Sekretari amerikan i Shtetit, Antony Blinken i kërkoi të hënën Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian, që me shpejtësi të pranojë propozimin e fundit dhe "jashtëzakonisht bujar" të Izraelit për një armëpushim në Gazë, dhe të sigurohet lirimi i pengjeve.
Negociatorët e Hamasit pritej që të hënën të takonin ndërmjetësuesit e Katarit dhe Egjiptit në Kajro, për të dhënë një përgjigje ndaj propozimit që Izraeli paraqiti në fundjavë.
"E vetmja gjë që qëndron mes popullit të Gazës dhe armëpushimit është Hamasi. Ata duhet të vendosin dhe duhet të vendosin shpejt," tha Blinken në një takim special të Forumit Ekonomik Botëror të mbajtur në kryeqytetin saudit, Riad.
"Unë shpresoj se ata do të marrin vendimin e duhur”, tha Blinken.
Një burim i informuar mbi bisedimet tha se propozimi i Izraelit përfshinte një marrëveshje për të pranuar lirimin e më pak se 40 nga afërsisht 130 pengjet që besohet se mbahen ende, në këmbim të lirimit të palestinezëve të burgosur në Izrael, dhe një fazë të dytë të një armëpushimi që parasheh “një periudhë qetësie” – që do të ishte një kompromis i Izraelit për kërkesën e Hamasit për armëpushim të përhershëm.
Shtetet e Bashkuara kanë parë "përparim të matshëm" në situatën humanitare në Gazë gjatë javëve të fundit, tha sekretari amerikan i Shtetit, Antony Blinken, por i kërkoi Izraelit të bëjë më shumë.
Duke folur në Riad të Arabisë Saudite, Blinken tha se mënyra më efektive për të lehtësuar krizën humanitare në Gazë do të ishte arritja e një armëpushimi.
Ai gjithashtu tha se Uashingtoni vazhdon përpjekjet për të parandaluar zgjerimin e luftës në Gazë.
Blinken mbërriti në Arabinë Saudite të hënën, në ndalesën e parë të një udhëtimi më të gjerë në Lindjen e Mesme për të diskutuar disa çështje, përfshirë qeverisjen e Gazës pasi të përfundojë lufta me Izraelin.
Diplomati i lartë amerikan do të shkojë në Izrael në fund të kësaj jave, ku ai pritet të bëjë presion ndaj kryeministrit izraelit, Benjamin Netanyahu, për të ndërmarrë hapat konkret që presidenti i Shteteve të Bashkuara, Joe Biden kërkoi këtë muaj për të përmirësuar situatën e rëndë humanitare në Gazë.
Në Riad, Blinken pritet të takohet me liderë të lartë sauditë dhe të zhvillojë një takim më të gjerë me homologët e pesë shteteve arabe - Katari, Egjipti, Arabia Saudite, Emiratet e Bashkuara Arabe dhe Jordania - për të çuar më tej diskutimet mbi atë se si do të dukej qeverisja e Rripit të Gazës pas luftës, tha një zyrtar i lartë i Departamentit të Shtetit.
Blinken pritet gjithashtu të bashkojë vendet arabe me shtetet evropiane dhe të diskutojë se si Evropa mund të ndihmojë përpjekjet e rindërtimit të enklavës së vogël, e cila është kthyer në një shkretëtirë në bombardimet gjashtëmujore izraelite.
Luftëtarët islamikë të grupit militant palestinez Hamas – grupit të shpallur organizatë terroriste nga SHBA dhe BE, sulmuan Izraelin më 7 tetor, duke vrarë 1.200 njerëz dhe duke rrëmbyer 253 pengje, sipas të dhënave izraelite.
Izraeli vendosi pastaj një rrethim total në Gazë dhe nisi një sulm ajror dhe tokësor që ka vrarë më shumë se 34.000 palestinezë, sipas autoriteteve shëndetësore në Gazën e kontrolluar nga Hamasi.
Bisedimet mbi rindërtimin dhe qeverisjen e Gazës kanë vazhduar për muaj të tërë me një mekanizëm të qartë që ende nuk është shfaqur.
Shtetet e Bashkuara pajtohen me objektivin e Izraelit që Hamasi duhet të çrrënjoset dhe se nuk mund të luajë më rol në të ardhmen e Gazës, por Uashingtoni nuk dëshiron që Izraeli të ripushtojë Rripin.
Në vend të kësaj, është parë një strukturë që do të përfshijë një Autoritet Palestinez të reformuar me mbështetjen e shteteve arabe.
Blinken do të diskutojë gjithashtu me autoritetet saudite përpjekjet për një marrëveshje normalizimi midis mbretërisë dhe Izraelit.
Në këmbim të normalizimit, shtetet arabe dhe Uashingtoni shtyjnë Izraelin të pajtohet me një rrugë për shtetësinë palestineze, diçka që Netanyahu e ka refuzuar vazhdimisht.
Nga Riadi, Blinken do të shkojë në Jordani dhe Izrael ku fokusi i udhëtimit do të zhvendoset në përpjekjet për të përmirësuar situatën e rëndë humanitare në Gaza.
Në Aman, Blinken do të takohet me zyrtarë të lartë jordanezë dhe grupe humanitare për të dëgjuar për përmirësimet, çfarë duhet bërë më shumë dhe më pas do t'ua dërgojë këtë reagim izraelitëve, më vonë këtë javë.
Udhëtimi i Blinkenit për të kontrolluar ndihmën humanitare vjen rreth një muaj pasi presidenti Biden lëshoi një paralajmërim të ashpër ndaj Netanyahut, duke thënë se politika e Uashingtonit mund të ndryshojë nëse Izraeli nuk merr hapa për të trajtuar dëmtimin e civilëve, vuajtjet humanitare dhe sigurinë e punonjësve të ndihmës.
Zyrtarët e lartë amerikanë në javët e fundit kanë mirëpritur hapat e Izraelit për të përmirësuar situatën humanitare, por vazhdimisht kanë thënë se duhet bërë më shumë.
Sipas një deklarate të Shtëpisë së Bardhë, në një telefonatë të dielën me Netanyahun, Biden përmendi përgatitjet izraelite për të hapur këtë javë pika të reja kufitare në veri të Gazës ku rreziku i urisë mbetet i lartë.
