Сироҷиддин Муҳриддин рӯзи 13-уми феврал дар нишасти хабарии муштарак бо ҳамтои русаш Сергей Лавров амалиёти мақомоти интизомии Русияро ба зидди муҳоҷирони тоҷик низ танқид кард.

"Амалиёт ба зидди муҳоҷирон гоҳо бо шеваҳои сахте сурат мегиранд. Мо чорабиниҳои мақомоти Русияро барои ба чаҳорчӯбаи қонунӣ ворид кардани муҳоҷират зери суол намебарем, вале ин чорабиниҳо набояд сабаби изтироб дар ҷомеа ва фазои иттилоотӣ бишаванд," – гуфт Сироҷиддин Муҳриддин дар Маскав.

Бадрафторӣ бо муҳоҷирони тоҷик дар Русия бахусус баъд аз ҳамлаи маргбор ба толори консертии "Крокус" дар моҳи март бисёр зиёд шуд. Баъди ҳамин ҳодиса аз Русия бештар аз 17 ҳазор муҳоҷири тоҷикро ихроҷ карданд.

Матбуоти Русия ва гоҳе сиёсатмадорони он муҳоҷирони корӣ ва аз ҷумла муҳоҷирони тоҷикро сабаби тамоми бадбахтиҳои кишварашон меноманд.

Бино ба омори расмӣ, танҳо дар нимаи соли 2024 аз Тоҷикистон тақрибан 393 ҳазор нафар барои кор ба хориҷ ва аксаран ба Русия рафтаанд.

Намояндагони Фаронса, Олмон, Бритониё, Лаҳистон, Испания, Итолиё ва Кумисюни Аврупо рӯзи 12-уми феврал гуфтанд, "дар ҳама гуна музокира бо Русия, Аврупо ва Украина низ бояд нақш дошта бошанд".

"Мо як ҳадаф дорем: идомаи пуштибонӣ аз Украина то расидан ба сулҳи одилона, ҳамаҷониба ва пойдор," – гуфта шудааст дар баёния.

Олаф Шолтс, садри аъзами Олмон, дар мусоҳибае бо нашрияи Politico гуфт, ки наметавон сулҳро ба Украина таҳмил кард. Ин мусоҳиба рӯзи 13-уми феврал нашр шуд.

Изҳороти раҳбарони аврупоӣ дар ҳолест, ки президенти Амрико Доналд Трамп рӯзи 12-уми феврал бо раҳбарони Русия ва Украина дурнамои хатми ҷанг дар Украинаро баррасӣ кард.

Ӯ изҳори умед кард, ки ин фоҷеа ба зудтарин фурсат хотима меёбад.

Рамазон Раҳимзода, вазири корҳои дохилӣ, рӯзи 13-уми феврал дар нишасти матбуотӣ гуфт, Иброҳим Сафарови 53-сола аз рӯйи 15 парвандаи ҷиноӣ таҳти ҷустуҷӯй қарор дошт.

"Ҳамаи парвандаҳо барои ба муомилот баровардани маводи мухаддир. Пештар дар Русия барои ин ҷиноят ба ҷавобгарӣ кашида шуда буд. Ҳоло дар Истанбули Туркия дастгир ва ба Тоҷикистон оварда шудааст ва тафтиши парвандаҳояш идома дорад," – афзуд вазир.

Ҳарчанд Раҳимзода дар бораи парвандаҳои Иброҳим Сафаров ҷузъиёт надод, пештар манбаъҳои Радиои Озодӣ гуфта буданд, ки ӯ "ба таъсиси шабакаи фурӯши ҳабҳои экстазӣ" ва "нигаҳдории силоҳ айбдор мешавад". Мавқеи наздикон ё вакили мудофеаш ба иттиҳом маълум нест.

Исми Иброҳим Сафаров (Боим) дар гузашта низ борҳо бо интиқолу фурӯши миқдори бузурги маводи мухаддир расонаӣ шуда буд. Расонаҳои русӣ аз ӯ “Пабло Эскобари Тоҷик” ном мебурданд.

Вай, ки дар гузашта ба баргузории консерт ва таҳияи суруд ба сарояндагон мадад мекард, соли 2006 бо беш аз 200 кило ҳероин дар Русия боздошт ва ба нуздаҳ сол зиндон маҳкум шуд. Соли 2020 дар саҳифааш дар Фейсбук хабар дод, ки озод шудааст.

Вазорати корҳои дохилии Тоҷикистон дар соли 2024 дар умум нуҳ гурӯҳи созмонёфтаи ҷиноии иборат аз 42 нафарро боздошт кардааст, ки аз онҳо 280 кило маводи мухаддир гирифта шудааст.

Волидони ду маҳбус бо шарти фош нашудани номашон рӯзи 12-уми феврал ба Радиои Озодӣ гуфтанд, баъди ҳодиса дар зиндони Ваҳдат бо фарзандонашон вохӯрда наметавонанд.

Яке аз ин ҳамсуҳбатҳои мо гуфт, фарзандаш дар як занги кӯтоҳи телефонӣ хабар додааст, ки назорат пурзӯр шудааст ва беҳтар аст феълан ба мулоқот наоянд.

Падари як маҳбуси дигар гуфт, умедвор аст, ҳарчӣ зудтар вазъ дар зиндонҳо ба ҳолати муқаррарӣ бармегардад ва боз фарзандонашро мебинад.

Рӯзи 3-юми феврал дар зиндони шаҳри Ваҳдат нооромӣ сар зад. Ба гуфтаи мақомот, чанде аз зиндониён бо мақсади “қатл ва фирор” ба нигаҳбонони зиндон ҳамла кардаанд.

Дар натиҷа ба маълумоти расмӣ 3 ва ғайрирасмӣ то 7 маҳбус кушта, чанд корманди зиндон захмӣ гаштаанд.

Манобеи Радиои Озодӣ гуфтанд, муфаттишони Додситонии кул ҳодисаро таҳқиқ доранд.

