Kurti për largimin e barrikadave: Vetë i vunë, vetë i hoqën

Të nderuar lexues, këtu po e mbyllim mbulimin e drejtpërdrejtë për ditën e sotme sa i përket situatës në veri të Kosovës.

Por, më poshtë po ju sjellim një përmbledhje të ngjarjeve që kanë ndodhur më 9 dhjetor:

• Shtetet e Bashkuara dënuan incidentet e dhunshme në veri të Kosovës dhe kërkuan nga Prishtina dhe Beogradi që të shmangin deklaratat që mund të përshkallëzojnë më tej tensionet
• Ministri i Punëve të Brendshme, Xhelal Sveçla, tha se në dy ditët e fundit, autoritetet kanë arrestuar dy serbë për sulme ndaj zyrtarëve policorë. Policia e Kosovës tha se arrestimi i fundit ndodhi më 9 dhjetor, në Jarinjë në veri të Kosovës, ku gjendet pikëkalimi kufitar midis Kosovës dhe Serbisë
• Komisioni Qendror i Zgjedhjeve nuk ka rekomanduar shtyrjen e zgjedhjeve në veri të Kosovës, pasi sipas anëtarit të këtij institucioni, Arianit Elshani, KQZ-ja nuk ka mandat për këtë
• Policia e Kosovës tha se situata në katër komunat në veri të Kosovës – të banuara me shumicë serbe – është stabile dhe e menaxhueshme
• Gjatë ditës janë raportuar disa incidente, tha Policia, përfshirë një sulm ndaj një ekipi gazetarësh. Në orët e mbrëmjes, në Mitrovicë të Veriut janë dëgjuar disa shpërthime. Por, autoritetet nuk kanë dhënë detaje se çfarë i ka shkaktuar ato
• Kryeministri i Kosovës, Albin Kurti, tha se Policia e Kosovës nuk është e orientuar kundër serbëve
• Presidentja e Kosovës, Vjosa Osmani, tha se në Kosovë nuk do të ketë më kurrë policë e ushtarë të Serbisë. Këto komente erdhën pas disa paralajmërimeve nga zyrtarët serbë se po e shqyrtojnë mundësinë që të dërgojnë trupa në Kosovë, duke u thirrur në rezolutën 1244 të Këshillit të Sigurimit të Kombeve të Bashkuara
• Njohësit thanë se Serbia nuk vendos për kthimin e forcave në Kosovë. Por, këtë e vendos misioni i NATO-s në Kosovë, KFOR
• Lista Serbe – partia kryesore e serbëve në Kosovë, që ka mbështetjen e Beogradit zyrtar – tha se "bartës i rezistencës” në veri është nënkryetari i saj, Milan Radoiçiq. Ai është në listën e zezë amerikane për përfshirje në krim të organizuar ndërkombëtar. Britania më 9 dhjetor e vendosi atë nën sanksione për shkak të korrupsionit
• Shtetet e Bashkuara dhe Gjermania kanë kërkuar që Kosova të shtyjë zgjedhjet, për shkak se kanë argumentuar se aktualisht nuk ka kushte për mbajtjen e tyre
• Bashkimi Evropian është shprehur i shqetësuar me situatën “shumë serioze” në veri të Kosovës
• Disa qytetarë – serbë dhe shqiptarë – në Mitrovicë të Veriut, i thanë Radios Evropa e Lirë se janë të mësuar me tensione. Mendimet e tyre mund t’i gjeni KËTU

Mirëmëngjesi të nderuar lexues. Po e rinisim mbulimin e drejtpërdrejtë të ngjarjeve në veri të Kosovës.

Gjatë natës nuk janë raportuar incidente në veri të vendit dhe aktualisht gjendja është e qetë.

Kështu i tha Radios Evropa e Lirë - drejtori i Policisë së Kosovës për rajonin e Mitrovicës së Veriut, Besim Hoti.

Në këtë komunë - e banuar me shumicë serbe - mbrëmjen e 9 dhjetorit, tek lagjja Tri Rrokaqiejt, janë dëgjuar shpërthime.

Hoti tha se kjo ka ndodhur me mjet shpërthyes piroteknik, dhe se nuk ka pasur dëme.

Në mbledhjen e Komisionit Qendror të Zgjedhjeve u tha se ky organ vazhdon me përgatitjet për mbajtjen e zgjedhjeve në veri të Kosovës.

Sipas tyre, nuk është në kompetencën e KQZ-së që të rekomandojë shtyrjen e zgjedhjeve.

Ndërsa sa i përket raportit të dërguar tek presidentja Vjosa Osmani, KQZ tha se vetëm e ka informuar atë për mbarëvajtjen e procesit zgjedhor, por nuk ka dhënë rekomandime.

Në këtë mbledhje, e cila u mbajt më 10 dhjetor, u vendos që të shtyhet afati për nominimin e anëtarëve të Këshillave të Vendvotimeve.

Me 11 vota për dhe asnjë kundër u vendos që ky afat të shtyhet deri më 13 dhjetor. Sipas tyre, kjo shtyrje nuk ndikon në procesin zgjedhor.

Për më shumë lexoni lajmin e plotë në këtë link.

Ministri i Jashtëm italian, Antonio Tajani, tha se tensionet në veri të Kosovës rrezikojnë stabilitetin në rajon.

Përmes një postimi në Twitter, ai tha se ka folur me kryeministrin e Kosovës, Albin Kurti, dhe presidentin e Serbisë, Aleksandar Vuçiq, dhe u ka kërkuar atyre që të “shmangin veprimet e njëanshme”.

Tajani tha se Italia dëshiron të jetë protagoniste e paqes në Ballkan.

“Le të nxisim dialogun mes Beogradit dhe Prishtinës”, shkroi ai.