Vuçeviq: Të gatshëm “për të mbrojtur qytetarët tanë”
Ministri serb i Mbrojtjes, Millosh Vuçeviq, tha se “ushtria serbe është e gatshme të kryejë çdo detyrë për të mbrojtur integritetin dhe sovranitetin e Republikës së Serbisë dhe të të gjithë qytetarëve të saj”.
Me këtë deklaratë, ai aludoi në territorin e Republikës së Kosovës – shtet i pavarur qysh në vitin 2008, por të cilin Serbia nuk e njeh.
Vuçeviq i bëri këto deklarata pas vizitës që realizoi në Rashkë, ku janë të stacionuar disa ushtarë serbë.
Rashka është qytet në Serbi që gjendet afër Jarinjës - pikë kufitare që ndan Kosovën me Serbinë.
Beogradi zyrtar, qysh më 8 dhjetor, ka paralajmëruar se është duke shqyrtuar dërgimin e forcave të tij në Kosovë, në bazë të Rezolutës 1244 të Kombeve të Bashkuara.
Paralajmërimi është bërë pasi Policia e Kosovës ka rritur praninë në veri të vendit, ku ditëve të fundit ka pasur tensione dhe incidente me armë zjarri.
Presidenti i Serbisë, Aleksandar Vuçiq, tha të hënën se Qeveria e tij, më 15 dhjetor, do të dërgojë kërkesë te misioni i NATO-s në Kosovë, KFOR, për vendosjen e forcave serbe në Kosovë.
KFOR-i nuk iu përgjigj kërkesës së REL-it për koment në lidhje me këto paralajmërime.
Një muaj paraburgim për Dejan Pantiqin
Ish-pjesëtarit serb të Policisë së Kosovës, Dejan Pantiq, i është caktuar masa e paraburgimit prej një muaji.
Lajmin e ka konfirmuar zëdhënësja e Gjykatës Themelore në Prishtinë, Mirlinda Gashi.
Ajo ka thënë se Pantiq dyshohet për “kryerjen e veprës penale terroriste”.
Ministri i Brendshëm i Kosovës, Xhelal Sveçla, ka thënë të shtunën se Pantiq "ka organizuar sulmin terrorist” ndaj zyrave të Komisionit Qendror të Zgjedhjeve në veri të Kosovës më 6 dhjetor, kur “janë sulmuar zyrtarët e KQZ-së dhe zyrtarët policorë”.
Si shenjë pakënaqësie ndaj arrestimit të Pantiqit më 10 dhjetor, serbët lokalë në veri të Kosovës kanë ngritur barrikada.
Më pas, Policia e Kosovës, duke përmendur aspektin e sigurisë, ka mbyllur dy pikëkalimet kufitare mes Kosovës dhe Serbisë – Jarinjë dhe Bërnjak.
Chollet anulon vizitën në Ballkan pas infektimit me koronavirus
Këshilltari i lartë i Departamentit amerikan të Shtetit, Derek Chollet, ka thënë se e ka anuluar vizitën e tij në Ballkan dhe Bruksel për shkak të infektimit me koronavirus.
“Do të jem i angazhuar në të gjitha çështjet në rajonin e Ballkanit”, ka thënë ai duke paralajmëruar se planifikon të vizitojë shtetet e këtij rajoni në fillim të vitit të ardhshëm.
Chollet, bashkë me të dërguarin amerikan për Ballkanin Perëndimor, Gabriel Escobar, ishte planifikuar që të vizitonin në pasditen e së hënës udhëheqësit e lartë të shtetit të Kosovës, ndërsa mëngjesin e së martës përfaqësues të partive politike.
Moska bën thirrje për zgjidhje “diplomatike” të situatës në veri
Kremlini ka bërë thirrje të hënën për zgjidhje “diplomatike”, pas rritjes së tensioneve në veri të Kosovës, ditëve të fundit.
“Ne parapëlqejmë që palët të bëjnë përpjekje të natyrës paqësore dhe që kjo situatë të zgjidhet përmes rrugëve diplomatike”, ka thënë zëdhënësi i Kremlinit, Dmitry Peskov, para gazetarëve.
“Ne duam të sigurohemi që të gjitha të drejtat e serbëve janë të garantuara”, ka thënë ai.
Ministria e Jashtme ruse është zotuar se do të qëndrojë me Beogradin.
“Ne do të vazhdojmë t’i ndihmojmë Beogradit për të mbrojtur interesat kombëtare legjitime, sa i përket Kosovës”, ka thënë zëdhënësja e Ministrisë së Jashtme ruse, Maria Zakharova.
Ajo ka thënë se Moska është “e alarmuar” për situatën e krijuar, dhe ka akuzuar Prishtinën për “provokime” dhe “shtypje të serbëve në Kosovë”, pa ofruar dëshmi për pretendimet e bëra.
Serbia gëzon lidhje të mira me Rusinë, derisa kjo e fundit nuk e njeh pavarësinë e Kosovës, të shpallur më 2008.