Ҷангсолори баҳсбарангез Гулбуддин Ҳикматёр рӯзи 29 сентябр дар маросими имзои созишномаи сулҳ бо Ашраф Ғанӣ мардумро аз тариқи видео ба сулҳ даъват кард. Дар Кобул ин созишномаро раиси ҷумҳурии Афғонистон Ашраф Ғанӣ дар Кохи раёсатҷумҳурӣ имзо кард. Ҳикматёр, ки аз макони номаълуме тариқи видео иртибот гирифт, зери ин созишнома аз як маҳалли корӣ имзо гузошт.

Имзои ин санад дар кохи раиси ҷумҳур, дар Кобул баргузор ва мустақиман дар телевизион пахш шуд.

Раҳбари табъидии ҷангиёни Ҳизби Исломӣ Гулбуддин Ҳикматиёр дар вақти имзои санад ҳамаи афғонҳоро, ки сулҳу салоҳи минтақаро мехоҳанд, табрик кард. Ӯ гуфт, "ман дуо мекунам, ки кишвари мо мустақилу худмухтор бошад. Ин миллати бегуноҳу хаста низоъҳо ва ҷангу ноамниро ба охир расонад ва ба ваҳдат бирасад."

Раиси ҷумҳури Афғонистон Ашраф Ғанӣ гуфт, "акнун вақтест Толибон андеша кунанд, ки ҷангро идома медиҳанд ва ё бо сулҳ меоянд."

Бар пояи созишномаи сулҳ, Ҳикматёр барои ҷангҳои гузашта афв мешавад ва ҳукумат баъзе тарафдорони ӯро аз маҳбас озод мекунад. Ҳукумати Афғонистон ҳамчун ваъда розӣ шудааст, ки барои лағви таҳримҳои байналмилалӣ алайҳи Гулбуддин Ҳикматёр пофишорӣ кунад. Созишнома ҳамчунин таъмини амнияти ӯро аз ҳисоби ҳукумат дар назар дорад.

Гуфтушунид бо Ҳикматёр баробар бо нигарониҳо аз бозгашти эҳтимолии яке аз тундравтарин гурӯҳи ҷангии Афғонистон идома доштааст.

Дипломатҳои амрикоӣ дар маросиме дар Душанбе рӯзи 17 сентябр ба Тоҷикистон 75 тонна ғизои истеҳсоли амрикоиро ба маблағи беш аз 255 ҳазор доллар тақдим карданд.

Дар иттилоияи сафорати ИМА дар Душанбе омадааст, ки ин кӯмакҳо “барои дастгирии тақрибан 40 ҳазор аҳолии осебпазир” равона мешавад. Маводи ғизоии тақдимшуда аз наску биринҷ ва сабзавот иборат мебошад, ки бо витамину минералҳои муҳим ғанӣ гардонида шудааст.

Ин ёриро ба беш аз 140 муассисаи тиббӣ ва иҷтимоӣ, аз ҷумла муассисаҳои табобати сил, дармонгоҳҳои равонпизишкӣ, марказҳои онкологӣ ва паноҳгоҳҳо барои гурезаҳо тақсим мекунанд.

Аз соли 2007 ҳукумати ИМА ба Тоҷикистон ҳазор тонна кумаки ғизоии ғанигардонидашудаи истеҳсоли Амрикоро ба маблағи беш аз 2,2 миллион доллар фароҳам кардааст.

Дар Олмон як зодаи Афғонистон барои куштори фарде дар гирдиҳамоии зиддиисломӣ ба ҳабси абад маҳкум шуд. Рӯзи сешанбе додгоҳи шаҳри Штутгарт гуфт, ки соли гузашта ин шаҳрванди Афғонистон бо ғаразҳои эҳтимолан мазҳабӣ ба гирдиҳамоии зиддиисломӣ ҳамла кард ва дар натиҷаи ин амали ӯ, як афсари полис ба қатл расида, панҷ каси дигар захмӣ шуданд.

Ба навиштаи хабаргузории Рейтерс, ҳукм замоне содир мешавад, ки дар Олмон баҳси бозгардони ҷинояткорон ва паноҳҷӯёни нокоми афғонистонӣ ҷараён дорад. Хабаргузорӣ меафзояд, бозгардони афроди ёдшуда соли гузашта баъди музокироти Олмон бо ҳукумати Толибони Афғонистон оғоз ёфтааст, вале Берлин то кунун расман ин иқдомро тасдиқ накардааст.

