Zelensky e konsideron Jerusalemin “vendin e duhur” për bisedime
Izraeli është duke bërë përpjekje për të ndërmjetësuar bisedimet mes Ukrainës dhe Rusisë, dhe në të ardhmen mund të jetë vend nikoqir i negociatave të nivelit të lartë, ka thënë presidenti ukrainas, Volodymyr Zelensky.
“Kryeministri i Izraelit, (Naftali) Bennett është duke tentuar të gjejë zgjidhje për mbajtje të bisedimeve”, ka thënë Zelensky përmes një video-adresimi.
“Ne jemi mirënjohës për përpjekjet e tij, dhe herët apo vonë ne do të nisim bisedimet me Rusinë, me mundësi në Jerusalem”.
“Ky është vendi i duhur për të gjetur paqe, nëse është e mundshme”, ka thënë ai.
Komentet e Zelenskyt kanë ardhur pasi ai i është adresuar Parlamentit të Izraelit - përmes video-linkut – të dielën.
Zelanda e Re zotohet për më shumë ndihmë për Ukrainën
Zelanda e Re është zotuar se do t’i ofrojë Ukrainës fonde shtesë në vlerë të 3.46 milionë dollarëve amerikanë si dhe pajisje jovdekjeprurëse.
Kryeministrja e këtij shteti, Jacinda Ardern ka thënë se paratë do të dërgohen në një fond të NATO-s, i cili ofron naftë, pajisje komunikimi dhe pajisje të ndihmës së parë për forcat ukrainase.
Deri më tani, Zelanda e Re ka dërguar ndihmë në Ukrainë në vlerë të 7 milionë dollarëve amerikanë.
Raportohet për sulme ruse në një terren stërvitor
Rusia ka lëshuar dy raketa në një terren stërvitor në Rivne, në perëndim të Ukrainës, ka thënë Vitaliy Koval, udhëheqës i administratës rajonale.
Në një video-adresim, ai ka thënë se sulmet kanë ndodhur në mëngjesin e 21 marsit.
Britania: Rusia ende e fokusuar në Kiev
Ministria britanike e Mbrojtjes ka thënë se kryeqyteti ukrainas, Kiev, vazhdon të mbetet prioritet për Rusinë dhe trupat ruse pritet të tentojnë sërish të hyjnë në qytet në javët në vijim.
Në përditësimin e mëngjesit, Ministria britanike ka thënë se luftimet e ashpra janë duke vazhduar në veri të kryeqytetit, mirëpo avancimet ruse nga ai drejtim kanë ngecur.
“Pavarësisht mungesës së vazhdueshme të përparimit, Kievi vazhdon të mbetet objektivi kryesor i Rusisë dhe ata pritet ta bëjnë prioritet rrethimin e qytetit në javët në vijim”.