Хабарнигори тоҷик Рухшона Ҳакимова рӯзи 5-уми феврал дар доираи парвандаи пурсарусадои "табаддулот" бо гуноҳи "хиёнат ба давлат" ба ҳашт сол зиндон маҳкум шуд. Худаш дар додгоҳ иттиҳомро рад кард.

Ҳабси Рухшона Ҳакимова вокунишҳои зиёдро дар шабакаҳои иҷтимоӣ ба миён овард. Бахусус инки ӯ ду кӯдак (яке нуҳмоҳа ва дигаре дуюнимсола) дорад.

Корбарони шабакаҳои иҷтимоӣ бо ишора ба муқаррароти қонунгузории Тоҷикистон дар бораи ба таъхир гузоштани ҷазои зане, ки кӯдаки хурдсол дорад, аз мақомот талаб карданд, ки Ҳакимоваро аз фарзандонаш ҷудо накунанд.

Шавкат Лутфуллозода, муовини аввали раиси Додгоҳи олии Тоҷикистон, рӯзи 13-уми феврал зимни нишасти хабарӣ гуфт, "ҳукми Рухшона Ҳакимова ба гурӯҳи ҷиноятҳои махсусан вазнин дохил мешавад ва мавқуф гузоштани иҷрои онро қонунгузорӣ пешбинӣ накардааст." Вай аз додани ҷузъиёти бештар худдорӣ кард.

Дар посух ба пурсишҳои батакрори хабарнигорон, ки то куҷо дуруст аст Рухшона Ҳакимова барои анҷоми як пурсиш дар бораи нуфузи Чин боздошту маҳкум шудааст, Лутфуллозода посух дод, ки парванда махфӣ аст ва бинобар ин, ҷузъиёт ироа карда наметавонад.

Рухшона Ҳакимова 31-сола аст ва хатмкардаи бахши рӯзноманигории Донишгоҳи миллии Тоҷикистон. Корро соли 2013 дар Маркази таҳқиқоти журналистӣ оғоз кардааст. Корманди нашрияҳои “Самак”, “Фараж” ва “Ҷавонони Тоҷикистон” буд. Матолиби таҳлилияш дар сомонаҳои “Кабар Азия” ва “Фактчек.тҷ” низ нашр шудаанд. Барандаи ҷоизаи ба номи Воҳид Асрорӣ, ҷоизаҳои Кумитаи ҷавонон, Эътилофи бонувони журналист ва "Медиа-Алянс"-и Тоҷикистон аст.

Дар бештар аз ду соли охир нуҳ рӯзноманигору блогери тоҷик – Абдулло Ғурбатӣ, Завқибек Саидаминӣ, Далери Имомалӣ, Абдусаттор Пирмуҳаммадзода, Хуршед Фозилов, Хушом Ғулом, Улфатхоним Мамадшоева, Муҳаммади Султон ва Аҳмади Иброҳим – аз 7 то 20 сол зиндонӣ шуданд. Созмонҳои ҳомии ҳуқуқ, аз ҷумла Human Rights Watch ин вазъро ташвишовар донистаанд.

Намояндагони Кумитаи андоз 13-уми феврал дар нишасти хабарӣ гуфтанд, блогерон соли гузашта ба буҷа 2,2 миллион сомонӣ молиёт супоридаанд.

Мустақилона тасдиқи ин рақамҳо аз манобеи мустақил имконпазир нест. Баъзе аз блогерон аз кам шудани даромади худ шикоят мекунанд.

Тибқи иттилои ахири Кумитаи андоз, дар кишвар 114 блогер сабт шудаанд, ки назар ба соли гузашта 26 кас зиёд аст.

Сабтиноми блогерҳо дар Тоҷикистон соли 2020 сар шуд. Мақомот ба ин бахш замоне таваҷҷуҳ карданд, ки сафи блогерон барои гирифтани даромад афзуд.

Трамп дар шабакаи иҷтимоии худ Truth Social навишт, бо Путин мавзӯи Украина, Ховари Миёна, энержӣ, зеҳни сунъӣ, қувваи доллар ва дигар мавзуъҳо гап задааст.

Ба гуфтаи Дмитрий Песков, сухангӯи Кремл, сӯҳбати роҳбарони Русия ва Амрико ҳудуди ду соат давом кард ва Путин Трампро ба Маскав даъват кардааст.

Раиси ҷумҳури Амрико сӯҳбат бо Владимир Путинро "пурсамар" номид. Ба навиштаи Трамп, ӯ ва Путин дар ин масъала ҳамфикр буданд, ки куштори миллионҳо нафар дар ҷанги Русия ва Украина бояд бас шавад.

"Мо тавофуқ кардем, ки аз наздик кор мекунем, аз ҷумла, ба кишварҳои ҳамдигар ташриф меорем. Мо ҳамчунин ба созиш расидем, ки ҳайатҳои мо музокиротро фавран оғоз кунанд. Мо корро аз он сар мекунем, ки ман ба президенти Украина занг мезанам ва дар бораи ин гуфтугӯ хабар медиҳам",-навиштааст Доналд Трамп.

Дертар хабари гуфтугӯи телефонии роҳбарони Амрико ва Украина ҳам расонаӣ шуд. Президенти Амрико аз Котиби давлатии ин кишвар, мушовири амнияти миллӣ, роҳбари Хадамоти федеролии амният ва фиристодаи вижаи ИМА дар масъалаи Украина дархост кардааст, ки музокиротро роҳбарӣ кунанд.

Рӯзи 5-уми феврал дар Русия рӯйхати шаҳрвандони хориҷие фаъол шуд, ки қонуншиканӣ кардаанд. Ба ин гурӯҳи муҳоҷирон то моҳи апрели соли равон муҳлат додаанд, ки ҳуҷҷатҳои худро дуруст кунанд.

Дар наворҳои фиристодаи муҳоҷирон аз шаҳрҳои Маскав ва Санкт-Петербург дида мешавад, ки анбуҳи зиёди одамон дар назди идораи муҳоҷират ҷамъ шудаанд.