Моҳи майи соли 2024-ум шаҳрванди 26-солаи Афғонистон, ки бо номи Сулаймон А. зикр шудааст, бо корди шикорӣ ба гирдиҳамоии гуруҳи мухолифини ислом бо номи "Пакс Европа" дар шаҳри ғарбии Манҳейм ҳамла кард.

Баъди ин амал ӯ боздошт шуд. Ҳарчанд ин шаҳрванди Афғонистон аз ҳаводорони созмони даҳшатафкани "Давлатӣ исломӣ" ба шумор меравад, дар айбномааш истилоҳи терроризм ёд нашудааст.

Дар ҳукми Сулаймон А. ибораи "ҷинояти хеле вазнин" ба чашм мехӯрад. Яъне имкони афви ҷурмаш вуҷуд надорад. Тибқи қонунҳои Олмон, Сулаймон А, ҳақ дорад, бознигарии ҳукмро талаб кунад.

Дар Тоҷикистон соле беш аз 2 миллион тонна партови сахти маишӣ ҷамъ мешавад ва ин партовгоҳҳо масоҳати умумии беш аз 300 гектарро ташкил медиҳад. Дар ин бора президенти Тоҷикистон Эмомалӣ Раҳмон рӯзи 17 сентябр дар мулоқот бо кормандони Кумитаи ҳифзи муҳити зист ва маросими ифтитоҳи бинои нави ин идораи ҳукуматӣ суханронӣ намуд.

Раҳмон ба камбуди шумори коргоҳҳои хурди коркарди партовҳо чун як мушкили ҷиддии экологии Тоҷикистон таъкид намуда гуфт, ки корхонаҳои амалкунанда барои коркарди партовҳои пластикӣ, коғаз, равғани воситаҳои нақлиёт, резину оҳанпора ва дигар навъи партов кифоят намекунанд.

Ӯ ба Кумитаи ҳифзи муҳити зист супориш дод, ки «Стратегияи миллии идоракунии партовҳоро барои давраи то соли 2035»-ро таҳия намоянд, то ки ҳадафи аслиаш кам кардани таъсири партовҳо ба муҳити зисти Тоҷикистон бошад.

Мушкили партовҳо дар Тоҷикистон нав нест ва дар бисёр маҳалҳои аҳолинишин то ҳол нуқтаҳои махсусан ҷудошуда барои ташкили партовгоҳи расмӣ вуҷуд надоранд. Фаъолони экологӣ аз ҷорӣ набудани низоми ҷудо кардани навъи партов вобаста ба сифати он – пластик, оҳан ё коғазу ахлоқи маишӣ солҳо аст интиқод мекунанд.

Раисҷумҳури Амрико Доналд Трамп қабл аз сафараш ба Британияи Кабир гуфтааст, Владимир Зеленский барои поёни ҷанг дар Украина, бояд ба созиш расад.

Ба гуфтаи Трамп, дидори як моҳи пеши ӯ бо Владимир Путин дар Аляска "муваффақиятҳои зиёд дошт", аммо барои созиш бояд ду тараф, яъне Русия ва Украина, ба созиш расанд.

Трамп гуфтааст, лозим меояд, ки ӯ низ дар вақти вохӯрии роҳбарони Русия ва Украина ҳузур дошта бошад, чун Путин ва Зеленский "ҳамдигарро дидан намехоҳанд"-у "наметавонанд дар як утоқ бошанд".

"Расидан ба созиш аз тахмини ман мушкилтар аст, барои онки Путин ва Зеленский нисбати ҳамдигар бадбинии зиёд доранд. Вале мо ин ҳолатро бозмедорем",-гуфтааст Трамп.

Пештар Марко Рубио, вазири корҳои хориҷии Амрико гуфт, эҳтимол дорад Доналд Трамп бо Владимир Зеленский ҳафтаи оянда дар ҳошияи нишасти 80-уми Маҷмааи СММ мулоқот кунад.

Доналд Трамп, раисҷумҳури Амрико рӯзи 15 сентябр аз рӯзномаи "Ню-Йорк Таймз" ва чаҳор хабарнигори он ба додгоҳи федеролии Флорида шикоят бурд ва 15 миллиард доллар ҷуброн талаб кард.

