Thirren të dalin në rrugë edhe punëtorët e arsimit dhe shëndetësisë
Në Rudarë, afër Zveçanit - komunë e banuar me shumicë serbe - raportohet se janë mbledhur disa serbë lokalë te vendi i njohur si “kryqi”. Aty janë parë edhe burra të maskuar.
REL-i mëson se mes atyre që kanë marrje thirrje nga punëdhënësit për të dal në rrugë janë edhe punëtorët e institucioneve serbe të arsimit dhe shëndetësisë.
Në Rudarë janë vendosur katër kamionë dhe tetë automjete të ambulancës.
Bllokimi i rrugëve vjen pas arrestimit të ish-policit serb, Dejan Pantiq.
Arsyeja e arrestimit të tij nuk dihet ende.
Policia e Kosovës nuk i ka kthyer përgjigje REL-it për këtë çështje.
Në këto fotografi shihen qytetarët që janë mbledhur në Rudarë, komuna e Zveçanit:
Shtyhen zgjedhjet në veri
Presidentja e Kosovës, Vjosa Osmani, ka bërë të ditur se janë shtyrë zgjedhjet në veri - të planifikuara për 18 dhjetor - për në prill të vitit 2023.
Ajo tha kështu pas një takimi që pati me përfaqësuesit e partive politike.
Osmani tha se për këtë vendim ka pasur konsensus të plotë mes partive politike dhe se është marrë parasysh edhe raporti i dërguar dje në Presidencë nga Komisioni Qendror i Zgjedhjeve.
“Në mënyrë që të sigurojmë pjesëmarrje sa më të madhe të qytetarëve në këto zgjedhje, vëzhgim nga institucionet vendore dhe ndërkombëtare, siguri për të gjithë qytetarët pa dallim, si dhe kohë të mjaftueshme për institucionet e sigurisë që të bëjnë edhe përpjekje e të ndërmarrin veprime shtesë për rend dhe ligj në veri në vendit, vlerësoj që shtyrja është e nevojshme”, tha ajo një konferencë për media.
Nënkryetarja e Partisë Demokratike të Kosovës, Vlora Çitaku, tha pas takimit se partia e saj i është bashkuar konsensusit për shtyrjen e zgjedhjeve pasi që “nuk mund të hyjë e vetme në zgjedhje në veri”.
Por, ajo e fajësoi Qeverinë e Kosovës që, sipas saj, “ka dështuar të krijojë kushtet për mbajtjen e zgjedhjeve në vend”.
“Kërkojmë nga Qeveria, nga Policia e Kosovës, nga kryeministri, që gjendjen në veri ta trajtojnë seriozisht. Shumë pak mund të ndryshojë gjendja në terren atje nëse qasja e institucioneve të Republikës së Kosovës nuk ndryshon”, tha ajo.
Osmani thotë se nuk ka koment të ri për situatën në veri
E pyetur nga gazetarët për situatën në veri, presidentja e Kosovës, Vjosa Osmani, tha se nuk ka koment të ri.
“Në veri, bandat kriminale, të udhëhequra nga lideri i tyre politik [Aleksandar] Vuçiq, nga i cili marrin urdhra, kanë për qëllim destabilizimin e Kosovës. Mirëpo, në këtë sfidë, sikurse në çdo tjetër deri sot, do të dalim fitimtarë”, tha ajo në konferencë për media pas takimit që pati me përfaqësuesit e partive politike.