Дар чанд ҷумла
Говдуздон ба даст афтоданд
Кормандони Шуъбаи корҳои дохилии ноҳияи Бохтар гурӯҳи говдуздҳоро боздошт намуд, ки пайваста даст ба дуздии чорвои калон зада, сокинони ноҳияро ба ташвиш гузоштаанд. Дафтари матбуоти Вазорати корҳои дохилии Тоҷикистон бо тасдиқи ин хабар 26 октябр ба Радиои Озодӣ гуфт, ин гурӯҳро кормандони умури дохила рӯзи якшанбе боздошт карданд, ки аз се нафар иборат буда, аз моҳи июн ба ин тараф даҳҳо адад гови ҷӯшоиро дуздида, дар бозор фурӯхтаанд. Инҳо сокинони ноҳияи Бохтар, Вахш ва шаҳри Қӯрғонтеппа буда, тафтишот то ошкор кардани афроди дигари ин гурӯҳ аз ифшои ному насаби онҳо худдорӣ кард. Ин афрод тайи нимсол дар чарогоҳҳои деҳаҳои “Чорсӯ”, “Ваҳдат”, “Меҳвар”, “Гули Сурх” ва аз чарогоҳҳои дигари ноҳияи Бохтар бо роҳи пинҳонӣ гову гусолаҳоро дуздида, дар қассобхонаҳо ва дар бозор фурӯхтаанд. Тавре мақомоти интизомии ноҳияи Бохтар мегӯяд, аъзои ин гуруҳ аз ҷумла шаби 31 августи соли равон ду сар гови калонро бо нархи 6 ҳазор сомонӣ ва дар моҳи июн як гови дигар бо арзиши 3000-сомонӣ ва шаби 29 сентябр чор гови дигар бо қимати 8000 сомониро дуздида маблағро барои зарурати зиндагии худ сарф кардаанд.
Ҳамаи хабарҳои имрӯзро дар инҷо бихонед
"Ангур 130, қулфинай 200 сомонӣ." Ҳолу ҳавои бозорҳои Душанбе пеш аз Соли нав
Баъзе аз сокинон шикоят доранд, ки дар арафаи иди Соли нав дар шаҳри Душанбе нархи баъзе аз маҳсулот, аз ҷумла меваҳо, якбора гарон шудааст.
“Як кило ангур (манзур ангури воридотӣ)-ро 130 сомонӣ мегӯянд. Ин чӣ гап аст? Як кило қулфинай 200 сомонӣ. Пештар 60 сомонӣ буд. Хуб, мегуфтем, ки дар гармхона парвариш меёбад. 200 сомонӣ бисёр бад аст. Нархҳоро хеле гарон кардаанд”, - изҳор дошт Парвина Ҷумаева рӯзи 31-уми декабр.
Ба гуфтаи мусоҳиби мо, ҳарчанд нархҳо дар шаҳри Хуҷанд ҳам дар арафаи иди Соли нав боло рафтаанд, на ба андозае, ки ҳоло ӯ дар Душанбе шоҳид шудааст.
Аскаралӣ Ғоибов, сокини ноҳияи Абдураҳмони Ҷомӣ ва меҳмони пойтахт, низ назари ҳамсон дорад: “Ман маҳсулоти дигарро напурсидаам. Аз деҳот ҳастам, ҳамин об дар онҷо 12 сомонӣ аст. Дар инҷо ба 13 сомонӣ харидаам. Дар ҳоле ки инҷо макони яклухтфурӯшӣ асту мардум аз ҳамин ҷо мебаранд.”
Тоҷирон, баръакс, мегӯянд, нархи маҳсулот дар арафаи Соли нав тақрибан тағйир наёфтааст. Наҷибулло Заҳмат рӯзи 30-юми декабр дар суҳбат ба Радиои Озодӣ гуфт, меваҳояшро бо нархе мефурӯшад, ки чанд рӯз пеш мефурӯхт.
“Чи хеле буд, ҳамон хел аст. Ҳеч тағйир наёфтааст. Мандарин 40 сомонӣ буд, ҳол ҳам 40 сомонӣ”, - илова кард вай.
Шикоятҳо аз гароншавии нархи молу маҳсулот, хусусан маҳсулоти ниёзи аввал дар Тоҷикистон дар арафаи иду ҷашнҳо зиёд садо медиҳад. Ҳарчанд мақомот дар ин рӯзҳо ярмарка ва намоишгоҳҳои фурӯши маҳсулот баргузор мекунанд, аммо сокинон чунин тадбирҳоро барои пешгирӣ аз болоравии нархҳо муассир намедонанд.
Амалиёти Фаронса ба зидди ДОИШ дар Сурия
Фаронса ба маконҳои гурӯҳи террористии "Давлати исломӣ" (ДОИШ) дар Сурия бо мушак зарба задааст.
Себастян Лекорню, вазири мудофиаи Фаронса, дар ин бора рӯзи 31-уми декабр хабар дод.
Ӯ гуфт, ки амалиёти зидди ҷангҷӯён рӯзи якшанбе, 29-уми декабр, анҷом шуд.
Аз он пеш ҳамлаи мушобеҳ аз тарафи Амрико сурат гирифт. Дар ҷараёни амалиёти Вашингтон чанд ҷангҷӯйи ДОИШ кушта шудаанд.
Хабаргузории "Рейтерс" менависад, пас аз суқути режими Башор Асад ояндаи сиёсии Сурия номуайян мемонад.
