми Осиё-2027 тимҳои миллӣ ба шаш гурӯҳи иборат аз чаҳордастаӣ тақсим шудаанд. Ҳар як даста дар гурӯҳ шаш бозӣ – се рақобат дар майдони худ ва се бозӣ дар меҳмонӣ - анҷом медиҳад. Танҳо ғолибони гурӯҳҳо ба қисми ниҳоии Ҷоми Осиё, ки аз 15-уми январ то 8-уми феврали соли 2027-ум дар Арабистони Саудӣ баргузор мешавад, роҳ меёбанд.
Дар Душанбе мавсими гармидиҳӣ сар мешавад
Шурӯъ аз имрӯз, 18 - уми октябр дар Душанбе мавсими гармкунии хонаҳо тавассути шаабакаҳои гармидиҳӣ оғоз мешавад. Дар ин бора нашрияи расмии “Паёми Душанбе” рӯзи 16 - уми октябр хабар дод.
Мақомот аз сокинон хостаанд, барои бехатарӣ ва кори беҳтари бухорӣ ё батареяҳои гармидиҳӣ дар пойтахт, таҷҳизоти гармидиҳии хонаҳои худро бисанҷанд ва барои қабули гармидиҳӣ омода бошанд.
Хабаргзоории “Азия плюс” бо истинод ба масъулини “шабакаҳои гармидиҳии Душанбе” гуфта буд, ки имсол дар шаҳри Душанбе 100 иншооти дигар ба низоми гармидиҳӣ пайваст мешаванд.
Аз ҷумла, ба гуфтаи ин манбаъ зимистони имсол сокинони 79 бино дар ноҳияи Фирдавсӣ 31 иншоот дар ноҳияи Сино ва 21 бино дар ноҳияи Исмоилӣ Сомонӣ бори аввал ба низоми гармидиҳӣ пайваст мешаванд. Солҳои гузашта сокинон аксаран аз кори шабакаҳои гармидиҳӣ ва нокофӣ буданӣ гармӣ дар хонаҳояшон шикоят мекарданд.
Ахиран Вазорати молия иттилоъ дод, ки бонки Аврупоии Таҷдид ва Рушд барои навсозӣ кардани низоми гармидиҳӣ дар Душанбе, 6 миллион евро медиҳад. Дар ин бора рӯзи 6- уми октябр созишнома имзо шудааст.
Дар шаҳри Душанбе ду маркази барқу гармидиҳӣ кор мекунанд, ки якеаш аз сӯи ширкати чинии "ТВЕА" сохта шудааст.
Сафарбӣ Давлатова бо ҷоизаи байналмилалии ҷангалбонҳои ҷаҳон қадрдонӣ шуд
Як зани ҷангалбон аз Тоҷикистон соҳиби ҷоизаи маъруфи байналмилалӣ шудааст. Ҷоизаи мазкур таҳти унвони International Ranger Award 2025 охири ҳафтаи гузашта дар доираи Конгресси ҷаҳонии ҳифзи табиат дар Абу-Забӣ ба Сафарбӣ Давлатова тақдим шудааст.
Ин зани ҷангалбон ҳамчун нозири ҳифзи ҷангали мамнуъгоҳи "Даштиҷум" фаъолият мекунад.
Ӯ ҳамарӯза беш аз 16 километр минтақаҳои кӯҳистонро посбонӣ менамояд, то ҳаракати ҳайвоноти ваҳшӣ назорат ва аз буридани ғайриқонунии дарахтон ҷилавгирӣ шавад.
Ҳамчунин Сафарбӣ минтақаи парвариши ниҳолҳои нокро, ки зери хатари нобудшавӣ қарор доранд, идора намуда, зиёда аз 6000 ниҳол парвариш мекунад.
