Presidenti rus, Vladimir Putin ka arritur në Krime më 14 mars, katër ditë para mbajtjes së zgjedhjeve presidenciale në Rusi.
Ai pritet të jetë pjesë e disa organizimeve për të shënuar përvjetorin e katërt të mbajtjes së referendumit në Krime, i cili është përdorur nga Moska vetëm si justifikim për të aneksuar rajonin e Ukrainës.
Para se të arrinte në Krime, Putin ka vizituar punimet në ndërtimet e urës, që pritet të lidhë Gadishullin e aneksuar me disa territore ruse.
Punimet për ndërtimin e kësaj ure patën nisur më 2016.
Zëdhënësi i Kremlinit, Dmitry Peskov, ka thënë më herët se vizita e Putinit në Krime do të jetë ngjarja kryesore në fushatën e tij para votimeve të 18 marsit.
Duke reaguar në vizitën e Putinit, presidenti ukrainas, Petro Poroshenko ka thënë se ky hap ka qenë “provokim jashtëzakonisht i rrezikshëm”, dhe i ka bërë thirrje Bashkimit Evropian për të vendosur sanksione kundër, “atyre që zhvillojnë takime për fushatën zgjedhore të Rusisë në territorin ukrainas”.
Qeveria e Putinit ka aneksuar Krimenë në mars të vitit 2014, pasi miku i Moskës, presidenti i atëhershëm i Ukrainës, Viktor Yanukovych, është larguar nga shteti pas protestave në rrugë, në të cilat kërkohej qeveri pro-Perëndimore.
