Дар чанд ҷумла
Вазири амнияти Туркманистон бори дувум танбеҳ гирифт
Қурбонгулӣ Бердимуҳаммадов, президенти Туркманистон дар якуним моҳи охир бори дувум ба вазири амнияташ Доврангелдӣ Байрамов танбеҳ эълон кард. Танбеҳи дувум ахиран зимни ҷаласаи Шӯрои амният эълон шудааст. Вазири амният ба хотири иҷро накардани масъулиятҳояш, барқарор накардани интизом миёни кормандон танбеҳ шунидааст. Дар ҳамин ҳол, Бердимуҳаммадов гуфтааст, вазорати амният "бояд кафили қонун ва амнияти кишвар бошад".
Дар ҷаласаи Шӯрои амнияти Туркманистон вазири амният аз вазъи кишвар гузориш дода, гуфтааст, ниҳоди зери роҳбарии вай чанд аспи ахалтека парвариш мекунад, ки дар мусобиқаҳо ширкат карда, соҳиб ҷоиза мешаванд. Бо ин вуҷуд, Бердимуҳаммадов аз кори вазорати амният қонеъ нашуда, ба вазир танбеҳ эълон кардааст. Бори аввал Байрамов дар ибтидои моҳи октябр танбеҳ гирифта буд.
Ҳамаи хабарҳои имрӯзро дар инҷо бихонед
СММ дар Афғонистон марги як кормандашро тасдиқ кард
Созмони Милали Муттаҳид дар Афғонистон хабари марги Фаришта Имодӣ, корманди UNFPA ё Сандуқи аҳолии СММ-ро тасдиқ кард.
Ин созмон рӯзи 5 июн бо нашри паёме дар шабакаи Х даргузашти Фаришта Имодиро тасдиқ кард ва бо хонавода, дӯстон ва ҳамкорони ӯ ҳамдардӣ кардааст.
Ин дар ҳоле аст, ки дар рӯзҳои ахир шуморе аз расонаҳои Афғонистон гузориш доданд, ки Фаришта Имодӣ, корманди Созмони Милали Муттаҳид дар яке аз минтақаҳои шаҳри Кобул аз сӯи афроди ношинос кушта шудааст.
Бархе фаъолони ҳуқуқи зан низ гуфтанд, ки Фаришта Имодӣ ҳадафи ҳамлаи афроди ношинос қарор гирифта ва ҷон бохтааст.
Бо ин ҳол, Созмони Милали Муттаҳид дар бораи сабабҳо ва чигунагии марги ӯ ҷузъиёт ироа накардааст.
Мақомҳои Толибон низ то замони нашри ин хабар дар ин маврид изҳори назар накардаанд.
Ҳамлаи ИМА ба ҷазираи Кишм ва зарбаи Эрон ба Баҳрайн ва Кувайт
Эрон ва Амрико субҳи шанбеи 6 июн аз ҳамлаҳо ба нерӯҳо ва пойгоҳҳои якдигар хабар доданд.
Фармондеҳии марказии артиши Амрико мегӯяд, ки шаш мушаки партобшуда аз сӯи Эрон раҳгирӣ шуда ва мушаки ҳафтум ба ҳадафи худ нарасидааст. Ба гуфтаи СЕНТКОМ, дар ҳоли ҳозир ҳеч гузорише дар бораи осеб дидани низомиёни Амрико дар ин ҳамлаҳо вуҷуд надорад
Дар баёнияи Фармондеҳии марказии артиши Амрико омадааст, "нерӯҳои ИМА дар 5 июн чандин мушаки баллистикии эронӣ ва паҳподи партобшуда аз сӯи Эрон ба тарафи тангаи Ҳурмуз ва ҳамсоягонро раҳгирӣ карданд. Эрон чанд соат пас аз он, ки Фармондеҳии марказии ИМА чаҳор паҳподи интиҳории эронии партобшуда ба тарафи тангаи Ҳурмузро сарнагун кард, ҳафт мушаки баллистикӣ ба тарафи Кувайт ва Баҳрайн партоб кард. Ин паҳподҳо таҳдиди фаврӣ барои рафтуомади баҳрӣ дар минтақа эҷод карданд. Нерӯҳои ИМА ба дунболи он барои дифоъ дар баробари ҳамлаҳои баҳрии бештар, сайтҳои радари нерӯҳои баҳрии Эронро дар Горук ва ҷазираи Кишм ҳадаф қарор доданд".
Сипоҳи посдорони Эрон субҳи 6 июн бо нашри баёнияе эълон кард, ки дар пайи ҳамлаҳои артиши Амрико ба ҷазираи Кишм, пойгоҳҳои амрикоӣ дар минтақа мавриди ҳамлаҳои мушакӣ қарор гирифтанд.
