Zyrtarë të Lëvizjes Vetëvendosje dhe Lidhjes Demokratike të Kosovës thanë se janë pajtuar për 100 për qind të programit qeverisës dhe se marrëveshja finale për koalicionin e qeverisjes në Kosovë pritet të nënshkruhet në fillim të javës së ardhshme nga liderët e dy partive, Albin Kurti dhe Isa Mustafa.
Albulena Haxhiu, pjesë e grupit punes të Lëvizjes Vetëvendosje, tha pas takimit me zyrtarë të LDK-së se drafti i programit qeverisës do të bëhet publik shumë shpejt.
Edhe Lutfi Haziri, nga Lidhja Demokratike Kosovës, i konfirmoi pajtimet rreth programit.
Takimi i grupeve punuese të të dyja partive u mbajt pas takimit të së enjtes midis kryetarit të Lëvizjes Vetëvendosje, Albin Kurti, dhe atij të Lidhjes Demokratike të Kosovës, Isa Mustafa, në përpjekje për arritjen e një marrëveshjeje për bashkëqeverisje.
Këto zhvillime vijnë pas certifikimit të rezultatit të zgjedhjeve parlamentare të 6 tetorit, që u bë të mërkurën.
Në këto zgjedhje, Lëvizja Vetëvendosje ka dalë partia e parë, e pasuar nga Lidhja Demokratike e Kosovës.
