Musliu: LDK-ja po frikësohet të marrë vendime
Ganimete Musliu, nga Partia Demokratike e Kosovës, e quajti “adoleshencë politike” propozimin e djeshëm të Lidhjes Demokratike të Kosovës që të formohet një qeveri tranzicioni me të gjitha partitë politike shqiptare.
Ajo tha se LDK-ja po frikësohet të marrë vendime - qoftë për koalicion me Lëvizjen Vetëvendosje, qoftë me partitë që deri më tani kishin qenë në opozitë - dhe se kështu “e ka lënë Kosovën prapa”.
“Kjo është hajgare me votën e qytetarëve të Republikës së Kosovës”, tha Musliu.
Ajo tha se ky është qëndrimi i saj personal dhe se PDK-ja do të japë qëndrimin e partisë vetëm pasi të mbahet një mbledhje e kryesisë së partisë sot në orën 15:00.
Rexhaj: Propozimi për qeveri tranzitore, i kotë
Edhe një deputet i Vetëvendosjes e ka kundërshtuar propozimin e Lidhjes Demokratike të Kosovës për qeveri tranzitore, duke e cilësuar si të “kotë”.
Arbër Rexhaj tha se “në vend se të ecim përpara, ata propozojnë të shkojmë mbrapa”.
“Vullneti i qytetarëve të Kosovës se Albin Kurti është njeriu më i votuar në historinë e Kosovës. Ajo çka propozon LDK-ja është devijim i vullnetit të qytetarëve të Kosovës. Ne e kemi dashur se nuk jemi bllokues dhe përkundrazi kemi propozuar koalicion me LDK, por ajo dëshiron të shkojë mbrapa”, tha Rexhaj.
Haradinaj: Nuk marr pjesë në takim me Vetëvendosjen
Kryetari i Aleancës për Ardhmërinë e Kosovës, Ramush Haradinaj, tha se ai nuk do të pranonte të marrte pjesë në një takim konsultativ për qeveri tranzicionale nëse në tavolinë është edhe Lëvizja Vetëvendosje.
“Ftesa për konsultë nuk ka gjë të keqe. Nuk ndryshon qëndrimi sa i përket qeverisë së opozitës, por po ashtu nuk na pengon ftesa e LDK-së për konsulta”, tha Haradinaj, duke iu referuar ftesës së një ditë më parë të LDK-së që të gjitha partitë politike shqiptare të bashkëpunojnë për qeveri tranzicionale deri vitin e ardhshëm.
Ai tha se do të pranonte takime bilaterale me LDK-në apo trilaterale me LDK-në dhe PDK-në.
Limaj: Ka disa lëvizje
Kryetari i Nismës, Fatmir Limaj, ka thënë se ka disa lëvizje nga seanca e kaluar konstituive, pa dhënë më shumë hollësi.
Ai nuk deshi të tregojë nëse do t’i përgjigjet ftesës së Lidhjes Demokratike për takim për formimin e një qeverie tranzitore.
“Të shohim se si do të shkojnë gjërat sot në seancë. Ka disa lëvizje. Ka propozime dhe komunikime me letra”, tha shkurt Limaj teksa hyri në ndërtesën e Kuvendit për seancën konstituive.
