Додгоҳии олии Тоҷикистон се тан аз наздикони Муҳиддин Кабирӣ, раҳбари ҳизби фаъолияташ мамнӯи наҳзати исломиро ба иттиҳоми "хабар надодан", ба муддати яксолӣ аз озодӣ маҳрум кард. Наздикони Муҳиддин Кабирӣ рӯзи 3-юми июн ба Радиои Озодӣ гуфтанд, ки Додгоҳи олии Тоҷикистон рӯзи панҷшанбеи 2-юми июн баъди эълони ҳукми 14 нафар аъзои раёсати ҲНИТ, ҳукми ин се нафарро низ содир кардааст.

Писараммаи Муҳиддин Кабирӣ Ҷамшед Нарзуллоев - мудири ширкати "Бинокор-Сервис", бародари ҳамсари ӯ Маҳмадалӣ Раҳматуллоев, сардори шуъбаи кадрҳои "Бинокор-Сервис" ва Ҳикматулло Сайфов ронанда ва хеши ҳамсари Кабириро ҳамакнун барои "хабар надодан" як солро пушти панҷараҳои зиндон сипарӣ хоҳанд кард. Ин се нафар тирамоҳи соли гузашта аз сӯи Кумитаи давлатии амнияти миллии Тоҷикистон бо иттиҳоми ҳамкорӣ бо писари Муҳиддин Кабирӣ ва интиқоли маблағ ба Ҳоҷӣ Ҳалим, (Абдуҳалим Назарзода), генерал ва собиқ муовини вазири дифоъ боздошт шуда буданд.

Онҳо рӯзи 26-уми октябри дар телевизиони Тоҷикистон дар бораи интиқоли маблағ ва теъдоди он ба Руҳулло Тиллозода, писари бузурги Кабирӣ шаҳодат доданд. Аммо Руҳулло Тиллозода ва Муҳиддин Кабирӣ ин шаҳодати хешовандонашон иттиҳомро рад карда гуфтанд, бо Ҳоҷӣ Ҳалим ба ҷузъ як рафиқи дерина ва салому алейк, ҳеҷ муомила ва рафту омад надоштанд.

Номи Абдуҳалим Назарзода, муовини вазири дифои Тоҷикистон, баъд аз ҳамлаҳои чоруми сентябр расонаӣ шуд ва мақомот ӯро барои ташкили ҳамлаҳои мусаллаҳона айбдор карда, амалиёти густурдаро барои боздошти ӯ ва ҳамроҳонаш роҳандозӣ намуданд. Амалиёт алайҳи Назарзода ва афродаш рӯзи 16 сентябр дар дараи Ромит ба поён расид ва худи ҳамон рӯз ва як рӯз баъд, бо дастури Додситонии кулл 13 узви Раёсати олии ҲНИТ ба иттиҳоми даст доштан дар ин ошӯб, боздошт шуданд. Додгоҳи олии Тоҷикистон ҳам рӯзи 29 сентябр Ҳизби наҳзати исломии Тоҷикистонро созмони террористӣ эълон кард ва фаъолияти онро дар қаламрави кишвар қатъ намуд.

Вазирони мудофиаи панҷ кишвари Осиёи Марказӣ дар шаҳри Самарқанди Узбекистон “муборизаи муштарак алайҳи терроризми байналмилалӣ”-ро баррасӣ кардаанд.

Расонаҳои давлатии Узбекистон ва Тоҷикистон навиштаанд, ки мулоқоти рӯзи 20-уми октябр нахустин нишасти панҷ вазир дар масоили “таъмини амният” будааст.

Сомонаи Вазорати мудофиаи Тоҷикистон навиштааст, ки Эмомалӣ Собирзода, вазири дифои Тоҷикистон бо чор ҳамтои худ аз Узбекистон, Қазоқистон, Туркманистон ва Қирғизистон “масъалаҳои таъмини амният дар минтақа, тавсеаи ҳамкориҳои низомӣ ва низомӣ-техникӣ байни кишварҳо, инчунин бардоштани сатҳи ҳамоҳангсозии муборизаи муштарак алайҳи терроризми байналмилалӣ”-ро баррасӣ кардаанд.

