Franca dhe Holanda i dorëzuan të enjten Ukrainës avionë luftarakë, duke ia rritur asaj mundësitë për ta mbrojtur hapësirën e vet ajrore nga bombardimet e pareshtura ruse.
Në Paris, ministri francez i Mbrojtjes, Sebastien Lecornu, tha në një postim në X të enjten se një numër i papërcaktuar avionësh luftarakë, Mirage 2000, mbërritën në Ukrainë, ndërsa Ministria e Mbrojtjes e Ukrainës njoftoi se ka pranuar gjithashtu avionë luftarakë F-16 të prodhuar nga SHBA-ja.
"Forcat Ajrore të Forcave të Armatosura të Ukrainës pranuan një përforcim të shumëpritur – avionët e parë luftarakë francezë, Mirage 2000, dhe F16-shat nga Mbretëria e Holandës", tha ministri ukrainas i Mbrojtjes, Rustem Umerov.
"Këto makina moderne luftarake janë në Ukrainë tashmë dhe së shpejti do të marrin pjesë në misione luftarake, duke forcuar mbrojtjen tonë dhe aftësinë tonë për t’i bërë ballë në mënyrë efektive agresionit rus", shtoi ai.
Lecornu tha në një postim në X se “me pilotë ukrainas në bord, pasi ata u stërvitën për disa muaj në Francë, këta avionë do të ndihmojnë për ta mbrojtur qiellin mbi Ukrainë”.
Parisi pati njoftuar se do t'i dorëzonte Ukrainës avionë luftarakë, Mirage 2000, në fillim të vitit 2025. Këta avionë janë të armatosur me raketa ajër-tokë dhe me masa kundër luftës elektronike.
Ukraina ka kërkuar prej kohësh avionë luftarakë modernë nga vendet e Perëndimit, veçanërisht avionët F-16 dhe Mirage. Në vitin 2023, disa vende aleate u pajtuan t’i dhuronin Ukrainës avionë F-16 me pëlqimin e SHBA-së. Avionët e parë F-16 iu dorëzuan Kievit në gusht 2024.
“Ky është një tjetër hap drejt forcimit të sigurisë së Ukrainës”, tha presidenti ukrainas, Volodymyr Zelensky, për mbërritjen e avionëve.
“Me ardhjen e këtyre avionëve, ne po vazhdojmë zgjerimin e flotës sonë të F16-shave, me Holandën që po i përmbush premtimet për ta mbështetur këtë përpjekje”, shtoi ai.
Eksperti izraelit i aviacionit, David Sharp, tha në një intervistë për shërbimin ukrainas të REL-it, Donbas.Realities, se avionët e sapoardhur do t’i zëvendësojnë avionët më të vjetër sovjetikë, Su-24, dhe do të jenë në gjendje të përdorin raketa Storm Shadow dhe SCALP.
Ai theksoi se ata gjithashtu do të jenë të rëndësishëm në misionet luftarake me rreze të shkurtër dhe të mesme veprimi dhe "natyrisht, kundër dronëve Shahed dhe raketave lundruese".
Ukraina po bën përpjekje për t’i zmbrapsur sulmet e pareshtura ajrore të Rusisë dhe ta frenojë përparimin e ushtrisë ruse në vijën e frontit, në prag të përvjetorit të tretë të luftës më 24 shkurt.
Në të njëjtën kohë, Kievi ka ndërmarrë ofensiva aty ku ka mundur për ta forcuar pozicionin e tij, në një kohë kur Perëndimi po përpiqet t’i rinisë bisedimet për një armëpushim dhe për një marrëveshje të mundshme paqeje.
Ndërkohë, Shtabi i Përgjithshëm i Forcave të Armatosura të Ukrainës tha të enjten se kreu sulm me dronë gjatë natës në bazën ajrore Primorsko-Ahtarsk në rajonin Krasnodar të Rusisë.
Sipas zyrtarëve ushtarakë ukrainas, kjo bazë shërbente si pikë kyç për ruajtjen, përgatitjen dhe lëshimin e dronëve Shahed, si dhe për mirëmbajtjen e avionëve që mbështesin operacionet ruse në rajonet Zaporizhja dhe Herson të Ukrainës.
Kanale ruse në Telegram dhe banorë të qytetit Primorsko-Ahtarsk raportuan për sulmin me dronë, ndërsa video të shpërndara në internet shfaqën zjarr pranë fushës ajrore.
Pamje të marra nga përdorues të internetit për sulmin me dronë në Krasnodar u verifikuan nga Radio Evropa e Lirë.
Kreu i qarkut konfirmoi se sistemet e mbrojtjes ajrore u aktivizuan për t’u mbrojtur ndaj dronëve.
Në të njëjtën kohë, Ministria e Mbrojtjes e Rusisë tha se sistemet e saj të mbrojtjes ajrore rrëzuan 28 dronë ukrainas gjatë natës – 13 mbi Detin Azov, tetë mbi rajonin Rostov, gjashtë mbi Krasnodar Krai dhe një mbi Astrahan.
Në një incident tjetër, tre njerëz dyshohet se u vranë nga një sulm me dronë ukrainas brenda rajonit Belgorod të Rusisë, i cili kufizohet me Ukrainën.
Guvernatori i Belgorodit, Vyacheslav Gladkov, shkroi në Telegram se incidenti ndodhi pranë fshatit Logaçiovka, i cili është shpallur zonë e ndaluar për shkak të kërcënimit të vazhdueshëm nga sulmet me dronë që prej fundit të tetorit 2022.
