Protestë në Rudarë
Në fshatin Rudarë, Komuna e Zveçanit, qytetarët serbë pritet të protestojnë kundër, siç thanë, “kërcënimeve” të kryeministrit të Kosovës, Albin Kurti. Në këtë vend, i cili në mesin e komunitetin lokal serb njihet edhe si “Te kryqi”, ndodhet një prej barrikadave të ngritura në veri të Kosovës qysh më 10 dhjetor.
Policia e Kosovës, nëpërmjet një komunikate për media, i ftoi qytetarët që “të kenë vëmendje dhe kujdes të shtuar” gjatë protestës.
Sipas paralajmërimeve të mëhershme, të mbledhurit në protestë pritet t’i kundërshtojnë “ultimatumet dhe afatet” për heqjen e barrikadave.
Nga 10 dhjetori, grupe të serbëve në veri të Kosovës kanë ngritur barrikada në rrugët që çojnë drejt vendkalimeve kufitare me Serbinë, Jarinjë dhe Bërnjak.
Me këtë veprim, ata i janë përgjigjur arrestimit të ish-policit serb, Dejan Pantiq, i dyshuar për një sulm kundër zyrtarëve të Komisionit Qendror të Zgjedhjeve në veri.
Për heqjen e barrikadave, ata kërkojnë lirimin e Pantiqit.
EULEX-i shton praninë në veri
Misioni Evropian për Sundim të Ligjit, EULEX, ka njoftuar se është duke monitoruar situatën e sigurisë në pjesën veriore të Kosovës.
“Ne jemi duke monitoruar nga afër situatën e sigurisë në pjesën veriore të Kosovës përmes pranisë sonë të shtuar në terren”, ka thënë EULEX-i, nëpërmjet një njoftimi për media.
EULEX-i më tej ka shtuar se njësitet e specializuara të këtij misioni janë duke kryer patrullime vëzhguese, përfshirë patrullimet në këmbë në Mitrovicën Veriore dhe Zveçan.
Çfarë e nxiti protestën e serbëve në veri?
Një intervistë që kryeministri i Kosovës, Albin Kurti dha për The Guardian nxiti reagime të shumta të pjesëtarëve të komunitetit serb në Kosovë. Por çfarë tha Kurti për largimin e barrikadave dhe si e interpretuan serbët deklaratën e tij?
Në tekstin e mëposhtëm mund të lexoni një verifikim se çfarë thanë Kurti e Rakiq për “viktimat” në veri?
Fotografitë e para nga protesta në veri
Ekipi i Radios Evropa e Lirë është duke përcjellë protestën e qytetarëve serbë në veri dhe sjell këto fotografi nga terreni.