Шавкат Мирзиёев, президенти Узбекистон дар номае ба вазирони дифои кишварҳои Осиёи Марказӣ гуфтааст, ки дар шароити таҳдидҳои амниятӣ ниҳодҳои панҷ кишвар бояд ҳамкории ҷиддӣ дошта бошанд. Ӯ гуфтааст, ки ҳамкориҳои панҷ кишвари Осиёи Марказӣ “ба сатҳи ҳамкориҳои стратегӣ” расидааст.

Дар хабарномаҳои расмӣ гуфта нашудааст, ки манзур аз “таҳдидҳои амниятӣ” чӣ ҳаст, вале ҳамоиши вазирони қудратии Осиёи Марказӣ дар Самарқанд камсобиқа аст.

Раҳбарони панҷ кишвари Осиёи Марказӣ борҳо ба иттиҳоди минтақавӣ даъват кардаанд, вале ҳанӯз чунин иттиҳоде шакл нагирифтааст, ҳарчанд ба назар мерасад, ки муносибати ин кишварҳо беҳтар шудааст.

Роҳбандӣ ва манъи ҳаракати мошинҳо ҳангоми сафари президенти Туркманистон ба вилояти Лебап ё Лаби об, сабаби марги як зани ҳомиладор шудааст.

Бахши туркмании Радиои Озодӣ бо такя ба манбаъҳои худ дар пулис ва хадамоти тандурустӣ навишт, зан натавонистааст сари вақт ба беморхона бирасад ва дар роҳ рӯйи дастони шавҳараш ҷон додааст.

Бино ба гуфтаи як корманди тиббӣ, "ба далели он, ки мошини "Ёрии таъҷилӣ" наомад, шавҳари зан ӯро бо мошини худаш ба беморхона бурдан мехост, аммо дар роҳ банд монд".

15-уми октябр Сардор Бердимуҳаммадов, президенти Туркманистон дар маросими гузоштани хишти таҳдоби маҷмааи корхонаи кимиёвӣ ширкат кард. Ба ин муносибат дар шаҳр роҳҳо баста шуданд ва ба гуфтаи бархе аз сокинон, ҳатто ба мошинҳои ёрии таъҷилӣ ҳам иҷозаи ҳаракат намедоданд.

Мақомоти вилояти Лебап ҳодисаро шарҳ надодаанд.

Маъмулан ҳангоми сафари мансабдорони Туркманистон ба ноҳияҳо чораҳои сахти амниятӣ рӯи даст гирифта мешавад ва роҳҳоро мебанданд. Сокинон пайваста шикоят мекунанд, ин вазъ ба кору зиндагии онҳо мушкил эҷод мекунад.

Иттиҳоди Аврупо аз шароити кори хабарнигорон, ҳомиёни ҳуқуқ ва ҷомеаи шаҳрвандӣ дар Тоҷикистон ибрози нигаронии амиқ карда, аз Душанбе хостааст барои сабти номи дубораи созмонҳои ҷамъияте, ки иҷборан аз кор монданд, имкон фароҳам орад.

Ин ва масъалаҳои дигари вобаста ба ҳуқуқи башар, аз ҷумла ҳуқуқи занон, хушунат ва манъи табъиз дар Тоҷикистон, аз мавзӯъҳои калидие буданд, ки рӯзи 17-уми октябр дар Брюссел дар муколамаи 15-уми Иттиҳоди Аврупо ва Тоҷикистон матраҳ шуданд.

Дар баёнияи расмии дафтари Иттиҳоди Аврупо, ки рӯзи 21 уми октябр нашр шуд, гуфта мешавад, ки ин созмон бо пешниҳоди феҳрасти мушаххаси ҳомиёну вакилони дифоъ ва хабарнигорони зиндонӣ, талаби фаврии раҳоии онҳоро кардааст. Айни замон наздик ба даҳ нафар аз блогерону хабарнигорони тоҷик дар зиндон ба сар мебаранд.

Аз соли 2022 ба ин тараф хабарнигорону блогерон Абдулло Ғурбатӣ, Завқибек Саидаминӣ, Абдусаттор Пирмуҳаммадзода ва Хуршед Фозилов аз 7 то ба 7.5 сол, Хушом Ғулом – 8 сол, Далери Эмомалӣ – 10 сол, Улфатхоним Мамадшоева – 20 сол ва Аҳмади Иброҳим 10,5 сол аз озодӣ маҳрум шуданд.

