Kurti për largimin e barrikadave: Vetë i vunë, vetë i hoqën

Pas takimit me presidentin serb, Aleksandar Vuçiq, i dërguari i Shteteve të Bashkuara për Ballkanin Perëndimor, Gabriel Escobar, ka takuar të mërkurën në Beograd edhe kryeministren e Serbisë, Ana Bërnabiq.

Sipas zyrës së Bërnabiqit, ajo e ka konsideruar me rëndësi "zbatimin e marrëveshjeve të nënshkruara tashmë dhe zbatimin e tyre në teren".

Sipas zyrës së saj, Bërnabiq e ka vënë theksin se formimi i Asociacionit të komunave me shumicë serbe në Kosovë.

Vetë Escobar ka thënë të martën për Radion Evropa e Lirë se punët për formim të Asociacionit duhet të nisin shpejt.

Në takimin e zhvilluar mes Escobarit, Vuçiqit dhe të dërguarit të Bashkimit Evropian për Ballkanin Perëndimor, Mirosllav Lajçak, është thënë të jetë diskutuar për situatën në veri të Kosovës dhe heqjen e barrikadave përmes rrugëve diplomatike.

Ministri i Jashtëm i Serbisë, Ivica Daçiq, ka diskutuar të mërkurën me të dërguarin e Shteteve të Bashkuara për Ballkanin Perëndimor, Gabriel Escobar rreth shqetësimeve që ka për “dështimin e Prishtinës që të zbatojë marrëveshjet e Brukselit”.

Sipas Ministrisë së Jashtme serbe, Daçiq ka thënë se “Serbia është e përkushtuar për thellim të bashkëpunimit me Shtetet e Bashkuara, me qëllim të stabilizimit të rajonit të Ballkanit Perëndimor”.

Më herët gjatë ditës, Escobar është takuar edhe me presidentin e Serbisë, Aleksandar Vuçiq dhe kryeministren e këtij shteti, Ana Bërnabiq.

Sipas institucioneve serbe, palët kanë diskutuar për barrikadat në veri të Kosovës dhe Asociacionin e komunave me shumicë serbe.

Të nderuar lexues, këtu po e përmbyllim raportimin e drejtpërdrejtë për zhvillimet në veri të Kosovës.

Rikthehemi sërish më 15 dhjetor.

Faleminderit që ishit me ne!

Për të gjashtën ditë me radhë, disa serbë në veri të Kosovës po vazhdojnë të bllokojnë rrugët që çojnë drejt pikave kufitare me Serbinë: Jarinjë dhe Bërnjak.

Vendosja e barrikadave nga disa serbë lokalë u nxit nga arrestimi i ish-pjesëtarit serb të Policisë së Kosovës, Dejan Pantiq. Kosova thotë se ai dyshohet për “sulm terrorist” ndaj zyrave të Komisionit Qendror të Zgjedhjeve në veri, më 6 dhjetor.
Situata në barrikada është e qetë.

Shkollat fillore dhe të mesme, në veriun e banuar me shumicë serbe, e që funksionojnë sipas sistemit serb, janë të mbyllura që nga e hëna, sikurse edhe objektet e hotelerisë.

Shumica e qytetarëve që gjenden në barrikada, janë punonjës të institucioneve serbe në Kosovë, nga sektori i shëndetësisë dhe arsimit. Siç mëson REL-i, ata dalin në barrikada me ndërrime.

Policia e Kosovës është vendosur në vendbanimet shumetnike në Mitrovicë të Veriut: Lagjen e Boshnjakëve, Tre Rrokaqiejt dhe në Kodrën e Minatorëve.

KFOR-i dhe EULEX-i po patrullojnë në Mitrovicë të Veriut, ndërkaq pjesëtarët e kontingjentit polak të KFOR-it gjenden në afërsi të barrikadës së ngritur në fshatin Rudarë të Zveçanit. Kjo barrikadë gjendet në rrugën magjistrale Prishtinë-Leposaviq.

Pas vendosjes së barrikadave, serbët kanë formuar Shtabin e Krizave. Sipas nënkryetarit të Listës Serbe, Igor Simiq, në këtë shtab bëjnë pjesë “përfaqësuesit politikë të popullit serb, figura të shquara, profesorë, mjekë dhe biznesmenë”.

Po ashtu, situata në Mitrovicën e Veriut është e qetë.