Артиши Кувайт ҳам субҳи 6 июн эълон кард, ки системаи дифои ҳавоии ин кишвар дар ҳоли муқобила бо ҳамлаҳои мушакӣ ва паҳбодӣ аст. Ҳамзамон, субҳи 6 июн Вазорати корҳои дохилии Баҳрайн аз фаъол шудани системаи дифои ҳавоии он кишвар хабар дод.
Хабаргузории "Франс-пресс" аз рух додани таркишҳо дар наздикии фурудгоҳи Кувайт ва ҳамчунин дар Баҳрайн хабар дод.
Тими миллии футболи Тоҷикистон Ҳиндро шикаст дод
Тими миллии футболи Тоҷикистон зери раҳбарии Игор Ангеловский, мутахассиси 50-сола аз Мекодонияи Шимолӣ, дар бозии аввали дӯстона мунтахаби Ҳиндустонро бо ҳисоби 3:1 шикаст дод.
Ин бозӣ дар доираи рӯзҳои расмии FIFA (Федератсияи байналмилалии футбол) шаби ҷумъаи 5-уми июн дар варзишгоҳи «ТАЛКО-Арена»-и шаҳри Турсунзода бо ҳузури беш аз 10 ҳазор тамошобин баргузор шуд.
Дар ибтидои дидор, дар дақиқаи ҳаштум, ҳамлагари мунтахаби Тоҷикистон Шериддин Бобоев аз пеналти ё ҷаримаи 11-метрӣ ҳисобро боз кард. Голи дувумро ҳимоятгар Меҳрубон Каримов дар дақиқаи 62-юм аз ҷаримагоҳ бо зарбаи сар зад. Баъди панҷ дақиқа нимҳимоятгар Эҳсони Панҷшанбе низ аз ҷаримагоҳ голи севумро ба самар расонид.
Голи ягонаи меҳмононро Фаррух Ҳоҷӣ Қасам, бозигари мунтахаби Ҳиндустон, дар дақиқаи 89-ум ба дарвозаи мизбонон ворид намуд.
Дидор бо мунтахаби Ҳиндустон дар Турсунзода нахустин бозии тими миллии Тоҷикистон бо сарварии Игор Ангеловский дар мақоми сармураббӣ ба ҳисоб мерафт.
Дар умум, ин бозии ҳаштум миёни мунтахабҳои Тоҷикистону Ҳиндустон дар тули 18 сол буд. Дар чаҳор бозӣ футболбозони тоҷик, дар ду дидор бозигарони ҳинду ғалаба кардаанд ва ду бозӣ мусовӣ шудааст.
Холид Ҷамили 49-сола аз Кувайт, ки вазифаи сармураббии тими миллии Ҳиндустонро ба зимма дорад, соли гузашта ҳам дастаашро ба Тоҷикистон оварда буд. Мунтахаби Тоҷикистон дар нахустин бозиаш дар мусобиқаи байналмилалии “Ҷоми миллатҳои CAFA-2025” дар гурӯҳи «В», ки моҳи сентябри порсол дар Варзишгоҳи марказии шаҳри Ҳисор доир шуд, аз тими миллии Ҳиндустон бо ҳисоби 1:2 шикаст хӯрда буд.
Ҳарчанд мунтахаби Тоҷикистон дар бозии аввали дӯстона тими миллии Ҳиндустонро мағлуб кард, коршиносону мухлисон аз ҳунарнамоии футболбозони тоҷик чандон хушҳол нашуданд. Зеро рақиб яке аз дастаҳои заиф буда, дар радабандии FIFA (Федератсияи байналмилалии футбол) нисбат ба мунтахаби Тоҷикистон 33 зина поин, дар ҷойгоҳи 136-ум, қарор дорад.
Бозии дувуми дӯстона байни тимҳои миллии Тоҷикистону Ҳиндустон рӯзи сешанебеи 9-уми июн дар Варзишгоҳи марказии шаҳри Ҳисор барпо гардида, соати 20:00 оғоз меёбад.
Бояд зикр намуд, бозиҳои дӯстона бо тими миллии Ҳиндустон як марҳилаи омодагии мунтахаби Тоҷикистон ба қисми ниҳоии Ҷоми Осиё-2027 мебошад. Рақибони футболбозони тоҷик дар гурӯҳи «D» тимҳои миллии Австралия, Ироқ ва Сингапурнд, ки хеле қавианд. Австралия ва Ироқ дар Ҷоми ҷаҳон-2026 бозӣ хоҳанд кард ва ин аз сатҳи баланди онҳо шаҳодат медиҳад. Дарвоқеъ, мунтахаби Ироқ бозии дӯстонаро муқобили тими миллии Испания бо натиҷаи мусовии 1:1анҷом дод.