Иттиҳоди Аврупо ҳамзамон аз набуди пешрафт дар масъалаи ҳуқуқи инсон дар Бадахшон нигаронӣ карда, аз мақомоти Тоҷикистон даъват намудааст, ки бо ақалиятҳои помирӣ муколамаи боз ташкил кунад. Дар пайи ҳодисаҳои моҳи майи соли 2022 дар Бадахшон, ки боиси кушта шудани эътирозгарон шуд, даҳҳо нафар зодагони ин минтақа боздошт ва ба ҳабсҳои тӯлонӣ маҳкум шуданд.

Дар ин нишаст аз пешрафт дар таҳияи қонунҳо дар бораи ҳуқуқи инсон ҳам ёдрас шуда, таъкид кардаанд, ки муҳим аст, то давлати Тоҷикистон қонунҳоро босамар иҷро кунад.

Назари мақомоти тоҷик дар ин бора маълум нест.

Иттиҳоди Аврупо таъкид кардааст, ки ҳамкориҳои дуҷонибаи Тоҷикистону Иттиҳоди Аврупо, равобити иқтисодӣ ва татбиқи бомуваффақияти GSP+ба риояи ҳуқуқ ва озодиҳои асосии шаҳрвандон дар Тоҷикистон сахт вобастааст.

Созмонҳои байналмилалии ҳомии ҳуқуқ борҳо аз раҳбарони иттиҳод хостаанд, дар ивази кӯмаку дастгирии тарҳҳои иқтисодиву иҷтимоии Тоҷикистон аз ҳукумат риояти ҳуқуқи инсон ва таҳкими демократияро талаб кунанд.

Иттиҳоди Аврупо яке аз шарикони иқтисодии Тоҷикистон аст ва айни замон аз кӯмакрасонҳои аслии кишвар ба ҳисоб меравад.

Ҷонибҳо дар масоили мубориза бо терроризм ва ифротгароӣ, идоракунии марз ва қочоқи маводи мухаддир, инчунин идоракунии об низ, ҳамкориҳо доранд.

Мухолифин ва созмонҳои ҳомии ҳуқуқи инсон солҳои охир Иттиҳоди Аврупоро ба "чашмпӯшӣ" ба поймолшавии ҳуқуқи одамону озодиҳои бунёдӣ дар Тоҷикистону кишварҳои дигари минтақа танқид мекунанд.

Иттиҳоди Аврупо дар моҳи июли соли 2024 ҳам аз вазъи ҳомиёни ҳуқуқ, рӯзноманигорон ва блогерони зиндонӣ дар Тоҷикистон нигаронӣ карда, аз Душанбе хоста буд, ки нақзи ҳуқуқи инсонро дар Вилояти Мухтори Кӯҳистони Бадахшон таҳқиқ кунад.

Шаби 21 октябр зилзила шаҳри Душанбе ва гӯшаҳои дигари Тоҷикистонро такон дод.

Кумитаи ҳолатҳои фавқулоддаи Тоҷикистон бо такя ба Хадамоти геофизикии Академияи илмҳои миллии Тоҷикистон хабар дод, ки зилзила соати 23:14 ба вақти маҳаллӣ, рух дод.

Ба иттилои манбаъ, маркази зилзила ҳудуди Афғонистон буда, қувваи зилзила дар он 5 дараҷа, дар ноҳияи Ишкошими Бадахшони Тоҷикистон 3-4 дараҷа ва дар шаҳри Душанбе 2-3 дараҷаро ташкил додааст.

Ба иттилои Кумитаи ҳолатҳои фавқулоддаи Тоҷикистон, заминларза хисорот ва талафони ҷонӣ дар пай надоштааст.

Ҳамзамон марказҳои зилзилашиносии ҷаҳон маркази ин заминларзаро кӯҳҳои Ҳиндукуш дар Афғонистон ва неруи онро 5,1 дараҷа гуфтанд.

Расонаҳои покистонӣ гузориш доданд, ки зилзила бархе аз минтақаҳои ин кишварро низ такон додааст.

Тоҷикистон дар яке аз минтақаҳои зилзилахези қораи Осиё ҷойгир аст. Ҳар сол дар кишвар садҳо заминларза сабт шуда, дар натиҷаи он баъзе аз манзили сокинон вайрон мешавад.

Аз ҷумла, бар асари зилзилаи рӯзи 13-уми апрели имсол дар ноҳияҳои Рашт ва Тоҷикобод 94 хона пурра ва 50 хона қисман вайрон шуда, ба 61 манзил осеби сабук расид.