Ҳукумати ӯ рӯзи 8-уми декабр аз тарафи нерӯҳои шӯришӣ таҳти раҳбарии “Таҳрир аш-Шом” (Амрико ва кишварҳои дигар террористӣ медонанд) сарнагун карда шуд.
Ҳукми волидони як навраси 13-сола дар Белград
Додгоҳе дар Белград волидони як навраси 13-соларо ба зиндон маҳкум кард.
Ин наврас соли гузашта 9 хонанда ва посбони мактабро бо зарби тир кушт.
Ҳукм рӯзи 30-юми декабр содир шуд.
Бар тибқи он, Владимир Кечманович 14 сол ва Миляна Кечманович се сол аз озодӣ маҳрум гаштаанд.
Владимир Кечмановичро ба "ҷинояти вазнин алайҳи амнияти ҷомеа, бепарвоӣ ва суистифода аз ноболиғ" гунаҳкор донистанд.
Миляна Кечманович ба бепарвоӣ муттаҳам шуд.
Вакилони мудофеъ эътироз карданд.
Додситон Ненад Стефанович гуфт, аз ҳукм розист, ҳарчанд оқибатҳои фоҷиабори ҷиноятро ҷуброн намекунад.
Бонги хатар дар Украина; зарба ба як анбори нафт дар Русия
Нерӯҳои Русия рӯзи 31-уми декабр бо мушаку ҳавопаймоҳои бесарнишин ба минтақаҳои мухталифи Украина ҳамла кардаанд.
Дар ин рӯз дар пойтахти Украина садои таркиш шунида шуда, дар Черниҳов, Суми, Полтава, Луҳанск, Днепропетровск, Запорожйе, Черкаси, Кировоҳрад ва Виннитса бонги хатар садо дод.
Сергей Попко, раиси маъмурияти низомии Киев, гуфт, боқимондаҳои як мушаки Русия дар ноҳияи Дарнитский ба се бино ва ду мошин зарар расонд.
Ҳамлаҳои Русия дар шаҳри Шосткаи вилояти Суми ба 12 бинои истиқоматӣ ва ду мактаб осеб расонда, чанд иншооти дигарро вайрон кард.
Дар ҳамин ҳол, ҳавопаймоҳои бесарнишини украинӣ рӯзи 31-уми декабр ба як анбори нафт дар ноҳияи Яртсевои вилояти Смоленски Русия зарба задаанд.
Амрико рӯзи 30-юми декабр бастаи нави кумакҳоро ба арзиши дуним миллиард доллар ба Украина эълон кард.
Дертар Вазорати молияи Иёлоти Муттаҳида гуфт, ки бар илова барои дастгирии буҷаи ба Украина 3,4 миллиард доллар медиҳад.
Табодули асирон байни Украина ва Русия
Русия ва Украина рӯзи 30-юми декабр даври нави табодули асиронро анҷом доданд. Гуфтугӯ барои иваз кардани асирон бо миёнравии Имороти Муттаҳидаи Арабӣ гузаштааст.
Ду тараф дар бораи шумораи асирони ивазшуда рақамҳои гуногун гуфтаанд.
Вазорати дифои Русия эълон кардааст, ки табодул бо ҳисоби баробари "150 ба 150" анҷом шуд.
Владимир Зеленский, президенти Украина, гуфтааст, ба ин кишвар на 150, балки 189 асир баргардонда шуд.
Дар миёни онҳо, ба гуфтаи Зеленский, низомиён ва ҳамчунин ду шаҳрванди мулкӣ буданд, ки ҳангоми тасарруфи Мариупол ба асорат афтиданд.
Вазорати дифои Русия гуфтааст, низомиёни озодшудаи ин кишвар ба Беларус оварда шуданд ва дар онҷо барояшон кумаки пизишкӣ расонда шуд.
Аз замони оғози ҷанги Русия алайҳи Украина ду кишвар чанд дафъа асиронро иваз кардаанд.
Путин имзо кард. Қабули фарзандони муҳоҷирон ба мактаб мушкил шуд
Президенти Русия Владимир Путин ба қонуне имзо кард, ки қабули фарзандони муҳоҷиронро ба мактаб мушкил мекунад.
Бар асоси ин санад, ки раиси ҷумҳури Русия 28-уми декабр зераш имзо кард, фарзандони муҳоҷирон танҳо баъди супоридани имтиҳон аз забони русӣ, ба мактаб пазируфта мешаванд. Ин қонун аз 1-уми апрели соли 2025 ба иҷро медарояд.
Агар фарзандони муҳоҷирон аз имтиҳони забони русӣ нагузаранд, ҳаққи таҳсил дар мактабро нахоҳанд дошт. Имтиҳон дар муассисаҳои давлатӣ гирифта мешудааст.
Талаботи дигар ин аст, ки пеш аз пазируфта шудан ба мактаб, қонунӣ будани ҳузури наврас дар Русия санҷида мешавад. Думаи давлатии Русия ин қонунро аввали моҳи декабри имсол қабул карда буд.
Мушкили қабули кӯдакон дар мактабҳои Русияро муҳоҷирони тоҷик ҳам доранд. Ба ин далел ҳам баъзе аз волидони муҳоҷир аз Тоҷикистон маҷбур мешаванд фарзандонашонро аз худ дур кунанду дар ватан дар тарбияи хешу табор гузоранд.
