Presidenti i Bjellorusisë, Alyaksandr Lukashenka, tha se nëse ndonjë shtet tjetër dëshiron të anëtarësohet në një union Rusi-Bjellorusi, atëherë “do të ketë armë bërthamore për të gjithë”.
Në një intervistë të publikuar në televizionin shtetëror rus mbrëmjen e 28 majit, Lukashenka, aleat i presidentit të Rusisë, Vladimir Putinit, tha se duhet “kuptuar strategjikisht” se Minsku dhe Moska kanë një mundësi unike për t'u bashkuar.
“Askush nuk është kundër që Kazakistani dhe vendet e tjera t’i kenë të njëjtat marrëdhënie të ngushta që i kemi ne me Federatën Ruse”, tha Lukashenka.
“Nëse dikush është i shqetësuar ... [atëherë] është shumë e thjeshtë: bashkohuni me shtetin e Bashkimit të Bjellorusisë dhe Rusisë. Kjo është e gjitha: do të ketë armë bërthamore për të gjithë”.
Ai shtoi se kjo ishte pikëpamja e tij dhe jo e Rusisë.
Rusia i vazhdoi javën e kaluar planet për të vendosur armë bërthamore taktike në Bjellorusi, në atë që do të ishte dislokimi i parë i kokave bërthamorë jashtë Rusisë që nga rënia e Bashkimit Sovjetik në vitin 1991. Ky plan ka nxitur shqetësime në Perëndim.
Rusia e përdori territorin e Bjellorusisë si pikënisje për nisjen e pushtimit të paprovokuar të Ukrainës në shkurt të vitit të kaluar dhe që atëherë bashkëpunimi ushtarak mes tyre është intensifikuar. Dy vendet kanë mbajtur stërvitje të përbashkëta ushtarake në Bjellorusi.
