Veseli i fton deputetët të hyjnë në sallë
Shumica e deputetëve të partive në pushtet, tashmë janë në sallën e Kuvendit të Kosovës, ku pritet të vazhdojë seanca e jashtëzakonshme.
Kryetari i Kuvendit, Kadri Veseli ka ftuar të gjithë deputetët që të jenë në sallë për të vazhduar punimet.
Në seancë pritet të votohet për ekipin negociator të propozuar nga Qeveria.
Konjufca: Seanca e thirrur nga Qeveria, sa për të vjedhur kohën e opozitës
Shefi i Grupit Parlamentar të Lëvizjes Vetëvendosje, Glauk Konjufca tha se mosfillimi i seancës së thirrur nga Qeveria, po bëhet “sa për vjedhur kohën e opozitës për seancën e thirrur” nga ta.
"Kjo shtyrje që nuk po përfundon kurrë është sa për vjedhur kohën e opozitës për seancën e thirrur”, tha Konjufca.
“Me fjalë të tjera kemi të bëjmë më një veprim të qëllimshme që po i shërben edhe kryetari i Kuvendit, që çdo dy orë të shtyjë seancën, në mënyrë që Hashim Thaçi të shkojë në takim me (Aleksandar) Vuçiqin, dhe ai të mos ketë asnjë pengesë", tha Konjufca.
E paqartë se a do të ketë vazhdim të seancës
Disa deputetë të partive në pushtet, duke përfshirë edhe ata nga Lista Serbe, pasi janë futur në sallën e Kuvendit, kanë dalë sërish.
Kuvendi i Kosovës ende nuk ka njoftuar për vonesën e fillimit të seancës së jashtëzakonshme apo shtyrjes së saj.
Opozita kërkon nisjen e seancës së thirrur nga ta
Partitë politike opozitare, Lidhja Demokratike e Kosovës, Lëvizja Vetëvendosje dhe Alternativa, i kanë bërë thirrje kryetarit të Kuvendit, Kadri Veseli që sa më parë të thërrasë seancën e kërkuar nga opozita lidhur me deklaratat e presidentit Hashim Thaçi për ndryshimin e kufijve, me qëllim që të miratohet rezoluta e kërkuar.
Shefi i Grupit Parlamentar të Vetëvendosjes, Glauk Konjufca ka thënë se seanca e partive në pushtet, e cila ende nuk ka rinisur, po shtyhet qëllimisht nga kryetari i Kuvendit, me qëllim që, siç tha ai, “Hashim Thaçit t’i mundësohet shkuarja në Bruksel” pa marrë parasysh një rezolutë të mundshme në Kuvend, që ia ndalon atij të flas për ndryshimin e kufijve të Kosovës.
Presidenti Hashim Thaçi dhe homologu i tij serb, Aleksandar Vuçiq pritet të zhvillojnë raundin e ri të bisedimeve, më 7 shtator në Bruksel.
Facebook Forum