Ramadani: Kosova do të dalë faqebardhë nga kjo situatë me Covid-19
Drejtori i Institutit Kombëtar të Shëndetësisë Publike në Kosovë, Naser Ramadani, tha se Kosova do ta tejkalojë gjendjen e krijuar nga koronavirusi, porse kërkohet nga qytetarët që t’iu përmbahen rregullave të Institutit dhe mekanizmave tjerë botërorë të shëndetësisë.
Këto komente, Ramadani i bëri pas një takimi që zhvilloi me presidentin e Kosovës, Hashim Thaçi, ku e njoftoi për gjendjen në të cilën është Kosova.
“Institucionet relavante të Kosovës dhe qytetarët janë rekomanduar që me kontributin e tyre të japin shtytjen më të madhe që të tejkalojmë krizën, duke pasur parasysh që rekomandimet e dhëna e kanë bazën te qytetari. Ne i kemi rekomanduar qytetarët që t’iu përmbahen strikt rregullave dhe rekomandimeve të Institutit të Shëndetësisë Publike, të Organizatës Botërore të Shëndetësisë, në mënyrë që të tejkalohet kjo situatë, duke mbajtur distancë së pari 2 metra, si dhe rekomandimet tjera”, tha Ramadani.
Kosova, shtoi ai, mund të organizohet dhe, sipas tij, “ky vend do të dalë faqebardhë nga kjo epidemi”.
Në Kosovë, deri më tani janë konfirmuar 19 raste me koronavirusin që shkakton sëmundjen Covid-19.
BQK: Nuk ka rritje të kërkesës për para të gatshme
Sistemi bankar në Kosovë është duke funksionuar normalisht dhe nuk vërehet ndonjë rritje e kërkesës për para të gatshme, për shkak të shpalljes së pandemisë së shkaktuar nga koronavirusi, thonë zyrtarë të Bankës Qendrore të Kosovës (BQK) dhe të disa bankave komerciale.
Kushtrim Ahmeti, zëdhënës në BQK, në një përgjigje për Radion Evropa e Lirë, tha se “për momentin, gjithçka është duke u zhvilluar normalisht, bankat kanë likuiditet të mjaftueshëm” dhe se “çështja e sistemit të pagesave është duke rrjedhur normalisht”.
Edhe liriana Tahiri, menaxhere në Zyrën për marrëdhënie me publikun në "Raiffaisen Bank”, i tha Radios Evropa e Lirë se “nuk është vërejtur ndonjë dallim nga numri i tërheqjeve që klientët i kanë bërë gjatë një dite të zakonshme, para se të krijohej situata e tanishme”.
“Çdo gjë është duke funksionuar normalisht sa u përket shërbimeve bankare si dhe shfrytëzimit të tyre nga ana e klientëve”, tha Tahiri.
- Më shumë hollësi mund të gjeni këtu.
Thaçi: Të ndërmerren hapa për të ruajtur ekonominë
Presidenti i Republikës së Kosovës, Hashim Thaçi, gjatë një takimi që ka zhvilluar me përfaqësuesit e shoqatave ekonomike në Kosovë tha se është e rëndësishme që të ndërmerren hapa për ta ruajtur ekonominë e këtij vendi.
Në një komunikatë për media, të lëshuar nga presidenca e Kosovës, thuhet se presidenti Thaçi ka biseduar me përfaqësuesit e shoqatave ekonomike për hapat që duhet ndërmarrë për t’iu ndihmuar punëtorëve dhe afaristëve kosovarë në rrethanat e krijuara pas përhapjes së koronavirusit të ri.
Koronavirusi godet rëndë ekonominë
“Pandemia e COVID-19 është sfidë për shëndetësinë, por edhe për ekonominë e Kosovës dhe të tërë globit. Është e rëndësishme që të ndërmerren hapa për ta ruajtur edhe ekonominë e vendit”, citohet të ketë thënë Thaçi.
Spanja merr vendim për mbyllje të hoteleve
Qeveria spanjolle ka konfirmuar se do të mbyllë të gjitha hotelet nga 24 marsi, me qëllim të parandalimit të përhapjes së koronavirusit të ri.
Për rezultat, qeveria britanike ka këshilluar të gjithë qytetarët e saj që të kthehen në shtëpi para kësaj date.
Zëdhënësi i Zyrës për të Huaj ka thënë se turistët britanikë në Spanjë duhet të kontaktojnë me linjën ajrore apo kompanitë turistike sa më shpejt që është e mundur për të ndryshuar datën e kthimit të udhëtimit të tyre.
Deri më tani në Spanjë janë infektuar 13,910 me koronavirusin e ri.