Соли 2025 нархи патент дар Русия боло меравад
Соли 2025 нархи патент ё иҷозатномаи кор қариб дар ҳама минтақаҳои Русия боло меравад.
Ба гузориши сомонаи расмии "Консультант Плюс", гаронтарин патент дар вилояти Краснодар таин шудааст, ки 17 ҳазор рубл мебошад. Дар ҷойҳои дуввум ва сеюм Челябинск бо 15 ҳазор рубл ва вилояти Твер бо қариб 15 ҳазор рубл ҷой ҷой гирифтаанд.
Арзонтарин патент дар Чеченистон, як ҷумҳурии зертобеи Русия аст, ки ҳамагӣ 3100 рубл таин шудааст. Вале сокинони ин ҷумҳурии воқеъ дар Қафқоз, худашон барои кор ба дигар минтақаҳои Русия мераванд.
Ба гузориши сомонаи "Консультант Плюс", ба истиснои Ҷумҳурии Хакасия, қариб дар ҳама минтақаҳои Русия патент гарон шуд. Аз ҷумла, дар шаҳри Маскав, ки бисёре аз муҳоҷирони тоҷик барои кор ба онҷо мераванд, патент аз 7500 то 8900 рубл гарон шуд. Дар вилояти Новосибирск бошад, нархи моҳонаи патентро аз 6300 рубл то 7900 рубл боло бурданд.
Боло рафтани нархи патент барои муҳоҷирон хабари нохуш аст, чун хароҷоти онҳоро зиёд мекунад. Бидуни патент дар Русия кор кардан манъ аст ва садҳо муҳоҷирро бо ин гуноҳ ихроҷ карданд.
"Тиреза нагузоред." Қарори нави "Толибон" нисбат ба занон
Бо қарори нави Ҳайбатулло Охундзода, раҳбари “Толибон”, дар Афғонистон гузоштани тиреза дар маконҳое, ки занон кору зиндагӣ мекунанд, манъ шудааст.
Матни қарор рӯзи 28-уми декабр дар шабакаи "Х" (Твиттери собиқ) нашр шуд.
Тибқи он, дар девори биноҳо набояд тирезае бошад, ки аз онҷо "рӯйи ҳавлӣ, ошхона, чоҳи оби ҳамсоя дида мешавад". Ҷое, ки одатан занҳо истифода мекунанд.
Дар қарор омадааст, назорати занон аз пушти тиреза метавонад боис ба амалҳои ғайриахлоқӣ шавад.
Мақомоти маҳаллӣ бояд сохтмони биноҳои навро барои таъмини меъёрҳои нав назорат кунанд. "Агар чунин тирезаҳо бошанд, бояд онҳоро аз байн бурда девор гузошт," -- омадааст дар амри раҳбари "Толибон".
"Толибон" соли 2021 идораи ҳукуматро дар Афғонистон ба даст гирифт.
Масъулони гурӯҳ то кунун қарору қонунҳое қабул карданд, ки занону духтаронро аз ҳамаи ҳуқуқ, бахусус таҳсилу кор ва ҳозир шудан дар маконҳои иҷтимоӣ ба шиддат маҳдуд мекунанд.
Даҳҳо муҳоҷири тоҷик дар гузаргоҳҳои Қазоқистон банд мондаанд
Даҳҳо муҳоҷири тоҷик, ки дар Қазоқистон кору зиндагӣ мекарданд, ҳангоми бозгашт ба Тоҷикистон дар гузаргоҳҳои марзии ин кишвар банд мондаанд.
Шарҳи мақомоти ду кишвар дастрас нест.
Баъзе аз муҳоҷирон рӯзи 30-юми декабр ба Радиои Озодӣ гуфтанд, маъмурони интизомии Қазоқистон онҳоро ба сохта ё қалбакӣ будани қайди ҷойи зист муттаҳам кардаанд.
Ҳоло онҳо мунтазири қарори Додгоҳ ҳастанд. Ба муҳоҷирон ихроҷ аз Қазоқистон таҳдид мекунад.
Дар миёни шаҳрвандони бандмондаи Тоҷикистон занону кӯдакон ҳам ҳастанд. Ҳавои сард вазъи онҳоро мушкил кардааст.
Муҳоҷирони тоҷик мегӯянд, дар як ҳафтаи охир амалиёт ва тафтиши хориҷиён дар Қазоқистон зиёд шудааст.
Ин кишвар баъд аз Русия макони дуюми муҳоҷирпазир аз Тоҷикистон аст.
Озарбойҷон қоидаи муҳоҷиратро барои русҳо сахттар кард
Дар Озарбойҷон қоидаҳои муҳоҷиратро барои шаҳрвандони Русия сахттар кардаанд.
Шаҳрвандони Русия аз соли 2025 ҳақ доранд, ки дар як сол фақат 90 рӯз дар хоки Озарбойҷон бе виза истанд.
Қарори нав рӯзи 29-уми декабр нашр шуд.
Вазорати корҳои хориҷии Озарбойҷон гуфт, чунин иқдом дар посух ба қарори монанд дар Русия нисбат ба шаҳрвандони Озарбойҷон гирифта шуд.
Қоидаи нав дар пасманзари суқути ҳавопаймои озарбойҷонӣ ҷорӣ мешавад, ки боис ба таниш дар равобити Боку ва Маскав гаштааст.
Ҳавопаймои ширкати озарӣ, ки рӯзи 25-уми декабр аз Боку ба Грозний парвоз мекард, дар Қазоқистон афтод. Аз 67 мусофиру сарнишин 38 кас ҷон бохт.