Бинобар ин, хуб мебуд тими миллии Тоҷикистон барои бозиҳои дӯстона ё санҷишӣ рақибони пурқувватро интихоб мекард.
Ризо Вализода аз Амрико хост, "ёрии пизишкӣ кунед"
Ризо Вализода, хабарнигори пешини Радиои Фардо, бахши форсии Радиои Озодӣ, дар як файли савтӣ ё садоӣ аз дохили зиндони "Эвин"-и Эрон аз ҳукумати Амрико хостааст, барои ӯ ва амрикоиҳои дигари маҳбус дар Ҷумҳурии Исломӣ "кумаки пизишкӣ фароҳам кунад".
Вализода дар ин файли савтӣ, ки Радиои Фардо онро дар ихтиёр дорад, гуфтааст: "Агар ҳатто дармони бемориҳои мо хостаи бузурге бошад, дастикам мешавад аз мақомоти эронӣ хост, ки на ҳамаи фишорҳои ҷисмӣ ва шиканҷаҳои равонӣ, балки ҳадди ақал бахше аз онро коҳиш диҳанд."
Вай ҳамзамон ба се шаҳрванди амрикоии дигар, ки дар зиндони "Эвин" ҳастанд, ишора карда, гуфтаааст, онҳо аз "бемориҳои гуногун ранҷ мебаранд ва аз хадамоти воқеии пизишкӣ маҳруманд."
Радиои Фардо натавонистааст ҷузъиёти марбут ба се амрикоии дигареро, ки Вализода мегӯяд дар зиндони "Эвин" ҳастанд, таъйид кунад.
Ризо Вализода пас аз даҳ сол кор дар Радиои Фардо, моҳи ноябри соли 2022, аз ин расона рафт. Пас аз муддате будубош дар хориҷ ба дидори наздиконаш ба Эрон баргашт ва моҳи октябри соли 2024 боздошт шуд. Наздиконаш гуфтаанд, Ризо Вализода ба як “доми амниятӣ” уфтод.
Худаш дар паёми охирин дар шабакаи “Х” навишта буд, ки бо Созмони иттилооти Сипоҳи посдорон музокироти нотамом дошт, аммо дар ниҳоят бе ягон замонатнома, на хаттӣ ва на шифоҳӣ, ба Эрон баргашт. Маълум нашуд, ӯ дар чӣ шароит ин навиштаро нашр карда буд.
Додгоҳи инқилоб дар Теҳрон, моҳи декабри соли 2024 Ризо Вализодаро бо иттиҳоми "ҳамкорӣ бо ҳукумати Амрико", ки Ҷумҳурии Исломӣ "душман" мехонад, гунаҳкор донист ва ду сол аз озодӣ маҳрум кард.
Шарҳи Кумитаи ҳолатҳои фавқулода дар бораи ҳалокати ду наврас
Кумитаи ҳолатҳои фавқулодаи Тоҷикистон ҳалокати ду наврасро дар ноҳияи Шамсиддин Шоҳин шарҳ дод.
Дафтари матбуотии Кумита ба Радиои Озодӣ гуфт, бегоҳи 3-юми июн бародарон Билол ва Салмоншоҳ Ғафурзодаҳо дар деҳаи Дараи об ба нигоҳбини чорво машғул буданд, ки борони сахт борид.
Ба қавли манбаъ, Салмоншоҳ Ғафурзодаи 11-сола “ба бориши шадиди борон тоб наоварда, дар натиҷа аз карахтшавии бадан (сармозадагӣ)” дар чарогоҳ ба ҳалокат расидааст.” Бародари ин наврасро ба бемористон интиқол додаанд ва пизишкони аҳволи ӯро хуб гуфтаанд.
Мақомот гуфтанд, шомгоҳи 3-юми июн ҳамчунин Шамил Ҳошимзодаи 9-сола қурбони сел шуд. Ин наврас ҳамроҳи падараш дар чарогоҳ будааст ва мақомот мегӯянд, ҷасади ӯро як километр поёнтар аз ҷойи ҳодиса ёфтанд.
Дар бораи ҳалокати ин ду наврас нахуст Радиои Озодӣ 4-уми июн хабар дода буд.
