Propozohet që Kosova të ketë vetëm një ekip negociator
Debati parlamentar për ekipin negociator të Kosovës në dialogun me Serbinë, ka nxjerrë edhe disa propozime. Grupi Parlamentar i Nismës Socialdemokrate, përmes deputetit Bilall Sherifi ka propozuar që ekipi negociator të jetë i vetmi që do të përfaqësojë Kosovën në dialogun me Serbinë.
Ai tha se nuk është në favor që Kosova në dialog të përfaqësohet në njërën anë nga presidenti e në anën tjetër nga ekipi qeveritar.
Ndërkaq, deputetja e Aleancës për Ardhmërinë e Kosovës, Donika Kadaj-Bujupi kishte dy kërkesa nga ekipi negociator i Kosovës.
“E para, territori i Republikës së Kosovës është një dhe i pandashëm dhe askush nuk ka mandat të negociojë për territorin e Republikës. E dyta, ekipi negociator obligohet të raportojë para Kuvendit, pas çdo raundi të bisedimeve”, tha deputetja, Kadaj-Bujupi.
Fillon seanca për emërimin e ekipit negociator
Kuvendi i Kosovës, pa opozitën, ka filluar seancën e jashtëzakonshme për emërimin e ekipit negociator për dialogun me Serbinë. Në krye të këtij ekipi është propozuar zëvendëskryeministri Fatmir Limaj.
Kryeministri Ramush Haradinaj tha se pjesë e ekipit do të jenë edhe Enver Hoxhaj, Behgjet Pacolli, Dardan Gashi, Avni Arifi dhe Mahir Yagcillar.
Haradinaj tha se vendet e tyre në këtë ekip i kanë edhe partitë opozitare dhe shoqëria civile.
Emërimi i këtij ekipi është mbështetur nga partitë në pushtet, PDK, AAK dhe Nisma Socialdemokrate.
Veseli takohet me ambasadorin Delawie
Kryetari i Kuvendit të Kosovës, Kadri Veseli është takuar sot me ambasadorin e Shteteve të Bashkuara në Prishtinë, Greg Delawie, me të cilin ka biseduar për fazën finale të dialogut në mes të Kosovës dhe Serbisë.
Veseli ka thënë se është “jetike” që të ketë konsensus dhe platformë të përbashkët të palës kosovare në këto bisedime.
Përmes një postimi në Facebook, Veseli ka thënë se Shtetet e Bashkuara mbështesin përfundimin e suksesshëm të dialogut.
Haradinaj: Opozita nuk do dëshiron ta ruajë territorin
Kryeministri i Kosovës, Ramush Haradinaj ka folur për mospjesëmarrjen në seancën e jashtëzakonshme nga partitë opozitare.
Ai ka thënë se ata nuk dëshirojnë ta ruajnë territorin e vendit.
“Është e pakuptueshme mospjesëmarrja e tyre. Ata duhet të vijnë t’i thonë pikëpamjet e veta. Mospjesëmarrja nuk është rrugë përpara”, tha Haradinaj.
Me kërkesë të Qeverisë së Kosovës është thirrur seancë e jashtëzakonshme për t’u diskutuar ekipi negociator për dialogun me Serbinë, që ndërmjetësohet nga Bashkimi Evropian.
Facebook Forum