KFOR-i heton të shtënat afër patrullës në Zubin Potok
Misioni i NATO-s në Kosovë, KFOR, ka bërë të ditur se është duke e hetuar atë që e ka quajtur “incident jodirekt zjarri” më 25 dhjetor, kur u raportua për të shtëna afër një patrulle të KFOR-it në Zubin Potok - njëra nga katër komunat e banuar me shumicë serbe në veri të Kosovës.
KFOR-i e kishte konfirmuar këtë incident mbrëmjen e së dielës, ndërsa të hënën ritheksoi se nuk ka pasur të lënduar ose dëme materiale.
“Incidenti përfshinte persona të panjohur të armatosur në zonën e Zubin Potokut. Nuk ka lëndime apo dëme materiale dhe ne po punojmë për t’i vërtetuar të gjitha faktet”, thuhet në njoftimin e KFOR-it.
Mediat serbe raportuan të dielën se rreth orës 19:45 ishin dëgjuar shkëmbime zjarri në Zubin Potok, dhe se të shtënat kanë ndodhur pasi Policia e Kosovës "ka dashur të heqë njërën nga barrikadat" në këtë komunë në veri të Kosovës. Policia e Kosovës ka demantuar këto raportime të mediave serbe se ka qenë e përfshirë në shkëmbim zjarri në Zubin Potok.
Lajmin e plotë mund ta lexoni KËTU
MPJD i vendos kushte Porfirijes për vizitën në Kosovë
Kreut të Kishës Ortodokse serbe, patriarkut Porfirije i është kërkuar që të dënojë apo distancohet nga “veprimet e pjesëtarëve të Kishës që po i ofrojnë përkrahje grupeve kriminale në veri të Kosovës” të cilët janë “përgjegjës për barrikadat” e ngritura në atë pjesë.
Kështu thanë nga Ministria e Punëve të Jashtme dhe Diasporës të Kosovës, që treguan se Porfirije ka bërë kërkesë më 23 dhjetor që të qëndrojë në Kosovë për tri ditë (26-28 dhjetor).
“Pra, kërkesa për vizitë e Patriarkut Porfirije nuk është refuzuar siç po propagandohet nga Kisha Ortodokse Serbe [KOS] dhe mediat serbe, por është ndërlidhur me deklaratën paraprake të distancimit nga veprimet dhe aktet e lartpërmendura”, thuhet në njoftim.
Lajmi i plotë:
AGK: Një ekip gazetarësh është sulmuar në veri
Asociacioni i Gazetarëve të Kosovës tha se është njoftuar se më 26 dhjetor ka ndodhur “një tjetër sulm i rëndë” ndaj gazetarëve që po raportojnë nga veri i Kosovës.
Sipas AGK-së, ekipi i Klan Kosovës është sulmuar me gurë në fshatin Zupç të Zubin Potok nga “persona të maskuar”.
“Ekipi i përbërë nga gazetarët Qëndresa Bellagoshi, Drin Demiri, kameramani Agon Bejtullahu dhe shoferi Elsad Sinani, janë sulmuar sot në fshatin Zupç. Gazetarja Bellagoshi dhe shoferi Sinani kanë marrë trajtim mjekësor, pasi që xhamat e veturës së thyer nga gurët i kanë goditur në fytyrë. Teksa, Demiri dhe Bejtullahu kanë shpëtuar pa lëndime”, thuhet në njoftim.
AGK-ja tha se për sulmin është njoftuar edhe Policia e Kosovës. Megjithatë, nga Policia e Kosovës nuk i janë përgjigjur interesimit të Radios Evropa e Lirë për ta konfirmuar rastin dhe për të marrë detaje të tjera.
“Sulmet e vazhdueshme përbëjnë kërcënim serioz për sigurinë e gazetarëve dhe pengojnë raportimin për zhvillimet në veri”, tha AKG-ja.
Disa nga gazetarët që po raportojnë nga veriu i Kosovës, ku disa serbë lokalë kanë ngritur barrikada, kanë thënë më herët për REL-in se nuk kanë mbrojtje të duhur gjatë raportimit.
BE dënon sulmin ndaj ekipit të gazetarëve
Zyra e Bashkimit Evropian në Kosovë ka dënuar sulmin ndaj një ekipi gazetarësh në Zubin Potok dhe u ka uruar atyre “shërim të shpejtë”.
“Ky dhe incidentet e mëparshme që e ndikojnë punën e mediave janë të papranueshme. Mediat kanë çdo të drejtë të raportojnë. Siguria e tyre nuk duhet të rrezikohet”, tha BE-ja.
Asociacioni i Gazetarëve të Kosovës tha se ekipi i Klan Kosovës u sulmua me gurë gjatë raportimit nga fshati Zupç i Zubin Potokut.