Deputetët hyjnë në sallë, të pranishëm edhe diplomatët ndërkombëtarë
Deputetët e Kuvendit të Kosovës tashmë kanë filluar të zënë vendet e tyre në sallën ku do të mbahet mbledhja konstituive.
Në pjesën për mysafirë dhe vëzhgues, janë të pranishëm dhe përfaqësuesit e korit diplomatik në Kosovë.
Adem Mikullovci drejton seancën konstituive
Mbledhjen Konstituive të Kuvendit të Kosovës pritet ta drejtojë deputeti më i vjetër me moshë, Adem Mikullovci, i shoqëruar nga deputeti më i ri në moshë.
Deputeti Mikullovci vjen nga radhët e Lëvizjes Vetëvendosje dhe drejtimin e seancës konstituive do ta bëj deri në zgjedhjen e kryetarit të ri të Kuvendit.
PAN nuk ka hyrë ende në sallë
Deputetët e koalicionit PAN (PDK, AAK dhe Nisma) nuk kanë hyrë ende në sallën e Kuvendit. Kryesuesi i seancës, deputeti më i vjetër nga radhët e Lëvizjes Vetëvendosje, Adem Mikullovci ka kërkuar nga administrata e Kuvendit që të kontaktoj këtë koalicion.
“Është korrekte t’i presim edhe pesë minuta”, ka thënë Mikullovci.
Deputetët e PAN-it, sipas njoftimeve nga ky grup, janë duke zhvilluar konsultimet e nevojshme para seancës.
Pjesa e parë e seancës zhvillohet pa PAN-in
Seanca konstituive e Kuvendit të Kosovës ka filluar punën pa deputetët e koalicionit PAN, të cilët nuk janë paraqitur në sallë.
Kryesuesi i seancës, deputeti Adem Mikullovci tha se në sallë janë 73 deputetë. Ai ka proceduar me pikën e parë, formimin e komisionit për verifikimin e kuorumit dhe mandateve.
Pas formimit të komisionit, Mikullovci ka shpallur pauzë.
Facebook Forum