Ukrainasja: Dua që kumbara ime në Moskë ta shohë shtëpinë time të shkatërruar
Forcat ruse kanë vazhduar grantimet në kryeqytetin ukrainas, Kiev, duke shkatërruar disa ndërtesa banimi më 23 mars. Një grua, shtëpia e së cilës u dëmtua nga granatimet, i bëri apel kumbarës së saj në Moskë, teksa tha se ajo duhet “të shohë” se forcat ruse po sulmojnë caqe civile, pavarësisht mohimeve nga Kremlini.
Biden: NATO është më e bashkuar se kurrë lidhur me Ukrainën
Presidenti amerikan, Joe Biden, tha se presidenti rus, Vladimir Putin, gaboi kur mendoi se NATO do të ishte e ndarë sa i përket Ukrainës.
Në një konferencë për media, Biden tha se pushtimi rus i Ukrainës ka rritur unitetin brenda NATO-s, Bashkimit Evropian dhe Grupit të shtatë vendeve më të industrializuara, G7.
“Ai nuk mendoi se ne mund ta ruanim këtë kohezion”, tha Biden duke iu referuar Putinit. Ai shtoi se NATO “nuk ka qenë kurrë më e bashkuar se sa është sot”.
“Putin po përballet me të kundërtën e asaj që ka menduar se do të ndodhte kur vendosi të hynte në Ukrainë”, tha Biden.
Shtetet e NATO-s dhe aleatët e tjerë kanë vendosur sanksione të ashpra ekonomike kundër Rusisë.
Lajmin e plotë mund ta lexoni KËTU
Johnson: Ukraina nuk është vetëm
Kryeministri i Mbretërisë së Bashkuar, Boris Johnson, tha se shteti i tij duhet ta mbështesë Ukrainën në luftën kundër Rusisë.
“Ky është vetëm fillimi”, tha ai pas takimit të liderëve të NATO-s.
Mbretëria e Bashkuar ka sanksionuar mbi 1,000 individë rusë dhe entitete dhe sipas Johson, këto janë sanksionet më të ashpra të Mbretërisë së Bashkuar.
“Mesazhi për Putinin është: Ukraina nuk është vetëm. Ne qëndrojmë me banorët e Kievit, Mariupolit, Lvivit dhe Donjeckut”, tha ai.
Ai tha se presidenti rus, Vladimir Putin, duhet të dështojë në përpjekjet e tij për ta pushtuar Ukrainën.
Macron: Rusia edhe më e izoluar nga skena botërore
Presidenti i Francës, Emmanuel Macron, tha se Rusia edhe më shumë është izoluar nga skena botërore.
Ai tha se është thelbësore që të shmanget përshkallëzimi i konfliktit dhe prandaj ai tha se NATO ka marrë vendim që të mbështesë Ukrainën, pa e futur veten në luftë kundër Rusisë.
Pas samitit të NATO-s, Macron tha se aleanca ushtarake po e rishikon pozicionin strategjik të saj si pasojë e luftës në Ukrainë.
Ai po ashtu tha se fuqitë perëndimore janë të gatshme të shtojnë sanksionet ndaj Rusisë nëse është e nevojshme, teksa ato po kërkojnë që të arrihet një armëpushim.
“Këto sanksione kanë ndikim dhe ne duhet të vazhdojmë që të kenë efekt më të madh”, tha ai.