Ба иттилои пешакӣ, ҳавопаймо ҳангоми ҳамлаи паҳподҳо ба Чеченистон ҳадафи низоми дифои зиддимушакии Русия қарор гирифтааст.
Илҳом Алиев, раисҷумҳури Озарбойҷон, гуфт, Русия барои ин кор бояд узрхоҳӣ кунад, гунаҳкоронро ҷазо диҳад ва ҷуброн пардозад. Владимир Путин, президенти Русия, дар суҳбати телефонӣ бо Алиев “барои ҳодисаи фоҷеабор дар фазои Русия” маъзарат хост.
Номаи раисҷумҳури Тоҷикистон ба Ҷо Байден
Раисҷумҳури Тоҷикистон дар номае ба Ҷо Байден, президенти Амрико, нисбат ба даргузашти Ҷимми Картер, раҳбари пешини Иёлоти Муттаҳида, изҳори ҳамдардӣ кардааст.
Ҷимми Картер рӯзи 29-уми декабр дар садсолагӣ даргузашт.
Эмомалӣ Раҳмон рӯзи 30-юми декабр дар номааш ба Ҷо Байден гуфтааст, аз шунидани ин хабар андуҳгин шуд.
Ӯ Ҷимми Картерро шахсе номидааст, ки "дар дохили кишвар соҳиби иззату эҳтироми хос" буд ва "дар арсаи байналмилалӣ обрӯву эътибори баланд дошт".
Ҷимми Картер, барандаи Ҷоизаи сулҳи Нобел, аз соли 1977 то 1981 раисҷумҳури Амрико буд.
Дар давраи раҳбарии ӯ инқилоби исломӣ дар Эрон пирӯз шуда, рӯҳониёни тундрав сафорати Амрикоро дар Теҳрон ишғол карданд.
Дар айни замон Картер ба чанд созиши муҳими байнулмилалӣ даст ёфт. Аз ҷумла, имзои созишнома байни Мисру Исроил дар соли 1979 яке аз рухдодҳои муҳими даврони зимомдории ӯ буд.
Парванда ба зидди ду мансабдори собиқ дар Сербистон
Додситонии Сербистон дар робита ба марги 15 нафар сездаҳ кас, аз ҷумла вазири пешини нақлиёт ва раиси собиқи Идораи роҳи оҳанро ба ҷавобгарӣ кашидааст.
Мақомот дар ин бора рӯзи 30-юми декабр изҳорот доданд.
Додситонӣ гуфт, Горан Весич, вазири пешини нақлиёт ва Елена Танаскович, раиси собиқи Идораи роҳи оҳан, дар миёни масъулони дигари фоҷеа ҳастанд.
Понздаҳ нафар дар натиҷаи шикастани боми даромадгоҳи Истгоҳи роҳи оҳан дар шаҳраки Нови Сад ҷон бохтанд.
Ҳодиса дар моҳи ноябри имсол рӯй дод ва боис ба эътирози ҳазорҳо нафар шуд. Мардум тақозо доштанд, ки ҳама гунаҳгорони ҳодиса ба ҷавобгарӣ кашида шаванд.
Ин ҳодиса баъд аз он рух дод, ки истгоҳи роҳи оҳан дар солҳои охир аз ҷониби як консорсиуми чинии иборат аз чор ширкат ду дафъа таъмир карда шуд.
Мулоқоти Эмомалӣ Раҳмон бо раиси ISI-и Покистон
Эмомалӣ Раҳмон, раисҷумҳури Тоҷикистон, бо Муҳаммад Асим Малик, раиси ISI ё Хадамоти байниидоравии иктишофи Покистон, суҳбат кардааст.
Мулоқот рӯзи 30-юми декабр дар шаҳри Душанбе гузашт.
Хадамоти матбуоти президент гуфт, ду тараф вазъи ҳозира ва дурнамои муносибатҳои Тоҷикистону Покистонро баррасӣ карданд.
Ба иттилои манбаъ, "таъмини субот, амнияти минтақаӣ ва ҳалли масоили мубрами ҳамкории дуҷониба" аз мавзуъҳои дигари суҳбат будааст.
Тарафҳо ҳамчунин дар бораи тақвияти ҳамкорӣ барои мубориза бо терроризму ифротгароӣ, қочоқи маводи мухаддир ва ҷинояткории фаромиллӣ гап задаанд, аммо тафсилоташ дастрас нест.
Сафари мақоми баландпояи амниятии Покистон ба Тоҷикистон пас аз задухӯрд миёни марзбонони ин кишвар ва нерӯҳои “Толибон”-и Афғонистон сурат гирифт. Ин воқеа рӯзи 28-уми декабр иттифоқ афтод.
Ҳарчанд ҳукумати “Толибон” аз поёни даргирӣ хабар дод, баъзе аз кишварҳо, аз ҷумла Русия, аз идомаи задухӯрд миёни Афғонистону Покистон нигаронанд.
Имтиёзи бештар барои қонунӣ кардани молу мулк ва дороиҳо дар Тоҷикистон
Ҳукумати Тоҷикистон имтиёз барои қонунигардонии молу мулк ва дороиҳоро зиёд кардааст.
Бар асоси муқаррароти қонун дар бораи афви амвол, шахсоне, ки дороиҳои худро расман сабтином мекунанд, давоми се сол аз пардохти андоз ва ҷаримаҳо озод буданд. Муқаррароти нави қонун ин муҳлатро чор сол пешбинӣ кардааст, яъне як сол бештар.