Садамаи муҳоҷирон дар Амур. Як нафар ҳалок шуда, 14 кас осеб дидаанд
Кумитаи тафтишотии вилояти Амур дар пайи як тасодуфи нақлиётӣ дар ноҳияи Свободненский бо иштироки муҳоҷирон парвандаи ҷиноӣ боз кардааст.
Субҳи баравақти 16-уми октябр дар наздикии деҳаи Уст-Пера як автобуси ҳомили 48 коргар ба мошини сабукрав бархӯрдааст. Дар натиҷа 1 нафар ҳалок ва 14 каси дигар бо ҷароҳатҳои гуногун дар бемористон бистарӣ шудаанд.
Хабаргузории ТАСС ба нақл аз дафтари матбуоти Кумитаи тафтишоти Русия дар вилояти Амур навиштааст, мусофирони автобус, коргарон аз Туркия, Тоҷикистон ва Узбекистон будаанд. Ҳамаи онҳо дар ширкати туркии Yamata кор мекардаанд.
Сонеҳа баъди он ба вуқуъ пайвастааст, ки автобус ба самти муқобили ҳаракат мебарояд. Пас аз бархурд ба мошини сабукрав автобус аз роҳ берун ва чаппа шудааст. Сабабҳои сар задани садамаи нақлиётӣ ва омилони он таҳқиқ мешаванд. Додситонии вилоят ин қазияро зери назорат гирифтааст.
Валентина Бескодарова, ёвари калони прокурори вилояти Амур гуфтааст: "Прокуратураи шаҳрӣ санҷишро оғоз кардааст, ки дар натиҷаи он иҷрои қонунҳои бехатарии ҳаракат дар роҳ ва риояи ҳифзи меҳнат баҳогузорӣ карда мешавад. Дар сурати мавҷуд будани қонуншиканӣ аз ҷониби додситонӣ чораандешӣ мешаванд".
Феълан яке аз маҷрӯҳони тасодуфи роҳ дар ҳолати вазнин дар шӯъбаи эҳё қарор дорад. Александр Бастрикин, раиси Кумитаи тафтишотии Русия дар бораи тафтиши ҳолатҳои садама гузориш талаб кардааст. Тасодуфҳои нақлиётӣ ё ҳама гуна ҳодисаҳои дигар бо ширкати муҳоҷирон ҳамеша вокуниши ин кумита ва раҳбари онро ба миён меоранд.
Дар Қирғизистон ҷаримабандии занони ниқобпӯш шуруъ шуд
Дар ҷануби Қирғизистон пулис 28 занро барои пӯшидани ниқоб ҷарима кардааст.
Ба гуфтаи ВКД-и Қирғизистон, амалиёти бо номи "Экстремист" дар ҷойҳои ҷамъиятии шаҳри Ӯш барпо шудааст.
Маблағи ҷарима 20 ҳазор сом - муодили 220 долларро ташкил додааст. Дар Қирғизистон аз моҳи январи соли ҷорӣ пӯшидани либосеро, ки барои шиносоӣ намудани шахс имкон намедиҳад, манъ карданд.
Мақомот тасмимро ба чораҳои амниятӣ рабт додаанд. Идораи динии мусулмонони кишвар аз ин иқдом пуштибонӣ кардааст.
Муфтиёт қайд намуд, ки ниқоб барои занони мусулмон либоси ҳатмӣ нест. Чунин рейдҳо пештар низ дар шаҳрҳои Ӯш ва Ҷалолобод гузаронида шуда буданд.
Аммо дар аввал ин рейдҳо танҳо бо огоҳӣ маҳдуд мешуданд. Пӯшидани ниқоб на танҳо дар Қирғизистон, балки дар дигар кишварҳои Осиёи Марказӣ ҳам манъ аст, аз ҷумла дар Тоҷикистон, ки занон ҳақ надоранд, бо ҳиҷоб ба муассисаҳои давлатӣ ва ё донишгоҳ ворид шаванд.