Селу обхезӣ, ки баҳори имсол дар Тоҷикистон бисёр зиёд мушоҳида шуд, фақат дар моҳи май камаш 4 нафарро дар шаҳрҳои Кӯлоб ва Турсунзода ҳалок кард ва панҷ каси дигарро захмӣ шуданд.
Боздошту ҳабси ду блогери тоҷик барои суханони таҳқиромез
Мақомоти интизомии Тоҷикистон дар шаҳри Душанбе ва вилояти Хатлон ду блогерро барои вайрон намудани тартиботи иҷтимоӣ ва дашному ҳақорати ҳамсуҳбатон боздошт кардаанд.
Раёсати корҳои дохилии Хатлон дар хабарномае навишт, Абдуллоҳ Зарифзода, маъруф ба Идибеки Бохтарӣ дар шабакаҳои иҷтимоӣ ва пахши мустақим "мунтазам аз алфози қабеҳ, суханони таҳқиромез ва ибораҳои хилофи одобу ахлоқи ҷамъиятӣ истифода намуда, шаъну шарафи дигар шаҳрвандонро паст задааст".
Назари ин блогери 32-сола ба ҳарфҳои мақомот маълум нест. Пулиси Хатлон гуфтааст, Идибеки Бохтарӣ бо қарори додгоҳ ба панҷ шабонарӯз ҳабси маъмурӣ маҳкум шуд.
Навор дар Инстаграм:
Идибеки Бохтарӣ соли 2025 бо гуноҳи "истифодаи зӯроварӣ нисбат ба намояндаи ҳокимият" ба як сол зиндон маҳкум шуда буд. Ӯ дар як навор Абдулмаҷид Муминзода, раиси шаҳри Бохтар ва наздиконашро дашном дода, таҳдид кард, ки наворҳои онҳоро пахш мекунад.
Ҳамчунин рӯзи 4-уми июн пулиси Душанбе Рустам Ашӯров, блогери дигарро дастгир кард.
Дар хабарномаи Раёсати корҳои дохилии Душанбе омадааст, ин блогер "тавассути шабакаҳои иҷтимоӣ навореро нашр намудааст, ки дар он амалҳои тарғибкунандаи талбандагӣ ва беэҳтиромӣ нисбат ба асъори миллӣ инъикос ёфтаанд”.
Додгоҳ Рустам Ашӯровро ба 10 шабонарӯз ҳабс маҳкум кардааст. Ҷузъиёти бештари ин иттиҳом ва ҳамчунин назари Рустам Ашӯров ба иттиҳом маълум нест.
Рустам Ашӯров соли 2019 ҳамроҳ бо се блогери дигар баъди пахши навор дар бораи занҳои "танфурӯш" боздошт шуда, баъдан афв шуданд.
Ин бори аввал нест, ки мақомоти интизомии Тоҷикистон блогеронро барои баддаҳонӣ ва дашному ҳақорати ҳамсӯҳбатон боздошт мекунад.
Сафорати Афғонистон дар Кувайт ба Толибон супурда шудааст
Сафорати Афғонистон дар Кувайт ба дипломатҳои ҳукумати Толибон супурда шудааст
Як манбаи огоҳ дар ҳукумати Толибон, ки нахост номаш ошкор шавад, рӯзи 4 июн ин хабарро ба Радиои Аврупои Озод/Радиои Озодӣ тасдиқ кард, аммо ҷузъиёти бештаре дар ин бора ироа накардааст.
Телевизиони хусусии "Тулӯъ" гузориш додааст, ки Шафиқ Хатиб, раиси консулӣ ва умури марзии Вазорати корҳои хориҷии Толибон, сарпарасти Сафорати Афғонистон дар Кувайт таъйин шудааст.
Мақомоти Кувайт то кунун дар ин робита чизе нагуфтаанд.
Пеш аз ин низ бештари кишварҳои арабии ҳошияи Халиҷи Форс, аз ҷумла, Қатар ва Имороти Муттаҳидаи Арабӣ, сафоратҳои Афғонистонро ба дипломатҳои Толибон вогузор карда буданд.
Вазири корҳои хориҷии ҳукумати Толибон Амирхон Муттақӣ ахиран гуфта буд, ки бо беш аз 40 кишвар робитаҳои дипломатӣ барқарор кардаанд.
Гурӯҳи Толибон дар моҳи августи соли 2021 бо сарнагунии ҳукумати Афғонистон ва фирори президент Ашраф Ғанӣ аз Кобул, ҳукуматро дар даст гирифт.
Ба ҷуз Русия, то кунун ҳеч кишвари дигар ҳукумати ин гурӯҳро ба расмият нашинохтааст.
