Demokratët në Kongresin e Shteteve të Bashkuara i bënë thirrje Shtëpisë së Bardhë që të lejojë pa ndërhyrje këshilltarin e posaçëm, Robert Mueller, të hetojë ndërhyrjen e Rusisë në zgjedhjet presidenciale në SHBA, vitin e kaluar.
Të hënën, Paul Manafort, ish-udhëheqës i fushatës së presidentit amerikan, Donald Trump, dhe një bashkëpunëtor i tij u akuzuan për komplot për të mashtruar SHBA-në në marrëveshjet e tyre me Ukrainën.
“Sundimi i ligjit është i rëndësishëm në Amerikë dhe hetimet duhet të lejohen të vazhdojnë pa pengesa. Presidenti nuk duhet, në asnjë rrethanë, të ndërhyjë në punën e këshilltarit të posaçëm”, tha udhëheqësi demokrat i Senatit, Chuck Schumer.
Senatorja demokrate në Komitetin për Gjyqësi, Dianne Feinstein, tha se çdo veprim i Trumpit për të shkarkuar Muellerin do të shkaktonte “shpërthim të fuqishëm”.
Trump i ka cilësuar hetimet e Muellerit si “gjueti shtrigash” dhe i ka kundërshtuar akuzat e djeshme, por Shtëpia e Bardhë tha se presidenti nuk planifikon ta shkarkojë këshilltarin e posaçëm.
Lexoni edhe këtë:
Hetimi i çështjes ruse: Manafort dhe Gates deklarohen të pafajshëm