Инчунин, се мактаб ва тақрибан дусад иншооти иҷтимоӣ, аз ҷумла чойхонаву бунгоҳи тиббӣ зарар дидаанд. Як сокини хурдсоли ноҳияи Рашт дар ин ҳодиса ҷон бохт.

Вазорати корҳои дохилии Тоҷикистон дар як раддия ба хабари Радиои Озодӣ мегӯяд, шахсе бо номи хонаводагии Султонов, ки дар Тоҷикистон боздошт ва Русия супурда шудааст, зода ё шаҳрванди Тоҷикистон нест.

Ин ниҳод рӯзи 21 октябр навишт, “Султанов Рафис Рустемович (на Рифъат Султонов), соли таваллудаш 1995, шаҳрванди Федератсияи Россия, сокини шаҳри Қазон буда, зодаи Тоҷикистон нест.”

Вазорат Радиои Озодиро ба он айбдор кардааст, ки гӯё ҳангоми истифода аз гузориши хабаргузории “Реальное время” амдан Султоновро "зодаи Тоҷикистон" номидааст.

«Радиои Озодӣ» ҳамчун сарчашмаи хабари мазкур хабаргузории “Реальное время”-ро нишон додааст, ки дар ин хабаргузорӣ зода ва шаҳрванди куҷо будани гумонбар дарҷ нагардида, баръакс қайд гардидааст, ки Султанов Рафис Рустемович ҳанӯз дар давлати бегона бо нишондоди аввал ба гуноҳи худ иқрор шудааст," навиштааст ВКД Тоҷикистон.

Аммо дар асл ин хабаргузорӣ дар ҳарду матлабаш рӯшану ошкоро Султоновро зодаи Тоҷикистон номида, афзудааст, ки ин гумоанбар "дар ватанаш боздошт шуда, масъалаи истирдодаш ба Русия баррасӣ мешавад". Ҳарчанд хабаргузорӣ ба манбаъҳои худ дар ВКД Русия такия мекунад, худи мақомоти Русия дар бораи шаҳрванди кадом кишвар будани Султонов расман чизе нагуфтаанд. Вале хабар додаанд, ки Султонов рӯзи 14-уми октябр ба Ирина Шевиреваи 34-сола дарафтода ба гарданаш чанд дафъа корд зада, ҳамон шаб ба Тоҷикистон фирор кардааст.

ВКД Русия гуфтааст, ки ин суиқасд фармоишӣ буда, дар таҳия ва иҷрои он ҳафт нафар боздошт шудаанд.

Ҷей Ди Венс, муовини раиси ҷумҳури Амрико рӯзи 21-уми октябр вориди Исроил шуд.

Қарор аст Венс бо намояндаи аршади Амрико дар умури Ховари Миёна ва коршиносони низомие вохӯрад, ки ба оташбас дар Навори Ғазза назорат доранд.

Тибқи гузоришҳои расонаҳои исроилӣ, муовини раиси ҷумҳури Амрико 22-юми октябр дар шаҳри Байтулмуқаддас бо роҳбарони Исроил, аз ҷумла нахуствазир Бенямин Нетаняҳу мулоқот мекунад.

Сафари муовини раиси ҷумҳури Амрико ба Исроил дар ҳоле анҷом мешавад, ки нигарониҳо аз шикасти оташбас дар Ғазза зиёд шудааст.

Тавофуқи оташбас дар Ғазза 13-уми октябр дар Миср имзо шуд ва ба ҷанги дусола дар ин минтақа поён дод. Созиши сулҳ миёни Исроил ва “Ҳамос” бо талошҳои чор кишвар ва тарҳи пешниҳодии Доналд Трамп ба даст омад.

Исроил рӯзи якшанбеи 19-уми октябр дар посух ба кушта шудани ду сарбозаш ба чандин макон дар Навори Ғазза ҳамлаҳои ҳавоӣ анҷом дод. Мақомоти Исроил баъди ин ҳамла гуфтанд, ба тавофуқи оташбас пойбанд мемонанд.

Порлумони Ҷопон рӯзи сешанбе Санаэ Такаитиро нахуствазири ин кишвар интихоб кард. Санаэ Такаити дар таърихи Ҷопон нахустин зан мебошад, ки ба ин мақом мерасад.

Санаэ Такаитии 64-сола, ки ахиран раиси Ҳизби либерал-демократи Ҷопон баргузида шуда буд, аз чанд муддат ба ин тараф гузинаи эҳтимолӣ барои раҳбарии ҳукумат матраҳ буд.

