Kryetari i Kuvendit të Kosovës, Kadri Veseli, tha se më 14 dhjetor, Kosova do ta ketë zyrtarisht ushtrinë e saj.
"Kjo është data kur në Kuvendin e Kosovës do t’i votojmë projektligjet që e transformojnë FSK-në në ushtri", shkroi Veseli në Facebook.
Projektligjet, të cilat i hapin rrugë transformimit të Forcës së Sigurisë së Kosovës në forcë me kapacitete ushtarake, janë miratuar në parim në Kuvendin e Kosovës në tetor.
Ato përfshijnë projektligjin për Ministrinë e Mbrojtjes, atë për Forcën e Sigurisë së Kosovës dhe Projektligjin për Shërbim në Forcën e Sigurisë së Kosovës.
Është thënë më herët se ato do të procedohen për dëgjim të dytë në Kuvend, gjatë muajit dhjetor.