Лоиҳаи қонунро ҳукумат 19-уми декабр ба порлумон пешниҳод кардааст.
Қонун дар бораи афви дороиҳо моҳи июли соли 2021 қабул шуда, мақомот онро чанд дафъа тамдид карданд.
Муҳлати охири ин қонун 5-уми январи соли 2025 таъин шудааст ва маълум нест, ки мақомот онро боз дароз мекунанд ё не.
Фирдавс Толибзода, раиси Бонки миллии Тоҷикистон, дар моҳи январи соли 2024 дар назди вакилони порлумон гуфта буд, аз замони иҷрои қонун, 5,9 миллиард сомонӣ қонунӣ карда шудааст. Иттилои алтернативи дар бораи ин дороиҳо ва соҳибони онҳо дастрас нест.
Ҷулонӣ аз ҳамкорӣ бо Эрону Русия гуфт, вале бар пояи “эҳтироми баробар”
Аҳмад Аш-Шаръ ё Абумуҳаммади Ҷулонӣ гуфтааст, Димишқ мехоҳад, ки бо Эрону Русия робита дошта бошад, аммо бар пояи “эҳтироми баробар”. Ҷулонӣ раҳбари гурӯҳи “Таҳрир аш-Шом” аст, ки идораи ҳукуматро дар Сурия ба даст дорад.
Ӯ рӯзи 29-уми декабр дар мусоҳиба бо телевизиони “Ал-Арабия” гуфт, “имкон надорад, ки Сурия бо як кишвари муҳими минтақаӣ мисли Эрон робита надошта бошад.”
Аммо ин робита, ба гуфтаи роҳбари нави Сурия, “бояд бар пояи эҳтиром ба истиқлоли ҳарду кишвар ва дахолат накардан ба корҳои ду давлат асос ёбад.”
Ҷулонӣ аз Теҳрон хост, дар сиёсатҳои худ дар минтақа, аз ҷумла дахолат ба корҳои дигар кишварҳо таҷдиди назар кунад.
Эрон ва Русия аз ҳампаймонҳои асосии Башор Асад, раисҷумҳури сарнагуншудаи Сурия, ҳастанд. Асад дар оғози моҳи декабр аз сӯйи гурӯҳҳои мухолиф бо роҳбарии “Ҳайат Таҳрир аш-Шом” аз қудрат барканор шуд.
Алиев гуфт, дар се рӯзи аввал аз Русия ба ҷуз сафсата чизе нашуниданд
Илҳом Алиев, раисҷумҳури Озарбойҷон, баъд аз як рӯзи узрхоҳии Владимир Путин, президенти Русия, суқути ҳавопаймои озариро дар ҳудуди Қазоқистон шарҳ дод.
Ӯ рӯзи 29-уми декабр дар суҳбат бо шабакаи "AzTV" гуфт, ҳавопаймои "Озарбойҷон Эйрлайнз" "қасдан суқут дода нашудааст", вале "дар се рӯзи аввал аз Русия ба ҷуз сафсата чизе нашунидем".
Дар ҳоле ки, ба гуфтаи Алиев, чораҳои зарурӣ "эътирофи гуноҳ, маъзарат хостан аз Озарбойҷон ва расондани маълумоти дуруст ба мардум" буд.
Ҳавопаймои ширкати "Озарбойҷон Эйрлайнз", ки рӯзи 25-уми декабр аз шаҳри Боку ба Грозний парвоз дошт, дар наздикии шаҳри Оқтау дар Қазоқистон суқут кард. 38 нафар ҷон бохта, 29 кас маҷрӯҳ шуданд.
Дафтари матбуоти раёсатҷумҳурии Русия рӯзи 28-уми декабр гуфт, Владимир Путин дар суҳбати телефонӣ бо Илҳом Алиев аз он узрхоҳӣ кард, ки ҳодисаи фоҷиабор дар қаламрави ҳавоии Русия рух додааст.
"Хулосаи ниҳоӣ баъди кушодани қуттии сиёҳ маълум хоҳад шуд, аммо фарзиязҳои ибтидоӣ низ бо далелҳо асос ёфтаанд. Далел ин аст, ки як ҳавопаймои мусофирбари Озарбойҷон дар қаламрави Русия, дар наздикии шаҳри Грозний, осеб дид ва идораро аз даст дод," - гуфт Илҳом Алиев.
Вай ҳаргуна кӯшиши инкори ин далел ва пинҳон доштани воқеиятро "ҳам бемаъно ва ҳам аблаҳӣ" номид.
Сарнагунии 9 паҳподи Русия дар вилояти Николаеви Украина
Шаби 28 ба 29-уми декабр дар вилояти Николаеви Украина 9 паҳпод ё ҳавопаймои бесарнишини Русияро сарнагун кардаанд.
Дар ин бора Виталий Ким, раиси маъмурияти низомии вилоят, дар Телеграм хабар дод.
Ӯ гуфт, ки ҳавопаймоҳои бесарнишин асосан зербунёдҳои энержиро ҳадаф дода буданд.
Мақомоти Русия ҳамлаи ҳадафмандона ба зербиноҳои иҷтимоиро дар шаҳру ноҳияҳои Украина пайваста рад мекунанд.
Дар натиҷаи афтодани боқимондаи ҳавопаймоҳо дар ҳудуди як корхона дар вилояти Николаев сӯхтор сар зада, як кас маҷруҳ шудааст.
