Nuk duhet të lejohet fillimi i ndonjë lufte eventuale në Gadishullin Korean dhe çështja duhet të zgjidhet përmes bisedimeve, ka thënë presidenti kinez, Xi Jinping, derisa Sekretari i Përgjithshëm i Kombeve të Bashkuara, Antonio Guterres, ka paralajmëruar për rrezikun e një hyrje të “përgjumur” në konflikt.
Xi i ka bërë këto komente gjatë një vizite me presidentin jugkorean, Moon Jae-in vetëm disa ditë pasi Sekretari amerikan i Shtetit, Rex Tillerson ka përmendur mundësinë e bisedimeve direkte me Korenë Veriore pa kushte paraprake.
Mirëpo Shtëpia e Bardhë ka thënë të mërkuren se nuk mund të mbahen diskutime, derisa Koreja Veriore të ketë një qasje të tillë.
Presidenti rus, Vladimir Putin, ka thënë se oferta e Tillersonit për bisedime ka qenë “një shenjë shumë e mirë”, derisa ka përmendur se ndonjë goditje e SHBA-së në Korenë Jugore do të kishte pasoja katastrofale.
Koreja Veriore e ka testuar një raketë balistike ndërkontinentale më 29 nëntor, e cila është thënë se ka kapacitet të arrijë në çdo pjesë të tokës amerikane.
Ndonëse Koreja Jugore dhe Kina kanë qëllim të përbashkët që ta bindin Korenë Veriore për ndaljen e testimeve të tilla dhe programit bërthamor, asnjëra nga vendet nuk ka ndonjë plan se si të arrihet një gjë e tillë.