Ба гуфтаи як муҳоҷир, маҷбуранд аз соати 2-3-и шаб навбат гиранд. Ин муҳоҷир ба Радиои Озодӣ навиштааст, кормандони идораи муҳоҷирати Санкт-Петербург дар 3 соат фақат 15 нафарро қабул мекунанд.

Бар асоси як фармони Владимир Путин, муҳоҷироне, ки то моҳи апрели имсол кор ва будубоши худро дар Русия қонунӣ намекунанд, аз ин кишвар ихроҷ хоҳанд шуд.

Пештар рӯйхати 120 ҳазор зодаи Тоҷикистон нашр шуд, ки дар қаламрави Русия ягон қонуншиканӣ кардаанд ва ба онҳо ихроҷ таҳдид мекунад.

Сиёсати зидди муҳоҷирон дар Русия баъд аз ҳамлаи маргбор ба толори “Крокус” дар баҳори соли 2024 шиддат гирифт.

Изҳороти ӯ рӯзи 12-уми феврал ҳангоми мулоқот бо вазири корҳои хориҷии Тоҷикистон Сироҷиддин Муҳриддин садо дод. Мулоқот дар шаҳри Остона гузашт.

Тоқаев гуфт, "Қазоқистон нисбат ба мардуми бародари тоҷик ҳисси вижае дорад. Кишварҳои мо ҳамеша якдигарро дастгирӣ мекарданд."

Вазири умури хориҷии Тоҷикистон, ки бо сафари расмӣ ба Қазоқистон рафтааст, низ равобити Душанбе ва Остонаро "наздику бародарона" хонд.

"Қазоқистон барои мо шарики муҳим аст ва дар ҳама бахшҳои ҳамкории дуҷониба ҳамдигарфаҳмии пурра вуҷуд дорад," -- гуфт Сироҷиддин Муҳриддин.

Қазоқистон шарики дувуми тиҷоратӣ-иқтисодии Тоҷикистон аст. Ду кишвар соле пеш ба нақша гирифтанд, ки додугирифтро ба ду миллиард доллар хоҳанд расонд. Тоҷикистон орду газу бензинро аз Қазоқистон меорад.

Қазоқистон баъд аз Русия кишвари дувуми муҳоҷирпазир аз Тоҷикистон аст. Бо афзоиши таъсири таҳримҳои байнулмилалӣ болои Русия ва коҳиши иқтисоди ин кишвар, баъзе аз муҳоҷирони тоҷик ба Қазоқистон рӯ оварданд. Онҳо асосан дар бозору сохтмон кор мекунанд.

Муҳоҷирон пештар аз он хушҳол буданд, ки дар муқоиса ба Русия, дар Қазоқистон таъқиби пулис ва бегонаситезӣ камтар аст. Ҳоло мегӯянд, вазъият ба Русия монанд мешавад.

Доналд Трамп, раисҷумҳури Амрико, рӯзи 11-уми феврал ӯро дар Кохи Сафед пазироӣ кард.

Трамп гуфт, ки Маскав рӯзи 12-уми феврал як амрикоии дигарро низ раҳо мекунад. “Фикр мекунам, ин метавонад як унсури бисёр муҳим, як қисми бузурги анҷоми ҷанг бошад,” – афзуд ӯ.

Марк Фогел гуфт, ки худро одами хушбахттарини рӯйи замин ҳис мекунад: "Мехоҳам ба Шумо расонам, ки ман қаҳрамон нестам. Президент Трамп қаҳрамон аст. Ин мақомдорони хадамоти дипломатӣ қаҳрамон ҳастанд. Вакилони мардумиву сенатороне, ки барои бозгардондану ҳимоят аз ман қонун қабул карданд, қаҳрамон ҳастанд. Ман аз ҳамаи онҳо қарздорам”

Фогел дар соли 2021-ум бо 17 грамм равғани бангдонаи ҳиндӣ дар фурудгоҳи Маскав дастгир шуда, бо ҷурми нигаҳдошт ва қочоқи маводи мухаддир ба муддати 14 сол аз озодӣ маҳрум шуд.

Вакили Фогел мегӯяд, истифодаи равғани бангдона барои табобат дар аёлати Пенсилвания иҷозат аст ва аз ин рӯ, номбурда бегуноҳ аст.

Раҳоии Фогел ба замоне рост омадааст, ки Трамп мехоҳад равобити Вашингтону Маскав беҳбуд ёбад.

Ӯ гуфт: "Русия муомилаи хуб нишон дод. Умедворам, ки ин як оғози эҳёи равобите хоҳад буд, ки ба мо имкон медиҳад, ҷангро хотима бахшем ва миллионҳо ҷавони дигар кушта нашаванд. Онҳо миллионҳо нафарро аз даст доданд. Онҳо дар як муддати кӯтоҳ эҳтимлан якуним миллион сарбозро аз даст додаанд. Мо бояд ин ҷангро боздорем!"

Гузориши видеоӣ дар инҷост:

Ҷунбиши ислоҳот ва рушд, қароргоҳаш дар Ҳолланд, интихоботро дар Тоҷикистон "раванди сохташуда" номид, ки "ҳадафи асосии он ҳифз ва қонунигардонии ҳокимияти худкома аст".

"Дар шароити нобудсозии пурраи ниҳодҳои демократӣ, набудани рақобати сиёсӣ ва саркӯби шадиди озодиҳои шаҳрвандӣ, ин намоишро наметавон як раванди интихоботии демократӣ номид," – гуфт Шарофиддин Гадоев, раиси Ҷунбиш, рӯзи 10-уми феврал.

Ба қавли ӯ, "интихоботе, ки бе рақобати воқеӣ, дар шароити сензураи комил, тарсонидани шаҳрвандон ва набудани назорати мустақил баргузор мегардад, қонунӣ ҳисобида намешавад."

