Presidenti Shteteve të Bashkuara të Amerikës (SHBA), Joe Biden, njoftoi të dielën, më 21 maj, një pako të re ndihme ushtarake për Ukrainën në luftën kundër pushtimit rus, e cila përfshin municion, artileri dhe automjete të blinduara.
Gjatë një takimi me presidentin ukrainas Volodymyr Zelenskyi, i cili u mbajt në Japoni, Biden tha se SHBA-ja po bënë gjithçka që mundet për të forcuar mbrojtjen e Ukrainës, në luftën e nisur nga Rusia më 24 shkurt të vitit të kaluar.
Biden u takua me presidentin ukrainas në margjinat e samitit të Grupit Shtatë (G7) në Hiroshimë, i cili mblodhi së bashku liderët e ekonomive kryesore të botës – SHBA-së, Japonisë, Gjermanisë, Britanisë së Madhe, Francës, Italisë dhe Kanadasë.
Udhëheqësit e G7-s ia sinjalizuan Rusisë gatishmërinë për të qëndruar pranë Ukrainës në terma afatgjatë, raporton Reuters.
Zelensky tha të dielën se ai “ia prezantoi botës formulën ukrainase të paqes me dhjetë pika”, gjatë një takimi me liderët botërorë në samitin në Japoni.
“Për sa kohë që pushtuesit janë në vendin tonë, askush nuk do të ulet në tryezën e bisedimeve me Rusinë”, shkroi Zelensky në Twitter, duke theksuar se “bota ka fuqi të mjaftueshme për të detyruar Rusinë të bëjë paqe”.
“Bota jonë është e madhe, por ne jemi të gjithë së bashku në të. Që nga Japonia e deri te vendet arabe, nga Evropa në Amerikën Latine, ne gjejmë mbështetje për formulën tonë”, tha ai.
Mbështetja e G7-s për Ukrainën
Samiti i Hiroshimës u fokusua në luftën e Rusisë në Ukrainë, sigurinë ekonomike, investimet e gjelbra dhe situatën në rajonin Indo-Paqësor.
Kryeministri japonez Fumio Kishida vlerësoi të dielën se ishte “e rëndësishme” që liderët e G7-s treguan solidaritet për të mbështetur ligjin dhe rendin ndërkombëtar, gjatë samitit ku presidenti ukrainas ishte i ftuar.
Këtë deklaratë Kishida e bëri në një konferencë për shtyp, me të cilën e mbylli samitit tre-ditor në Hiroshimë.
Presidentit ukrainas Volodymyr Zelensky, në ditën e fundit të samitit iu dha mundësia për të fituar vëmendjen e vendeve si Brazili dhe India, shkruan Reuters.
Kancelari gjerman Olaf Scholz tha se programet e mundshme të aleatëve për trajnimin e pilotëve ukrainas për avionët luftarakë F-16 ishin një mesazh për Rusinë se nuk pritet sukses në pushtimin e Ukrainës, madje edhe nëse konflikti është afatgjatë.
Shtetet e Bashkuara kanë njoftuar sanksione kundër më shumë se 300 objektivave, që synojnë të ndëshkojnë Rusinë për pushtimin e saj në Ukrainë.
Britania njoftoi planet për të ndaluar importet e diamanteve ruse, bakrit, aluminit dhe nikelit dhe njoftoi një valë të re sanksionesh kundër Rusisë, duke synuar kompanitë e lidhura me vjedhjen e dyshuar të grurit ukrainas.
Ministri i Jashtëm rus Sergei Lavrov vlerësoi se vendimet e G7-s në samit kishin për qëllim “frenimin e dyfishtë”, të Rusisë dhe Kinës.
Qasje e përbashkët ndaj Kinës
Liderët e G7-s njoftuan një qasje të përbashkët ndaj Kinës, duke dashur të “ulin rrezikun dhe jo të ndajnë” angazhimin ekonomik me vendin që konsiderohet “fabrika e botës”.
“Vendet e G7-s do të sigurojnë vazhdimin e investimeve të mëdha në Kinë, madje edhe përderisa reduktojnë ekspozimin ndaj rrezikut ndaj ekonomisë së dytë më të madhe në botë”, tha kancelari gjerman Olaf Scholz.
Presidenti i SHBA-së, Joe Biden, theksoi rëndësinë e krijimit të pavarësisë ndaj zinxhirëve të furnizimit kinez, si dhe rezistimit të “shtrëngimit ekonomik” dhe kundërshtimit të “praktikave të dëmshme që dëmtojnë punëtorët”.
“Kjo do të thotë të mbrosh një grup të ngushtë teknologjish të avancuara kritike për sigurinë tonë kombëtare”, shtoi Biden.
Kryeministri britanik Rishi Sunak vlerësoi se Kina përfaqëson “sfidën më të madhe të epokës së sotme” për sa i përket sigurisë dhe prosperitetit global dhe se është “gjithnjë e më autoritare brenda dhe jashtë vendit”.
Në deklaratat e tyre, udhëheqësit e G7-s ia kanë bërë të ditur qëndrimet e tyre Pekinit lidhur me çështjet që nxisin përçarje, siç është Indo-Paqësori dhe Tajvani.
Kina kundërshtoi deklaratën e përbashkët të G7-s nga Hiroshima dhe u ankua te organizatori i samitit, Japonia, njoftoi Ministria kineze e Punëve të Jashtme.
