Çfarë thanë Kurti dhe Rakiq për "viktimat" në veri?
Kryeministri i Kosovës, Albin Kurti, tha se autoritetet po tregohen të kujdesshme, dhe u kanë dhënë kohë trupave të KFOR-it për të larguar barrikadat në veri, për shkak se "nuk përjashtohet mundësia e viktimave".
Këtë deklaratë të Kurtit, dhënë The Guardian, lideri i Listës Serbe e ka interpretuar si thirrje për "vrasjen e serbëve".
Ne kemi verifikuar këto dy deklarata dhe në artikullin më poshtë mund të mësoni më shumë:
Roli i dyfishtë i djathtistëve për pushtetin e Vuçiqit
Tubimi i djathtistëve nga Serbia, më 18 dhjetor, në vendkalimin kufitar me Kosovën, Jarinjë, me sloganin “Lutuni Zotit dhe rrini pas Rusisë”, ishte i treti i tyre brenda një jave.
Para Jarinjës, ata protestuan dy herë në qendër të Beogradit. Njëra protestë u zhvillua para Presidencës së Serbisë, ku ndodhet edhe kabineti i presidentit Aleksandar Vuçiq.
Në protesta u tha se Kosova është pjesë e Serbisë dhe u kërkua ndërprerja e dialogut për normalizimin e marrëdhënieve me Kosovën, i cili zhvillohet që nga viti 2011, nën ndërmjetësimin e Bashkimit Evropian.
Për më shumë lexoni lajmin e plotë KËTU.
Munsch: Presim koordinim të ngushtë me KFOR-in
Në një intervistë për agjencinë serbe, Beta, udhëheqësi i Komandës së Forcave të Përbashkëta të NATO-s, admirali Stuart Munsch deklaroi se KFOR-i është duke e monitoruar nga afër situatën në veri të Kosovës. Ai shtoi se KFOR-i është "plotësisht i aftë dhe i gatshëm të sigurojë një mjedis të sigurt dhe liri të lëvizjes për të gjitha komunitetet kudo në Kosovë, në përputhje me mandatin e bazuar në Rezolutën 1244 të Kombeve të Bashkuara të Këshillit të Sigurimit nga viti 1999”.
“Që nga tetori ne kemi shtuar praninë, ndër të tjera, duke shtuar forcat, si dhe patrullimet në veri të Kosovës këtë javë. Presim që të gjithë aktorët të jenë në koordinim të ngushtë me misionin e KFOR-it dhe të përmbahen nga demonstrimet provokuese të forcës, në mënyrë që të ruhet siguria e të gjitha komuniteteve", tha ai.
Munsch është takuar sot në Beograd me presidentin serb, Aleksandar Vuçiq.
Admirali i NATO-s takon Vuçiqin në Beograd
Presidenti serb, Aleksandar Vuçiq, do të presë sot në Beograd komandantin e Komandës së Forcave të Përbashkëta të NATO-s, admiralin Stuart Munsch.
Takimi, sipas presidencës serbe, do të mbahet nga ora 10:00.
Kryeministri i Kosovës, Albin Kurti, ka thënë se është ende në pritje të KFOR-it për heqjen e barrikadave në veri të Kosovës, por se "nuk do të lejohet që barrikadat në veri të qëndrojnë edhe shumë gjatë".