Protestë në anën serbe të Jarinjës në mbështetje të serbëve të Kosovës
Disa protestues kanë nisur të mblidhen të dielën afër pikëkalimit kufitar mes Kosovës dhe Serbisë, Jarinjë, - në anën e territorit serb - si shenjë mbështetjeje ndaj serbëve lokalë që kanë ngritur barrikada në veri të Kosovës.
Protestuesit janë dëgjuar duke bërtitur, “Kosova është zemra e Serbisë”.
Policia serbe e ka krijuar një kordon në afërsi të kufirit.
Thirrja për protestë është bërë nga grupet djathtiste, siç është “Patrulla Kombëtare”, si dhe është bërë thirrje që organizimit t’i bashkohen mbështetës tjerë nga Serbia, Mali i Zi dhe Republika Sërpska e Bosnje-Hercegovinës.
Në mesin e tyre është edhe Damjan Knezheviq, kreu i grupit jozyrtar të ekstremit të djathtë "Patrulla Kombëtare" nga Serbia.
“Patrulla Kombëtare” njihet për veprimet e saj kundër emigrantëve, për glorifikimin e kriminelëve serbë të luftës dhe mbështetjen për Rusinë në luftën që zhvillon në Ukrainë.
Organizata është e lidhur me grupin e ekstremit të djathtë "Rusov" dhe grupin paraushtarak rus "Vagner", të cilin e ka vizituar së fundi në Rusi.
Në disa pamje të publikuara në platformat online, protestuesit dëgjohen duke insistuar që t’i afrohen pikës kufitare, ku shihen trupa të misionit të NATO-s, KFOR.
KFOR-i paralajmëron stërvitje të rregullta në Novosellë
Misioni i NATO-s në Kosovë, KFOR, ka bërë të ditur se në ditët në vijim do të kryejë stërvitje të rregullta ushtarake afër bazës që ka në Novosellë.
Sipas një njoftimi për media, stërvitjet synojnë të trajnojnë njësitet e KFOR-it, për të garantuar lirinë e lëvizjes në kohë krizash dhe 'konsistojnë në një seri të simulimeve taktike dhe aktiviteteve logjistike, përfshirë pajisje të rënda dhe helikopterë".
Njoftimi për këto stërvitje vjen në kohën kur autoritetet e Kosovës bëjnë thirrje për heqjen e barrikadave të ngritura nga serbët lokalë në veri të Kosovës.
KFOR-i ka bërë të ditur më 16 dhjetor se e ka shtuar numrin e ekipeve patrulluese në veri.
Barrikadat janë ngritur më 10 dhjetor në këtë pjesë të Kosovës, si shenjë pakënaqësie ndaj arrestimit të ish-zyrtarit serb të Policisë së Kosovës, Dejan Pantiq.
Pantiq dyshohet se ka organizuar “sulm terrorist” në zyrat e Komisionit Qendror të Zgjedhjeve në veri të Kosovës më herët gjatë muajit dhjetor.
Komunat veriore - Mitrovicë e Veriut, Zveçan, Zubin Potok dhe Leposaviq - janë të banuara me shumicë serbe.
Përshëndetje lexues të nderuar,
E diela shënon ditën e nëntë prej kur janë ngritur barrikadat në veri të Kosovës.
Pavarësisht thirrjeve të Kosovës për heqjen e tyre, ato vazhdojnë të jenë aty.
Në këtë blog do të mund të gjeni të gjitha informacionet për këtë temë.
Lista Serbe: Sveçla nuk është i mirëpritur në veri
Lista Serbe, partia kryesore e serbëve në Kosovë, ka thënë se vizita e ministrit të Punëve të Brendshme të Kosovës, Xhelal Sveçla, në pikëkalimin kufitar mes Kosovës dhe Serbisë, Bërnjak, është provokim “me qëllim të përshkallëzimit të situatës në terren”.
Katër komunat në veri të Kosovës - Mitrovicë e Veriut, Zubin Potok, Leposaviq dhe Zveçan - janë të banuara me shumicë serbe.
Situata në veri të Kosovës është tensionuar prej 10 dhjetorit, kur serbët lokalë kanë ngritur barrikada si shenjë pakënaqësie ndaj arrestimit të ish-zyrtarit serb të Policisë së Kosovës, Dejan Pantiq.
Ministri Sveçla, ka njoftuar të shtunën, përmes llogarisë së tij në Facebook, se ka qëndruar në mbrëmjen e 16 dhjetorit në Bërnjak, së bashku me zyrtarët e Policisë së Kosovës të angazhuar atje.
“Institucionet e Republikës së Kosovës i kanë të gjitha kapacitetet për t’i larguar barrikadat dhe në koordinim me partnerët tanë ndërkombëtarë janë duke vlerësuar situatën për reagim adekuat”, ka thënë Sveçla.
Lista Serbe ka thënë se Sveçla “nuk është i mirëpritur në komunat serbe në veri të Kosovës” dhe se “nuk ka çfarë të kërkojë në rajonet tona”.