Русия дар моҳи феврали соли 2022 бедалел ба хоки Украина ҳамла кард ва даргирии ду тараф аз он замон идома дорад.
Як шаҳрванди гумшудаи Тоҷикистонро баъд аз 21 сол ёфтаанд
Як шаҳрванди Тоҷикистонро, ки соли 2003 бо нияти сафар ба Русия ба роҳ баромада, бенишон гашта буд, баъди 21 сол дар Қазоқистон ёфта, ба назди пайвандонаш баргардондаанд.
Толиб Бегимқулов 52-сола аст ва аз деҳаи Шӯрноваи шаҳри Панҷакент.
Акбар Шарифӣ, подполковник (сарҳангёр)-и милиса, мегӯяд, Бегимқулов соли 2003 дар роҳ ба Русия, дар ҳудуди Қазоқистон, бар асари тасодуфи нақлиётӣ “осеби майнаи сар бардошта, ба бемории фаромӯшхотирӣ гирифтор шудааст”.
Вай рӯзи 28-уми декабр дар гузорише дар торнамои Вазорати корҳои дохилии Тоҷикистон навишт: “Толиб Бегимқулов маълумот дар бораи худ, наздикону пайвандон ва ҷойи зистро пурра аз хотир бароварда, то ин дам дар ҳавлии шаҳрванди Қазоқистон дар шаҳри Чимкент мезист.”
Ҷузъиёт маълум нест. Вазорати корҳои дохилӣ "истифода аз барномаҳои интернетӣ", ҳамкорӣ бо консулгарии Тоҷикистон дар Алмато ва мақомоти ҳифзи ҳуқуқи Қазоқистонро аз омилҳои ёфтани Толиб Бегимқулов номбар кардааст.
Мақомот мегӯянд, кофтукоби Толиб Бегимқулов бо дархости падараш аз соли 2014 расман идома дошт, вале ӯ замоне пайдо ва ба ватан оварда шуд, ки волидонаш дигар барҳаёт нестанд. “Пайдо шудани ӯ барои ҳамсару фарзандон ва дигар аъзои оила хурсандибахш гардид,” – гуфтааст Акбар Шарифӣ.
Омори пурра дар бораи чӣ қадар бедарак будани шаҳрвандони Тоҷикистон дар дохил ва беруни ҷумҳурӣ нашр намешавад.
Ба иттилои Вазорати корҳои дохилии Тоҷикистон, танҳо дар нуҳ моҳи соли 2020 зиёда аз 700 нафар бедарак шуда буданд. Маълум нест чӣ қадаре аз онҳо ёфт шуда, чанд нафар бедарак мондаанд.
Михеил Кавелашвилӣ, раисҷумҳури нави Гурҷистон савганд ёд кард
Михеил Кавелашвилӣ, футболбози собиқ ва яке аз мунтақидони Ғарб, ба унвони раисҷумҳури нави Гурҷистон савганд ёд кард.
Ин маросим рӯзи 29-уми декабр, дар пасманзари буҳрони сиёсии чандмоҳа дар Гурҷистон, баргузор шуд.
Ваколати президенти ғарбгаро, Саломе Зурабишвили, рӯзи 29-уми декабр ба поён расид.
Ӯ кохи раёсати ҷумҳуриро тарк кард, вале гуфт, ҳамчунон раҳбари қонунӣ мемонад.
Зурабишвилӣ маросими савгандёдкунии Кавелашвилиро "масхараомез" номид. Чандсад эътирозгар дар назди бинои порлумони Гурҷистон гирди ҳам омаданд.
Саломе Зурабишвилӣ ва намояндагони мухолифон қаблан натиҷаҳои интихоботи порлумониро напазируфта, хоҳони овоздиҳии такрорӣ дар Гурҷистон ҳастанд.
Дар ин интихобот, ки рӯзи 26-уми октябри соли 2024 баргузор шуд, "Орзуи гурҷӣ", ҳизби ҳоким ва аз “дӯстон”-и Русия, иддаои пирӯзӣ кард. Намояндагони мухолифон гуфтанд, маърака бо тақаллуб ва хушунату таҳдид гузашт.
Аз он замон эътирозҳои зиддиҳукуматӣ дар Гурҷистон ҷараён дорад. Қатъи музокирот барои пайвастани Тбилиси ба Иттиҳоди Аврупо ин эътирозҳоро бештар кард.
Михеил Кавелашвилӣ 53-сола аст ва аз соли 2016 вакили порлумони Гурҷистон. Вай дар соли 1995 дар ҳайати дастаи "Спартак-Алания"-и Владикавказ унвони қаҳрамони Русияро соҳиб шудааст.
Медведев гуфт, фарзандони муҳоҷирон забони русиро "дуруст намедонанд"
Муовини раиси Шӯрои амнияти Русия гуфт, беш аз 40 дарсади фарзандони муҳоҷирон дар мактабҳои ин кишвар забони русиро "дуруст намедонанд".
Дмитрий Медведев дар ин бора рӯзи 26-уми декабр дар ҷаласае сухан ронд.
"Шумори онҳо зиёд аст, беш аз 200 ҳазор нафар. Мутаассифона, қисми зиёди онҳо – беш аз 40 дарсад барои азхудкунии барномаи таълимии ибтидоӣ забони русиро намедонанд," – гуфт ӯ.
Ин омор бар пояи маълумоти Вазорати маорифи Русия ба даст омадааст.