Дар шикоят омадааст, мақолаҳо ва китобе, ки пеш аз интихоботи соли 2024 нашр шуданд, "намунаи чандинсолаи дурӯғгӯӣ ва бадгӯии барқасдона" алайҳи Трамп будааст.

Трамп дар шабакаи иҷтимоии Social Truth ин рӯзномаро ба дурӯғпардозӣ ва сухангӯи чапи радикал" будан, муттаҳам кард.

Хабаргузории "Ассошиэйтед пресс" гуфтааст, ки "Ню-Йорк Таймз" ба дархосташ барои шарҳи ин мавзуъ, ҳанӯз посух надодааст.

Трамп қаблан ҳам алайҳи расонаҳои дигар, аз ҷумла, Wall Street Journal, шикояти 10-миллиарддоларӣ бурда буд.

Бонки миллии Тоҷикистон дар вокуниш ба як гузориши Радиои Озодӣ аз 9 сентябр гуфтааст, дар кишвар барои фурӯши доллари амрикоӣ "ягон маҳдудият ё талаботи нав ҷорӣ карда нашудааст".

Дар моҳҳои ахир қурби доллар дар Тоҷикистон поён рафт, аммо пайдо кардани ин асъори хориҷӣ ба гуфтаи сокинон дар бонкҳо хеле мушкил аст. Бонкҳои тиҷоратӣ ё доллар надоранд ё бо маҳдудият танҳо то 500 доллар мефурӯшанд.

Бонки миллии Тоҷикистон дар вокуниш ба ин гузориш навиштааст, "талаботи ташкилотҳои қарзии молиявӣ дар асоси дархостҳои пешниҳодшуда пурра ва сари вақт қонеъ гардонида мешавад".

Аммо Бонки миллӣ дар ин бора ягон омор наовардааст ва маълум нест, ки талаботи рӯзонаи бонк ва ташкилотҳои қарзии кишвар ба доллар чӣ қадар аст.

Бонки миллӣ ҳамчунин бе овардани рақамҳои мушаххас танҳо гуфтааст, дар моҳҳои январ - августи имсол асъори нақди барои аҳолӣ ҷудошуда назар ба соли гузашта зиёд мебошад.

Дар вокуниши Бонки миллӣ омадааст, камчинии асъори хориҷӣ дар бонкҳо "танҳо дар ҳолатҳои истисноӣ, аз қабили ба итмом расидани асъори нақди ҷудошуда дар хазина" ва саривақт нарасидани асъор метавонад ба вуҷуд ояд, "вале ҳолати мазкур вазъияти бозорро пурра инъикос намекунад".

Баъзе аз соҳибкорон ба Радиои Озодӣ гуфтанд, қабл аз он ки доллар бигиранд, бояд санади соҳибкориашонро пешниҳод кунанд ва баъд аз ин ба онҳо доллар дода мешавад.

Бонки миллӣ низ ин ҳолатро тасдиқ карда гуфтааст, дар ҳолати як дафъа ивази асъор дар ҳаҷми аз 350 то 1750 нишондиҳанда барои ҳисобҳо, бонкҳо вазифадоранд, ки шахсияти муштариро аниқ кунанд.

Бонки миллии Тоҷикистон гуфтааст, сокинон метавонанд ҳангоми сафар, пардохти маблағи таҳсил дар хориҷ ва табобат, аз бонкҳо кортҳои Visa, UnionPay, Mastercard дастрас карда, сомониро ба он ворид кунанд ва он автоматӣ ба асъори хориҷӣ иваз карда мешавад.

Дар ҳоли ҳозир сад доллари амрикоӣ дар бонкҳои Тоҷикистон то 940 сомонӣ мубодила мешавад.

Танҳо дар ду рӯз дар роҳҳои Тоҷикистон панҷ нафар кушта ва ду нафар сахт маҷрӯҳ шудаанд. Вазорати корҳои дохилии Тоҷикистон хабар додааст, ки рӯзи 13 ва 14-уми сентябр чор садамаи маргбор дар роҳҳои кишвар сабт шудааст.

Дар миёни ҳалокшудагон кӯдаки шашсола, навраси 16-сола ва ҷавони 30-сола будаанд. Ду тани дигар аз 50 ва 56 сола будаанд.

