Ukraina e akuzon Rusinë për terrorizëm shtetëror
Rusia po kryen terrorizëm shtetëror në Ukrainë dhe do të vazhdojë të sulmojë shtete të tjera, tha ministri i Mbrojtjes së Ukrainës, Oleksii Reznikov.
Duke folur përkrah Sekretarit britanik të Mbrojtjes, Ben Wallace gjatë vizitës në Londër, Reznikov tha se 150 fëmijë ukrainas janë vrarë që prej nisjes së pushtimit rus të Ukrainës. Ai tha se mbi 400 shkolla dhe çerdhe dhe mbi 110 spitale janë shkatërruar.
“Mijëra e mijëra civilë” po ashtu janë vrarë, shtoi ai, dhe tha se ende nuk dihet se sa persona janë të bllokuar nën rrënojat e shtëpive të shkatërruara.
“Ky është terrorizëm shtetëror. Prandaj Kremini duhet të ndalet, sepse do të vazhdojë edhe më tej, do të sulmojë shtete të tjera”, tha Reznikov.
Ai nuk dha ndonjë dëshmi për këto pretendime. Rusia vazhdimisht mohon se shënjestron caqe civile.
Që prej nisjes së luftës në Ukrainë, ushtarët ukrainas kanë shkatërruar pothuajse 500 tanke ruse dhe mbi 1,500 makina të blinduara, tha ministri ukrainas. Ai tha se armët që i ka ofruar Britania janë përdorur në disa prej këtyre sulmeve.
Rusia me notë proteste ndaj SHBA-së për cilësimin e Putinit si “kriminel lufte”
Ministria e Jashtme e Rusisë e ka ftuar në bisedë ambasadorin amerikan në Rusi, John Sullivan, pas deklaratave të bëra së fundmi nga presidenti Joe Biden, i cili e quajti presidentin rus, Vladimir Putin, “kriminel lufte” për shkak të pushtimit të paprovokuar të Ukrainës.
Ministria tha përmes një deklarate më 21 mars se lëshoi një demarsh dhe i dorëzoi një notë proteste Sullivanit “në lidhje me deklaratat e papranueshme të kreut të Shtëpisë së Bardhë, Joe Biden, në lidhje me presidentin e Rusisë”.
“Deklarata të tilla të bëra nga një president amerikan, të cilat nuk janë të denja për një burrështetas, kanë vendosur raportet ruso-amerikane në prag të prishjes”, thuhet në deklaratë.
Lajmin e plotë mund ta lexoni KËTU
Nënat e ushtarëve rusë i kërkojnë djemtë në Ukrainë
Khrystyna punon në një linjë të ndihmës, të krijuar nga autoritetet ukrainase, për t’iu ofruar informata familjeve të ushtarëve rusë, të zhdukur gjatë luftës. Thirrjet e tyre janë lutje të dëshpëruara për ndihmë, shpesh të shoqëruara me kërkim-falje. Në dy prej thirrjeve, dy gra në Ukrainë po i kërkonin vëllezërit e tyre, në ushtrinë pushtuese ruse. Njëra prej tyre pyeti: “A po lufton vëllai im kundër nesh?”.
Zyrtarët ukrainas: Rusia ka granatuar qytetit e Odesës
Autoritetet në qytetin më të madh port të Ukrainës, Odesa, thanë se forcat detare ruse në Detin e Zi kanë granatuar disa ndërtesa banimi në periferi të qytetit.
Kjo është hera e parë që ndërtesat granatohen në këtë qytet.
Një zëdhënës i administratës rajonale të ushtrisë tha se nuk nga sulmet nuk ka viktima.
Marina ruse e ka bllokuar Odesën, që vlerësohet se është një prej shënjestrave kryesore strategjike dhe simbolike për Rusinë.
Fortifikohet Odesa