Медведев афзуд, фарзандони муҳоҷирон бо сабаби кору зиндагии волидонашон дар Русия ба мактабҳои маҳаллӣ мераванд.
Думаи Давлатии Русия дар моҳи декабри соли 2024 қонунеро қабул кард, ки бар асоси он, фарзандони муҳоҷирон бе донистани забони русӣ ба мактабҳо пазируфта намешаванд.
Иҷрои қонуни нав аз аввали моҳи апрел дар назар аст.
Русия мизбони бештар аз 1 миллион муҳоҷири кории тоҷик аст ва қонуни нав зиндагии ҳазорон нафари онҳоро, ки мехоҳанд фарзандонашонро аз худ дур накунанд, сахттар хоҳад кард.
Сиёсати зидди муҳоҷирон дар Русия дар баҳори соли 2024, пас аз ҳамлаи маргбор ба толори “Крокус Сити Ҳолл”, шиддат гирифт. Аксари гумонзадҳо, ба иттилои мақомоти Русия, зодагони Тоҷикистон ҳастанд.
Марги 179 кас дар садамаи ҳавопаймо дар Куриёи Ҷанубӣ
Садамаи ҳавопаймои "Boeing 737-800" дар Куриёи Ҷанубӣ боис ба марги 179 кас шудааст. Ду сарнишин наҷот ёфтанд.
Ҳодиса рӯзи 29-уми декабр дар шаҳри Муан рӯй дод.
Ҳавопаймо бо 175 мусофир ва 6 сарнишин аз Бангкок, пойтахти Тайланд, парвоз карда буд.
Тибқи иттилои муқаддамотӣ, чархи ҳавопаймо ба мушкил дучор шудааст. Масъулони ҳолатҳои изтирории шаҳри Муан гуфтаанд, ки сабабҳои садамаро таҳқиқ мекунанд.
Хабаргузории “Рейтерс” навишт, ки ҳавопаймо ҳангоми фурудоӣ аз хати парвоз берун шуда, ба девори бетонии фурудгоҳ бархӯрд.
“Франс Пресс” мегӯяд, ҳавопаймои ширкати “Jeju Air” ҳангоми нишастан бидуни чарх ба замин зад.
Ин садамаи маргбортарини ҳавопаймо дар 27 соли охир дар Куриёи Ҷанубӣ будааст. Дар ҳодисаи мушобеҳ дар соли 1997 беш аз 200 нафар ҷон бохта буд.
Владимир Путин аз раиси ҷумҳури Озарбойҷон узр пурсид
Владимир Путин, раиси ҷумҳури Русия рӯзи шанбе аз ҳамтои озариаш Илҳом Алиев барои суқути ҳавопаймои ширкати озарӣ узр пурсидааст.
Дафтари матбуоти раёсати ҷумҳурии Русия рӯзи 28-уми декабр дар як баёнияи расмӣ гуфт, ки Владимир Путин бо Илҳом Алиев суҳбати телефонӣ дошт. Дар баёния омадааст: “Владимир Путин аз он узрҳоҳӣ кард, ки ҳодисаи фоҷиабор дар қаламрави ҳавоии Русия рух додааст ва бори дигар ба хонаводаҳои қурбониён изҳори тассалият кард ва ба маҷруҳо шифои зудрас хост.”
Ҳавопаймои ширкати Озарбойҷон Эйрланз, ки рӯзи 25-уми декабр аз шаҳри Боку ба Грозний парвоз дошт, дар наздикии шаҳри Оқтау дар Қазоқистон суқут кард. 38 нафар ҷон бохта, 29 тани дигар маҷрӯҳ шуданд. Владимир Путин ошкоро нагуфтааст, ки системаи дифои мушакии Русия ҳавопаймои мусофирбари Эмбраер-190-ро задааст, аммо гуфтааст, вақти талоши ҳавопаймо барои фуруд дар фурудгоҳи Грозний “паҳподҳои ҷангии Украина, ба шаҳри Грозний, Моздок ва Владикавказ ҳамла мекарданд ва системи дифои мушакии Русия ин ҳамлаҳоро рафъ мекард.”
Дафтари матбуоти раиси ҷумҳури Озарбойҷон гуфтааст, ки ҳавопаймо бар асари таъсири физикӣ ва фаннӣ аз берун дар фазои Русия батамом аз идора берун шуда ва самти шаҳри Оқтау дар Қазоқистон ҳаракат кардааст. Пештар ҳам гуфта мешуд, ки мумкин аст, ҳавопаймои ширкати озариро нерӯҳои ҳавоии Русия иштибоҳан зада бошанд ва ба сабаби аз кор афтодани системаи идора, ҳавопаймо дар наздикии Ақтау суқут кардааст.
Писари Зубайдуллои Розиқро аз зиндон раҳо карданд
Асрориддин Розиқов, писари яке аз раҳбарони собиқи Ҳизби мамнуи наҳзати исломӣ дар Тоҷикистон аз зиндон раҳо шудааст. Бародараш Ҳисомиддин рӯзи 27-уми декабр ба Радиои Озодӣ гуфт, ки Асрориддинро дар ҳамин рӯз аз зиндони Хуҷанд озод кардаанд ва ӯ ба назди хонаводааш баргаштааст.