Парванда ба зидди зане, ки тифлашро бераҳмона задааст
Мақомоти интизомии Душанбе ба зидди як зани 24-сола парвандаи ҷиноӣ боз кардаанд, ки бераҳмии ӯ ба фарзандаш мардуми зиёдеро дар шабакаҳои иҷтимоӣ ба хашм овардааст.
Дар видеое, ки дар шабакаҳои иҷтимоӣ бахусус дар Фейсбук мечархад, дида мешавад, ки ин зан чӣ гуна ба сари фарзанди яксолаи худ бераҳмона ва сахт бо мушт мезанад.
Раёсати умури дохилии Душанбе рӯзи 4-уми июн дар як баёнияи расмӣ гуфт, ки ба зидди сокини шаҳр Мавлуда Бурҳонова бо иттиҳоми барқасдона осеби сахт расондан ба сиҳатии инсон ва ташкил кардани фоҳишахона парвандаи ҷиноӣ боз кардааст.
Маълум нест, ҳодиса кай сурат гирифтааст, вале раёсат мегӯяд, ки баъди вокуниши сахти ҷомеа ҳувияти занро мушаххас ва ба зидди ӯ парвандаи ҷиноӣ боз кардаанд.
Ба иттилои Раёсати умури дохилӣ, Мавлуда Бурҳонова дар гузашта ҳам барои ҷалби духтарон ба танфурӯшӣ ба ҷавобгарии ҷиноӣ кашида шудааст.
Назари зан ба баёнияи мақомот рӯшан нест.
Дар шарҳи видеои муносибати бераҳмона бо кӯдак корбарони зиёде дар Фейсбук гуфтаанд, ки Мавлуда Бурҳонова бояд аз ҳуқуқи модарӣ маҳрум карда шавад. Бар асоси парвандае, ки боз кардаанд, эҳтимол фарзанди хурдсоли Мавлуда Бурҳоноваро аз ӯ гирифта, барои парасторӣ ба ихтиёри давлат диҳанд.
Латукӯб ё бераҳмона задани тифлони хурдсол дар гузашта ҳам зиёд дида шудааст ва Ваколатдори ҳуқуқи кӯдак дар Тоҷикистон дар гузориши солонаи худ гуфтааст, соли гузашта 6 муроҷиат дар бораи зӯроварӣ ё задани кӯдаконро сабт кард. Дар ин гузориш омадааст, “ташвишовар аст, ки бештар шахсоне ба кӯдакон зӯроварӣ ё зулм мекунанд, ки тифлон онҳоро мешиносанд ё ба онҳо меҳр бастаанд.”
"Ду наврас ҷон бохт." Пайомади сел дар ноҳияи Шамсиддини Шоҳин
Бар асари омадани сел дар ноҳияи Шамсиддини Шоҳин ду наврас ҷон бохта, се каси дигар бо захмҳои вазнин дар бемористон бистарӣ шудаанд.
Ҳодиса пас аз зуҳри 3-юми июн дар деҳаи Шаҳрибарбари ин ноҳия ва замоне рух додааст, ки наврасон ба чарондани чорво машғул буданд.
Як манбаъ дар ҳукумати ноҳияи Шамсиддин Шоҳин рӯзи 4-уми июн ба Радиои Озодӣ гуфт, ҷонбохтагон Шамил Ҳошимзодаи 9-сола ва Салмон Ғафурзодаи 11-сола ҳастанд.
"Мардум наврасонро аз сел бароварда, ба шифохона бурданд. Ду нафар ҳалок шуда, се нафари бо осебҳои сахт дар бемористон ҳастанд," -- афзуд ҳамсуҳбати мо.
Селу обхезӣ, ки баҳори имсол дар Тоҷикистон бисёр зиёд мушоҳида шуд, фақат дар моҳи май камаш 4 нафарро дар шаҳрҳои Кӯлоб ва Турсунзода кушт ва панҷ каси дигарро захмӣ кард.
Ҳавошиносони тоҷик ба мардуми кишвар ҳушдор додаанд, ки рӯзи 5-уми июн бахусус дар манотиқи кӯҳистонӣ эҳтиёткор бошанд, зеро хатари омадани сел зиёд аст.
Тоҷикистон, ки як кишвари кӯҳистонӣ аст, дар баробари селу обхезиву ярч ва ҳам хушксолӣ бисёр осебпазир аст ва солона дар натиҷаи ин фалокатҳои табиӣ даҳҳо миллион доллар зарар мебинад.
Ҳушдор аз хатари омадани сел дар минтақаҳои Тоҷикистон
Ҳавошиносони тоҷик ба мардуми кишвар ҳушдор додаанд, ки рӯзи 5-уми июн бахусус дар манотиқи кӯҳистонӣ эҳтиёткор бошанд, зеро хатари омадани сел зиёд аст.
