Daka: Procesi zgjedhor po ecën në rregull
Kryetarja e Komisionit Qendror të Zgjedhjeve KQZ-së, Valdete Daka në konferencën e parë për media, ka bërë të ditur se janë hapur të gjitha vendvotimet në Republikën e Kosovës.
Ajo u bëri thirrje të gjithë qytetarëve me të drejtë vote që të shfrytëzojnë të drejtën e tyre.
Hoti: Procesi zgjedhor në komunat në veri, pa ndonjë problem
Policia e Kosovës njofton se procesi zgjedhor në katër komunat veriore të Kosovës po zhvillohet pa ndonjë problem eventual në aspektin e sigurisë.
Besim Hoti, zëvendëskomandant i Policisë së Kosovës për veriun e vendit, tha për Radion Evropa e Lirë se “deri më tani në aspektin e sigurisë në këtë pjesë gjithçka është në rregull”.
Shtatë qendra të votimit në veri të Mitrovicës janë hapur që nga ora 07:00.
Haradinaj: Vota e qytetarëve ka peshën e katër viteve
Ramush Haradinaj, kandidat për kryeministër, i nominuar nga koalicioni i Partisë Demokratike të Kosovës, Aleancës për Ardhmërinë e Kosovës dhe Nismës për Kosovën, ka votuar.
“I bëj thirrje qytetarëve të Kosovës të votojnë, vota ka rëndësi. Ky vendim i sotëm e ka peshën e vet katër vite, dhe qytetarët ta shfrytëzojnë të drejtën e tyre dhe të votojnë”, ka thënë Haradinaj.
Apostolova: Votoni, sepse sot vendoset se kush do ta udhëheqë Kosovën
Përfaqësuesja e Bashkimit Evropian në Kosovë, Nataliya Apostolova ka vizituar disa qendra votimi. Ajo ka thënë se 11 qeshori është ditë shumë e rëndësishme për Kosovën.
“Shpresojmë që njerëzit do të dalin dhe të votojnë. Është një përgjegjësi e madhe që kanë, sepse ata sot vendosin se kush do t’i udhëheqë”, ka thënë Apostolova.
Zyrtarja e BE-së i ka dëshiruar Kosovës një proces të suksesshëm zgjedhor.
Facebook Forum