Ҳисомиддин Розиқов дар суҳбат бо Радиои Озодӣ гуфт: «Асрориддин тақрибан як соли мӯҳлати ҳабсро дар боздоштгоҳ сипарӣ кард ва пас аз адои чаҳор соли боқимонда дар зиндони Хуҷанд озод шуд. Ин бисёр хабари хуш барои хонаводаи мост, вале афсӯс падарам дар зиндон ҳастанд ва модарам даргузаштанд.
Асрориддин Розиқов, писари Зубайдуллои Розиқ, узви собиқи раёсти ҳизби фаъолияташ дар Тоҷикистон мамнӯи наҳзати исломӣ аст, ки худи ӯ соли 2016 бо гуноҳҳои вазнин, аз ҷумла терроризм ба 25 соли зиндон маҳкум шуд. Худаш гуфтааст, ки гуноҳе надорад.
Додгоҳи ноҳияи Исмоили Сомонӣ дар Душанбе моҳи декабри соли 2020 Асрориддинро бо гуноҳи иштирок дар фаъолияти ҳизбҳои сиёсӣ, иттиҳодияҳои ҷамъиятӣ, фаъолияташон мамнуъ дар Тоҷикистон ба 5 соли зиндон маҳкум кард. Он замон созмонҳои ҳомии ҳуқуқ аз ҳукумати Тоҷикистон хоста буданд, ки “Асрориддин Розиқовро фавран озод кунад".
Владимир Путин санади лозим барои ҳамкорӣ бо Толибонро имзо кардааст
Владимир Путин, раиси ҷумҳури Русия рӯзи 28-уми декабр қонунеро имзо кардааст, ки иҷоза медиҳад, гурӯҳи Толибони ҳоким бар Афғонистон аз феҳрасти созмонҳои террористӣ дар Русия хориҷ карда шавад.
Дар қонуни ислоҳшудае, ки ба сармоягузории терроризм ва феҳрасти созмонҳои террористӣ дахл дорад, акнун дар Русия метавонанд, созмонеро, ки тарғибу ташвиқ ва ҳимоят аз терроризмро бас кардааст, аз феҳрасти созмонҳои мамнӯъ дар Русия берун кунанд.
Матни қонун дар вебсайтҳои расмии Русия нашр шудааст. Думаи давлатии Русия ин қонунро 17-уми декабр қабул кард ва Леонид Слутский, раиси Кумитаи робитаҳои байналмилалӣ гуфтааст, ки ислоҳи қонун аз ҷумла барои фароҳам кардани шароити қонунӣ барои ҳамкории Русия бо Толибон пешбинӣ шудааст.
Фаъолияти Толибон, ки як гурӯҳи ифротӣ ба ҳисоб меравад ва се сол боз Афғонистонро идора мекунад, аз моҳи феврали соли 2003 дар Русия манъ аст. Бо вуҷуди бозгашти Толибон ба қудрат дар соли 2021 ба Афғонистон ҳеч яке аз кишварҳои дунё ҳукумати онро ба расмият нашинохтаанд. Ҳоло маълум нест, ки мақомоти Русия кай Толибонро аз феҳрасти созмонҳои террористӣ хориҷ мекунанд.
Амрико ба зидди нахуствазири собиқи Гурҷистон таҳримоти нав ҷорӣ кард
Иёлоти Муттаҳидаи Амрико ба зидди Бидзина Иванишвилӣ миллиардери гурҷӣ, нахуствазири собиқ ва муассиси Ҳизби Рӯъёи Гурҷистон таҳримоти наве ҷорӣ кард, зеро ба қавли Амрико, ӯ демократия дар Гурҷистонро “ба нафъи Русия” таҳти хатар гузоштааст.
Энтони Блинкен, вазири умури хориҷии Амрико рӯзи 27-уми декабр дар як баёнияи расмӣ гуфт: “Рӯъёи Гурҷистон, таҳти раҳбарии Иванишвилӣ манофеи Кремлро пеш бурд, самтгирии Гурҷистон ба Аврупову Атлантикро аз роҳаш хориҷ кард, ки дар таззод бо пешбиниҳои мардуми Гурҷистон ва Қонуни асосии Гурҷистон аст.”
Ба қавли Блинкен, амалкардҳои Иванишвилӣ ва Рӯъёи Гурҷистон, сабаби таназзули институтҳои демократӣ, нақзи ҳуқуқи инсон ва маҳдудияти баҳбарардорӣ аз озодиҳои бунёдӣ дар Гурҷистон шудааст. Бар асоси таҳримоти нави Амрико, муомила бо муассисаҳое, ки Иванишвилӣ молики он аст, манъ карда мешавад.
Бино ба гузориши Блумберг, сарвати Бидзина Иванишвилӣ тахминан 7. 5 миллиард долларро ташкил медиҳад, ки аз ҳисоби фурӯши фулуззот, бонкдорӣ ва ширкатҳои мухобиротӣ дар Русия ба даст омадааст. Иракли Кобахидзе, нахуствазири Гурҷистон таҳримоти Амрикоро “таҳдид” номида гуфт, ки амалкарди Амрико “подоше” барои ҳимояти манофеи миллии Гурҷистон аст.
Аввали моҳи декабр ҳукумати Амрико амр дод, ба онҳое, ки “демократия дар Гурҷистонро таҳти хатар меандозанд” раводиди ин кишвар дода нашавад. Гурҷистон, ки як замон шарики наздики Амрико ва Иттиҳоди Аврупо буд, бо самтгирӣ ба ҷониби Русия ва саркӯби дигарандешон хашми ҳарду шарикони пешинашро барангехт.