Санаэ Такаити рӯзи 21 октябр пас аз дидор бо императори он кишвар, расман ба кор оғоз кард.

Ӯ рӯзи 20 октябр ваъда дод, ки "иқтисоди Ҷопонро қавитар бисозад ва ин кишварро тавре бозсозӣ кунад, ки битавонад дар баробари насли оянда масъулиятпазир бошад".

Хонум Санаэ Такаити як сиёсатмадори миллигарои муҳофизакор аст ва пештар вазири амнияти иқтисодӣ ва умури дохилӣ будааст.

Ӯ барномаи молии тавсеаталабонае барои чаҳорумин иқтисоди бузурги ҷаҳон дорад.

Президенти Амрико Доналд Трамп мегӯяд, талошҳо барои расидан ба тавофуқ миёни Русия ва Украина идома доранд ва агар ин созиш ҳосил нашавад пайомадаш вазнин хоҳад буд.

Трамп 20-уми октябр дар суҳбат ба хабарнигорон гуфт, “мо талош дорем созиш ба даст ояд. Агар ин кор анҷом шавад, олӣ аст. Дар ғайри сурат бисёриҳо баҳои вазнин хоҳанд пардохт”.

Хабарнигорон аз Доналд Трамп пурсиданд, ки чаро Иёлоти Муттаҳида барои ғалабаи низомии Украина талош намекунад. “Ҳама чиз аз он ки шумо тасаввур мекунед, печидатар аст", - посух дод Трамп.

Ҳарфҳои раиси ҷумҳури ИМА дар ҳоле садо медиҳанд, ки Котиби давлатии Амрико Марко Рубио ахиран бо ҳамтои русаш Сергей Лавров телефонӣ гуфтугӯ кард. Гуфта мешавад вазирони корҳои хориҷӣ омодагӣ ба дидори Трамп ва Путинро дар Будапешт баррасӣ кардаанд.

Вазири нақлиёти Тоҷикистон роҳбандӣ ё тамбашавӣ дар ҷодаҳо, ба вижа дар пойтахтро яке аз мушкилиҳои асосии ин соҳа номидааст. Моҳҳои ахир сокинони зиёде дар Душанбе аз тамбашавии роҳҳо шикоят мекунанд.

Азим Иброҳим, вазири нақлиёт 17-уми октябр дар ҷаласаи ҷамъбастии ин ниҳод аз ин вазъ нигаронӣ кардааст. Ӯ гуфтааст, тамбашавӣ сабаби дер мондани одамон ба кор, асабонияти ронандагону мусофирон ва садамаҳо шуда, ба кори хадамоти фаврӣ мисли "Ёрии таъҷилӣ", халал ворид мекунад.

Вазири нақлиёти Тоҷикистон сабабҳои асосии тамбашавии мошинҳоро ба афзоиши аҳолӣ ва шумори воситаҳои нақлиёт, рабт додааст.

Азим Иброҳим ба зердастонаш дастур додааст, ки "оид ба тадбирҳои таъхирнопазир ҷиҳати коҳиш додани тамбашавӣ пешниҳодҳо манзур намоед". Маълум нест, ки мақомот барои кам кардани тамбашавӣ дар роҳҳо чӣ кор карда метавонанд.

Дар зимн, ин мушкилро муовини раиси шаҳри Душанбе Раҳмиддин Салимзода ҳам ба таҳлил кашида, гуфтааст, ки аз соли 2021 то 2024 шумори мошинҳои шахсӣ дар шаҳр қариб 66 дарсад зиёд шудааст. Вай дар матлабе дар нашрияи "Паёми Душанбе" навиштааст, теъдоди мошинҳо дар пойтахт қариб ба 145 ҳазор расидааст.

Ба гуфтаи ин мақомдори тоҷик, сабаби аслии тамбашавӣ, ворид шудани шумораи зиёди мошинҳо аз берун ба пойтахт аст. Ба гуфтаи Раҳмиддин Салимзода, дар як шабонарӯз аз шаҳру ноҳияҳои дигар беш аз 44 ҳазор мошин вориди Душанбе мешаванд.

