Në Zyrën e Auditimit të Kosovës, prej sot ka nisur të funksionojë njësia e re për luftimin e mashtrimeve.
Ambasadori i Shteteve të Bashkuara në Prishtinë, Philip Kosnett, që ishte i pranishëm në këtë ngjarje, tha se është i lumtur për nisjen e punës së kësaj njësie të re.
“Kjo njësi, është dëshmia më e mirë se si drejtësia dhe prosperiteti janë të ndërthurura”, tha ambasadori Kosnett.
Ambasadori Kosnett tha se qytetarët e Kosovës meritojnë transparencë dhe llogaridhënie nga udhëheqësit dhe institucionet e vendit.
“Me themelimin e njësisë kundër mashtrimit, Zyra e Auditimit po dërgon një mesazh se nuk do të zmbrapset, por e kundërta, po bën hapa para për të ekspozuar korrupsionin dhe mashtrimin. Qytetarët e Kosovës meritojnë udhëheqës dhe institucione që tregojnë transparencë dhe llogaridhënie”, tha ambasadori Kosnett.
Ndërkaq, Auditori i Përgjithshëm i Kosovës, Besnik Osmani tha se me ndihmën e USAID-it, janë trajnuar gjithsej 60 auditorë të cilët do të punojnë në këtë njësi të re për luftimin e mashtrimeve.