Бори аввал нест, ки интихоботҳоро дар Тоҷикистон таҳрим мекунанд. Ҳизби сотсиал-демократ дар соли 2020 баргузории интихоботи президентиро ғайриқонунӣ номида, бойкот кард.

Интихоботи порлумонӣ дар Тоҷикистон дар панҷ сол як бор баргузор мешавад. Интихоби вакилон ин навбат дар рӯзи 2-юми марти имсол дар назар гирифта шудааст.

Шаш ҳизби сиёсии Тоҷикистон, ки яке ҳизби ҳоким ва боқимонда ошкоро сиёсати ҳукуматро ҷонибдорӣ мекунанд, номзадҳои худро барои ширкат дар интихобот пешбарӣ кардаанд. Ҳизби сотсиал-демократ на анҷуман баргузор кард, на номзаде пешниҳод намуд.

Дар ҳоли ҳозир аз 63 курсии порлумон 47 курсӣ дар ихтиёри Ҳизби ҳокими халқӣ-демократии Тоҷикистон қарор дорад. Ҳизби кишоварзӣ 7 курсӣ, коммунистӣ ду намоянда ва Ҳизби сотсиалист як курсӣ дорад. Ягона намояндаи Ҳизби демократ Саидҷаъфар Усмонзода буд, ки бо гуноҳи "талош барои табадуллоти давлатӣ" 27 сол зиндонӣ шуд.

Дар ин бора Бенямин Нетаняҳу, нахуствазири Исроил, рӯзи 11-уми феврал баъд аз ҷаласаи кобина изҳори назар кард.

Амрико ва Иттиҳоди Аврупо “Ҳамос”-ро созмони террористӣ медонанд.

Ба гузориши расонаҳои исроилӣ, дар доираи созиши оташбас, қарор буд гуруҳи “Ҳамос” рӯзи 15-уми феврал боз 9 асирро озод кунад.

“Ҳамос” рӯзи 10-уми феврал Исроилро ба нақзи созиши оташбас айбдор карда эълон кард, ки раванди раҳоии гаравгонҳоро бозмедорад.

Доналд Трамп, раисҷумҳури Амрико, ҳушдор дод, ки агар ҳамаи гаравгонҳои исроилӣ то нимрӯзи шанбеи ҳафтаи оянда озод нашаванд, созиши оташбас бекор хоҳад шуд.

Расонаи Ynet менависад, кобинаи Бенямин Нетаняҳу ин тасмими Доналд Трампро дастгирӣ кардааст.

Бар асоси созиши оташбас, ки нимаи дуюми моҳи январ оғоз шуд, қарор буд гурӯҳи “Ҳамос” 33 асири Исроилро озод кунад.

Дар иваз Исроил бояд ҳудуди 2 ҳазор зиндонии фаластиниро озод мекард. Марҳилаи аввали созиш барои 42 рӯз пешбинӣ шудааст.

Ба гузориши расонаҳои русӣ, ин мақомдори шаҳри Митиш ба он муттаҳам мешавад, ки асноди зодаи Тоҷикистон Таҳмина Самадоваро дуруст насанҷидааст. Азҷумла, ин мақомдорро ба он муттаҳам кардаанд, ки даромади Самадова ва ҳамчунин чигуна дар як ҳуҷра зиндагӣ кардани 13 нафарро тафтиш накардааст.

Рӯзи 13-уми январ ба Таҳмина Самадова, зодаи Тоҷикистон ва шаҳрванди Русия 24 миллион рубл маблағи хариди хона доданд. Ӯ модари ҳафт фарзанд аст. Аммо ин хабар дар Русия норозигии миллатгароёнро ба миён овард ва Таҳмина Самадоваро бо иттиҳоми қаллобӣ боздошт карданд. Бо сабаби ҳомила буданаш ӯро то поёни баррасии парванда озод кардаанд.

Таҳмина Самадова 14 сол боз шаҳрванди ин кишвар аст ва интизори тифли ҳаштум мебошад.

Ба навиштаи ин расона, аз сабаби зиёд будани шумори гумонбарон, ин эҳтимол вуҷуд дорад парванда дар додгоҳи сайёр баррасӣ шавад.

Мақомоти Русия дар бораи кай ва дар куҷо баргузор шудани додгоҳи гумонбарони ҳамла ба "Крокус" расман чизе нагуфтаанд.

ТАСС навиштааст, мурофиа дар яке аз додгоҳҳои ҳарбии минтақаи ғарбӣ баррасӣ хоҳад шуд.

Таҳқиқи ин қазияи хунин аввали моҳи феврал ба анҷом расида, ба навиштаи расонаҳои русӣ, қарор аст моҳи март ба додгоҳ равад.

Ҳамлаи маргбор ба “Крокус” рӯзи 22-юми марти соли 2024 дар наздикии Маскав рӯй дод. Даҳҳо кас куштаву захмӣ шуданд. Ба гумони нақшарезии ҳамла, иҷро ва кумак ба он зиёда аз бист тан, асосан зодагони Тоҷикистон, дар боздошт ҳастанд.

Чор гумонбари асосӣ Муҳаммадсобир Файзов, Далерҷон Мирзоев, Фаридуни Шамсиддин ва Саидакрам Раҷабализода шаҳрвандони Тоҷикистон ҳастанд.

Аммо шиканҷаи ин афрод дар рӯзҳои аввали боздошт нигаронии ҳомиёни ҳуқуқ ва мақомоти Тоҷикистон ба миён овард, аммо ҳеч таҳқиқе анҷом нашуд.

Баъди ҳамлаи маргбор ба толори консертии "Крокус" ихроҷи муҳоҷирон аз он кишвар бисёр зиёд шуд.

Мақомоти Тоҷикистон ҳам эътироф мекунанд, ки баъд аз ҳодисаи "Крокус", мавридҳои нақзи ҳуқуқи шаҳрвандони кишвар дар қаламрави Русия бештар шудааст.

Ҳар сол садҳо ҳазор шаҳрванди Тоҷикистон дар ҷустуҷӯйи кору маоши муносиб ба Русия ва кишварҳои дигар мераванд.