Дар ҳушдори расмӣ, ки Идораи об ва ҳавошиносии Тоҷикистон нашр кард, гуфта мешавад, фардо мумкин аст, дар баъзе аз минтақаҳои ноҳияҳои тобеи марказ, вилоятҳои Хатлону Суғду Бадахшон борони зиёд борида, сабаби обхезӣ шавад.
Хатари селу обхезӣ аз ҷумла дар рӯдхонаҳои Зарафшон, Вахш, Панҷ ва рӯдхонаҳои ҷанубии қаторкӯҳҳои Ҳисор пешбинӣ мешаванд. Ҳавошиносон дар ин рӯзҳо ба мардум ҳушдор медиҳанд, ки аз сафар ба маҳаллаҳои кӯҳӣ ва назди дарёҳои пуртуғён худдорӣ кунанд.
Селу обхезӣ, ки баҳори имсол дар Тоҷикистон бисёр зиёд мушоҳида шуд, фақат дар моҳи май камаш 4 нафарро дар шаҳрҳои Кӯлоб ва Турсунзода кушт ва панҷ каси дигарро захмӣ кард.
Тоҷикистон, ки як кишвари кӯҳистонӣ аст, дар баробари селу обхезиву ярч ва ҳам хушксолӣ бисёр осебпазир аст ва солона дар натиҷаи ин фалокатҳои табиӣ даҳҳо миллион доллар зарар мебинад. Дар аксар ҳолат ҳам мардуми зиёндида маҷбур мешаванд, хонаҳои нимавайронаи худро мустақилона таъмир ва ё бозсозӣ кунанд.
Омӯзгори латукӯбшударо ҷарима кардаанд
Додгоҳи ноҳияи Нуробод, Муҳимҷон Раҳмонов, омӯзгори латукӯбшударо 20 нишондиҳанда барои ҳисобҳо, баробар ба 1560 сомонӣ, ҷарима кардааст. Муҳимҷон Раҳмонов пештар ба Радиои Озодӣ шикоят карда буд, ки рӯзи 8-уми май бародари як хонанда ӯро задааст.
Ҳукм нимаи дувуми 3-юми июн содир шуда, додгоҳ ин омӯзгорро дар иҷро накардани ӯҳдадорӣ дар мавриди таълиму тарбияи кӯдак, гунаҳор кардааст.
Ба иттилои як манбаи огоҳ, омӯзгор дар додгоҳ "сухани дағал гуфтан" ба як хонандаро қабул кардааст, аммо гуфтааст, аз болои ҳукм шикоят мебарад.
Манбаи Радиои Озодӣ дар Додгоҳи ноҳияи Нуробод гуфт, Миралӣ Орзуев, касе, ки омӯзгорро латукӯб кардааст, ба панҷ шабонарӯз ҳабси маъмурӣ маҳкум шудааст.
Додгоҳ ӯро дар майдаавбошӣ гунаҳкор кард. Ба иттилои манбаи огоҳи Радиои Озодӣ, Орзуев дар додгоҳ гуфтааст, омӯзгорро танҳо як шаппотӣ задааст.
Омӯзгор Муҳимҷон Раҳмонов ҳам ба ҳукми нисбати худаш содиршуда ва ҳам ба ҳукми Миралӣ Орзуев норозигӣ карда гуфтааст, аз болои он шикоят мебаранд.
Муҳимҷон Раҳмонов пештар ба Радиои Озодӣ шикоят карда буд, ки рӯзи 8-уми май бародари як хонанда ӯро задааст. Аммо Миралӣ Орзуев, бародари ин мактабхон дар як суҳбат ба Радиои Озодӣ гуфта буд, омӯзгорро назадааст, балки танҳо суҳбат карданд.
Дар видеои суҳбати муаллим, ки дар шабакаҳои иҷтимоӣ аз ҷумла "Фейсбук" васеъ паҳн шуд, Муҳимҷон Раҳмонов мегӯяд, фарде, ки ба ӯ дарафтод, ҳамчунин гуфтааст, "падару модаратро фалон мекунам" ва сипас "ба рӯям туф кард".
Тоҷикистон ба як ширкати русӣ 15 ҳазор гектар замин иҷора медиҳад
Мақомоти Тоҷикистон ҷузъиёти созишнома бо ширкати русии "БТК гурӯҳ"-ро шарҳ доданд.
