Abdixhiku: LDK nuk e voton Haxhiun për kryetare të Kuvendit
Kryetari i Lidhjes Demokratike të Kosovës, Lumir Abdixhiku, konfirmoi se subjekti i tij politik, nuk ka ndërruar qëndrim dhe se nuk e voton Albulena Haxhiun për kryetare të Kuvendit.
“Do të votojmë njëjtë si herët e kaluara sepse nuk ndajnë bindjen e njëjtë me partinë e parë [Vetëvendosjen]”, deklaroi Abdixhiku.
Abdixhiku e bëri këtë konfirmim pak para rinisjes së seancës.
Nga 61 vota sa nevojiten, të shtunën, më 19 prill, pro zgjedhjes së Haxhiut në këtë detyrë kanë votuar 57 deputetë.
Deputetët fillojnë të hynë në objektin e Kuvendit
Deputetë nga parti të ndryshme parlamentare kanë filluar të hynë në objektin e Kuvendit të Kosovës ku në ora 15:00 pritet që për herë të katërt të rinisë seanca për konstituimin e Kuvendit.
Në mesin e deputetëve që tashmë kanë hyrë në Kuvend është edhe kryetari i Lidhjes Demokratike të Kosovës, Lumir Abdixhiku.
Lidhja Demokratike e Kosovës, në seancën e 19 prillit, votoi kundër zgjedhjes së Albulena Haxhiut për kryetare të Kuvendit të Kosovës.
Çfarë pritet të ndodhë në seancën e sotme?
Në seancën e sotme, deputetët duhet t’i zgjedhin kryetarin dhe pesë nënkryetarët në mënyrë që ta konstituojnë Kuvendin e Kosovës përfundimisht.
Lëvizja Vetëvendosje pritet ta propozojë përsëri Albulena Haxhiun për kryetare të Kuvendit, por nuk është e qartë nëse i ka votat e nevojshme.
Haxhiu dështoi të emërohej në seancën e 19 prillit, pasi i mori vetëm 57 vota nga 61 të nevojshme në dy tentime radhazi.
Seanca konstituive, sipas rregullores së Kuvendit, përfundon me zgjedhjen e tyre e kryetarit dhe nënkryetarëve.
Në rast se Kuvendi konstituohet sot në përpjekjen e katërt, atëherë do të hapet rruga për formimin e Qeverisë së re.
Çitaku: LVV nuk bëri asnjë përpjekje për t’i siguruar votat
Deputetja zgjedhur e Partisë Demokratike të Kosovës, Vlora Çitaku tha se në bazë të rezultatit zgjedhor të zgjedhjeve të 9 shkurtit i takon Lëvizjes Vetëvendosje t’i sigurojë votat e nevojshme për të zgjedhur kryetarin e Kuvendit.
Çitaku tha shkurt para mediave pak para nisjes së seancës së Kuvendit, se Vetëvendosje ‘nuk ka bërë asnjë përpjeke’ për t’i kontaktuar deputetët e partive tjera për t’i siguruar votat për kandidatin e tyre.
Kujtojmë se kandidate e Vetëvendosjes për kryetare të Kuvendit në seancën e kaluar ishte Albulena Haxhiu por në të dyja votimet nuk i mori votat e nevojshme.