Koreja e Veriut lëshon raketë balistike pas largimit të Kamala Harrisit nga Koreja e Jugut

Ushtria e Koresë së Jugut tha se Koreja e Veriut ka lëshuar të paktën një raketë balistike drejt ujërave të saj lindore.

Lëshimi i kësaj rakete erdhi disa orë pasi zëvendëspresidentja e SHBA-së, Kamala Harris, u largua nga Koreja e Jugut.

Kjo ishte ndalesa e saj e fundit gjatë një udhëtimi katër-ditor në vendet aziatike, në të cilin ajo theksoi angazhimin e SHBA-së për të mbrojtur aleatët e saj përballë kërcënimeve në rritje të Koresë së Veriut.

Ky ishte ishte raundi i tretë i testeve raketore nga Koreja e Veriut këtë javë. Ajo testoi dy raketa balistike të mërkurën, një ditë para se Harris të vizitonte Korenë e Jugut, dhe një para se ajo të largohej nga Uashingtoni të dielën.

Koreja e Veriut ka testuar një mori raketash gjatë viteve të fundit, duke përfshirë disa që Shtetet e Bashkuara të Amerikës dhe Koreja e Jugut kanë vlerësuar se kanë qenë në kuadër të testimeve të sistemeve interkontinentale. Testimet janë parë po ashtu si përpjekje e Phenianit për të treguar se ka sisteme të besueshme raketore që mund të bartin koka bërthamore. Organizata e Kombeve të Bashkuara ia ndalon Koresë së Veriut testimin e raketave balistike dhe atyre bërthamore, prandaj edhe ka vendosur sanksione ndaj saj. Por, ky shtet i Azisë Lindore ka shkelur vazhdimisht ndalesën, ndërsa udhëheqësi koreanoverior, Kim Jong Un, është zotuar se do të rrisë kapacitetet shtetërore për mbrojtje. Shumica e pamjeve në këtë fotogaleri janë publikuar nga agjencia shtetërore koreanoveriore e lajmeve KCNA, dhe janë shpërndarë nga agjencia ndërkombëtare e lajmeve Reuters, e cila nuk ka mundur të verifikojë në mënyrë të pavarur datën e shkrepjes së fotografive. (Përgatiti: Trim Haliti)

Rezolutat e OKB-së e ndalojnë Korenë e Veriut të testojë çdo lloj rakete balistike.

SHBA-ja dhe Koreja e Jugut kanë frikë prej kohësh se Koreja e Veriut mund të kryejë prova të reja bërthamore në çdo kohë.

Ky vend i izoluar është subjekt i sanksioneve të ashpra ndërkombëtare për shkak të programit të tij të armëve bërthamore.

Koreja e Veriut ka kryer një seri testimesh që nga janari, përfshirë edhe lëshimin e një rakete balistike ndërkontinentale me rreze të gjatë veprimi.