Садамаи аз ҳама пурқурбонии рӯзи 13-уми сентябр, ки дар он се кас кушта ва як тан маҷрӯҳ шудааст, дар роҳи Душанбе-Кӯлоб дар ҳудуди ноҳияи Данғара замоне рух додааст, ки, ба гуфтаи ВКД, ронанда Фирдавс Давлатов қоидаи ҳаракат дар роҳро риоя накарда, ба мошини самти муқобил бархурдааст.

Ҳодисаҳои дигар дар роҳи Душанбе-Ёвон, Панҷакент-Айнӣ ва Бохтар-Данғара сабт шудаанд.

Вазорат ин ҳодисаҳоро беэҳтиётӣ ва риоя накардани қоидаҳои ҳаракат дар роҳ унвон кардааст.

Бино бар ҳисобҳои соли гузашта, рӯзе дар роҳҳои Тоҷикистон дар садамаҳо то се нафар кушта ва то панҷ нафар маҷрӯҳ мешаванд.

Бархе аз он интиқод мекунанд, ки бо вуҷуди таъкидҳои махсуси мақомоти баландпоя, ҷорӣ кардани низоми назорати видеоӣ аз кӯчаву роҳҳо, бисёр ронандаҳо қоидаҳоро нодида мегиранд.

Решаи мушкилро дар фасод медонанд, чун дар ниҳояти кор ронандагони қоидашиканро ҷазо намедиҳанд ва ба афроде, ки ронандагӣ карда наметавонанд, шаҳодатномаи ронандагӣ медиҳанд.

Аз сӯи дигар, дар Тоҷикистон аксар ронандаву мусофирон тасмаи бехатарии мошинро намебананд, ки ин омори маргро бештар мекунад.

Одам Қодиров - писари 17-солаи раҳбари Чеченистон Рамазон Қодиров соате дорад, ки 40 миллион рубл нарх дошта, ду баробар бештар назар ба даромади расмии солонаи падараш мебошад. Акси ноболиғро, ки дар ҳукумати Чеченистон мақоми раиси хадамоти амнияти Рамазон Қодировро ба ӯҳда дорад, хоҳараш Табарик дар Инстаграм нашр кард.

Ба соати гаронарзиш дар дасти писари Қодиров нашрияи "Верстка" таваҷҷӯҳ кардааст. Хабарнигорон маълум кардаанд, ки соат сохти ширкати амрикоии Jacob & Co ва рақамаш Epic SF24 аст. Соат аз тиллои сафед ва 104 санги алмос сохта шудааст. Дар саросари ҷаҳон 18 дона чунин соат ба фурӯш рафтааст, ки ҳар яки он 497 ҳазор доллар арзиш дорад.

Одам Қодиров соати дигаре ҳам аз ширкати Jacob & Co дорад. Дар рӯзи тӯяш тобистони имсол ин ноболиғ соате дар даст дошт, ки яккаву ягона дар ҷаҳон аст. Ин соат бо беш аз сесад дона алмос оро дода шуда 7 миллион доллар арзиш дорад.

Одам Қодиров на танҳо раиси хадамоти амнияти раиси ҷумҳурии Чеченистон аст, балки инчунин нозири ба истилоҳ донишгоҳи хадамоти таъиноти вижаи шаҳри Гудермес, ду баталйони вазорати дифоъ, тамоми сохторҳои ВКД Чеченистон ва ҳам дабири Шӯрои амнияти ин ҷумҳурӣ мебошад. Маълум нест оё ӯ маоши давлатӣ мегирад ва ҳаҷми он чанд аст.

Бино ба эъломияи даромадҳои Рамазон Қодиров барои соли 2021, даромади расмии ӯ 26,5 миллион рублро ташкил додааст.

Исми Одам Қодиров баъди латукӯби Никита Журавел дар як боздоштгоҳи шаҳри Грозний ба ҳамагон маълум шуд. Ин ҷавони рус барои оташ задани китоби Қуръон боздошт ва ба Чеченистон бурда шуд. Писари Қодиров унвони қаҳрамони ҷумҳуриро дорад. Ӯро инчунин дар ҷумҳуриҳои мусалмоннишини Тотористон, Қарачаю Черкес, Қабардину Балқор ҳам бо ҷоизаву нишонҳои давлатӣ қадрдонӣ кардаанд.

