Kurti: Nëntë barrikada janë ende në veri
Kryeministri i Kosovës, Albin Kurti, në një konferencë për media ka thënë se "mbrëmë ka pasur të shtëna në drejtim të Policisë së Kosovës dhe nëntë barrikada me njerëz të armatosur që i kanë ndaluar qytetarët me automjete dhe këmbësorë".
"Strukturat ilegale të Serbisë janë bërë banda kriminale, agresive si asnjëherë më parë. Janë me dhjëtëra shkelje të rënda të ligjit, me të cilat po merret Policia”, ka thënë Kurti duke shtuar se nuk ka të plagosur me armë zjarri, siç ishte raportuar nëpër disa media.
“Qeveria e Kosovës e përsërit zotimin që në momentin kur hiqen barrikadat dhe vendoset liria e plotë e lëvizjes, shtyhet zbatimi i dy vendimeve të Qeverisë”, ka konfirmuar kryeministri Kurti.
Lajmin e plotë mund ta lexoni në linkun më poshtë:
Sveçla: Deri në mesditë u lëshuan mbi një mijë dokumente
Në të gjitha pikat kufitare të Kosovës nga orët e para të 1 gushtit dhe deri në mesditë, janë lëshuar mbi 1 mijë e 500 dokumente hyrëse për qytetarët me shtetësi serbe.
Kështu ka njoftuar ministri i Punëve të Brendshme i Kosovës, Xhelal Sveçla, i cili ka bërë të ditur se dy pikat kufitare në Jarinjë dhe Bërnjak po vazhdojnë të jenë të mbyllura.
Sipas të dhënave të MPB-së, shumica e dokumenteve janë lëshuar në pikëkalimin kufitar në Dheun e Bardhë dhe në Merdare.
Sipas Qeverisë së Kosovës, vendimi për reciprocitet do të qëndrojë në fuqi deri në largimin e plotë të barrikadave në drejtim të Jarinjes dhe Bërnjakut.
PDK: Qeveria nuk e planifikoi mirë vendimin për reciprocitet
Nënkryetarja e Partisë Demokratike të Kosovës(PDK), Vlora Çitaku, në një konferencë për media kritikoi veprimet e Qeverisë së Kosovës sa i përket vendosjes së reciprocitetit me Serbinë lidhur me targat dhe dokumentet serbe.
Çitaku tha se “vendimi për veprim ka qenë i paplanifikuar mirë”.
Duke iu referuar vendimit të mëvonshëm të Qeverisë së Kosovës për shtyrjen e zbatimit të reciprocitetit, Çitaku tha se Qeveria është treguar joserioze.
“Dështimi në realizimin e këtyre vendimeve të Qeverisë po krijon një përshtypje që veriu është i pamenaxhueshëm dhe situata atje është jashtë kontrollit të shtetit”, theksoi Çitaku.
Ajo, gjithashtu, tha se është e rëndësishme që Qeveria të shpjegojë se çfarë do të ndodhë tash e tutje.
Vulin: SHBA-ja të bindë Kosovën për një zgjidhje
Ministri i Punëve të Brendshme i Serbisë, Aleksandar Vulin, ka deklaruar më 1 gusht se “muaji i ardhshëm duhet të shfrytëzohet për marrëveshje dhe diplomaci”, teksa ka komentuar bllokadat e vendosura nga serbët lokalë në veri të Kosovës.
Sipas një njoftimi të Ministrisë së Brendshme të Serbisë, Vulin ka porositur serbët në Kosovë se “nuk duhet t’i besojnë Prishtinës dhe duhet t’i besojnë Serbisë së tyre dhe presidentit Aleksandar Vuçiq”.
Ai ka thënë se nuk pret asgjë nga Prishtina, por pret që Bashkimi Evropian – nën ndërmjetësimin e të cilit u arritën dy marrëveshje për formimin e Asociacionit – të formojë menjëherë Asociacionin e komunave me shumicë serbe.
“Unë pres që Shtetet e Bashkuara, që kanë treguar se kanë ndikim të madh në Kosovë, të vazhdojnë ta përdorin këtë ndikim për të mirë... të vazhdojnë ta përdorin ndikimin për ta bindur [kryeministrin e Kosovës, Albin] Kurtin që të arrijë një zgjidhje. Në thelb, kjo nuk është çështje mes Prishtinës dhe Beogradit, por është një çështje mes Beogradit e BE-së dhe shteteve që kanë ndikim në Kosovë.”, ka thënë Vulin.
Lajmin e plotë mund ta lexoni në linkun më poshtë:
