Vendoset barrikadë në afërsi të Merdares
Është mbyllur pikëkalimi kufitar në Merdare, për shkak të vendosjes së barrikadave në Serbi rreth dy kilometra nga ky kufi.
Kështu njoftoi mbrëmjen e 27 dhjetorit Qendra Kombëtare për Menaxhim Kufitar në Kosovë.
Merdarja - një prej pikëkalimeve kufitare me Serbinë - përdoret në masë të madhe nga diaspora kosovare për hyrje-dalje nga Kosova.
Ministria e Punëve të Jashtme dhe Diasporës (MPJD), përmes një postimi në rrjetin social Facebook tha se “grupet kriminale serbe kanë bllokuar pikën kufitare në Merdare”.
Vuçiq pas takimit me Ushtrinë e Serbisë thotë se beson në forcën dhe vendosmërinë serbe
Presidenti serb, Aleksandar Vuçiq, ka deklaruar me 27 dhjetor se ka vizituar disa njësi të Ushtrisë së Serbisë “diku midis Kralevës dhe Rashkës”, dhe paralajmëroi një takim me përfaqësuesit e serbëve nga Kosova, por pa dhënë më shumë detaje.
Komuna e Rashkës në Serbi gjendet afër kufirit me Kosovën.
“Unë besoj në drejtësi dhe ligj, por më shumë se çdo gjë në urtësinë, por edhe forcën dhe vendosmërinë serbe”, shkroi ai në Instagram.
*Lajmin e plotë mund ta lexoni KËTU
Osmani reagon pas sulmeve ndaj gazetarëve në veri
Presidentja e Kosovës, Vjosa Osmani, ka reaguar pas sulmeve ndaj gazetarëve që raportojnë nga veriu, duke thënë që ata po sulmohen nga "bandat kriminale të mbështetura nga [presidenti serb Aleksandar] Vuçiq, tregojnë qëllimet e vërteta të Beogradit për të fshehur të vërtetën".
Në një postim në rrjetin social Twitter, ajo tha se "udhëheqja e Serbisë mund të ketë ndryshuar që nga vitet '90, por qëllimet e tyre nuk kanë ndryshuar. Ata do të dështojnë. Demokracia dhe shteti i së drejtës do të mbizotërojnë".
Disa nga gazetarët që po raportojnë nga veriu i Kosovës, ku disa serbë lokalë kanë ngritur barrikada, kanë thënë më herët për REL-in se nuk kanë mbrojtje të duhur gjatë raportimit.
Që nga atëherë janë shënuar një numër i incidentesh, ku përveç gazetarëve janë sulmuar edhe pjesëtarë të Policisë së Kosovës dhe trupave ndërkombëtare, si EULEX dhe KFOR.
Vuçiq: Jemi duke bërë gjithçka për të ruajtur paqen dhe stabilitetin
Presidenti serb, Aleksandar Vuçiq, tha se janë duke folur “me të gjithë” dhe janë duke “bërë gjithçka për të ruajtur paqen dhe stabilitetin”, për të gjetur një zgjidhje kompromisi.
Kështu deklaroi ai më 27 dhjetor, pas takimit me Patriarkun Porfirije.
Vuçiq nuk foli për arsyet e ngritjes së gatishmërisë luftarake në nivelin më të lartë, vendim të cilin e mori dje.
Presidenti serb pyeti se “kënd e shqetësojnë barrikadat në veri të Kosovës, kur askush nuk kalon nëpër ato rrugë, përveç serbëve, të cilët i përkrahin barrikadat si formë proteste dhe luftojnë për të drejtat dhe jetën e tyre”.
“Pse dikush në mënyrë histerike insiston në heqjen e barrikadave, sepse është e nevojshme që serbët të dëbohen nga veriu i Kosovës, sepse vetëm kështu e shohin zgjidhjen e problemit, si shqiptarët në Prishtinë ashtu edhe një pjesë e komunitetit ndërkombëtar”, tha ai.