Дар як шабонарӯзи гузашта дар натиҷаи ҳамлаи бесарнишинҳои украинӣ дар вилояти Белгороди Русия се сокини маҳаллӣ кушта ва 11 нафар захмӣ шудаанд. Ин маълумотро раиси вилоят Вячеслав Гладков нашр кардааст. Ба иттилои ӯ, дар миёни кушташудаҳо сокини деҳаи Лозовое ва ду зани сокини деҳаи Головчино мебошанд.

Аксар маҷрӯҳшудаҳо сокинони деҳаи Зозули мебошанд, ки, ба таъкиди раиси вилоят, ҳангоми афтодани паҳпод дар дохили як микроавтобус қарор доштанд. Инчунин рӯзи сешанбе дар беморхонаи маҳаллӣ як сокини рӯзи 25 апрел аз ҳамлаи дрон маҷрӯҳшудае ҷон додааст. Вилояти Белгород ҳамсарҳади Украина аст ва пайваста мавриди ҳамлаҳои паҳподҳо қарор мегирад.

Вазорати дифои Русия рӯзи сешанбе дар бораи 87 паҳподи нобудкарда гузориш дод.

Дар ҳамин ҳол, шаби 16 сентябр низомиёни рус минтақаи Запорожйеи Украинаро мавриди ҳамла қарор доданд ва дар натиҷа, шабона як нафар кушта ва 13 кас маҷрӯҳ гардид. Ба иттилои маъмурияти вилоят, дар миёни осебдидаҳо ду ноболиғ ҳам мебошанд. Раиси вилоят Иван Федоров гуфт, ки шабона на камтар аз даҳ ҳамла сурат гирифт. Дар натиҷа, 10 манзили бисёрошёна ва 12 хонаи хусусӣ осеб дидааст.

Артиши Русия инчунин дар ноҳияи Пологовский ҳамла анҷом дод, ки дар паи он як марди 66-сола ҷон дод.

Додгоҳе дар ИМА як корманди собиқи корхонаи саноати ҳарбиро барои кӯшиши ҷосусӣ ба манфиати Русия ҳабс кард. Вазорати адлияи Амрико рӯзи 15 сентябр гуфт, Ҷон Мюррей-Роу бо қарори додгоҳ ба 10,5 соли ҳабс ва 25 ҳазор доллар ҷарима маҳкум мешавад.

Мюрреи 67-сола сокини аёлати Дакотаи Ҷанубӣ буда, давоми чил сол чун муҳандиси санҷишӣ дар чандин корхонаи соҳаи саноати ҳарбии Амрико кор кардааст. Яке аз самтҳои кораш фанновариҳо марбут ба муқовимати радиоэлектронӣ будааст. Ӯ, инчунин, ба маводи махфӣ ва фавқулодда махфӣ ҳам дастрасӣ доштааст.

Тафтиш маълум кардааст, ки моҳи марти соли 2020 Мюррей бо як нафаре дар тамос шудааст, ки ӯро намояндаи ҳукумати Русия гумон кардааст. Ба ӯ гуфтааст, ки ба ҳукумати ИМА садоқат надорад ва мехоҳад ба Русия манфиатовар бошад.

Дар мулоқот бо ин шахс ӯро бо маълумоти махфӣ, аз ҷумла иттило аз соҳаи муқовимати радиоэлектроние, ки силоҳҳои амрикоӣ доранд, таъмин кардааст. Давоми ҳашт моҳ ҳамингуна ин нафарро, ки дар асл ҷосуси Бюрои федеролии тафтишоти ИМА будааст, бо маводи махфӣ таъмин кардааст.

Баъди ин, ӯро як корманди хатарнок барои ширкат номида, аз кор пеш кардаанд. Баъди ҳабс ӯ иқрор шудааст, ки ба як давлати хориҷӣ мехост маълумоти вобаста ба масоили амнияти миллиро бидиҳад.

