Ukraina dhe Rusia zhvillojnë bisedime shtesë për paqe
Negociatorët ukrainas dhe ata rusë kanë zhvilluar një bisedë 90-minutëshe të hënën – përmes video-lidhjes - dhe ekipet punuese do të takohen gjatë ditës, ka thënë një delegacion ukrainas.
“Sot do të punojmë gjithë ditën”, ka thënë delegati ukrainas dhe ligjvënësi, David Arakhamia sipas mediave ukrainase, transmeton Reuters.
Çmimi i naftës mund të arrijë në “300 dollarë për fuçi nëse refuzohet nafta ruse”
Zëvendëskryeministri rus, Alexander Novak, ka thënë të hënën se çmimet e naftës mund të arrijnë në 300 dollarë për fuçi nëse nafta e papërpunuar ruse refuzohet nga Perëndimi.
Megjithatë, ai ka shtuar se diçka e tillë është pak e mundshme, ka thënë agjencia e lajmeve, TASS, transmeton Reuters.
Novak ka thënë se është e pamundshme për Evropën që të refuzojë naftën dhe gazin rus tani për tani.
Ndër zhvillimet e fundit të luftës në Ukrainë:
- Mariupoli vazhdon të përballet me situatë të rëndë. Rreth 300,000 njerëz janë të bllokuar, pa rrymë, ushqim dhe ujë, si dhe në bombardime të mëdha
- Ukraina ka injoruar kërkesën e Rusisë për të dorëzuar këtë qytet, duke thënë se premtimet ruse për të hapur korridore humanitare, nuk janë të besueshme
- Një deputet ukrainas nga Mariupoli ka thënë se Rusia është duke tentuar që t’i përballë banorët e Mariupolit me uri të madhe, mirëpo ka shtuar se qyteti nuk do të dorëzohet
- Autoritetet ukrainase kanë thënë që të paktën tetë njerëz kanë vdekur kur një qendër tregtare dhe një numër shtëpish janë goditur në rajonin Podilski në Kiev
- Njerëzit janë këshilluar që të strehohen pasi një tank 50-tonësh me gaz helmues është dëmtuar pas bombardimeve në central kimik afër qyteti Sumi, duke shkaktuar rrjedhje toksike të amoniakut
- Kryetari i qytetit të Kievit ka njoftuar për orë policore në kryeqytet prej orës 20:00 me orën lokale të hënën deri në orën 07:00 me orën lokale të mërkurën
- Ministri i Jashtëm i Lituanisë ka thënë se Bashkimi Evropian duhet të vazhdojë presionin ndaj Rusisë dhe “nuk duhet të lodhet” nga vendosja e sanksioneve
Kremlini: Nuk ka përparim të madh në bisedimet për paqe
Nuk ka asnjë përparim të madh në bisedimet për paqe në mes të Rusisë dhe Ukrainës, ka thënë Kremlini më 21 mars.
Duke folur para gazetarëve, zëdhënësi i Kremlinit, Dmitry Peskov, ka thënë se duhet arritur përparim i madh në bisedime, para se të jetë i mundshëm takimi i presidentit rus, Vladimir Putin me homologun e tij ukrainas, Volodymyr Zelensky.
Rusia ka pushtuar Ukrainën më 24 shkurt, mirëpo forcat ukrainase kanë bërë rezistencë të madhe dhe Perëndimi ka vendosur sanksione të ashpra ndaj Rusisë, me qëllim të largimit të forcave ruse nga territori ukrainas.
Zelensky ka bërë sërish thirrje për negociata me Putinin, në një intervistë të zhvilluar më 20 mars, në kanalin televiziv, CNN.
“Jam i gatshëm për negociata me të”, ka thënë Zelensky.
“Mendoj se pa negociata nuk mund të përfundojë kjo luftë”, ka thënë mes tjerash Zelensky për CNN.