Bildt: Duhet të ndërmerren hapa të vështirë
Ish-kryeministri i Suedisë, Carl Bildt, tha se përpara se Kosova të aplikojë për anëtarësim në Bashkimin Evropian, janë disa marrëveshje që duhen respektuar dhe "duhet të ndërmerren hapa të vështirë".
Bildt, i cili ka shërbyer si i dërguar i posaçëm i BE-së në ish-Jugosllavi në vitet 1990, nuk specifikoi se për cilat marrëveshje apo hapa e ka fjalën.
"Kriza po shpërthen sërish në veri të Kosovës. Gjërat do të nxehen derisa Kosova synon të dorëzojë aplikimin për në BE në ditët në vijm. Por, përpara se të lëvizet përpara me këtë aplikim, ka marrëveshje që duhen respektuar dhe duhet të ndërmerren hapa të vështirë", shkroi Bildt në Twitter.
Zyrtarë të Kosovës kanë paralajmëruar se aplikimi për anëtarësimin e vendit në BE do të bëhet gjatë kësaj jave.
Mbyllen shkollat “deri në njoftimin e radhës”
Shkollat fillore dhe të mesme në komunat në veri të Kosovës nuk do të punojnë deri në njoftimin e radhës, për shkak të situatës aktuale të sigurisë, konfirmoi drejtori i shkollës fillore “Sveti Sava” në Mitrovicën e Veriut, Miodrag Jovanoviq, për Radion Evropa e Lirë.
Ai nuk dha detaje se deri kur nuk do të shkojnë nxënësit në shkollë, por vetëm tha se një vendim i tillë është marrë të dielën mbrëma.
“Me shumë gjasa” është marrë nga institucionet kompetente, tha ai.
Shkollat në mjediset serbe në veri të Kosovës funksionojnë nën sistemin e Serbisë.
Qetë në veri, vazhdon bllokada
Kamionë të mëdhenj dhe autobusë vazhdojnë t'i bllokojnë rrugët në fshatin Rudarë të Komunës së Zveçanit, përkatësisht në rrugën që çon drejt pikës kufitare me Serbinë - Jarinjë.
Në hyrje të barrikadës është vendosur edhe një shirit me ngjyrë të kuqe dhe të bardhë, për të bllokuar kalimin në anën tjetër të barrikadës.
Mëngjesin e së hënës, në këtë zonë ishte qetë.
Ekipi i REL-it ndodhet aktualisht në fshatin Rudarë të Komunës së Zveçanit, ku vazhdon bllokada e rrugëve nga disa serbë lokalë.