Артиши Исроил аз шоми душанбе, 15-уми сентябр амалиёти заминии ишғоли шаҳри Ғаззаро шурӯъ кард. Радио Свобода бо такя ба Axios менависад, дар оғоз низомиёни исроилӣ болои Ғазза ҳамлаҳои ҳавоӣ ба роҳ монда, баъдан тонкҳо вориди шаҳр шудаанд. Як мақоми баландпояи артиши Исроил ба ин нашрия гуфтааст, ки низомиёни исроилӣ вориди Ғазза шуданд ва базудӣ ба онҳо нирӯҳои иловагӣ ҳамроҳ мешаванд.

Пеш аз оғози амалиёт артиши Исроил аз фаластиниҳо даъват кардааст, ки шаҳрро тарк карда ба қисмати ҷанубии “минтақаҳои башарӣ” бикӯчанд. Хабар дода мешавад, ки Ғаззаро 300 ҳазор кас тарк кардаанд. The Jerusalem Post менависад, ки 700 ҳазор кас дар дохил боқӣ мемонанд.

Ҳуҷум чанд соат баъди мулоқоти котиби давлатии ИМА Марко Рубио бо нахуствазири Исроил Бенямин Нетаняҳу ва аъзои баландпояи ҳукумати ӯ шурӯъ шуд. Манбаъҳои Axios гуфтаанд, ки Рубио дар ин мулоқот гуфтааст, ки маъмурияти президенти ИМА Доналд Трамп амалиёти заминиро дастгирӣ мекунад, вале мехоҳад, ки он зуд ба анҷом расад.

Исроил баъди ҳамлаи рӯзи 7 октябри соли 2023-и Ҳамос – гуруҳе, ки онро ИМА ва Иттиҳоди Аврупо террористӣ меноманд, дар минтақаи Ғазза амалиёти ҳарбӣ ба роҳ мондааст. Дар он ҳамла 1200 сокини мулкӣ куштаву беш аз 250 нафар гаравгон гирифта ва ба Ғазза бурда шуданд. Исроил гуфт, ки мақсадаш нобуд кардани Ҳамос дар Ғазза мебошад.

Мақомоти Исроил гуфтанд, ки яке аз ҳадафи марказии амалиёти ҳарбии Ғазза озод кардани гаравгонҳо мебошад. Бино ба иттилои ахир, то ҳол 50 нафар, аз ҷумла, сарбози соли 2014 кушташуда дар дасти гаравгонгирҳо боқӣ мемонанд. То ҳол танҳо 20 нафар аз гаравгонҳо зинда гуфта мешаванд. Вазорати беҳдошти Ғазза, ки таҳти назари Ҳамос аст, мегӯяд, аз оғози амалҳои низомӣ дар минтақа тахминан 65 ҳазор фаластинӣ кушта шудааст.

Дастаи «Истиқлол»-и Душанбе нахустин бозиашро дар марҳилаи гурӯҳии Лигаи қаҳрамонҳои 2-и Осиё-2025/26 муқобили бошгоҳи футболи «Ал-Наср»-и Арабистони Саудӣ, ки дар ҳайати он капитан ё сарвони тими миллии Португалия Криштиану Роналду бозӣ мекунад, анҷом медиҳад.

Ин бозии даври аввал дар гурӯҳи «D» 17-уми сентябр дар варзишгоҳи «Ал-Аввал Парк»-и шаҳри Риёз баргузор мегардад. Бозӣ соати 21:15 бо вақти маҳаллӣ (соати 23:15 бо вақти Душанбе) оғоз меёбад.

Ба иттилои маркази матбуоти бошгоҳи “Истиқлол”, футболбозони Душанбе, ки рӯзи 15-уми сентябр вориди Арабистони Саудӣ шуданд, дар шаҳри Риёз нахустин тамрини худро зери раҳбарии сармураббӣ Игор Черевченко анҷом доданд.

Тибқи нақша 16-уми сентябр даста тамрини худро дар майдони асосии бошгоҳи “Ал-Наср” доир намуда, инчунин намояндагони “Истиқлол” дар ҷаласаи пеш аз бозӣ ва нишасти матбуотӣ иштирок мекунанд.

Рақибони «Истиқлол» дар гурӯҳи «D» ба ҷуз аз «Ал-Наср»-и Риёз, ки дар Про-лигаи Арабистони Саудӣ бозӣ мекунад, бошгоҳҳои «Ал-Завра»-и Бағдод аз Премйер-лигаи Ироқ ва «Гоа»-и иёлати Гоа аз Супер-лигаи Ҳиндустон мебошанд.