1600 нафарро барои қарздорӣ нагузоштанд аз Тоҷикистон берун раванд
Хадамоти иҷрои Тоҷикистон мегӯяд, дар нуҳ моҳи имсол ба феҳрасти ягонаи қарздорон номи 2350 нафари дигарро ворид кардааст. Онҳое, ки исмашон дар ин рӯйхат аст, то замони баргардонидани қарзҳои худ ба бонк, муаассиса ва ё афроди алоҳида аз кишвар берун рафта наметавонанд.
Дар гузорише аз натиҷагирии фаъолияти нуҳмоҳаи ин ниҳод, ки рӯзи 16-уми октябр нашр шуд, гуфта шудааст, ки дар ин давра ба 5075 нафар қарздорон барои берун рафтан аз кишвар маҳдудият гузошта шудааст.
Дар маҷмӯъ дар 9 моҳ 1600 нафаре, ки мехостанд, аз кишвар берун шаванд, бо сабаби қарздорӣ аз марз баргардонида шудаанд.
Хадамоти иҷро аз натиҷаи ин амал тавсиф карда, гуфтааст қарздорон баъди ин беш аз 24 миллион сомонӣ ва 108 ҳазор доллар қарзи худро баргардонидаанд.
Ба иттилои Хадамоти иҷро дар умум дар чанд соли ахир ба ин далел сафари беш аз 21 ҳазор қарздор ба берун маҳдуд шудааст.
Русия: Сафи донишҷӯён зиёд ва муҳоҷирони ғайриқонунӣ кам мешавад
Президенти Русия бо имзои фармони дахлдор консепсияи сиёсати муҳоҷиратро барои солҳои 2026-2030 тасдиқ намуд. Санади мазкур дар вебсайти интишори расмии санадҳои меъёрӣ ҷой дода шуда, дар он ба ҳамгироии иҷтимоӣ-фарҳангии муҳоҷирон таъкид шудааст.
Консепсияи нав коҳиши шумори муҳоҷирони ғайриқонунӣ ва ҷиноятҳо дар байни шаҳрвандони хориҷиро пешбинӣ мекунад.
Дар ҳуҷҷат таҷрибаи ҷойдошта дар танзими вуруду хуруҷи шаҳрвандони хориҷӣ, шароити будубоши қонунии онҳо, сабти номи муҳоҷирон, додани паноҳгоҳи муваққатӣ ва тартиби дарёфти шаҳрвандии Русияро инъикос ёфтааст.
Дар гузашта мақомдорони рус гуфта буданд, ки иқдомҳои ҳозираи назорат бар шаҳрвандони хориҷӣ дар ҳудуди Русия ба ҷилавгирӣ аз “анклавҳои қавмӣ” ва “минтақаҳои ҷиноӣ” қодир нестанд.
Дар консепсияи нав зикр шудааст, ки афзоиши шумори муҳоҷироне, ки барои кор ба Русия меоянд, то соли 2030 идома хоҳад кард. Гузашта аз ин, зуҳури чолишҳо ва таҳдидҳои нав ба амнияти миллӣ такмили сиёсати муҳоҷиратро тақозо мекунад. Бинобар ин Русия бояд барои баланд бардоштани масъулияти корфармо дар масъалаҳои марбут ба сиёсати муҳоҷират чораҳоеро рӯйи даст бигирад.
Бар асоси консепсияе, ки аз соли нав амалӣ хоҳад шуд, теъдоди муҳоҷирони ғайриқонунӣ бояд кам карда шавад ва ниҳодҳои давлатӣ будубоши аъзои оилаҳоеро, ки дар Русия кор ва таҳсил намекунанд, маҳдуд намоянд.
Дар ин байн шумори донишҷӯёни хориҷӣ дар донишгоҳҳои Русия бояд афзоиш ёбад. Ба он муҳоҷироне, ки қонунӣ дар Русия ҳузур дошта, забони русиро медонад ва дар ягон ҷиноят даст надоранд, роҳҳои осонтари дарёфти шаҳрвандии Русия муқаррар шудааст. Ҳамчунин ҳукумат барои кӯч додани шаҳрвандони хориҷие, ки аз арзишҳои анъанавии Русия пуштибонӣ мекунанд бояд мусоидат намояд.