Пули фиристодаи онҳо барои иқтисоди оилаҳо муҳим дониста мешавад, вале мақомоти Тоҷикистон солҳои охир маблағи интиқолии онҳоро ошкор намекунанд.

Ба гуфтаи Султон Раҳимзода, бахши асосии сармояи хориҷӣ ё 81 дарсади он ба бахшҳои коркард ва истихроҷи маъданҳои куҳӣ рост меояд.

Ин мақомдори тоҷик афзуд, Чин, Иёлоти Муттаҳидаи Амрико, Британияи Кабир, Русия ва Қазоқистон аз сармоягузорони асосӣ ба иқтисоди Тоҷикистон дар соли гузашта будаанд.

Раиси Кумитаи сармоягузорӣ афзуд, ҳукумат талош дорад шароити сармоягузорӣ дар кишвар беҳтар шавад. Манъ шудани санҷиши соҳибкорон то соли 2027 ба гуфтаи Султон Раҳимзода, яке аз ин иқдомҳо мебошад.

Вале сармоягузорон пештар аз шароити кор дар Тоҷикистон аз ҷумла, андозҳои баланд, шикоят карда буданд. Айни ин шикоятҳо аз забони сафирони пешини Иттиҳоди Аврупо ва Русия дар Душанбе садо дода буд.

Антонио Гутерриш рӯзи сешанбе дар баёнияе гуфт, аз саргирии хусуматҳо, ки сабаби фоҷиаи бузург хоҳад шуд, бояд пешгирӣ шавад.

Гурӯҳи фаластинии “Ҳамос” рӯзи 10-уми феврал эълон кард, ки раванди раҳоии гаравгонҳоро бозмедорад.

Намояндагони ин гурӯҳ мақомоти Исроилро ба поймоли созиши оташбас дар Ғазза муттаҳам карданд.

Доналд Трамп, раисҷумҳури Амрико, ҳушдор дод, ки агар ҳамаи гаравгонҳои исроилӣ то нимрӯзи шанбеи ҳафтаи оянда озод нашаванд, созиши оташбас бекор хоҳад шуд.

"Ҳамос" рӯзи 7-уми октябри соли 2023 дар ҳамлае ба Исроил беш аз 1200 касро кушт ва зиёда аз 200 нафарро ба гарав гирифт. То ин дам теъдоде аз онҳо озод карда шудаанд.

Дар ҳамлаҳои Исроил ҳудуди 47 ҳазор фаластинӣ кушта ва даҳҳо ҳазори дигар захмӣ шуданд.

Ҷанги ду тараф понздаҳ моҳ давом кард.

САҲА рӯзи 4-уми феврал дар эъломияе гуфт, "набудани кафолат аз ҷониби мақомоти Тоҷикистон дар бораи сабтином ё аккредитатсияи нозирон" боис шуд, ки аз назорати интихоботи моҳи март даст кашад.

Сироҷиддин Муҳриддин рӯзи 11-уми феврал нозирони ин созмонро ба вайрон кардани муқаррароти интихобот ва хатари ба вуҷуд овардани шарҳи нодурусти вазъияти дохилии Тоҷикистон муттаҳам кард.

"Сабтиноми ҳамаи мушоҳидон то 10-уми феврал давом кард. Фақат гурӯҳи Дафтари ниҳодҳои демкоратӣ ва ҳуқуқи инсони САҲА аз пеши худ таърихҳои дигарро барои сабтином пешниҳод карданд. Онҳо хостанд, ки қонунгузории моро вайрон кунанд. Пешниҳод карданд, ки онҳоро то 31-уми январ сабтином кунанд. Азбаски КМИР тартибу қоидаи худашро дорад, натавонистем онҳоро то 31-уми январ ба қайд гирем," – гуфт вазир.

Ӯ афзуд, нозирон сипас таърихи дуюмро пешниҳод карданд: “То 3-юми феврал ҳам мо ин корро карда натавонистем. Онҳо гашта ба Вена рафтанд ва дар он ҷо Шӯрои доимии Вена/САҲА-ро даъват карданду хостанд, ҳамин масъалаи иштироки онҳоро аз нуқтаи назари манфӣ ба тамоми аъзои созмон расонанд."

Мария Телалян, роҳбари Дафтари ниҳодҳои демократӣ ва ҳуқуқи инсон дар баёнияи 4-уми феврал гуфтааст, "набудани кафолати расмӣ дар бораи он ки нозирони мо метавонанд як моҳ қабл аз интихобот кори худро анҷом диҳанд", як сабаби худдории ин созмон аз назорати ҷараёни интихобот дар Тоҷикистон шуд.

Сироҷиддин Муҳриддин Дафтари ниҳодҳои демократии САҲА-ро ба он муттаҳам кард, ки ҳайати арзёбии ниёзҳои ин ниҳод дар гузорише вазъияти дохилии Тоҷикистонро беасос ва яктарафа арзёбӣ кардаанд.

"Ҳамзамон бояд гуфт, ки дар ин гузориш масъалаҳое қайд гардидаанд, ки ба интихобот ва рафти омодагии он рабте надоранд. Чунин муносибат хавфи ба вуҷуд овардани шарҳи нодурусти вазъияти дохилиро ба бор меорад. Ба замми ин дар гузориш аз иқдоми мусбати мақомоти давлатӣ барои таҳкими субот ва рушди кишвар чизе зикр нашудааст," -- гуфт вазири корҳои хориҷии Тоҷикистон.

Интихоботи порлумонии Тоҷикистон 2-юми марти имсол баргузор мешавад. 63 узви Маҷлиси намояндагон дар Тоҷикистон дар панҷ сол як дафъа интихоб мешаванд. Дар ҳоли ҳозир аксар курсиҳои порлумонро ҳизби ҳокими халқӣ-демократӣ дар ихтиёр дорад.