Мусобиқот дар Лигаи қаҳрамонҳои 2-и Осиё бо ширкати 32 даста доир мегардад. Дастаҳо ба ду минтақа – Шарқ ва Ғарб тақсим шудаанд. Ҳар як минтақа аз 16 даста иборат аст.

“Истиқлол” ба минтақаи Ғарб дохил аст. Дастаи ғолиби минтақаҳо ҳуқуқ пайдо мекунад, ки соли оянда дар Лигаи элита ё бартари бошгоҳҳои футболи Осиё иштирок намояд.

Ёдовар мешавем, ду сол пеш "Истиқлол" дар марҳилаи гурӯҳии Лигаи қаҳрамонҳои AFC (Конфедератсияи футболи Осиё)-2023/24 дар гурӯҳи “Е” бо тими "Ал-Наср" ду бозӣ анҷом дода буд. Душанбегиҳо дар меҳмонӣ бо ҳисоби 1:3 шикаст хӯрда, бозиро дар майдони худ мусовӣ (1:1) карда буданд.

Дар ҷадвали гурӯҳи “Е” дастаи “Ал-Наср” бо касби 14 имтиёз мақоми аввалро азони худ кард ва ҳамчун ғолиби гурӯҳ ба плей-офф роҳ ёфт. “Персеполис”-и Эрон бо касби 8 имтиёз дар зинаи дуюм қарор гирифт. Ин даста барои ба даври баъдӣ роҳ пайдо кардан талош кард, вале ба орзуяш нарасид.

“Ал-Дуҳайл”-и Қатар бо касби 7 имтиёз зинаи сеюм ва “Истиқлол”-и Тоҷикистон бо касби 3 имтиёз ҷойгоҳи охиринро ишғол карданд. Ин ду даста низ аз ҳаққи идомаи мубориза дар даври баъдии мусобиқот маҳрум гаштанд.

Тақвими бозиҳои «Истиқлол» дар марҳилаи гурӯҳии Лигаи қаҳрамонҳои 2-и Осиё-2025/26

Минтақаи Ғарб

Гурӯҳи «D»

«Ал-Наср» (Арабистони Саудӣ)

«Ал-Завра» (Ироқ)

«Истиқлол» (Тоҷикистон)

«Гоа» (Ҳиндустон)

Даври 1-ум

17-уми сентябр (чоршанбе)

«Ал-Наср» (Арабистони Саудӣ) - «Истиқлол» (Тоҷикистон)

Даври 2-юм

1-уми октябр (чоршанбе)

«Истиқлол» (Тоҷикистон) - «Гоа» (Ҳиндустон)

Даври 3-юм

22-юми октябр (чоршанбе)

«Истиқлол» (Тоҷикистон) - «Ал-Завра» (Ироқ)

Даври 4-ум

5-уми ноябр (чоршанбе)

«Ал-Завра» (Ироқ) - «Истиқлол» (Тоҷикистон)

Даври 5-ум

26-уми ноябр (чоршанбе)

«Истиқлол» (Тоҷикистон) - «Ал-Наср» (Арабистони Саудӣ)

Даври 6-ум

24-уми декабр (чоршанбе)

«Гоа» (Ҳиндустон) - «Истиқлол» (Тоҷикистон)

Дар пайи таркиши балони газ дар вилояти Суғд, як навраси 13-сола ҷароҳат бардоштааст.

Ба иттилои Кумитаи ҳолатҳои фавқулодаи Тоҷикистон, ҳодиса субҳи 14-уми сентябр дар ноҳияи Ҷабор Расулов рух додааст.

Ба гуфтаи манбаъ, бо сабабҳои номаълум дар манзили Меҳроҷ Самадов балони газ кафидааст.

Як бошандаи 13-солаи ин хона ҷароҳат бардоштааст ва ба гуфтаи мақомот, феълан зери назорати пизишкон аст.

Мақомот гуфтаанд, сабаби таркиши газро муайян мекунанд.

Дар Тоҷикистон сокинон барои омода намудани ғизо аз гази моеъ истифода мебаранд.

Таркиши балонҳои газ дар гузашта ҳам рух дода, сабаби ҷароҳат бардоштани сокинон шуда буд.

