Ukraina injoron ultimatumin e dorëzimit të Mariupolit
Kanë kaluar disa orë prej kur Rusia i ka dhënë afat të fundit Ukrainës për të dorëzuar qytetin e rrethuar të Mariupolit, ku 300,000 njerëz besohet se janë të bllokuar edhe me pak furnizime.
Çfarë ka thënë Rusia?
Ushtria ruse i ka dhënë afat Ukrainës që deri të hënën në mëngjes të njoftojë për dorëzim të qytetit, duke premtuar se në kthim do të garantojë dy korridore humanitare për t’u larguar njerëzit.
Si është përgjigjur Ukraina?
Ukraina ka hedhur poshtë këtë ultimatum.
“Nuk ka vend për dorëzim, ulje të armëve tona”, ka thënë zëvendëskryeministri i shtetit, sipas mediumit, Ukrainska Pravda.
Një këshilltar i Mariupolit ka thënë për transmetuesin britanik, BBC, se premtimet e Rusisë nuk janë të besueshme dhe se ushtarët do të luftojnë deri në luftëtarin e fundit.
Çfarë mund të ndodhë tani?
Nuk është e qartë.
Moska nuk e ka specifikuar se çfarë do të bëjnë trupat e saj nëse nuk zbatohet kërkesa për dorëzim.
Mirëmëngjesi të gjithëve!
Po e rinisim transmetimin e drejtpërdrejtë për zhvillimet e lidhura me luftën në Ukrainë.
Në orët e para të mëngjesit të së hënës, Ukraina ka hedhur poshtë kërkesat e Rusisë për të hequr dorë nga qyteti i rrethuar i Mariupolit, duke thënë se “nuk ka vend për dorëzim”.
Qëndroni me ne!
Lexues të nderuar. Ne këtu po e ndërpresim mbulimin e drejtpërdrejtë të luftës në Ukrainë, për t’u rikthyer sërish nga ora 7:00 e mëngjesit.
Zhvillimet kryesore të ditës së diel kanë qenë:
- Në orët e vona të së dielës, granatimet goditën shtëpi banimi dhe një lagje tregtare në qarkun Podil të Kievit, duke vrarë të paktën një person, tha kryetari i kryeqytetit ukrainas, Vitali Klitschko.
- Rusia u bëri thirrje forcave ukrainase të dorëzojnë armët në qytetin port lindor të Mariupolit
- Zyrtarët rus kanë pranuar se Komandanti i lartë i flotës ruse të Detit të Zi, kapiteni Andrey Paliy u vra në Ukrainë
- Presidenti ukrainas Volodymyr Zelensky, përmes një video-lidhjeje iu drejtua Parlamentit izraelit
- Zyrtarët e hekurudhave shtetërore të Ukrainës kanë thënë se bjellorusët e ndershëm kanë ndërprenë furnizimet ruse
- Presidenti ukrainas Volodymyr Zelensky ka thënë se është i gatshëm të negociojë me presidentin rus Vladimir Putin
- OKB: Të paktën 902 civilë janë vrarë dhe 1,459 të tjerë janë plagosur në Ukrainë deri në mesnatën e 19 marsit
- Zelensky e ka akuzuar Rusinë për krime lufte gjatë rrethimit të qytetit jugor të Mariupolit
- Një shkollë arti në qytetin e rrethuar të Mariupolit, që përdorej si strehimore, është bombarduar nga forcat ruse
- Për herë të dytë, Rusia ka thënë se ka përdorur raketa hipersonike në sulmet në Ukrainë
- Ministri i Jashtëm i Turqisë, Mevlut Cavusoglu, ka thënë se Ukraina dhe Rusia janë afër arritjes së një marrëveshjeje për çështje “kritike”
- Morgjet bjelloruse të mbushura me trupat e ushtarëve rusë
Ukraina thotë se janë evakuuar edhe 7,295 persona
Zëvendëskryeministrja ukrainase, Iryna Vereshchuk tha se më 20 mars janë evakuuar 7,295 civilë nga qytetet ukrainase.
Evakuimi u bë nga katër prej shtatë korridoreve humanitare që ishin planifikuar të funksiononin.
Në tërësi, 3,985 persona u evakuuan nga qyteti i rrethuar i Mariupolit dhe u dërguan në qytetin Zaporizhja.
Qeveria ukrainase planifikon që të hënën të kryejë më shumë evakuime, tha Vereshchuk.