Зиёд шудани шумораи таксиҳо дар пойтахро ҳам муовини раиси шаҳри Душанбе яке аз сабабҳои дигари эҷоди тамбашавӣ дар роҳҳо номидааст. Ҳоло ба навиштаи ин мақомдор, теъдоди таксиҳо дар пойтахт ба 12 ҳазор адад расидааст.

Ба пешниҳоди Муовини раиси шаҳр, бунёди пулҳои болои роҳ ва ҷудо кардани хатти нақлиёти мусофирбар мисли кишварҳои дигар, метавонад вазъро беҳтар кунад.

Мардум дар пойтахт мегӯянд, тамбашавӣ ягона мушкили онҳо дар роҳҳо нест. Камбуди нақлиёти калони мусофирбар дар ҷодаҳои шаҳр ва беназм будани кори онҳову нархи роҳкироро сокинон аз мушкилиҳои асосии дигар дар роҳҳо меноманд.

Дар Русия марҳилаи дуввуми амалиёти "Нелегал-2025" идома дорад ва нерӯҳои амниятӣ муҳоҷиронро дар сохтмону бозор ва ҷойи хобу автобусҳо ҷустуҷӯву тафтиш ва боздошт мекунанд.

Маъмурини чанд ниҳод -- пулису, амният ва ОМОН ё гурӯҳи таъиноти махсус ба яке аз сохтмонҳо дар маркази Хабаровск ворид шуда, даҳҳо муҳоҷирро барои тафтиши ҳуҷҷатҳо ба идораи муҳоҷират бурданд.

Онҳо се нафарро барои нақзи қоидаҳои муҳоҷират хориҷ намуданд ва ду нафарро таҳдид ба зиндон кардаанд. Ба иттилои кормандони интизомӣ, ин муҳоҷирон пас аз гирифтани шаҳрвандӣ, қисми ҳарбиро тарк кардаанд.

Дар Барнаул дар пайи амалиёти пулис дар дохили автобус 33 муҳоҷир боздошт ва аз Русия ихроҷ шудаанд.

Дар Челябинск ҳам амалиёти ҷустуҷӯву тафтиши муҳоҷирон дар қаҳвахонаву сохтмонҳо идома дорад.

Дар амалиёти "Нелегал–2025" мақомоти рус аз дрон истифода мебаранд.

Ба иттилои расмӣ, дар 4 рӯзи амалиёт 17 ҳолати ҳуқуқвайронкунии маъмурӣ ва 19 ҷиноят дар самти муҳоҷират ошкор шуда, 135 нафарро аз Русия рондаанд. Амалиёти мазкур то 22 юми октябр идома мекунад.

Солҳои ахир махсусан пас аз ҳамла ба толори консертии "Крокус", шикори муҳоҷирон дар Русия шиддат гирифта, дар бисёре аз мавридҳо бо таҳқиру латтукӯби муҳоҷирон ҳамроҳ будааст.

Арабистони Саудӣ барои қабули зоирон қоидаи навро ҷорӣ кард. Аз ин ба баъд барои гирифтани виза ё раводид кас бояд аз ташхиси тиббӣ гузарад.

Санади тандурустӣ тавассути пойгоҳи "Nusuk" таҳия карда мешавад. Шарти нав барои сафар ба ҳаҷро Вазорати тандурустии Арабистони Саудӣ эълон кард.

Рӯйхати бемориҳое, ки монеи сафари одамон ба ҳаҷ мешавад, дароз аст. Бар асоси ин феҳраст, афроде, ки ба шаклҳои вазнини бемории гурда, бемории қалб, бемориҳои музмини шуш гирифторанд ё аз бемориҳои асаб азият мекашанд, наметавонанд ҳаҷ кунанд.

Гирифторӣ ба бемориҳои сироятӣ ва саратону ҳомиладорӣ дар моҳҳои ахир ҳам ба кас имкон намедиҳад, ки сафари ҳаҷ кунад.

Ба таъкиди мақомоти Арабистони Саудӣ, маҳдудиятҳои нав барои ҳифзи бехатарӣ ва сиҳатии зоирон гирифта шудааст.

Бо назардошти фавти зоирони зиёд дар солҳои пеш, Арабистони Саудӣ имсол тадобири амниятиро сахттар кардааст, то аз маргумири зиёд дар маъракаи ҳаҷ пешгирӣ шавад.

Соли 2024 ба сабаби гармои сахт ва ҳарорати 51 дараҷаӣ, бештар аз 1300 зоир дар Арабистони Саудӣ ҷон доданд.

