AGK u bën thirrje autoriteteve të ofrojnë siguri për gazetarët që raportojnë nga veriu
Asociacioni i Gazetarëve të Kosovës u ka bërë thirrje autoriteteve në Kosovë që të marrin masa për të siguruar gazetarët gjatë raportimeve të tyre në veri të Kosovës.
Përmes një postimi në Facebook, AGK ka thënë se brenda dy ditëve janë raportuar dy sulme ndaj ekipeve të mediave lokale në Kosovë.
Policia e Kosovës ka thënë më herët gjatë ditës se ka pasur raportime për të shtëna me armë zjarri në disa lokacione në veri të Kosovës.
Petkoviq: Populli serb është ngopur dhe nuk duron më
Shefi i Zyrës për Kosovën në Qeverinë e Serbisë, Petar Petkoviq, ka thënë se kryeministri i Kosovës, Albin Kurti është “i vetmi që dëshiron konflikte dhe luftë” dhe se “Beogradi dhe populli serb dëshirojnë paqe dhe gjithmonë insistojnë në paqe”.
“Populli serb është ngopur me terrorin e Kurtit dhe nuk do të durojmë më, populli serb do të përgjigjet me gjithë çka ka kundër agresionit të Kurtit”, ka thënë ai përmes një postimi në Facebook, duke mos ofruar dëshmi për pretendimet e bëra.
Ministri i Punëve të Brendshme i Kosovës, Xhelal Sveçla, ka deklaruar publikisht, në disa raste, se gjysma e forcave policore në veri “kanë punuar” për Serbinë.
Të nderuar lexues,
Këtu e ndërpresim mbulimin direkt të zhvillimeve në veri të Kosovës. Rikthehemi paraditen e së dielës.
Faleminderit që përcillni Radion Evropa e Lirë.