Ministri në detyrë i Shëndetësisë në Kosovës, Arben Vitia, ka bërë të ditur se rastet me koronavirus që po paraqiten në spitale, janë gjithnjë e më të rënda.
Përmes një postimi në rrjetin social Facebook, Vitia bën thirrje për respektim të masave kundër përhapjes së koronavirusit.
"Rastet që po vijnë në spital janë gjithnjë e më të rënda. Ndaj duhet të mendojmë parandalimin me çdo kusht. Me çdo kusht. Masat, edhe pse duken se janë strikte ato kanë vetëm një qëllim: mos ta lejojmë shndërrimin e njeriut në shifër. Ne jemi një vend e një Republikë. Këtu njerëzit janë të gjithë tanët", thotë ministri Vitia.
Gjatë ditës së enjte në Kosovë u raportua për dy vdekje si pasojë e sëmundjes COVID-19.
Deri më tani Kosova ka 423 raste të konfirmuara me koronavirus; 11 pacientë kanë vdekur, ndërsa 74 janë shëruar.
Qendra Klinike Universitare e Kosovës, njoftoi të enjten se në Klinikën Infektive janë duke u trajtuar 63 pacientë të prekur nga koronavirusi.
