Prokuroria Speciale e Republikës së Kosovës ka njoftuar përmes një komunikate për media se sot “ka ngritur aktakuzë, të cilën e ka dërguar në Gjykatën Themelore në Prishtinë, kundër 12 të pandehurve, për lëndën e njohur në opinion si 'Veteranët', në drejtim të veprës penale keqpërdorim i pozitës apo autoritetit zyrtar”.
Në aktakuzë është propozuar që “gjykata të lëshojë masën për ndalimin e pagesës së pensioneve të fituara në mënyrë të kundërligjshme si veteranë luftëtarë të Ushtrisë Çlirimtare të Kosovës, deri në përfundimin e procedurës penale”.
“Nga provat e siguruara deri më tani është vërtetuar se nga pagesat e kundërligjshme për veteranët luftëtarë të UÇK-së, buxheti i Republikës së Kosovës është dëmtuar në shumën prej 68.153.533.14 euro”, thuhet në komunikatën e Prokurorisë Speciale.
Kryeprokurori i shtetit, Aleksander Lumezi, i ka thënë agjencisë së lajmeve Reuters se Agim Çeku, zëvendësministër i Forcës së Sigurisë së Kosovës, dhe shefi i tij, ministri Rrustem Berisha, janë dy nga të akuzuarit.
Çeku ka qenë kryeministër i Kosovës nga viti 2006 deri në vitin 2008, si dhe kryesues i Komisionit për verifikim të veteranëve.