Ҳизбҳои аграрӣ ва ислоҳоти иқтисодӣ мутаносибан бо доштани 7 ва 5 вакил фраксияи худро дар порлумон ташкил додаанд. Ҳизби коммунист ду вакил ва ҳизбҳои сотсиалистиву демократии Тоҷикистон яктоӣ курсӣ доранд.

Нозирони САҲА дар ҳоле аз мушоҳидаи интихобот даст кашиданд, ки муносибатҳои Тоҷикистон ва ин созмон дар солҳои охир бино бар ширкати мухолифони ҳукумат дар ҳамоишҳои он ба сардӣ гароидаанд.

Ин оморро Имматшо Нодирзода, сардори Хадамоти муҳоҷирати Тоҷикистон, рӯзи 11-уми феврал дар нишасти матбуотӣ ба хабарнигорон дод. Вале на ӯ ва на вазири кору муҳоҷират посух надоданд, ки чӣ теъдод аз онҳо ихроҷ шуда, чӣ қадар ихтиёрӣ бозгаштанд.

Солеҳа Холмаҳмадзода, вазири кор ва муҳоҷирати Тоҷикистон, танҳо ҳаминро гуфт, ки “вобаста аз дигаргуниҳо дар қонунҳои Русия” бозгашти муҳоҷирон ба ватан бештар шуд.

Баъд аз ҳамлаи шаби 22-юми марти соли 2024 ба толори “Крокус” дар наздикии Маскав шикояти муҳоҷирон аз санҷишу тафтиш ва ихроҷашон аз қаламарави Русия бештар гардид.

Мақомоти қудратии Русия зиёда аз 20 нафар, асосан зодагони Тоҷикистонро бо гумони тарҳрезӣ, иҷро ва ёрӣ дар ин ҳамла боздошт карданд. Баъзе аз онҳо худро бегуноҳ дониста, хоҳони бозбинии парванда шуданд, вале посухи рад гирифтанд.

Ҳарчанд муносибати дағал, санҷишҳои пайиҳам, маъракаҳои иттилоотии зидди муҳоҷирон дар Русия то моҳи марти соли 2024 низ ҷой дошт, баъд аз он бештар шуд.

Думаи давлатии Русия дар соли 2024 даҳҳо қарору қонунро қабул кард, ки ба истилоҳ зидди муҳоҷирон равона шуда буданд.

Сода кардани ихроҷи муҳоҷирон, сахттар кардани имтиҳони забони русӣ ва маҳдуд кардани қабули фарзандони муҳоҷирон ба мактабҳои Русия аз ҷумлаи онҳост.

Ба гуфтаи раиси Кумитаи сармоягузорӣ, Амрико дар ин нома аз ҳукумати Тоҷикистон пурсидааст, ки дар баробари ширкатҳои русӣ, ки таҳрим шудаанд, чӣ корҳо анҷом медиҳад.

Раҳимзода ҷузъиёти номаро ошкор накарда, танҳо гуфт, "мақомот онро баррасӣ доранд".

Баъд аз оғози ҷанги Русия дар хоки Украина, Амрико ва Иттиҳоди Аврупо алайҳи ширкатҳои русӣ таҳримҳои сахт ҷорӣ карданд. Намунаи охираш таҳрими ширкати "Газпромнефт" аст, ки намояндагияш дар Тоҷикистон ҳам фаъолият дорад.

Хабарнигори Радиои Озодӣ рӯзи 11-уми феврал ҳангоми нишасти хабарӣ аз раиси Кумитаи давлатии сармоягузорӣ пурсид, ки баъд аз таҳрими Амрико, кори ширкати "Газпромнефт" дар Тоҷикистон чӣ мешавад? Султон Раҳимзода дар ин бора ҳеч шарҳи мушаххас надод ва танҳо ишора кард, ки ин соли аввал нест, ки ширкатҳои русӣ таҳрим мешаванд.

Бештар аз 80 дарсади бензину газро Тоҷикистон аз “Газпромнефт” мехарад ва танҳо дар 6 моҳи соли гузашта аз он 451 ҳазор тонна сӯзишворӣ гирифтааст. Нигаронӣ ҳам аз он аст, ки таҳримҳои Амрико агар маҷрои газу бензини русиро ба Тоҷикистон набандад ҳам, эҳтимол камтар кунад.

Дар ин бора Муҳаммад Ғуломзода, масъули Шабакаҳои тақсими барқ, рӯзи 11-уми феврал хабар дод.

Қарзи ин корхонаи воқеъ дар шаҳри Турсунзода то моҳи январи соли 2024 зиёда аз 351 миллион сомониро ташкил медод.

Напардохтани пули барқ аз ҷониби корхонаи “Талко” дар ҳолест, ки ин ширкат аз имтиёз бархурдор аст. Он нерӯи барқро нисбат ба корхонаҳои дигари саноатӣ ва аҳолӣ арзон дастрас мекунад.

Арзиши як киловат/соат нерӯи барқ барои корхонаҳои дигари саноатӣ 70,35 дирам, барои аҳолӣ 30,75 дирам, вале барои корхонаи “Талко” 18,6 дирам пешбинӣ шудааст.

Чанд рӯз қабл намояндагони Хадамоти зидиинҳисории Тоҷикистон ҳам гуфта буданд, ки эҳтимол имсол нархи истифодаи нерӯи барқ дар кишвар боло меравад.

Маҳмадумар Асозода, раиси ширкати "Барқи тоҷик" рӯзи 11-уми феврал зимни нишасти хабарӣ ба пурсишҳои батакрори Радиои Озодӣ дар бораи ва аз кай ва чӣ қадар гарони шудани қимати барқ посухи дақиқ надод ва танҳо гуфт, ки ин амр дар салоҳияти ҳукумат аст.

Аз ин пеш, Сафаралӣ Қурбонзода, муовини аввали раиси Хадамоти зиддиинҳисории Тоҷикистон гуфта буд, ки пешниҳод барои боло бурдани арзиши барқ ба ҳукумат ирсол шудааст.

