Kurti për largimin e barrikadave: Vetë i vunë, vetë i hoqën

Policia e Kosovës ka thënë se nuk qëndrojnë informacionet e disa mediumeve se autoritetet kanë ndaluar autobusë me protestues që ishin nisur drejt protestës që u mbajt në Rudarë të Zveçanit.

“Gjatë realizimit të detyrave dhe autorizimeve ligjore në funksion të garantimit të ligjit dhe sigurisë, një autobus është ndaluar sipas procedurave të kontrollit rutinor dhe gjatë verifikimit të dokumenteve disa persona nuk kanë pranuar të legjitimohen nga autoritetet kompetente, prandaj në mënyrë vullnetare [me vetë dëshirë] nuk kanë vazhduar tutje”, u tha në njoftimin e Policisë.

Sipas autoriteteve të rendit, protesta ka përfunduar pa ndonjë incident dhe në të “kanë marrë pjesë rreth 1.500 pjesëmarrës”.

Kryetari i Listës Serbe, Goran Rakiq, gjatë protestës paraqiti disa kërkesa për largimin e barrikadave që disa serbë lokalë kanë ngritur në veri të Kosovës që nga 10 dhjetori.

Ai tha se lirimi i serbëve të arrestuar, tërheqja e “listave sekrete për arrestimin dhe pushkatimin e serbëve” dhe tërheqja e njësive speciale të Policisë së Kosovës janë kërkesat e protestuesve.

Autoritetet në Kosovë më herët kanë demantuar pretendimet e Listës Serbe se ka lista për arrestim të serbëve dhe po ashtu kanë thënë se në veri janë dërguar policë të rendit, e jo njësitë speciale.

Barrikadat në veri u ngritën pas arrestimit të ish-policit serb të Kosovës, Dejan Pantiq. Autoritetet në Kosovë dyshojnë se Pantiq ka organizuar sulmin e 6 dhjetorit ndaj zyrtarëve të Komisionit Qendror të Zgjedhjeve në veri.

Situata në Kosovë është e paqëndrueshme dhe se Serbia ende po pret përgjigjen e KFOR-it sa i përket dislokimit të ushtarëve serbë, tha më 22 dhjetor sekretari i Shtetit në Ministrinë e Mbrojtjes së Serbisë, Nemanja Staroviq.

Këto deklarata ai i bëri për mediat e huaja në Beograd, në ditën e 13-të që kur disa serbë lokalë kanë ngritur në veri të Kosovës, dhe një ditë pasi kryeministrja serbe, Ana Bërbaniq, tha se situata është “në prag të konfliktit të armatosur”.

I pyetur nga gazetarët për vlerësimin e Ministrisë së Mbrojtjes serbe nëse situata është në prag të një konflikti të armatosur, Staroviq tha:

“Ne jemi shumë të kujdesshëm me fjalët që përdorim dhe gjithmonë bëjmë përpjekje që të përdorim një gjuhë të paqes për shkak të përgjegjësisë që kemi. Në anën tjetër, unë i kuptoj plotësisht deklaratat e dhëna nga kryeministrja serbe [Ana Bërnabiq] dhe nga presidenti [Aleksandar Vuçiq]”.

*Lajmin e plotë mund ta lexoni KËTU

Qindra qytetarë serbë nga pjesë të ndryshme të Kosovës u mblodhën të enjten në veri të vendit, duke parashtruar një varg kërkesash për heqjen e barrikadave të ngritura në këtë zonë. Protesta u thirr nga i ashtuquajturi Shtab i krizave, i cili përbëhet nga punonjës të institucioneve të Serbisë në Kosovë dhe përfaqësues të partisë më të madhe të serbëve, Lista Serbe. Disa qytetarë të anketuar nga REL-i, thanë se janë të privuar nga të drejtat e tyre; të tjerë thanë se nuk e kanë idenë se përse protestojnë.

Ministri i Punëve të Brendshme të Kosovës, Xhelal Sveçla, tha se situata e sigurisë në veri të Kosovës është rënduar.

Andaj ai tha se po presin që KFOR-i të veprojë sa më shpejt, por shtoi se nëse kjo nuk ndodh, Kosova do t’i heqë vetë barrikadat.

“Ata [KFOR] kanë kërkuar një kohë që ata vetë të bëjnë largimin e barrikadave. Ne tani po presim që atë angazhimin e tyre ta realizojnë. Por pasi janë bërë 13 ditë dhe ne kemi policë të bllokuar në Jarinjë dhe Bërnjak, ditët që po numërohen, po u vije fundi. Besoj që KFOR-i dhe faktori ndërkombëtar po angazhohen që këtë ta bëjnë sa më shpejt. Por, për hir të një stabiliteti më të madh, ne po presim që kjo të bëhet nga vetë ata që kanë vendosur barrikadat apo KFOR-i. Por, pritja e ka fundin e saj”, tha Sveçla.

*Lajmin e plotë mund ta lexoni KËTU