Ҳар сол беш аз шаш ҳазор сокини Тоҷикистон барои адои ҳаҷҷи фарзӣ мераванд.

Як моҳ баъди барканории сафири Қазоқистон дар ИМА бо амри президент Қосимҷомарт Тоқаев Магжан Илёсов раҳбари нави намояндагии дипломатии Остона дар Вашингтон таъин шуд.

Фармони таъини сафири нави Қазоқистон дар ИМА рӯзи 20 октябр дар сомонаи Оқорда - қасри президент ба нашр расид. Илёсов дар ин мақом Ержан Ошиқбоевро иваз кард, ки давоми шаш соли гузашта дар ин мақом кор кардааст. Ошиқбоев ҳамроҳ бо вазири корҳои хориҷии Қазоқистон Мурат Нуртлеу поёни моҳи сентябр баъди бозгашти Тоқаев аз Ню Йорк аз вазифа маҳрум шуда буд.

Он замон бархе тахмин карданд, ки барканориҳо ба интиқодҳои Тоқаев аз дипломатҳои калони кишвараш ва нотавонии ташкили гуфтугӯи ӯ бо президенти ИМА Доналд Трамп рабт дорад, дар ҳоле, ки президенти Узбекистон Шавкат Мирзиёев тавонист давоми панҷ дақиқа бо Трамп мулоқоти ҳузурие дошта бошад. Айни замон, дар ин сафар ба Амрико дар чаҳорчӯби мубоҳисаҳои Маҷмаи кулли СММ дар Ню Йорк, ҳайатҳои Узбекистон ва Қазоқистон бо ширкатҳои ИМА ба маблағи умумии 12 миллиард доллар созишномаҳо дар заминаи хариди ҳавопаймоҳову локомотивҳо имзо карданд.

Дафтари президенти Қазоқистон он замон сабаби ин барканориҳоро нашр накард.

Илёсов 51 сол дошта, хатмкардаи Донишгоҳи давлатии забонҳои ҷаҳон ва равобити байналмилалии Қазоқистон мебошад. Ӯ инчунин дар Донишгоҳи Ҳарвард таҳсил кардааст.

Аз соли 2000 ба ин сӯ дар сохторҳои ВКХ ба кор шурӯъ кардааст. Дар мақомҳои сафири Қазоқистон дар Нидерланди, Бритониё, Ирландия ва Исландия кор кардааст.

Дар шаҳри Ереван ҷасади Айшат (Оиша) Боймуродова - духтаре аз Чеченистонро пайдо кардаанд, ки дар паи хушунати хонаводагӣ Русияро тарк карда буд. Дар ин бора полиси Арманистон хабар дод.

Чанде пеш як фаъоли ҳуқуқ гуфт, ки Айшат баъди он ки барои мулоқот бо як дугонааш берун рафт, нопадид шуд. Бархе тахмин карданд, ки шояд духтари фирориро гашта ба Чеченистон бурдаанд.

Полиси Арманистон навишт: “19 октябр ба идораи полиси ВКД Арманистон як шаҳрванд занг зада хабар дод, ки дар як хонаи иҷора дар кӯчаи Демирчяни шаҳри Ереван ҷасади зане пайдо шудааст. Ходимони полис ба ҷои ҳодиса рафтанд. Маълум шуд, ки он ҷасади Айшат Боймуродоваи 23-сола аст, ки аз 17 октябр нопадид шуда буд”. Тафтиш шурӯъ шуда, сабабҳои марги ӯ санҷида мешавад.

Боймуродова бо ёрии як созмони ҳомии ҳуқуқ, ки ба духтарону занони Қафқози Шимолӣ дасти ёрӣ дароз мекунад, Чеченистонро тарк карда буд. Рӯзи 17 октябр фаъоли ҳуқуқ Даниил Чебикин гуфт, ки Айшат нопадид шудааст.

Ӯ гуфт, дӯстони Айшат Боймуродова, ки бо ӯ дар як манзил зиндагӣ мекунанд, хабар додаанд, ки ӯ шоми 15 октябр аз сайругашт барнагашт. Чебикин навишт: “Вай барои мулоқот бо як дугонааш рафта буд, ки бо ӯ тавассути Инстаграм шинос шуда буд. Каме дертар маълум шуд, ки дар миёни обуначиёни дугонааш афроде ҳастанд, ки ба атрофиёни Қодиров рабт доранд”.