Фаррух Юсуфзода, муовини аввали раиси Кумитаи сармоягузорӣ ва идораи амвол 26-уми май дар Маҷлиси намояндагон гуфт, гурӯҳи ширкатҳои БТК бояд давоми даҳ соли оянда дар Тоҷикистон 150 миллион доллар сармоягузорӣ карда, "корхонаи коркарди нахи пахтаро то маҳсулоти ниҳоӣ", бунёд кунад.
Дар иваз Тоҷикистон ӯҳдадор шудааст, ки барои кишти пахта ба ин ширкат "на камтар аз 15 ҳазор гектар бо инфрасохтори зарурӣ" ҷудо мекунад. Мӯҳлати истифодаи ин заминҳо доимӣ ё на камтар аз 20 сол пешбинӣ шудааст.
Қарор аст, ки ин заминҳо асосан дар минтақаи Кӯлоб ба ширкати русӣ дода шаванд.
Созишнома бо ширкати "БТК" моҳи октябри соли 2025 дар ҷараёни сафари президенти Русия Владимир Путин ба Тоҷикистон имзо шуда буд. Мақомоти Тоҷикистон ҳадаф аз ҳамкорӣ бо ин ширкатро рушди саноат гуфта буданд.
Вале мавзӯи гурӯҳи БТК аз он назар мавриди таваҷҷӯҳ аст, ки бино ба як таҳқиқи Радиои Озодӣ, ин ширкат инак чор сол аст бо таҳияи либоси ҳарбӣ ба артиши Русия дар ҷанги Украина машғул аст.
Бунёдгузор ва баҳрагирандаи асосии ин ширкат Таймураз Боллоев зери таҳримҳои Иттиҳоди Аврупо қарор дорад
Ҳалокати падару писар аз расиши сими барқ
Дар пайи расиши сими барқ як падару писар дар ноҳияи Мастчоҳ ба ҳалокат расидаанд. Ҳодиса шоми 3-юми июн дар бошишгоҳи саҳроии деҳаи Падрохи ноҳия рух додааст.
Як манбаи огоҳ аз қазия ба Радиои Озодӣ гуфт, Ҳикматулло Одиназодаи 26-сола барои буридани шохи тут ба болои дарахт мебарояд, вале ба як симе бармехӯрад, ки аз болои дарахт мегузашт.
Ҳамсӯҳбати Радиои Озодӣ гуфт, Одиназода ба сими барқ часпида, аз болои дарахт ба даруни ҷуйи об меафтад ва онҷо ҷон медиҳад.
Падари ин ҷавон Раҳматулло Одинаев барои халос кардани писараш меравад, аммо сими барқ ҷони ӯро ҳам мегирад. Ин мард 64 сол доштааст.
Ин падару писар 4-уми июн дар зодгоҳашон деҳаи Падрох ба хок супурда шуданд.
Мақомоти ноҳияи Мастчоҳ ҳодисаро таҳқиқ доранд.
Ҳалок шудани сокинон аз барқ дар гузашта ҳам иттифоқ афтодааст. Риоя накардани қоидаи бехатарӣ аз сабабҳои асосии ин ҳодисаи нохуш гуфта мешавад.
Майли сармоягузорон аз Узбекистон ба сохтани корхонаҳо дар Тоҷикистон
Дар ҳоле ки тоҷирону соҳибкорони тоҷик аз санҷишҳои зиёду пайваста ва гаронии молиёт ё андоз шикоят доранд, баъзе аз сармоягузорон аз Узбекистон барои сохтани корхонаҳои азим ба шимоли Тоҷикистон омадаанд.
Яке аз ин корхонаҳо "Суғдметал" аст, ки моҳи марти соли 2025 бо харҷи ним миллиард сомонӣ дар ноҳияи Бобоҷон Ғафурови вилояти Суғд ба кор сар кард. Мақомот гуфтанд, яке аз сармоягузоронаш соҳибкоре аз Узбекистон аст.
Масъулони корхонаи истеҳсоли пардаҳои полиэтилении "Технологияи полимерӣ" дар ноҳияи Бобоҷон Ғафуров низ гуфтанд, ки дар ду соли гузашта бо ёрии мутахассисон аз Узбекистон шароити корро беҳтар кардаанд.
Ин корхона соли 2009 бо пули соҳибкори тоҷик фаъол шуда, аммо дертар ва ба далели ҷавобгӯ набудани маҳсулоташ ба талаботи бозор бо душворӣ дучор шуда буд.
Равобити Тоҷикистону Узбекистон, ки дар гузашта ба далели баҳси роҳу обу нерӯгоҳ ба сардӣ печида буд, баъд аз марги Ислом Каримов ва ба қудрат омадани Шавкат Мирзиёев беҳтар шуд.