Ба гуфтаи ин масъули Хадамоти зиддиинҳисорӣ, нархи ниҳоии барқ "пас аз ҳисоб кардани хидматрасониҳои истеҳсол, интиқол ва тақсимоти барқ маълум мешавад".

Бори ахир нерӯи барқ моҳи январи соли 2024 гарон шуда буд. Аз он вақт сокинони Тоҷикистон барои ҳар киловат барқ 30,75 ва корхонаҳо 70,35 дирам месупоранд.

Корхонаҳои “Талко”, Комбинати металлургии Тоҷикистон ва корхонаи нуриҳои "Азот" нархи барқро аз дигар корхонаҳо арзонтар мегиранд.

“Талко” давлатӣ аст ва Комбинати металлургии Тоҷикистон тибқи ҳуҷҷатҳои Кумитаи андоз, аз сӯи “Фароз” таъсис ёфтааст. Намояндагони Комбинати металлургии Тоҷикистон борҳо гуфтаанд, ки ба ширкати “Фароз” ягон робита надоранд. Соҳиби корхонаи “Азот” маълум нест.

Семен Григорев дар мусоҳиба бо хабаргузории русии ТАСС гуфтааст, мақомоти қудратӣ ва амниятии Тоҷикистон ба дархостҳои ҳамтоёнашон аз Русия дар бораи таҳқиқи ҳодисаи "Крокус" фавран вокуниш карданд.

Аммо Сафири Русия ҷузъиёти ҳамкории мақомоти қудратии Тоҷикистон ва Русияро ифшо накардааст. Семен Григорев танҳо гуфтааст, ки тамосҳои ду кишвар дар ин бахш идома доранд.

Ҳанӯз маълум нест, ки ҳамкории мақомоти Тоҷикистон бо Русия дар робита ба қазияи "Крокус" аз чӣ иборат буд. Вале наздикони бархе аз гумонбарони ин ҳамла дар Тоҷикистон пештар ба Радиои Озодӣ гуфтанд, муфаттишони рус бо онҳо дар Душанбе суҳбат кардаанд.

Изҳороти ахири Сафорати Русия дар ҳоле садо дод, ки таҳқиқи ҳамлаи хунин ба толори консертии "Крокус" ба анҷом расида, қарор аст парванда моҳи март ба додгоҳ равад.

Ба гумони нақшарезӣ ва кӯмак ба ҳамлаи рӯзи 22-юми марти соли гузашта ба толори "Крокус" зиёда аз бист тан, асосан зодагони Тоҷикистон, дар боздошт ҳастанд.

Чор нафари онҳо омилони асосӣ муаррифӣ шуда, дар рӯзҳои аввали боздошт бо гӯши нимбурида, беҳушу беҳаракат ва порчае аз селофан дар гардан дар додгоҳ дида шуданд.

Тибқи омори расмӣ, соли 2024 дар Тоҷикистон 9 ҳазор оила аз ҳам ҷудо шудаанд, ки назар ба як соли пеш ҳазор адад камтар будааст.

Ба гуфтаи мақомот, соли гузашта 75 ҳазор ақди никоҳ дар кишвар сабти ном шудааст, ки дар қиёс ба соле пеш ҳазор адад камтар аст.

Бунафша Файзиддинзода, раиси Кумитаи занон гуфт, издивоҷҳои бармаҳал ва омода набудани духтарон ба зиндагии мустақилона, аз сабабҳои асосии ҷудошавии оилаҳо дар Тоҷикистон аст.

Пошхӯрии оилаҳо ва маҳрум шудани фарзандон аз тарбияи яке аз волидайн солҳост, ки аз мавзуъҳои нигаронкунанда дар ҷомеаи Тоҷикистон аст.

Мақомот гуфтанд, пули ҷоизаҳо, ки аз Фонди захиравии президент ҷудо шудааст ва 1 миллиону 787 ҳазору 500 сомонӣ (қариб 164 ҳазор доллар)-ро ташкил медиҳад, барои қадршиносии 46 нафар ғолибон ва ҷоизадорони мусобиқаҳои байналмилалии варзишӣ ва мураббиёни онҳо ҷудо гардидааст.

Зимнан, ҷоизаи президенти Тоҷикистон соли 2015 таъсис ёфтааст ва бори нӯҳум аст, ки ба ғолибону ҷоизадорони мусобиқаҳои байналмилалӣ ва мураббиёни онҳо супурда мешавад.

То ин давра ба 370 нафар ғолибону ҷоизадорони мусобиқаҳои сатҳи байналмилалӣ аз фонди захиравии президенти Тоҷикистон 8 миллиону 250 ҳазор сомонӣ мукофотпулӣ ҷудо гардида, дар вазъияти тантанавӣ тақдим карда шудааст.

Мутобиқи қарори Ҳукумати Тоҷикистон ба варзишгарон барои медали тиллои Бозиҳои олимпӣ 300 ҳазор сомонӣ, барои медали нуқра 250 ҳазор сомонӣ ва барои медали биринҷӣ 200 ҳазор сомонӣ супурда мешавад.

Дар ин қарор, инчунин, ҳаҷми маблағи мукофотпулӣ ба ғолибону ҷоизадорони мусобиқаҳои қаҳрамонии ҷаҳону Осиё ва Бозиҳои осиёӣ муқаррар шудааст.

Се медали варзишгарони тоҷик дар Бозиҳои XXXIII тобистонаи олимпӣ, ки аз 26-уми июл то 11-уми августи соли 2024 дар шаҳри Пориси Фаронса баргузор шуданд, натиҷаи беҳтарини варзиши тоҷик дар соли 2024 мебошад.

Дар Олимпиадаи Порис-2024 аз 14 варзишгари тоҷик се нафар – Сомон Маҳмадбеков (-81 кг), Темур Раҳимов (+100 кг), ҳарду дар риштаи ҷудо, Давлат Болтаев (-92 кг) дар риштаи бокс - бо медалҳои биринҷӣ сарфароз гаштанд.