Эмомалӣ Раҳмон, раисҷумҳури Тоҷикистон ҳамлаи Исроил ба пойтахти Қатарро маҳкум карда, онро "таҷовуз ба соҳибистиқлолӣ ва тамомияти арзӣ"- Қатар гуфтааст.

Президенти Тоҷикистон 15-уми сентябр дар нишасти саронии кишварҳои Созмони ҳамкории исломӣ дар шаҳри Давҳа гуфт, кишвараш "амали таҷовузкоронаро, ки поймолкунии дағалонаву ошкорои ҳуқуқи байналмилалӣ ва усулҳои бунёдии Оинномаи Созмони Милал" мебошад, "қотеона маҳкум" мекунад.

Пеш аз ин Вазорати корҳои хориҷии Тоҷикистон низ ҳамлаи Исроил ба пойтахти Қатарро маҳкум карда буд.

Нерӯҳои ҳавоии Исроил рӯзи 9 сентябр ба қароргоҳи гурӯҳи "Ҳамос" дар шаҳри Давҳа, пойтахти Қатар ҳамла карданд. Гурӯҳи "Ҳамос" дар баёнияе эълон кард, ки дар ин ҳамла 5 тан аз аъзои ин гурӯҳ, аз ҷумла, писари раҳбари ҳайати музокиракунандаи ин гурӯҳ Халил Ҳайя ва раиси дафтари ӯ, кушта шуданд. Аъзои ҳайати музокиракунандаи "Ҳамос" аз ин ҳамла ҷони солим бадар бурдаанд.

Бисёре аз кишварҳои ҷаҳон ин ҳамлаи Исроилро маҳкум карданд.

Эмомалӣ Раҳмон дар ҳамоиши кишварҳои Созмони ҳамкории исломӣ ҳамчунин аз он нигаронӣ кардааст, "дар тӯли ду соли охир ҷомеаи ҷаҳонӣ шоҳиди вазъи фоҷеабори инсонӣ дар Навори Ғазза аст ва ҳанӯз ҳам ормонҳои мардуми Фаластин мавзӯи мубрами рӯзномаи байналмилалӣ боқӣ мондаанд".

Ҷанги навбатӣ миёни фаластиниҳо ва Исроил рӯзи 7 октябри соли 2023 бо ҳамлаи гурӯҳи "Ҳамос" ба Исроил оғоз шуд. Тибқи оморҳои Исроил, ҳар ин ҳамла "Ҳамос" 1200 нафарро кушт ва ҳудуди 251 тани дигарро ба гарав бурд.

Бар асоси эълони мақомоти маҳаллии фаластинӣ, аз он замон то кунун беш аз 64 ҳазор нафар, ки аксарашон ғайринизомӣ ҳастанд, дар ҳамлаҳои Исроил ба навори Ғазза кушта шудаанд.

Бо як қарори ҳукумати Арманистон, аз 1 ноябри соли ҷорӣ аз муҳри марзбонони ин кишвар дар бораи убури сарҳади давлатии Арманистон нақши кӯҳи Арарат пок карда мешавад.

Ба ҷои он дар рӯи муҳр навиштаҷоти “Арманистон” ба забонҳои англисӣ ва арманӣ, номи гузаргоҳи марзӣ, санаи убури марз ва ҳам рамзи истгоҳи марзии ҳавоӣ, роҳи оҳан ё гузаргоҳи заминӣ ифода мешавад.

Кӯҳи Арарат рамзи миллии Арманистон буда, он дар рӯи герб ё нишони миллии ин кишвар кашида шудааст, вале аз ҷиҳати ҷуғрофиёӣ ин кӯҳ дар қаламрави Туркия ҷойгир мебошад.

Ин тағйирот иқдоме дар самти оддисозии муносиботи миёни Ереван ва Анкара дониста мешавад, ки дар паи саркӯби арманитаборҳо дар Туркияи Усмонӣ дар соли 1915 ва даъвои Арманистон барои эътирофи наслкушӣ ва ҳам низои Арманистону Озарбойҷон барои Қаробоғи кӯҳӣ бад шудааст.

Сарҳади миёни Арманистону Туркия аз соли 1993 баста буда, вале соли 2022 миёни ду кишвар парвози ҳавопаймоҳо аз сар гирифта шуд ва фиристодаҳои вижа дар заминаи тавсеаи ҳамкорӣ музокиротро барпо кардаанд.