Пештар Оҷонси омори Узбекистон гузориш дода буд, ки теъдоди корхонаҳо бо сармояи соҳибкорони тоҷик дар ин кишвар рӯ ба афзоиш будааст. Ҳоло дар Узбекистон 410 корхона бо сармояи соҳибкорони тоҷикистонӣ кор мекунанд. Моҳи ноябри соли гузашта теъдоди ин корхонаҳо 357 адад буд.
Дар ҳамин додугирифт байни Тоҷикистону Узбекистон афзуда, дар чор моҳи аввали имсол ба тақрибан 285 миллион доллар расидааст.
Аз Тоҷикистон ба Узбекистон бештар маъдан, нерӯи барқ, ангишт, алюминий, нахи пахта ва маҳсулоти кишоварзӣ содир шудааст. Аз Узбекистон ба Тоҷикистон гази табиӣ, маҳсулоти нафтӣ, нерӯи барқ, масолеҳи сохтмонӣ, ҷиҳози хона ва маҳсулоти филизӣ овардаанд.
Ду кишвар мехоҳанд, дар чор соли оянда додугирифтро ба ду миллиард доллар расонанд.
Қаблан чанде аз соҳибкорони узбекистонӣ шикоят карда буданд, ки маъмурони гумруки Тоҷикистон бо таъхир дар ҳуҷҷатгузорӣ барои воридоти молу маҳсулот монеагузорӣ мекунанд.
Навор дар Инстаграм:
Амрико ба як киштии озими Эрон ҳамла кард, Эрон ба Кувайт
Вазорати корҳои хориҷии Кувайт гуфт, дар ҳамлаи Эрон ба ин кишвар дастикам як нафар кушта шуд.
Дар ин ҳодиса, ки рӯзи 3-юми июн иттифоқ уфтод, Фурудгоҳи байнулмилалии Кувайт баста шуда, ба чанд иншооти муҳим, аз ҷумла намояндагиҳои дипломатӣ осеб расидааст.
Вазорати умури хориҷии Кувайт дар изҳороте “ҳамлаҳои бераҳмона ва пайваста”-и Эронро маҳкум кард. Ин ниҳод афзудааст, рафтори Ҷумҳурии Исломӣ танишҳоро сахттар ва амнияту суботро дар минтақа халалдор мекунад.
Ҳамлаи Эрон ба Кувайт баъд аз он сурат гирифт, ки Ҷумҳурии Исломӣ Амрикоро ба ҳамла ба як киштии нафткаши он кишвар муттаҳам кард
Пештар мақомоти Амрико гуфтанд, нерӯҳои ин кишвар як киштии боркашро, ки тавассути обҳои Халиҷи Форс озими Эрон буд, ҳадаф қарор доданд. Иёлоти Муттаҳида дар ин минтақа таҳрим ҷорӣ намуда, равуои киштиҳоро ба Эрон манъ кардааст.
Ситоди марказии нерӯҳои ИМА рӯзи 2-юми июн изҳор намуд, ки киштии Лекси давоми 24 соати гузашта дастури низомиёни Амрикоро нодида гирифтааст.
Хабаргузории "Рейтерс" тасдиқ мекунад, ки киштии Лекси 26-уми май дар обҳои соҳилии Умон ҷойгир буд. Низомиёни амрикоӣ исрор меварзанд, ки баъд аз исобати мушак киштӣ ҳаракатро ба тарафи Эрон қатъ кард.
Лекси шашумин киштӣ аст, ки низомиёни амрикоӣ аз оғози муҳосираи Халиҷи Форс дар таърихи 13-уми апрел беҳаракат кардаанд. Дар ин муддат 122 киштии дигар, ки озими бандарҳои эронӣ будаанд, самти ҳаракаташонро тибқи дастурҳои низомиёни амрикоӣ тағйир додаанд.
Ҳамчунон Ситоди марказии нерӯҳои ИМА иттилоъ медиҳад, ки дар ду рӯзи гузашта нерӯҳои амрикоӣ ва ҳампаймонҳояшон дар Ховари Миёна як идда мушакҳои баллистикӣ ва паҳпод ё ҳавопаймоҳои бесарнишини Эронро роҳгирӣ кардаанд.
Дар ҷавоб нерӯҳои амрикоӣ барои ба истилоҳ "ҳимоят аз худ" пойгоҳҳои низомии Эрон дар ҷазираи Қешм, воқеъ дар гулӯгоҳи Ҳурмузро мавриди оташ қарор додаанд. Аз натиҷаи ва талафот хабар дода намешавад.