Варзишгарони тоҷик соли гузашта дар ду ришта - ҷудо ва гуштии озод - дар қаҳрамонии ҷаҳон пас аз 17 сол медал ба даст оварданд. Сомон Маҳмадбеков дар мусобиқаи қаҳрамонии ҷудои ҷаҳон дар вазни то 81 кило дар шаҳри Абузабии Имороти Муттаҳидаи Арабӣ барандаи медали биринҷӣ гардид.

Бояд зикр намуд, ки ин дуюмин медал дар таърихи ҷудои тоҷик дар қаҳрамонии ҷаҳон ба шумор меравад. Аввалин медалро дар ин мусобиқот Расул Боқиев соли 2007 дар шаҳри Рио-де-Жанейрои Бразилия ба даст овардааст. Вай дар вазни то 73 кило бо медали биринҷӣ сарфароз шуда буд.

Абдулмаҷид Кудиев моҳи октябри соли гузашта дар мусобиқаи қаҳрамонии ҷаҳон дар риштаи гуштии озод дар вазни то 70 кило дар шаҳри Тиранаи Албания медали биринҷӣ гирифт. Қаблан, Юсуф Абдусаломов соли 2007 дар қаҳрамонии ҷаҳон дар риштаи гуштии озод дар вазни то 84 кило дар шаҳри Бокуи Озарбойҷон соҳиби медали нуқра шуда буд.

Вале варзишгарони тоҷик соли 2024 натавонистанд дар қаҳрамонии ҷаҳон дар навъҳои олимпӣ медалҳои тиллою нуқра ба даст биёранд. Зимнан, пас аз пирӯзии гурзандози машҳури тоҷик Андрей Абдувалиев дар қаҳрамонии ҷаҳон соли 1995 дар шаҳри Ҳётеборги Шведсия, то ҳоло касе аз Тоҷикистон дар навъҳои олимпии варзиш медали тилло нагирифтааст.

Ҳамчунин баъди он ки гурзандоз Дилшод Назаров соли 2015 дар қаҳрамонии ҷаҳон дар Пекини Чин медали нуқра гирифт, варзишгарони тоҷик дар муддати қариб даҳ сол дар риштаҳои олимпӣ ба чунин натиҷа даст наёфтаанд.

Акмал Убайдов дар мусобиқаи қаҳрамонии бокси Осиё, ки аз 28-уми ноябр то 11-уми декабр дар шаҳри Чиангмайи Тайланд доир гардид, дар вазни то 60 кило мақоми аввалро касб намуд. Вай пас аз панҷ сол барои Тоҷикистон аз қаҳрамонии бокси Осиё медали тилло овард. Охирин маротиба Баҳодур Усмонов соли 2019 дар қаҳрамонии Осиё соҳиби медали тилло шуда буд.

Ҷоизаи президенти Тоҷикистон ба ғолибон ва ҷоизадорони мусобиқаҳои байналмилалии варзишӣ дар соли 2024 дар як маросими ботантана, ки онро рӯзҳои наздик Кумитаи кор бо ҷавонон ва варзиши Тоҷикистон ташкил мекунад, супурда хоҳад шуд.

Ба иттилои Федератсияи футболи Тоҷикистон, дар чаҳорумин мусобиқаи қаҳрамонии CAFA-2025 байни занон дастаҳои мунтахаби футзали Қирғизистон, Тоҷикистон, Туркманистон, Узбекистон ва Эрон ширкат дорзанд.

Мусобиқа аз рӯйи системи даврӣ дар як давра баргузор мешавад. Ҳамаи бозиҳо дар Қасри теннис ва маҷмааи варзишҳои обии Душанбе доир мегарданд.

Аввалин бозии мусобиқаи имсола миёни дастаҳои мунтахаби занонаи футзали Туркманистон ва Қирғизистон бо ҳисоби мусовии 1:1 ба поён расид. Дар бозии дигари даври якум тими миллии Эрон дастаи мунтахаби Узбекистонро бо ҳисоби бузурги 9:0 шикаст дод.

Дастаи мунтахаби Тоҷикистон, ки дар даври аввали мусобиқа озод буд, нахустин бозии худро дар қаҳрамонии CAFA-2025 бо тими Қирғизистон анҷом медиҳад. Ин дидор рӯзи душанбеи 10-уми феврал баргузор мешавад.

Баъдан занони футзалбози тоҷик 12-уми феврал бо мунтахаби Туркманистон, 14-уми феврал бо дастаи Узбекистон ва 16-уми феврал бо тими Эрон рақобат мекунанд.

Бояд гуфт, дар се мусобиқаи пешин (Душанбе - 2022, Тошканд - 2023 ва Душанбе - 2024), ки панҷ дастаи мунтахаби занонаи минтақа –Қирғизистон, Тоҷикистон, Туркманистон, Узбекистон ва Эрон – иштирок доштанд, бонувони эронӣ пирӯз шудаанд. Натиҷаи беҳтарини мунтахаби Тоҷикистон дар ин мусобиқа медалҳои биринҷӣ дар соли 2023 дар Тошканд мебошад.

Мусобиқаи қаҳрамонии футзали CAFA-2025 байни дастаҳои мунтахаби занона

Иштироккунандагон:

Қирғизистон

Тоҷикистон

Туркманистон

Узбекистон

Эрон

Даври якум

9-уми феврал (якшанбе)

Туркманистон – Қирғизистон – 1:1

Узбекистон – Эрон – 0:9

Даври дуюм

10-уми феврал (душанбе)

16:00 – Туркманистон - Узбекистон

19:00 – Қирғизистон – Тоҷикистон

Даври сеюм

12-уми феврал (чоршанбе)

16:00 – Эрон - Қирғизистон

19:00 – Тоҷикистон – Туркманистон

Даври чаҳорум

14-уми феврал (ҷумъа)

16:00 – Эрон - Туркманистон

19:00 – Узбекистон – Тоҷикистон

Даври панҷум

16-уми феврал (якшанбе)

16:00 – Қирғизистон - Узбекистон

19:00 – Тоҷикистон – Эрон