Чебикин навишт, ки ба Айшат бозгашти маҷбурӣ ба Чеченистон таҳдид мекунад. “Дар гузашта чунин ҳодисаҳо дар Аврупо, Гурҷистон ва минтақаҳои дигари Русия ҳам сабт шудааст, - навишт Чебикин. – Як чунин ҳодисае дар Ереван ҳам метавонист рух бидиҳад”.

Соли 2023 аз Петербург ба Чеченистон духтари дигари фирорӣ Седа Сулаймонова ҳам баргардонида шуд. Ду сол шуд ҳеҷ хабаре дар бораи ӯ нест ва ҳомиёни ҳуқуқ мегӯянд, ки эҳтимолан хешовандонаш ӯро кушта бошанд.

Дар Фаронса гурӯҳи иборат аз 60 муфаттиш дар пайи боздошти гурӯҳи дуздони ҷавоҳироти беназири таърихӣ аз осорхонаи маъруфи “Лувр” мебошанд.

Ба қавли вазорати фарҳанги Фаронса, субҳи 19-уми октябр дар рӯзи рӯшан гурӯҳи муташаккилонаи дуздон худро усто вонамуд карда, тавассути зинапояи барқӣ дохили бино шуда, аз гӯшаи “Аполло” - макони нигаҳдошти ҷавоҳироти салтанатии Фаронса ҳашт нигораи бебаҳо ва аз ҷумла тоҷи ҳамсари Наполеон -маликаи Фаронса - Мария Луизаро ба яғмо бурданд.

Шоҳидони ин ҳодиса мегӯянд, ки аснои фирор дуздон тоҷро, ки аз пораҳои алмос ва дигар сангҳои гаронбаҳо оро дода шудааст, афтониданд ва эҳтимол он зиён дида бошад.

Хабаргузории Рейтерс аз корбаронаш навори ин ҷавоҳиротро дастрас намудааст. Дуздӣ боиси вокунишҳои ғазаболуд дар ҷомеаи Фаронса гардида, масъалаи амнияти муассисаҳои фарҳангиро дар маркази таваҷҷӯҳ қарор додааст.

Дар осорхонаи Лувр соли 1911-ум наққошии «Мона Лиза» ҳам рабуда шуда буд. Баъд аз ду соли тафтишот маълум шуд, ки дуздиро яке аз кормандони музей ташкил кардааст. Дузд боздошт ва наққошии бебаҳо ба ҷояш баргардонида шуд.

Embed ба дигарон фиристед

Фаронса дуздони ҷавоҳироти салтанатии ин кишварро ҷустуҷӯ дорад

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:01:27 0:00

Рӯзи 19-уми октябр мақомот барои гузарондани мусобиқаи мошинронии Асҳаб Тамаев, як блогери чечентабор як қисмати роҳи Душанбе-Чаноқро бастанд.

Хабаргузории "Азия-Плюс" аз қавли ширкати IRS навиштааст, беш аз 5 километр роҳи Душанбе-Чаноқ дар ҳудуди "Кӯли Душанбе" барои мусобиқаи мошинронии Асҳаб Тамаев баста шуд. Навори ин мусобиқа ба шабакаҳои иҷтимоӣ роҳ ёфт ва дида мешавад, ки одамони зиёде ҷамъ шудаанд.

Чанд корбари шабакаҳои иҷтимоӣ навиштанд, шоми 19-уми октябр беш аз як соат дар роҳи Душанбе-Хуҷанд дармонданд.

Дар ҳоле, ки мақомоти Тоҷикистон қаблан чандин нафарро барои ташкили пойга ё мусобиқаи мошинронӣ боздошту ҷарима кардаанд, маълум нест, ки ҳадаф аз баргузории ин гуна мусобиқа бо ҳузури Тамаев чист?

Ҳамчунин наворҳое ба шабакаҳои иҷтимоӣ роҳ ёфт, ки дар он дида мешавад, дар вақти намоиши мошинронии Асҳаб Тамаев дар як майдон курсиҳои барои мухлисон омодашуда чаппа шуда, чанд нафар аз баландӣ ба замин меафтанд. Маълум нест, ки дар ин ҳодиса чанд кас зарар дидааст.

Асҳаб Тамаев блогери шинохтаи чечентабор аст, ки қаблан низ дар чанд кишвари Осиёи Марказӣ ва Русия сабқатҳои мошинронӣ ташкил кардааст.