Консепсиия нави сиёсати муҳоҷиратӣ дар Русия дар шароите рӯи кор меояд, ки тақрибан ҳар ҳафта мақомоти интизомӣ аз боздоштҳои бераҳмонаву ҳабс ва ихроҷи муҳоҷирон бо баҳонаҳои риояи қонунҳои муҳоҷират гузоришҳо нашр мекунанд. Думаи давлатии Русия дар якуним соли баъди ҳамлаи маргбор ба толори "Крокус"-и Маскав, ки дар содир кардани он асосан шаҳрвандони Тоҷикистон гумонбар мебошанд, даҳҳо қонуни маҳдудкунандаи кору ҳузури муҳоҷиронро қабул кардаанд.
Мақомоти тоҷик мегӯянд, ки соли гузашта Русия беш аз 30 ҳазор муҳоҷири тоҷикистониро аз ин кишвар ихроҷ намудааст. Владимир Путин дар нишасти ахири хабарии муштарак бо Эмомалӣ Раҳмон, ки рӯзи 9 октябр дар шаҳри Душанбе сурат гирифт, гуфт, ки дар Русия бештар аз як миллион шаҳрванди Тоҷикистон зиндагӣ ва кор мекунанд.
Зеленский барои мулоқот бо Трамп вориди Амрико шуд
Президенти Украина Владимир Зеленский бо нашри як навор эълон кард, ки вориди Вашингтон шудааст.
Қарор аст имрӯз вай дар Кохи сафед бо Доналд Трамп мулоқот кунад. Дар наворе, ки дар телеграм -канали ӯ нашр шудааст, дида мешавад, ки раисҷумҳур аз зинапояҳои ҳавопаймо поин мешавад. Рӯзи панҷшанбе оҷонсии "Интерфакс-Украина" бо истинод ба маълумоти хадамоти назорати парвози ҳавопаймоҳо хабар дод, ки ҳавопаймои раисиҷумҳури Украина дар пойгоҳи ҳавоии "Эндрюс" фуруд омад.
Зеленский гуфтааст, рӯзи панҷшанбе бо намояндагони ширкатҳои энержӣ ва дифоии Амрико мулоқот мекунад. Вай таъкид кардааст, ки “Ин тавлидкунандагони силоҳи қавӣ ҳастанд, ва тавони таҳкими бахши дифоъро доранд.”
Ба гуфтаи раҳбари Украина дар ин мулоқот масъалаи таҳкими низоми ҳимояи зиддиҳавоии Украина низ баррасӣ мешавад. Зеленский гуфтааст, Маскав, "баробари шунидани хабари мушакҳои "Томаҳавк" ба аз сар гирифтани гуфтугуҳо шитоб дорад" Аз ин пеш Президенти ИМА гуфта буд, мумкин аст ба Украина мушакҳои болдори “Томаҳавк” бидиҳад.
Ҳайати Украина, ки аллакай чанд рӯз боз дар Амрико қарор доранд, рӯзи 16 уми октябр бо Китт Келлог, намояндаи махсуси Трамп оид ба масоили Украина гуфтугӯ кардаанд.
Доналд Трамп рӯзи панҷшанбе бо президенти Русия сӯҳбати телефонӣ дошт. Баъд аз ин вай эълон кард, ки эҳтимол бо Путин дар Будапешт вомехӯрад.
Мавзӯи калидии мулоқоти раҳбарони Амрико ва Украина имрӯз интиқоли аслиҳа ба Украина, аз ҷумла мушакҳои болдор хоҳад буд. Русия гуфтааст, ки ин кор муносибати Маскавро бо ИМА бад хоҳад кард.
Гуфтугӯ