Kuvendi në nyje

Kryesuesi e mbyllë seancën

Kryesuesi i seancës, Adem Mikullovci ka thënë se "e mbyllë mbledhjen" konstituive, ndonëse aty nuk u zgjodh kryetari i Kuvendit, si vendim i domosdoshëm për konstituimin e këtij institucioni.

Mikullovci i kërkoi koalicionit PAN që të propozojë kryetarin e Kuvendit, por PAN nuk e propozoi. Në ato momente, Mikullovci tha se e mbyllë seancën.

Duke u larguar nga salla, deputeti i PDK-së dhe PAN-it, Enver Hoxhaj tha se seanca është mbyllur dhe se tani i mbetet kryesisë së vjetër që ta thërras seancën e re.

Imer Mushkolaj: Seanca e parë e Kuvendit reflektoi krizë

“Fillimi i punës së legjislaturës së re të Kuvendit të Kosovës u karakterizua edhe me fillimin e një krize, në kuptim e asaj se ishin dy muaj kohë dhe koalicioni fitues i zgjedhjeve PAN nuk i ka numrat për të zgjedhur kryetarin, dhe rrjedhimisht për t’i hapur rrugë edhe krijimit të Qeverisë”, ka thënë analisti politik, Imer Mushkolaj.

“Nëse nuk gjendet një zgjidhje që të votohet kandidati për kryetar të Kuvendit të Kosovës nga koalicioni PAN, dhe t’i hapet rrugë zgjedhjes së Qeverisë, zgjedhjet janë të pashmangshme”, ka thënë Mushkolaj.

Seanca vazhdon nga ora 15:00

Seanca konstituive e Kuvendit të Kosovës pritet të vazhdojë rreth orës 15:00. Kuvendi i Kosovës, në faqen zyrtare ka publikuar tashmë njoftimin për vazhdimin e seancës.

Pika e vetme e mbetur e kësaj seance është zgjedhja e kryetarit të Kuvendit.

Seanca i vazhdon punimet, pa PAN-in

Seanca konstituive po i vazhdon punimet, por pa subjektin fitues të zgjedhjeve, koalicionin PAN (PDK, AAK dhe Nisma)

Deputetët e koalicionit PAN nuk janë paraqitur ende në sallën e Kuvendit të Kosovës, ku ishte paraparë që nga ora 15:00 të vazhdonte seanca konstituive.

Njëri nga deputetët e këtij koalicioni, Milaim Zeka nga Nisma për Kosovën tha se deputetët e PAN-it nuk do të vijnë në vazhdimin e seancës.